၃. သတ္တိဝဂ္ဂေါ

၁. သတ္တိသုတ္တဝဏ္ဏနာ

၂၁. သတ္တိဝဂ္ဂဿ ပဌမေ သတ္တိယာတိ ဒေသနာသီသမေတံ. ဧကတောခါရာဒိနာ သတ္ထေနာတိ အတ္ထော. ဩမဋ္ဌောတိ ပဟတော. စတ္တာရော ဟိ ပဟာရာ ဩမဋ္ဌော ဥမ္မဋ္ဌော မဋ္ဌော ဝိမဋ္ဌောတိ. တတ္ထ ဥပရိ ဌတွာ အဓောမုခံ ဒိန္နပဟာရော ဩမဋ္ဌော နာမ၊ ဟေဋ္ဌာ ဌတွာ ဥဒ္ဓံမုခံ ဒိန္နော ဥမ္မဋ္ဌော နာမ၊ အဂ္ဂဠသူစိ ဝိယ ဝိနိဝိဇ္ဈိတွာ ဂတော မဋ္ဌော နာမ၊ သေသော သဗ္ဗောပိ ဝိမဋ္ဌော နာမ. ဣမသ္မိံ ပန ဌာနေ ဩမဋ္ဌော ဂဟိတော. သော ဟိ သဗ္ဗဒါရုဏော ဒုရုဒ္ဓရသလ္လော ဒုတ္တိကိစ္ဆော အန္တောဒေါသော အန္တောပုဗ္ဗလောဟိတောဝ ဟောတိ၊ ပုဗ္ဗလောဟိတံ အနိက္ခမိတွာ ဝဏမုခံ ပရိယောနန္ဓိတွာ တိဋ္ဌတိ. ပုဗ္ဗလောဟိတံ နိဟရိတုကာမေဟိ မဉ္စေန သဒ္ဓိံ ဗန္ဓိတွာ အဓောသိရော ကာတဗ္ဗော ဟောတိ၊ မရဏံ ဝါ မရဏမတ္တံ ဝါ ဒုက္ခံ ပါပုဏာတိ. ပရိဗ္ဗဇေတိ ဝိဟရေယျ.

ဣမာယ ဂါထာယ ကိံ ကထေတိ? ယထာ သတ္တိယာ ဩမဋ္ဌော ပုရိသော သလ္လုဗ္ဗဟန-ဝဏတိကိစ္ဆနာနံ အတ္ထာယ ဝီရိယံ အာရဘတိ၊ ပယောဂံ ကရောတိ ပရက္ကမတိ. ယထာ စ ဍယှမာနော မတ္ထကေ အာဒိတ္တသီသော တဿ နိဗ္ဗာပနတ္ထာယ ဝီရိယံ အာရဘတိ၊ ပယောဂံ ကရောတိ ပရက္ကမတိ၊ ဧဝမေဝ ဘိက္ခု ကာမရာဂံ ပဟာနာယ သတော အပ္ပမတ္တော ဟုတွာ ဝိဟရေယျ ဘဂဝါတိ ကထေသိ.

အထ ဘဂဝါ စိန္တေသိ – ဣမာယ ဒေဝတာယ ဥပမာ တာဝ ဒဠှံ ကတွာ အာနီတာ၊ အတ္ထံ ပန ပရိတ္တကံ ဂဟေတွာ ဌိတာ၊ ပုနပ္ပုနံ ကထေန္တီပိ ဟေသာ ကာမရာဂဿ ဝိက္ခမ္ဘနပဟာနမေဝ ကထေယျ. ယာဝ စ ကာမရာဂေါ မဂ္ဂေန န သမုဂ္ဃါဋိယတိ၊ တာဝ အနုဗဒ္ဓေါဝ ဟောတိ. ဣတိ တမေဝ ဩပမ္မံ ဂဟေတွာ ပဌမမဂ္ဂဝသေန ဒေသနံ ဝိနိဝဋ္ဋေတွာ ဒေသေန္တော ဒုတိယံ ဂါထမာဟ. တဿတ္ထော ပုရိမာနုသာရေနေဝ ဝေဒိတဗ္ဗောတိ. ပဌမံ.

