၈. မဓုပိဏ္ဍိကသုတ္တဝဏ္ဏနာ

၁၉၉. ဧဝံ မေ သုတန္တိ မဓုပိဏ္ဍိကသုတ္တံ. တတ္ထ မဟာဝနန္တိ ဟိမဝန္တေန သဒ္ဓိံ ဧကာဗဒ္ဓံ အရောပိမံ ဇာတိဝနံ၊ န ယထာ ဝေသာလိယံ ရောပိတာရောပိတမိဿကံ. ဒိဝါဝိဟာရာယာတိ ဒိဝါ ပဋိသလ္လာနတ္ထာယ. ဗေလုဝလဋ္ဌိကာယာတိ တရုဏဗေလုဝရုက္ခဿ. ဒဏ္ဍပါဏီတိ န ဇရာဒုဗ္ဗလတာယ ဒဏ္ဍဟတ္ထော. အယဉှိ တရုဏော ပဌမဝယေ ဌိတော၊ ဒဏ္ဍစိတ္တတာယ ပန သုဝဏ္ဏဒဏ္ဍံ ဂဟေတွာ ဝိစရတိ၊ တသ္မာ ဒဏ္ဍပါဏီတိ ဝုတ္တော. ဇင်္ဃာဝိဟာရန္တိ ဇင်္ဃာကိလမထဝိနောဒနတ္ထံ ဇင်္ဃာစာရံ. အနုစင်္ကမမာနော အနုဝိစရမာနောတိ အာရာမဒဿန-ဝနဒဿန-ပဗ္ဗတဒဿနာဒီနံ အတ္ထာယ ဣတော စိတော စ ဝိစရမာနော. အဓိစ္စနိက္ခမနော ကိရေသ ကဒါစိ ဒေဝ နိက္ခမိတွာ ဧဝံ ဝိစရတိ. ဒဏ္ဍမောလုဗ္ဘာတိ ဒဏ္ဍံ ဩလုမ္ဘိတွာ ဂေါပါလကဒါရကော ဝိယ ဒဏ္ဍံ ပုရတော ဌပေတွာ ဒဏ္ဍမတ္ထကေ ဒွေ ဟတ္ထေ ပတိဋ္ဌာပေတွာ ပိဋ္ဌိပါဏိံ ဟနုကေန ဥပ္ပီဠေတွာ ဧကမန္တံ အဋ္ဌာသိ.

၂၀၀. ကိံဝါဒီတိ ကိံဒိဋ္ဌိကော. ကိမက္ခာယီတိ ကိံ ကထေတိ. အယံ ရာဇာ ဘဂဝန္တံ အဝန္ဒိတွာ ပဋိသန္ထာရမတ္တကမေဝ ကတွာ ပဉှံ ပုစ္ဆတိ. တမ္ပိ န အညာတုကာမတာယ၊ အစိတ္တီကာရေန ပုစ္ဆတိ. ကသ္မာ? ဒေဝဒတ္တဿ ပက္ခိကော ကိရေသ. ဒေဝဒတ္တော အတ္တနော သန္တိကံ အာဂစ္ဆမာနေ တထာဂတေ ဘိန္ဒတိ. သော ကိရ ဧဝံ ဝဒေတိ ‘‘သမဏော ဂေါတမော အမှာကံ ကုလေန သဒ္ဓိံ ဝေရီ၊ န နော ကုလဿ ဝုဒ္ဓိံ ဣစ္ဆတိ. ဘဂိနီပိ မေ စက္ကဝတ္တိပရိဘောဂါ၊ တံ ပဟာယ ‘နဿတေသာ’တိ နိက္ခမိတွာ ပဗ္ဗဇိ. ဘာဂိနေယျောပိ မေ စက္ကဝတ္တိဗီဇန္တိ ဉတွာ အမှာကံ ကုလဿ ဝဍ္ဎိယာ အတုဿန္တော ‘နဿတေတ’န္တိ တမ္ပိ ဒဟရကာလေယေဝ ပဗ္ဗာဇေသိ. အဟံ ပန တေန ဝိနာ ဝတ္တိတုံ အသက္ကောန္တော အနုပဗ္ဗဇိတော. ဧဝံ ပဗ္ဗဇိတမ္ပိ မံ ပဗ္ဗဇိတဒိဝသတော ပဋ္ဌာယ န ဥဇုကေဟိ အက္ခီဟိ ဩလောကေတိ. ပရိသမဇ္ဈေ ဘာသန္တောပိ မဟာဖရသုနာ ပဟရန္တော ဝိယ အာပါယိကော ဒေဝဒတ္တောတိအာဒီနိ ဘာသတီ’’တိ. ဧဝံ အယမ္ပိ ရာဇာ ဒေဝဒတ္တေန ဘိန္နော၊ တသ္မာ ဧဝမကာသိ.

