၅. အရဟန္တသုတ္တဝဏ္ဏနာ

၂၅. ပဉ္စမေ ကတာဝီတိ စတူဟိ မဂ္ဂေဟိ ကတကိစ္စော. အဟံ ဝဒါမီတိ အယံ ဒေဝတာ ဝနသဏ္ဍဝါသိနီ၊ သာ အာရညကာနံ ဘိက္ခူနံ ‘‘အဟံ ဘုဉ္ဇာမိ၊ အဟံ နိသီဒါမိ၊ မမ ပတ္တော၊ မမ စီဝရ’’န္တိအာဒိကထာဝေါဟာရံ သုတွာ စိန္တေသိ – ‘‘အဟံ ဣမေ ဘိက္ခူ ‘ခီဏာသဝါ’တိ မညာမိ၊ ခီဏာသဝါနဉ္စ နာမ ဧဝရူပါ အတ္တုပလဒ္ဓိနိဿိတကထာ ဟောတိ၊ န ဟောတိ နု ခေါ’’တိ ဇာနနတ္ထံ ဧဝံ ပုစ္ဆတိ.

သာမညန္တိ လောကနိရုတ္တိံ လောကဝေါဟာရံ. ကုသလောတိ ခန္ဓာဒီသု ကုသလော. ဝေါဟာရမတ္တေနာတိ ဥပလဒ္ဓိနိဿိတကထံ ဟိတွာ ဝေါဟာရဘေဒံ အကရောန္တော ‘‘အဟံ၊ မမာ’’တိ ဝဒေယျ. ‘‘ခန္ဓာ ဘုဉ္ဇန္တိ၊ ခန္ဓာ နိသီဒန္တိ၊ ခန္ဓာနံ ပတ္တော၊ ခန္ဓာနံ စီဝရ’’န္တိ ဟိ ဝုတ္တေ ဝေါဟာရဘေဒေါ ဟောတိ၊ န ကောစိ ဇာနာတိ. တသ္မာ ဧဝံ အဝတွာ လောကဝေါဟာရေန ဝေါဟရတီတိ.

အထ ဒေဝတာ – ‘‘ယဒိ ဒိဋ္ဌိယာ ဝသေန န ဝဒတိ၊ မာနဝသေန နု ခေါ ဝဒတီ’’တိ စိန္တေတွာ ပုန ယော ဟောတီတိ ပုစ္ဆိ. တတ္ထ မာနံ နု ခေါတိ သော ဘိက္ခု မာနံ ဥပဂန္တွာ မာနဝသေန ဝဒေယျ နု ခေါတိ. အထ ဘဂဝါ – ‘‘အယံ ဒေဝတာ ခီဏာသဝံ သမာနံ ဝိယ ကရောတီ’’တိ စိန္တေတွာ၊ ‘‘ခီဏာသဝဿ နဝဝိဓောပိ မာနော ပဟီနော’’တိ ဒဿေန္တော ပဋိဂါထံ အာဟ. တတ္ထ ဝိဓူပိတာတိ ဝိဓမိတာ. မာနဂန္ထဿာတိ မာနာ စ ဂန္ထာ စ အဿ. မညတန္တိ မညနံ. တိဝိဓမ္ပိ တဏှာ-ဒိဋ္ဌိ-မာန-မညနံ သော ဝီတိဝတ္တော၊ အတိက္ကန္တောတိ အတ္ထော. သေသံ ဥတ္တာနတ္ထမေဝါတိ. ပဉ္စမံ.