၂. ဖုသတိသုတ္တဝဏ္ဏနာ

၂၂. ဒုတိယေ နာဖုသန္တံ ဖုသတီတိ ကမ္မံ အဖုသန္တံ ဝိပါကော န ဖုသတိ၊ ကမ္မမေဝ ဝါ အဖုသန္တံ ကမ္မံ န ဖုသတိ. ကမ္မဉှိ နာကရောတော ကရိယတိ. ဖုသန္တဉ္စ တတော ဖုသေတိ ကမ္မံ ဖုသန္တံ ဝိပါကော ဖုသတိ၊ ကမ္မမေဝ ဝါ ဖုသတိ. ကမ္မဉှိ ကရောတော ကရိယတိ. တသ္မာ ဖုသန္တံ ဖုသတိ၊ အပ္ပဒုဋ္ဌပဒေါသိနန္တိ ယသ္မာ န အဖုသန္တံ ဖုသတိ၊ ဖုသန္တဉ္စ ဖုသတိ၊ အယံ ကမ္မဝိပါကာနံ ဓမ္မတာ၊ တသ္မာ ယော ‘‘အပ္ပဒုဋ္ဌဿ နရဿ ဒုဿတိ၊ သုဒ္ဓဿ ပေါသဿ အနင်္ဂဏဿာ’’တိ ဧဝံ ဝုတ္တော အပ္ပဒုဋ္ဌပဒေါသီ ပုဂ္ဂလော၊ တံ ပုဂ္ဂလံ ကမ္မံ ဖုသန္တမေဝ ကမ္မံ ဖုသတိ၊ ဝိပါကော ဝါ ဖုသတိ. သော ဟိ ပရဿ ဥပဃာတံ ကာတုံ သက္ကောတိ ဝါ မာ ဝါ၊ အတ္တာ ပနာနေန စတူသု အပါယေသု ဌပိတော နာမ ဟောတိ. တေနာဟ ဘဂဝါ – ‘‘တမေဝ ဗာလံ ပစ္စေတိ ပါပံ၊ သုခုမော ရဇော ပဋိဝါတံဝ ခိတ္တော’’တိ. ဒုတိယံ.

၃. ဇဋာသုတ္တဝဏ္ဏနာ

၂၃. တတိယေ အန္တောဇဋာတိ ဂါထာယံ ဇဋာတိ တဏှာယ ဇာလိနိယာ အဓိဝစနံ. သာ ဟိ ရူပါဒီသု အာရမ္မဏေသု ဟေဋ္ဌုပရိယဝသေန ပုနပ္ပုနံ ဥပ္ပဇ္ဇနတော သံသိဗ္ဗနဋ္ဌေန ဝေဠုဂုမ္ဗာဒီနံ သာခါဇာလသင်္ခါတာ ဇဋာ ဝိယာတိ ဇဋာ. သာ ပနေသာ သကပရိက္ခာရပရပရိက္ခာရေသု သကအတ္တဘာဝ-ပရအတ္တဘာဝေသု အဇ္ဈတ္တိကာယတန-ဗာဟိရာယတနေသု စ ဥပ္ပဇ္ဇနတော အန္တောဇဋာ ဗဟိဇဋာတိ ဝုစ္စတိ. တာယ ဧဝံ ဥပ္ပဇ္ဇမာနာယ ဇဋာယ ဇဋိတာ ပဇာ. ယထာ နာမ ဝေဠုဇဋာဒီဟိ ဝေဠုအာဒယော၊ ဧဝံ တာယ တဏှာဇဋာယ သဗ္ဗာပိ အယံ သတ္တနိကာယသင်္ခါတာ ပဇာ ဇဋိတာ ဝိနဒ္ဓါ၊ သံသိဗ္ဗိတာတိ အတ္ထော. ယသ္မာ စ ဧဝံ ဇဋိတာ၊ တံ တံ ဂေါတမ ပုစ္ဆာမီတိ တသ္မာ တံ ပုစ္ဆာမိ. ဂေါတမာတိ ဘဂဝန္တံ ဂေါတ္တေန အာလပတိ. ကော ဣမံ ဝိဇဋယေ ဇဋန္တိ ဣမံ ဧဝံ တေဓာတုကံ ဇဋေတွာ ဌိတံ ဇဋံ ကော ဝိဇဋေယျ၊ ဝိဇဋေတုံ ကော သမတ္ထောတိ ပုစ္ဆတိ.