အထ ဘဂဝါ ယထာ အယံ ရာဇာ မယာ ပဉှေ ပုစ္ဆိတေ န ကထေတီတိ ဝတ္တုံ န လဘတိ၊ ယထာ စ ဘာသိတဿ အတ္ထံ န ဇာနာတိ၊ ဧဝမဿ ကထေဿာမီတိ တဿာနုစ္ဆဝိကံ ကထေန္တော ယထာဝါဒီ ခေါတိအာဒိမာဟ.

တတ္ထ န ကေနစိ လောကေ ဝိဂ္ဂယှ တိဋ္ဌတီတိ လောကေ ကေနစိ သဒ္ဓိံ ဝိဂ္ဂါဟိကကထံ န ကရောတိ န ဝိဝဒတိ. တထာဂတော ဟိ လောကေန သဒ္ဓိံ န ဝိဝဒတိ၊ လောကော ပန တထာဂတေန သဒ္ဓိံ အနိစ္စန္တိ ဝုတ္တေ နိစ္စန္တိ ဝဒမာနော၊ ဒုက္ခံ၊ အနတ္တာ၊ အသုဘန္တိ ဝုတ္တေ သုဘန္တိ ဝဒမာနော ဝိဝဒတိ. တေနေဝါဟ ‘‘နာဟံ၊ ဘိက္ခဝေ၊ လောကေန ဝိဝဒါမိ၊ လောကောဝ ခေါ၊ ဘိက္ခဝေ၊ မယာ ဝိဝဒတိ၊ တထာ န၊ ဘိက္ခဝေ၊ ဓမ္မဝါဒီ ကေနစိ လောကသ္မိံ ဝိဝဒတိ၊ အဓမ္မဝါဒီဝ ခေါ၊ ဘိက္ခဝေ၊ ဝိဝဒတီ’’တိ (သံ. နိ. ၃.၉၄). ယထာတိ ယေန ကာရဏေန. ကာမေဟီတိ ဝတ္ထုကာမေဟိပိ ကိလေသကာမေဟိပိ. တံ ဗြာဟ္မဏန္တိ တံ ခီဏာသဝံ ဗြာဟ္မဏံ. အကထံကထိန္တိ နိဗ္ဗိစိကိစ္ဆံ. ဆိန္နကုက္ကုစ္စန္တိ ဝိပ္ပဋိသာရကုက္ကုစ္စဿ စေဝ ဟတ္ထပါဒကုက္ကုစ္စဿ စ ဆိန္နတ္တာ ဆိန္နကုက္ကုစ္စံ. ဘဝါဘဝေတိ ပုနပ္ပုနဗ္ဘဝေ၊ ဟီနပဏီတေ ဝါ ဘဝေ၊ ပဏီတော ဟိ ဘဝေါ ဝုဒ္ဓိပ္ပတ္တော အဘဝေါတိ ဝုစ္စတိ. သညာတိ ကိလေသသညာ. ကိလေသာယေဝ ဝါ ဣဓ သညာနာမေန ဝုတ္တာ၊ တသ္မာ ယေန ကာရဏေန ကာမေဟိ ဝိသံယုတ္တံ ဝိဟရန္တံ တံ လောကေ နိန္နာဝါဒိံ ခီဏာသဝဗြာဟ္မဏံ ကိလေသသညာ နာနုသေန္တိ၊ တဉ္စ ကာရဏံ အဟံ ဝဒါမီတိ အယမေတ္ထ အတ္ထော. ဣတိ ဘဂဝါ အတ္တနော ခီဏာသဝဘာဝံ ဒီပေတိ. နိလ္လာဠေတွာတိ နီဟရိတွာ ကီဠာပေတွာ. တိဝိသာခန္တိ တိသာခံ. နလာဋိကန္တိ ဝလိဘင်္ဂံ နလာဋေ တိဿော ရာဇိယော ဒဿေန္တော ဝလိဘင်္ဂံ ဝုဋ္ဌာပေတွာတိ အတ္ထော. ဒဏ္ဍမောလုဗ္ဘာတိ ဒဏ္ဍံ ဥပ္ပီဠေတွာ. ‘‘ဒဏ္ဍမာလုဗ္ဘာ’’တိပိ ပါဌော၊ ဂဟေတွာ ပက္ကာမီတိ အတ္ထော.

