၇. ဝနပတ္ထပရိယာယသုတ္တဝဏ္ဏနာ

၁၉၀. ဧဝံ မေ သုတန္တိ ဝနပတ္ထပရိယာယံ. တတ္ထ ဝနပတ္ထပရိယာယန္တိ ဝနပတ္ထကာရဏံ၊ ဝနပတ္ထဒေသနံ ဝါ.

၁၉၁. ဝနပတ္ထံ ဥပနိဿာယ ဝိဟရတီတိ မနုဿူပစာရာတိက္ကန္တံ ဝနသဏ္ဍသေနာသနံ နိဿာယ သမဏဓမ္မံ ကရောန္တော ဝိဟရတိ. အနုပဋ္ဌိတာတိအာဒီသု ပုဗ္ဗေ အနုပဋ္ဌိတာ သတိ တံ ဥပနိဿာယ ဝိဟရတောပိ န ဥပဋ္ဌာတိ၊ ပုဗ္ဗေ အသမာဟိတံ စိတ္တံ န သမာဓိယတိ၊ ပုဗ္ဗေ အပရိက္ခီဏာ အာသဝါ န ပရိက္ခယံ ဂစ္ဆန္တိ၊ ပုဗ္ဗေ အနနုပ္ပတ္တံ အနုတ္တရံ ယောဂက္ခေမသင်္ခါတံ အရဟတ္တဉ္စ န ပါပုဏာတီတိ အတ္ထော. ဇီဝိတပရိက္ခာရာတိ ဇီဝိတသမ္ဘာရာ. သမုဒါနေတဗ္ဗာတိ သမာဟရိတဗ္ဗာ. ကသိရေန သမုဒါဂစ္ဆန္တီတိ ဒုက္ခေန ဥပ္ပဇ္ဇန္တိ. ရတ္တိဘာဂံ ဝါ ဒိဝသဘာဂံ ဝါတိ ရတ္တိကောဋ္ဌာသေ ဝါ ဒိဝသကောဋ္ဌာသေ ဝါ. ဧတ္ထ စ ရတ္တိဘာဂေ ပဋိသဉ္စိက္ခမာနေန ဉတွာ ရတ္တိံယေဝ ပက္ကမိတဗ္ဗံ၊ ရတ္တိံ စဏ္ဍဝါဠာဒီနံ ပရိဗန္ဓေ သတိ အရုဏုဂ္ဂမနံ အာဂမေတဗ္ဗံ. ဒိဝသဘာဂေ ဉတွာ ဒိဝါဝ ပက္ကမိတဗ္ဗံ၊ ဒိဝါ ပရိဗန္ဓေ သတိ သူရိယတ္ထင်္ဂမနံ အာဂမေတဗ္ဗံ.

၁၉၂. သင်္ခါပီတိ ဧဝံ သမဏဓမ္မဿ အနိပ္ဖဇ္ဇနဘာဝံ ဇာနိတွာ. အနန္တရဝါရေ ပန သင်္ခါပီတိ ဧဝံ သမဏဓမ္မဿ နိပ္ဖဇ္ဇနဘာဝံ ဇာနိတွာ.

၁၉၄. ယာဝဇီဝန္တိ ယာဝ ဇီဝိတံ ပဝတ္တတိ၊ တာဝ ဝတ္ထဗ္ဗမေဝ.

၁၉၅. သော ပုဂ္ဂလောတိ ပဒဿ နာနုဗန္ဓိတဗ္ဗောတိ ဣမိနာ သမ္ဗန္ဓော. အနာပုစ္ဆာတိ ဣဓ ပန တံ ပုဂ္ဂလံ အနာပုစ္ဆာ ပက္ကမိတဗ္ဗန္တိ အတ္ထော.

၁၉၇. သင်္ခါပီတိ ဧဝံ သမဏဓမ္မဿ အနိပ္ဖဇ္ဇနဘာဝံ ဉတွာ သော ပုဂ္ဂလော နာနုဗန္ဓိတဗ္ဗော၊ တံ အာပုစ္ဆာ ပက္ကမိတဗ္ဗံ.

၁၉၈. အပိ ပနုဇ္ဇမာနေနာပီတိ အပိ နိက္ကဍ္ဎီယမာနေနာပိ. ဧဝရူပေါ ဟိ ပုဂ္ဂလော သစေပိ ဒါရုကလာပသတံ ဝါ ဥဒကဃဋသတံ ဝါ ဝါလိကမ္ဗဏသတံ ဝါ ဒဏ္ဍံ အာဟရာပေတိ၊ မာ ဣဓ ဝသီတိ နိက္ကဍ္ဎာပေတိ ဝါ၊ တံ တံ ခမာပေတွာ ယာဝဇီဝံ ဝတ္ထဗ္ဗမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

ဝနပတ္ထပရိယာယသုတ္တဝဏ္ဏနာ နိဋ္ဌိတာ.