အထဿ ဘဂဝါ တမတ္ထံ ဝိဿဇ္ဇေန္တော သီလေ ပတိဋ္ဌာယာတိအာဒိမာဟ. တတ္ထ သီလေ ပတိဋ္ဌာယာတိ စတုပါရိသုဒ္ဓိသီလေ ဌတွာ. ဧတ္ထ စ ဘဂဝါ ဇဋာဝိဇဋနံ ပုစ္ဆိတော သီလံ အာရဘန္တော န ‘‘အညံ ပုဋ္ဌော အညံ ကထေတီ’’တိ ဝေဒိတဗ္ဗော. ဇဋာဝိဇဋကဿ ဟိ ပတိဋ္ဌာဒဿနတ္ထမေတ္ထ သီလံ ကထိတံ.

နရောတိ သတ္တော. သပညောတိ ကမ္မဇတိဟေတုကပဋိသန္ဓိပညာယ ပညဝါ. စိတ္တံ ပညဉ္စ ဘာဝယန္တိ သမာဓိဉ္စေဝ ဝိပဿနဉ္စ ဘာဝယမာနော. စိတ္တသီသေန ဟေတ္ထ အဋ္ဌ သမာပတ္တိယော ကထိတာ၊ ပညာနာမေန ဝိပဿနာ. အာတာပီတိ ဝီရိယဝါ. ဝီရိယဉှိ ကိလေသာနံ အာတာပနပရိတာပနဋ္ဌေန ‘‘အာတာပေါ’’တိ ဝုစ္စတိ၊ တဒဿ အတ္ထီတိ အာတာပီ. နိပကောတိ နေပက္ကံ ဝုစ္စတိ ပညာ၊ တာယ သမန္နာဂတောတိ အတ္ထော. ဣမိနာ ပဒေန ပါရိဟာရိယပညံ ဒဿေတိ. ပါရိဟာရိယပညာ နာမ ‘‘အယံ ကာလော ဥဒ္ဒေသဿ၊ အယံ ကာလော ပရိပုစ္ဆာယာ’’တိအာဒိနာ နယေန သဗ္ဗတ္ထ ကာရာပိတာ ပရိဟရိတဗ္ဗပညာ. ဣမသ္မိဉှိ ပဉှာဗျာကရဏေ တိက္ခတ္တုံ ပညာ အာဂတာ. တတ္ထ ပဌမာ ဇာတိပညာ၊ ဒုတိယာ ဝိပဿနာပညာ၊ တတိယာ သဗ္ဗကိစ္စပရိဏာယိကာ ပါရိဟာရိယပညာ.

သော ဣမံ ဝိဇဋယေ ဇဋန္တိ သော ဣမေဟိ သီလာဒီဟိ သမန္နာဂတော ဘိက္ခု. ယထာ နာမ ပုရိသော ပထဝိယံ ပတိဋ္ဌာယ သုနိသိတံ သတ္ထံ ဥက္ခိပိတွာ မဟန္တံ ဝေဠုဂုမ္ဗံ ဝိဇဋေယျ၊ ဧဝမေဝံ သီလေ ပတိဋ္ဌာယ သမာဓိသိလာယံ သုနိသိတံ ဝိပဿနာပညာသတ္ထံ ဝီရိယဗလပဂ္ဂဟိတေန ပါရိဟာရိယပညာဟတ္ထေန ဥက္ခိပိတွာ သဗ္ဗမ္ပိ တံ အတ္တနော သန္တာနေ ပတိတံ တဏှာဇဋံ ဝိဇဋေယျ သဉ္ဆိန္ဒေယျ သမ္ပဒါလေယျာတိ.