၂၀၁. အညတရောတိ နာမေန အပါကဋော ဧကော ဘိက္ခု. သော ကိရ အနုသန္ဓိကုသလော၊ ဘဂဝတာ ယထာ ဒဏ္ဍပါဏီ န ဇာနာတိ၊ တထာ မယာ ကထိတန္တိ ဝုတ္တေ ကိန္တိ နု ခေါ ဘဂဝတာ အဝိညေယျံ ကတွာ ပဉှော ကထိတောတိ အနုသန္ဓိံ ဂဟေတွာ ဒသဗလံ ယာစိတွာ ဣမံ ပဉှံ ဘိက္ခုသံဃဿ ပါကဋံ ကရိဿာမီတိ ဥဋ္ဌာယာသနာ ဧကံသံ ဥတ္တရာသင်္ဂံ ကရိတွာ ဒသနခသမုဇ္ဇလံ အဉ္ဇလိံ ပဂ္ဂယှ ကိံဝါဒီ ပန၊ ဘန္တေ ဘဂဝါတိအာဒိမာဟ.

ယတောနိဒါနန္တိ ဘာဝနပုံသကံ ဧတံ၊ ယေန ကာရဏေန ယသ္မိံ ကာရဏေ သတီတိ အတ္ထော. ပပဉ္စသညာသင်္ခါတိ ဧတ္ထ သင်္ခါတိ ကောဋ္ဌာသော. ပပဉ္စသညာတိ တဏှာမာနဒိဋ္ဌိပပဉ္စသမ္ပယုတ္တာ သညာ၊ သညာနာမေန ဝါ ပပဉ္စာယေဝ ဝုတ္တာ. တသ္မာ ပပဉ္စကောဋ္ဌာသာတိ အယမေတ္ထ အတ္ထော. သမုဒါစရန္တီတိ ပဝတ္တန္တိ. ဧတ္ထ စေ နတ္ထိ အဘိနန္ဒိတဗ္ဗန္တိ ယသ္မိံ ဒွါဒသာယတနသင်္ခါတေ ကာရဏေ သတိ ပပဉ္စသညာသင်္ခါ သမုဒါစရန္တိ၊ ဧတ္ထ ဧကာယတနမ္ပိ စေ အဘိနန္ဒိတဗ္ဗံ အဘိဝဒိတဗ္ဗံ အဇ္ဈောသိတဗ္ဗံ နတ္ထီတိ အတ္ထော. တတ္ထ အဘိနိန္ဒိတဗ္ဗန္တိ အဟံ မမန္တိ အဘိနန္ဒိတဗ္ဗံ. အဘိဝဒိတဗ္ဗန္တိ အဟံ မမာတိ ဝတ္တဗ္ဗံ. အဇ္ဈောသိတဗ္ဗန္တိ အဇ္ဈောသိတွာ ဂိလိတွာ ပရိနိဋ္ဌပေတွာ ဂဟေတဗ္ဗယုတ္တံ. ဧတေနေတ္ထ တဏှာဒီနံယေဝ အပ္ပဝတ္တိံ ကထေတိ. ဧသေဝန္တောတိ အယံ အဘိနန္ဒနာဒီနံ နတ္ထိဘာဝေါဝ ရာဂါနုသယာဒီနံ အန္တော. ဧသေဝ နယော သဗ္ဗတ္ထ.

