၁၀. သီလဝန္တသုတ္တဝဏ္ဏနာ

၁၂၂. ဒသမေ အနိစ္စတောတိအာဒီသု ဟုတွာ အဘာဝါကာရေန အနိစ္စတော၊ ပဋိပီဠနာကာရေန ဒုက္ခတော၊ အာဗာဓဋ္ဌေန ရောဂတော၊ အန္တောဒေါသဋ္ဌေန ဂဏ္ဍတော၊ တေသံ တေသံ ဂဏ္ဍာနံ ပစ္စယဘာဝေန ဝါ ခဏနဋ္ဌေန ဝါ သလ္လတော ဒုက္ခဋ္ဌေန အဃတော၊ ဝိသဘာဂမဟာဘူတသမုဋ္ဌာနအာဗာဓပစ္စယဋ္ဌေန အာဗာဓတော၊ အသကဋ္ဌေန ပရတော၊ ပလုဇ္ဇနဋ္ဌေန ပလောကတော၊ သတ္တသုညတဋ္ဌေန သုညတော၊ အတ္တာဘာဝေန အနတ္တတော. ဧဝမေတ္ထ ‘‘အနိစ္စတော ပလောကတော’’တိ ဒွီဟိ ပဒေဟိ အနိစ္စမနသိကာရော၊ ‘‘သုညတော အနတ္တတော’’တိ ဒွီဟိ အနတ္တမနသိကာရော၊ သေသေဟိ ဒုက္ခမနသိကာရော ဝုတ္တောတိ ဝေဒိတဗ္ဗော. သေသမေတ္ထ ဥတ္တာနမေဝ. ဒသမံ.