ဧတ္တာဝတာ သေခဘူမိံ ကထေတွာ ဣဒါနိ ဇဋံ ဝိဇဋေတွာ ဌိတံ မဟာခီဏာသဝံ ဒဿေန္တော ယေသန္တိအာဒိမာဟ. ဧဝံ ဇဋံ ဝိဇဋေတွာ ဌိတံ ခီဏာသဝံ ဒဿေတွာ ပုန ဇဋာယ ဝိဇဋနောကာသံ ဒဿေန္တော ယတ္ထ နာမဉ္စာတိအာဒိမာဟ. တတ္ထ နာမန္တိ စတ္တာရော အရူပိနော ခန္ဓာ. ပဋိဃံ ရူပသညာ စာတိ ဧတ္ထ ပဋိဃသညာဝသေန ကာမဘဝေါ ဂဟိတော၊ ရူပသညာဝသေန ရူပဘဝေါ. တေသု ဒွီသု ဂဟိတေသု အရူပဘဝေါ ဂဟိတောဝ ဟောတိ ဘဝသင်္ခေပေနာတိ. ဧတ္ထေသာ ဆိဇ္ဇတေ ဇဋာတိ ဧတ္ထ တေဘူမကဝဋ္ဋဿ ပရိယာဒိယနဋ္ဌာနေ ဧသာ ဇဋာ ဆိဇ္ဇတိ၊ နိဗ္ဗာနံ အာဂမ္မ ဆိဇ္ဇတိ နိရုဇ္ဈတီတိ အယံ အတ္ထော ဒဿိတော ဟောတိ. တတိယံ.

၄. မနောနိဝါရဏသုတ္တဝဏ္ဏနာ

၂၄. စတုတ္ထေ ယတော ယတောတိ ပါပတော ဝါ ကလျာဏတော ဝါ. အယံ ကိရ ဒေဝတာ ‘‘ယံကိဉ္စိ ကုသလာဒိဘေဒံ လောကိယံ ဝါ လောကုတ္တရံ ဝါ မနော၊ တံ နိဝါရေတဗ္ဗမေဝ၊ န ဥပ္ပါဒေတဗ္ဗ’’န္တိ ဧဝံလဒ္ဓိကာ. သ သဗ္ဗတောတိ သော သဗ္ဗတော. အထ ဘဂဝါ – ‘‘အယံ ဒေဝတာ အနိယျာနိကကထံ ကထေတိ၊ မနော နာမ နိဝါရေတဗ္ဗမ္ပိ အတ္ထိ ဘာဝေတဗ္ဗမ္ပိ၊ ဝိဘဇိတွာ နမဿာ ဒဿေဿာမီ’’တိ စိန္တေတွာ ဒုတိယဂါထံ အာဟ. တတ္ထ န မနော သံယတတ္တမာဂတန္တိ၊ ယံ ဝုတ္တံ ‘‘န သဗ္ဗတော မနော နိဝါရယေ’’တိ၊ ကတရံ တံ မနော၊ ယံ တံ သဗ္ဗတော န နိဝါရေတဗ္ဗန္တိ စေ. မနော သံယတတ္တံ အာဂတံ၊ ယံ မနော ယတ္ထ သံယတဘာဝံ အာဂတံ၊ ‘‘ဒါနံ ဒဿာမိ၊ သီလံ ရက္ခိဿာမီ’’တိအာဒိနာ နယေန ဥပ္ပန္နံ၊ ဧတံ မနော န နိဝါရေတဗ္ဗံ၊ အညဒတ္ထု ဗြူဟေတဗ္ဗံ ဝဍ္ဎေတဗ္ဗံ. ယတော ယတော စ ပါပကန္တိ ယတော ယတော အကုသလံ ဥပ္ပဇ္ဇတိ၊ တတော တတော စ တံ နိဝါရေတဗ္ဗန္တိ. စတုတ္ထံ.