ဒဏ္ဍာဒါနာဒီသု ပန ယာယ စေတနာယ ဒဏ္ဍံ အာဒိယတိ၊ သာ ဒဏ္ဍာဒါနံ. ယာယ သတ္ထံ အာဒိယတိ ပရာမသတိ၊ သာ သတ္ထာဒါနံ. မတ္ထကပ္ပတ္တံ ကလဟံ. နာနာဂါဟမတ္တံ ဝိဂ္ဂဟံ. နာနာဝါဒမတ္တံ ဝိဝါဒံ. တုဝံ တုဝန္တိ ဧဝံ ပဝတ္တံ တုဝံ တုဝံ. ပိယသုညကရဏံ ပေသုညံ. အယထာသဘာဝံ မုသာဝါဒံ ကရောတိ၊ သာ မုသာဝါဒေါတိ ဝေဒိတဗ္ဗာ. ဧတ္ထေတေတိ ဧတ္ထ ဒွါဒသသု အာယတနေသု ဧတေ ကိလေသာ. ကိလေသာ ဟိ ဥပ္ပဇ္ဇမာနာပိ ဒွါဒသာယတနာနိ နိဿာယ ဥပ္ပဇ္ဇန္တိ၊ နိရုဇ္ဈမာနာပိ ဒွါဒသသု အာယတနေသုယေဝ နိရုဇ္ဈန္တိ. ဧဝံ ယတ္ထုပ္ပန္နာ၊ တတ္ထေဝ နိရုဒ္ဓါ ဟောန္တိ. သွာယမတ္ထော သမုဒယသစ္စပဉှေန ဒီပေတဗ္ဗော –

‘‘သာ ခေါ ပနေသာ တဏှာ ကတ္ထ ဥပ္ပဇ္ဇမာနာ ဥပ္ပဇ္ဇတိ၊ ကတ္ထ နိဝိသမာနာ နိဝိသတီ’’တိ ဝတွာ – ‘‘ယံ လောကေ ပိယရူပံ သာတရူပံ၊ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ၊ ဧတ္ထ နိဝိသမာနာ နိဝိသတိ. ကိဉ္စ လောကေ ပိယရူပံ သာတရူပံ? စက္ခု လောကေ ပိယရူပံ သာတရူပ’’န္တိအာဒိနာ (ဝိဘ. ၂၀၃) နယေန ဒွါဒသသုယေဝ အာယတနေသု တဿာ ဥပ္ပတ္တိ စ နိရောဓော စ ဝုတ္တော. ယထေဝ စ တဏှာ ဒွါဒသသု အာယတနေသု ဥပ္ပဇ္ဇိတွာ နိဗ္ဗာနံ အာဂမ္မ နိရုဒ္ဓါပိ အာယတနေသု ပုန သမုဒါစာရဿ အဘာဝတော အာယတနေသုယေဝ နိရုဒ္ဓါတိ ဝုတ္တာ၊ ဧဝမိမေပိ ပါပကာ အကုသလာ ဓမ္မာ အာယတနေသု နိရုဇ္ဈန္တီတိ ဝေဒိတဗ္ဗာ. အထ ဝါ ယွာယံ အဘိနန္ဒနာဒီနံ အဘာဝေါဝ ရာဂါနုသယာဒီနံ အန္တောတိ ဝုတ္တော. ဧတ္ထေတေ ရာဂါနုသယာဒီနံ အန္တောတိ လဒ္ဓဝေါဟာရေ နိဗ္ဗာနေ ပါပကာ အကုသလာ ဓမ္မာ အပရိသေသာ နိရုဇ္ဈန္တိ. ယဉှိ ယတ္ထ နတ္ထိ၊ တံ တတ္ထ နိရုဒ္ဓံ နာမ ဟောတိ၊ သွာယမတ္ထော နိရောဓပဉှေန ဒီပေတဗ္ဗော. ဝုတ္တဉှေတံ ‘‘ဒုတိယံ ဈာနံ သမာပန္နဿ ဝိတက္ကဝိစာရာ ဝစီသင်္ခါရာ ပဋိပ္ပဿဒ္ဓါ ဟောန္တီ’’တိအာဒိ (ပဋိ. မ. ၁.၈၃).

၂၀၂. သတ္ထု စေဝ သံဝဏ္ဏိတောတိ သတ္ထာရာ စ ပသံသိတော. ဝိညူနန္တိ ဣဒမ္ပိ ကရဏတ္ထေ သာမိဝစနံ၊ ပဏ္ဍိတေဟိ သဗြဟ္မစာရီဟိ စ သမ္ဘာဝိတောတိ အတ္ထော. ပဟောတီတိ သက္ကောတိ.

