၁၂. ဓမ္မကထိကဝဂ္ဂေါ

၁-၂. အဝိဇ္ဇာသုတ္တာဒိဝဏ္ဏနာ

၁၁၃-၁၁၄. ဓမ္မကထိကဝဂ္ဂဿ ပဌမေ ဧတ္တာဝတာ စ အဝိဇ္ဇာဂတော ဟောတီတိ ယာဝတာ ဣမာယ စတူသု သစ္စေသု အညာဏဘူတာယ အဝိဇ္ဇာယ သမန္နာဂတော၊ ဧတ္တာဝတာ အဝိဇ္ဇာဂတော ဟောတီတိ အတ္ထော. ဒုတိယေပိ ဧသေဝ နယော. ပဌမဒုတိယာနိ.

၃. ဓမ္မကထိကသုတ္တဝဏ္ဏနာ

၁၁၅. တတိယေ ပဌမေန ဓမ္မကထိကော၊ ဒုတိယေန သေခဘူမိ၊ တတိယေန အသေခဘူမီတိ ဧဝံ ဓမ္မကထိကံ ပုစ္ဆိတေန ဝိသေသေတွာ ဒွေ ဘူမိယော ကထိတာ. တတိယံ.

၄. ဒုတိယဓမ္မကထိကသုတ္တဝဏ္ဏနာ

၁၁၆. စတုတ္ထေ တိဿန္နမ္ပိ ပုစ္ဆာနံ တီဏိ ဝိဿဇ္ဇနာနိ ကထိတာနိ. စတုတ္ထံ.

၅-၉. ဗန္ဓနသုတ္တာဒိဝဏ္ဏနာ

၁၁၇-၁၂၁. ပဉ္စမေ အတီရဒဿီတိ တီရံ ဝုစ္စတိ ဝဋ္ဋံ၊ တံ န ပဿတိ. အပါရဒဿီတိ ပါရံ ဝုစ္စတိ နိဗ္ဗာနံ၊ တံ န ပဿတိ. ဗဒ္ဓေါတိ ကိလေသဗန္ဓနေန ဗဒ္ဓေါ ဟုတွာ ဇီယတိ စ မီယတိ စ အသ္မာ လောကာ ပရံ လောကံ ဂစ္ဆတီတိ. ဣမသ္မိံ သုတ္တေ ဝဋ္ဋဒုက္ခံ ကထိတန္တိ. ဆဋ္ဌာဒီနိ ဥတ္တာနတ္ထာနေဝ. ပဉ္စမာဒီနိ.

၁၀. သီလဝန္တသုတ္တဝဏ္ဏနာ

၁၂၂. ဒသမေ အနိစ္စတောတိအာဒီသု ဟုတွာ အဘာဝါကာရေန အနိစ္စတော၊ ပဋိပီဠနာကာရေန ဒုက္ခတော၊ အာဗာဓဋ္ဌေန ရောဂတော၊ အန္တောဒေါသဋ္ဌေန ဂဏ္ဍတော၊ တေသံ တေသံ ဂဏ္ဍာနံ ပစ္စယဘာဝေန ဝါ ခဏနဋ္ဌေန ဝါ သလ္လတော ဒုက္ခဋ္ဌေန အဃတော၊ ဝိသဘာဂမဟာဘူတသမုဋ္ဌာနအာဗာဓပစ္စယဋ္ဌေန အာဗာဓတော၊ အသကဋ္ဌေန ပရတော၊ ပလုဇ္ဇနဋ္ဌေန ပလောကတော၊ သတ္တသုညတဋ္ဌေန သုညတော၊ အတ္တာဘာဝေန အနတ္တတော. ဧဝမေတ္ထ ‘‘အနိစ္စတော ပလောကတော’’တိ ဒွီဟိ ပဒေဟိ အနိစ္စမနသိကာရော၊ ‘‘သုညတော အနတ္တတော’’တိ ဒွီဟိ အနတ္တမနသိကာရော၊ သေသေဟိ ဒုက္ခမနသိကာရော ဝုတ္တောတိ ဝေဒိတဗ္ဗော. သေသမေတ္ထ ဥတ္တာနမေဝ. ဒသမံ.

၁၁. သုတဝန္တသုတ္တဝဏ္ဏနာ

၁၂၃. တထာ ဧကာဒသမေ. ဒသမသ္မိဉှိ ‘‘သီလဝတာ’’တိ စတုပါရိသုဒ္ဓိသီလံ ဝုတ္တံ၊ ဣဓ သုတဝတာတိ ကမ္မဋ္ဌာနသုတံ ဣဒမေဝ နာနာကရဏံ. ဧကာဒသမံ.

၁၂-၁၃. ကပ္ပသုတ္တာဒိဝဏ္ဏနာ

၁၂၄-၁၂၅. ဒွါဒသမတေရသမာနိ ရာဟုလောဝါဒသဒိသာနေဝါတိ. ဒွါဒသမတေရသမာနိ.

ဓမ္မကထိကဝဂ္ဂေါ ဒွါဒသမော.