၅. အရဟန္တသုတ္တဝဏ္ဏနာ

၂၅. ပဉ္စမေ ကတာဝီတိ စတူဟိ မဂ္ဂေဟိ ကတကိစ္စော. အဟံ ဝဒါမီတိ အယံ ဒေဝတာ ဝနသဏ္ဍဝါသိနီ၊ သာ အာရညကာနံ ဘိက္ခူနံ ‘‘အဟံ ဘုဉ္ဇာမိ၊ အဟံ နိသီဒါမိ၊ မမ ပတ္တော၊ မမ စီဝရ’’န္တိအာဒိကထာဝေါဟာရံ သုတွာ စိန္တေသိ – ‘‘အဟံ ဣမေ ဘိက္ခူ ‘ခီဏာသဝါ’တိ မညာမိ၊ ခီဏာသဝါနဉ္စ နာမ ဧဝရူပါ အတ္တုပလဒ္ဓိနိဿိတကထာ ဟောတိ၊ န ဟောတိ နု ခေါ’’တိ ဇာနနတ္ထံ ဧဝံ ပုစ္ဆတိ.

သာမညန္တိ လောကနိရုတ္တိံ လောကဝေါဟာရံ. ကုသလောတိ ခန္ဓာဒီသု ကုသလော. ဝေါဟာရမတ္တေနာတိ ဥပလဒ္ဓိနိဿိတကထံ ဟိတွာ ဝေါဟာရဘေဒံ အကရောန္တော ‘‘အဟံ၊ မမာ’’တိ ဝဒေယျ. ‘‘ခန္ဓာ ဘုဉ္ဇန္တိ၊ ခန္ဓာ နိသီဒန္တိ၊ ခန္ဓာနံ ပတ္တော၊ ခန္ဓာနံ စီဝရ’’န္တိ ဟိ ဝုတ္တေ ဝေါဟာရဘေဒေါ ဟောတိ၊ န ကောစိ ဇာနာတိ. တသ္မာ ဧဝံ အဝတွာ လောကဝေါဟာရေန ဝေါဟရတီတိ.

အထ ဒေဝတာ – ‘‘ယဒိ ဒိဋ္ဌိယာ ဝသေန န ဝဒတိ၊ မာနဝသေန နု ခေါ ဝဒတီ’’တိ စိန္တေတွာ ပုန ယော ဟောတီတိ ပုစ္ဆိ. တတ္ထ မာနံ နု ခေါတိ သော ဘိက္ခု မာနံ ဥပဂန္တွာ မာနဝသေန ဝဒေယျ နု ခေါတိ. အထ ဘဂဝါ – ‘‘အယံ ဒေဝတာ ခီဏာသဝံ သမာနံ ဝိယ ကရောတီ’’တိ စိန္တေတွာ၊ ‘‘ခီဏာသဝဿ နဝဝိဓောပိ မာနော ပဟီနော’’တိ ဒဿေန္တော ပဋိဂါထံ အာဟ. တတ္ထ ဝိဓူပိတာတိ ဝိဓမိတာ. မာနဂန္ထဿာတိ မာနာ စ ဂန္ထာ စ အဿ. မညတန္တိ မညနံ. တိဝိဓမ္ပိ တဏှာ-ဒိဋ္ဌိ-မာန-မညနံ သော ဝီတိဝတ္တော၊ အတိက္ကန္တောတိ အတ္ထော. သေသံ ဥတ္တာနတ္ထမေဝါတိ. ပဉ္စမံ.