၂၀၃. အတိက္ကမ္မေဝ မူလံ အတိက္ကမ္မ ခန္ဓန္တိ သာရော နာမ မူလေ ဝါ ခန္ဓေ ဝါ ဘဝေယျ၊ တမ္ပိ အတိက္ကမိတွာတိ အတ္ထော. ဧဝံသမ္ပဒန္တိ ဧဝံသမ္ပတ္တိကံ၊ ဤဒိသန္တိ အတ္ထော. အတိသိတွာတိ အတိက္ကမိတွာ. ဇာနံ ဇာနာတီတိ ဇာနိတဗ္ဗမေဝ ဇာနာတိ. ပဿံ ပဿတီတိ ပဿိတဗ္ဗမေဝ ပဿတိ. ယထာ ဝါ ဧကစ္စော ဝိပရီတံ ဂဏှန္တော ဇာနန္တောပိ န ဇာနာတိ၊ ပဿန္တောပိ န ပဿတိ၊ န ဧဝံ ဘဂဝါ. ဘဂဝါ ပန ဇာနန္တော ဇာနာတိယေဝ၊ ပဿန္တော ပဿတိယေဝ. သွာယံ ဒဿနပရိဏာယကဋ္ဌေန စက္ခုဘူတော. ဝိဒိတကရဏဋ္ဌေန ဉာဏဘူတော. အဝိပရီတသဘာဝဋ္ဌေန ပရိယတ္တိဓမ္မပ္ပဝတ္တနတော ဝါ ဟဒယေန စိန္တေတွာ ဝါစာယ နိစ္ဆာရိတဓမ္မမယောတိ ဓမ္မဘူတော. သေဋ္ဌဋ္ဌေန ဗြဟ္မဘူတော. အထ ဝါ စက္ခု ဝိယ ဘူတောတိ စက္ခုဘူတောတိ ဧဝမေတေသု ပဒေသု အတ္ထော ဝေဒိတဗ္ဗော. သွာယံ ဓမ္မဿ ဝတ္တနတော ဝတ္တာ. ပဝတ္တာပနတော ပဝတ္တာ. အတ္ထံ နီဟရိတွာ ဒဿနသမတ္ထတာယ အတ္ထဿ နိန္နေတာ. အမတာဓိဂမာယ ပဋိပတ္တိံ ဒဒါတီတိ အမတဿ ဒါတာ. အဂရုံ ကတွာတိ ပုနပ္ပုနံ အာယာစာပေန္တောပိ ဟိ ဂရုံ ကရောတိ နာမ၊ အတ္တနော သာဝကပါရမီဉာဏေ ဌတွာ သိနေရူပါဒတော ဝါလုကံ ဥဒ္ဓရမာနော ဝိယ ဒုဗ္ဗိညေယျံ ကတွာ ကထေန္တောပိ ဂရုံ ကရောတိယေဝ နာမ. ဧဝံ အကတွာ အမှေ ပုနပ္ပုနံ အယာစာပေတွာ သုဝိညေယျမ္ပိ နော ကတွာ ကထေဟီတိ ဝုတ္တံ ဟောတိ.

၂၀၄. ယံ ခေါ နော အာဝုသောတိ ဧတ္ထ ကိဉ္စာပိ ‘‘ယံ ခေါ ဝေါ’’တိ ဝတ္တဗ္ဗံ သိယာ၊ တေ ပန ဘိက္ခူ အတ္တနာ သဒ္ဓိံ သင်္ဂဏှန္တော ‘‘ယံ ခေါ နော’’တိ အာဟ. ယသ္မာ ဝါ ဥဒ္ဒေသောဝ တေသံ ဥဒ္ဒိဋ္ဌောဝ. ဘဂဝါ ပန ထေရဿာပိ တေသမ္ပိ ဘဂဝါဝ. တသ္မာ ဘဂဝါတိ ပဒံ သန္ဓာယပိ ဧဝမာဟ၊ ယံ ခေါ အမှာကံ ဘဂဝါ တုမှာကံ သံခိတ္တေန ဥဒ္ဒေသံ ဥဒ္ဒိသိတွာတိ အတ္ထော.