၆. ပဇ္ဇောတသုတ္တဝဏ္ဏနာ

၂၆. ဆဋ္ဌေ ပုဋ္ဌုန္တိ ပုစ္ဆိတုံ. ကထံ ဇာနေမူတိ ကထံ ဇာနေယျာမ. ဒိဝါရတ္တိန္တိ ဒိဝါ စ ရတ္တိဉ္စ. တတ္ထ တတ္ထာတိ ယတ္ထ ယတ္ထေဝ ပဇ္ဇလိတော ဟောတိ၊ တတ္ထ တတ္ထ. ဧသာ အာဘာတိ ဧသာ ဗုဒ္ဓါဘာ. ကတမာ ပန သာတိ? ဉာဏာလောကော ဝါ ဟောတု ပီတိအာလောကော ဝါ ပသာဒါလောကော ဝါ ဓမ္မကထာအာလောကော ဝါ၊ သဗ္ဗောပိ ဗုဒ္ဓါနံ ပါတုဘာဝါ ဥပ္ပန္နော အာလောကော ဗုဒ္ဓါဘာ နာမ. အယံ အနုတ္တရာ သဗ္ဗသေဋ္ဌာ အသဒိသာတိ. ဆဋ္ဌံ.

၇. သရသုတ္တဝဏ္ဏနာ

၂၇. သတ္တမေ ကုတော သရာ နိဝတ္တန္တီတိ ဣမေ သံသာရသရာ ကုတော နိဝတ္တန္တိ၊ ကိံ အာဂမ္မ နပ္ပဝတ္တန္တီတိ အတ္ထော. န ဂါဓတီတိ န ပတိဋ္ဌာတိ. အတောတိ အတော နိဗ္ဗာနတော. သေသံ ဥတ္တာနတ္ထမေဝါတိ. သတ္တမံ.

၈. မဟဒ္ဓနသုတ္တဝဏ္ဏနာ

၂၈. အဋ္ဌမေ နိဓာနဂတံ မုတ္တသာရာဒိ မဟန္တံ ဓနမေတေသန္တိ မဟဒ္ဓနာ. သုဝဏ္ဏရဇတဘာဇနာဒိ မဟာဘောဂေါ ဧတေသန္တိ မဟာဘောဂါ. အညမညာဘိဂိဇ္ဈန္တီတိ အညမညံ အဘိဂိဇ္ဈန္တိ ပတ္ထေန္တိ ပိဟေန္တိ. အနလင်္ကတာတိ အတိတ္တာ အပရိယတ္တဇာတာ. ဥဿုက္ကဇာတေသူတိ နာနာကိစ္စဇာတေသု အနုပ္ပန္နာနံ ရူပါဒီနံ ဥပ္ပါဒနတ္ထာယ ဥပ္ပန္နာနံ အနုဘဝနတ္ထာယ ဥဿုက္ကေသု. ဘဝသောတာနုသာရီသူတိ ဝဋ္ဋသောတံ အနုသရန္တေသု. အနုဿုကာတိ အဝါဝဋာ. အဂါရန္တိ မာတုဂါမေန သဒ္ဓိံ ဂေဟံ. ဝိရာဇိယာတိ ဝိရာဇေတွာ. သေသံ ဥတ္တာနမေဝါတိ. အဋ္ဌမံ.

၉. စတုစက္ကသုတ္တဝဏ္ဏနာ

၂၉. နဝမေ စတုစက္ကန္တိ စတုဣရိယာပထံ. ဣရိယာပထော ဟိ ဣဓ စက္ကန္တိ အဓိပ္ပေတော. နဝဒွါရန္တိ နဝဟိ ဝဏမုခေဟိ နဝဒွါရံ. ပုဏ္ဏန္တိ အသုစိပူရံ. လောဘေန သံယုတန္တိ တဏှာယ သံယုတ္တံ. ကထံ ယာတြာ ဘဝိဿတီတိ ဧတဿ ဧဝရူပဿ သရီရဿ ကထံ နိဂ္ဂမနံ ဘဝိဿတိ၊ ကထံ မုတ္တိ ပရိမုတ္တိ သမတိက္ကမော ဘဝိဿတီတိ ပုစ္ဆတိ. နဒ္ဓိန္တိ ဥပနာဟံ၊ ပုဗ္ဗကာလေ ကောဓော၊ အပရကာလေ ဥပနာဟောတိ ဧဝံ ပဝတ္တံ ဗလဝကောဓန္တိ အတ္ထော. ဝရတ္တန္တိ ‘‘ဆေတွာ နဒ္ဓိ ဝရတ္တဉ္စ၊ သန္ဒာနံ သဟနုက္ကမ’’န္တိ ဂါထာယ (ဓ. ပ. ၃၉၈၊ သု. နိ. ၆၂၇) တဏှာ ဝရတ္တာ၊ ဒိဋ္ဌိ သန္ဒာနံ နာမ ဇာတံ. ဣဓ ပန ပါဠိနိဒ္ဒိဋ္ဌေ ကိလေသေ ဌပေတွာ အဝသေသာ ‘‘ဝရတ္တာ’’တိ ဝေဒိတဗ္ဗာ၊ ဣတိ ကိလေသဝရတ္တဉ္စ ဆေတွာတိ အတ္ထော. ဣစ္ဆာ လောဘန္တိ ဧကောယေဝ ဓမ္မော ဣစ္ဆနဋ္ဌေန ဣစ္ဆာ၊ လုဗ္ဘနဋ္ဌေန လောဘောတိ ဝုတ္တော. ပဌမုပ္ပတ္တိကာ ဝါ ဒုဗ္ဗလာ ဣစ္ဆာ၊ အပရာပရုပ္ပတ္တိကော ဗလဝါ လောဘော. အလဒ္ဓပတ္ထနာ ဝါ ဣစ္ဆာ၊ ပဋိလဒ္ဓဝတ္ထုမှိ လောဘော. သမူလံ တဏှန္တိ အဝိဇ္ဇာမူလေန သမူလကံ တဏှံ. အဗ္ဗုယှာတိ အဂ္ဂမဂ္ဂေန ဥပ္ပါဋေတွာ. သေသံ ဥတ္တာနမေဝါတိ. နဝမံ.

၁၀. ဧဏိဇင်္ဃသုတ္တဝဏ္ဏနာ

၃၀. ဒသမေ ဧဏိဇင်္ဃန္တိ ဧဏိမိဂဿ ဝိယ သုဝဋ္ဋိတဇင်္ဃံ. ကိသန္တိ အထူလံ သမသရီရံ. အထ ဝါ အာတပေန မိလာတံ မာလာဂန္ဓဝိလေပနေဟိ အနုပဗြူဟိတသရီရန္တိပိ အတ္ထော. ဝီရန္တိ ဝီရိယဝန္တံ. အပ္ပါဟာရန္တိ ဘောဇနေ မတ္တညုတာယ မိတာဟာရံ၊ ဝိကာလဘောဇနပဋိက္ခေပဝသေန ဝါ ပရိတ္တာဟာရံ. အလောလုပန္တိ စတူသု ပစ္စယေသု လောလုပ္ပဝိရဟိတံ. ရသတဏှာပဋိက္ခေပေါ ဝါ ဧသ. သီဟံဝေကစရံ နာဂန္တိ ဧကစရံ သီဟံ ဝိယ၊ ဧကစရံ နာဂံ ဝိယ. ဂဏဝါသိနော ဟိ ပမတ္တာ ဟောန္တိ၊ ဧကစရာ အပ္ပမတ္တာ၊ တသ္မာ ဧကစရာဝ ဂဟိတာတိ. ပဝေဒိတာတိ ပကာသိတာ ကထိတာ. ဧတ္ထာတိ ဧတသ္မိံ နာမရူပေ. ပဉ္စကာမဂုဏဝသေန ဟိ ရူပံ ဂဟိတံ၊ မနေန နာမံ၊ ဥဘယေဟိ ပန အဝိနိဘုတ္တဓမ္မေ ဂဟေတွာ ပဉ္စက္ခန္ဓာဒိဝသေနပေတ္ထ ဘုမ္မံ ယောဇေတဗ္ဗန္တိ. ဒသမံ.

သတ္တိဝဂ္ဂေါ တတိယော.