စက္ခုဉ္စာဝုသောတိအာဒီသု အယမတ္ထော၊ အာဝုသော၊ နိဿယဘာဝေန စက္ခုပသာဒဉ္စ အာရမ္မဏဘာဝေန စတုသမုဋ္ဌာနိကရူပေ စ ပဋိစ္စ စက္ခုဝိညာဏံ နာမ ဥပ္ပဇ္ဇတိ. တိဏ္ဏံ သင်္ဂတိ ဖဿောတိ တေသံ တိဏ္ဏံ သင်္ဂတိယာ ဖဿော နာမ ဥပ္ပဇ္ဇတိ. တံ ဖဿံ ပဋိစ္စ သဟဇာတာဒိဝသေန ဖဿပစ္စယာ ဝေဒနာ ဥပ္ပဇ္ဇတိ. တာယ ဝေဒနာယ ယံ အာရမ္မဏံ ဝေဒေတိ၊ တဒေဝ သညာ သဉ္ဇာနာတိ၊ ယံ သညာ သဉ္ဇာနာတိ၊ တဒေဝ အာရမ္မဏံ ဝိတက္ကော ဝိတက္ကေတိ. ယံ ဝိတက္ကော ဝိတက္ကေတိ၊ တဒေဝါရမ္မဏံ ပပဉ္စော ပပဉ္စေတိ. တတောနိဒါနန္တိ ဧတေဟိ စက္ခုရူပါဒီဟိ ကာရဏေဟိ. ပုရိသံ ပပဉ္စသညာသင်္ခါ သမုဒါစရန္တီတိ တံ အပရိညာတကာရဏံ ပုရိသံ ပပဉ္စကောဋ္ဌာသာ အဘိဘဝန္တိ၊ တဿ ပဝတ္တန္တီတိ အတ္ထော. တတ္ထ ဖဿဝေဒနာသညာ စက္ခုဝိညာဏေန သဟဇာတာ ဟောန္တိ. ဝိတက္ကော စက္ခုဝိညာဏာနန္တရာဒီသု သဝိတက္ကစိတ္တေသု ဒဋ္ဌဗ္ဗော. ပပဉ္စသင်္ခါ ဇဝနေန သဟဇာတာ ဟောန္တိ. ယဒိ ဧဝံ ကသ္မာ အတီတာနာဂတဂ္ဂဟဏံ ကတန္တိ? တထာ ဥပ္ပဇ္ဇနတော. ယထေဝ ဟိ ဧတရဟိ စက္ခုဒွါရိကော ပပဉ္စော စက္ခုဉ္စ ရူပေ စ ဖဿဝေဒနာသညာဝိတက္ကေ စ ပဋိစ္စ ဥပ္ပန္နော၊ ဧဝမေဝံ အတီတာနာဂတေသုပိ စက္ခုဝိညေယျေသု ရူပေသု တဿုပ္ပတ္တိံ ဒဿေန္တော ဧဝမာဟ.

သောတဉ္စာဝုသောတိအာဒီသုပိ ဧသေဝ နယော. ဆဋ္ဌဒွါရေ ပန မနန္တိ ဘဝင်္ဂစိတ္တံ. ဓမ္မေတိ တေဘူမကဓမ္မာရမ္မဏံ. မနောဝိညာဏန္တိ အာဝဇ္ဇနံ ဝါ ဇဝနံ ဝါ. အာဝဇ္ဇနေ ဂဟိတေ ဖဿဝေဒနာသညာဝိတက္ကာ အာဝဇ္ဇနသဟဇာတာ ဟောန္တိ. ပပဉ္စော ဇဝနသဟဇာတော. ဇဝနေ ဂဟိတေ သဟာဝဇ္ဇနကံ ဘဝင်္ဂ မနော နာမ ဟောတိ၊ တတော ဖဿာဒယော သဗ္ဗေပိ ဇဝနေန သဟဇာတာဝ. မနောဒွါရေ ပန ယသ္မာ အတီတာဒိဘေဒံ သဗ္ဗမ္ပိ အာရမ္မဏံ ဟောတိ၊ တသ္မာ အတီတာနာဂတပစ္စုပ္ပန္နေသူတိ ဣဒံ ယုတ္တမေဝ.

ဣဒါနိ ဝဋ္ဋံ ဒဿေန္တော သော ဝတာဝုသောတိ ဒေသနံ အာရဘိ. ဖဿပညတ္တိံ ပညပေဿတီတိ ဖဿော နာမ ဧကော ဓမ္မော ဥပ္ပဇ္ဇတီတိ ဧဝံ ဖဿပညတ္တိံ ပညပေဿတိ၊ ဒဿေဿတီတိ အတ္ထော. ဧသ နယော သဗ္ဗတ္ထ. ဧဝံ ဣမသ္မိံ သတိ ဣဒံ ဟောတီတိ ဒွါဒသာယတနဝသေန သကလံ ဝဋ္ဋံ ဒဿေတွာ ဣဒါနိ ဒွါဒသာယတနပဋိက္ခေပဝသေန ဝိဝဋ္ဋံ ဒဿေန္တော သော ဝတာဝုသော စက္ခုသ္မိံ အသတီတိ ဒေသနံ အာရဘိ. တတ္ထ ဝုတ္တနယေနေဝ အတ္ထော ဝေဒိတဗ္ဗော.

ဧဝံ ပဉှံ ဝိဿဇ္ဇေတွာ ဣဒါနိ သာဝကေန ပဉှော ကထိတောတိ မာ နိက္ကင်္ခါ အဟုဝတ္ထ၊ အယံ ဘဂဝါ သဗ္ဗညုတဉာဏတုလံ ဂဟေတွာ နိသိန္နော၊ ဣစ္ဆမာနာ တမေဝ ဥပသင်္ကမိတွာ နိက္ကင်္ခါ ဟောထာတိ ဥယျောဇေန္တော အာကင်္ခမာနာ စ ပနာတိအာဒိမာဟ.

၂၀၅. ဣမေဟိ အာကာရေဟီတိ ဣမေဟိ ကာရဏေဟိ ပပဉ္စုပ္ပတ္တိယာ ပါဋိယေက္ကကာရဏေဟိ စေဝ ဝဋ္ဋဝိဝဋ္ဋကာရဏေဟိ စ. ဣမေဟိ ပဒေဟီတိ ဣမေဟိ အက္ခရသမ္ပိဏ္ဍနေဟိ. ဗျဉ္ဇနေဟီတိ ပါဋိယေက္ကအက္ခရေဟိ. ပဏ္ဍိတောတိ ပဏ္ဍိစ္စေန သမန္နာဂတော. စတူဟိ ဝါ ကာရဏေဟိ ပဏ္ဍိတော ဓာတုကုသလော အာယတနကုသလော ပစ္စယာကာရကုသလော ကာရဏာကာရဏကုသလောတိ. မဟာပညောတိ မဟန္တေ အတ္ထေ မဟန္တေ ဓမ္မေ မဟန္တာ နိရုတ္တိယော မဟန္တာနိ ပဋိဘာနာနိ ပရိဂ္ဂဟဏသမတ္ထာယ မဟာပညာယ သမန္နာဂတော. ယထာ တံ မဟာကစ္စာနေနာတိ ယထာ မဟာကစ္စာနေန ဗျာကတံ၊ တံ သန္ဓာယ တန္တိ ဝုတ္တံ. ယထာ မဟာကစ္စာနေန ဗျာကတံ၊ အဟမ္ပိ တံ ဧဝမေဝံ ဗျာကရေယျေန္တိ အတ္ထော.

မဓုပိဏ္ဍိကန္တိ မဟန္တံ ဂုဠပူဝံ ဗဒ္ဓသတ္တုဂုဠကံ ဝါ. အသေစနကန္တိ အသေစိတဗ္ဗကံ. သပ္ပိဖာဏိတမဓုသက္ကရာဒီသု ဣဒံ နာမေတ္ထ မန္ဒံ ဣဒံ ဗဟုကန္တိ န ဝတ္တဗ္ဗံ သမယောဇိတရသံ. စေတသောတိ စိန္တကဇာတိကော. ဒဗ္ဗဇာတိကောတိ ပဏ္ဍိတသဘာဝေါ. ကော နာမော အယန္တိ ဣဒံ ထေရော အတိဘဒ္ဒကော အယံ ဓမ္မပရိယာယော၊ ဒသဗလဿ သဗ္ဗညုတညာဏေနေဝဿ နာမံ ဂဏှာပေဿာမီတိ စိန္တေတွာ အာဟ. တသ္မာတိ ယသ္မာ မဓုပိဏ္ဍိကော ဝိယ မဓုရော၊ တသ္မာ မဓုပိဏ္ဍိကပရိယာယောတွေဝ နံ ဓာရေဟီတိ ဝဒတိ. သေသံ သဗ္ဗတ္ထ ဥတ္တာနတ္ထမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

မဓုပိဏ္ဍိကသုတ္တဝဏ္ဏနာ နိဋ္ဌိတာ.