၃. မဟာဒုက္ခက္ခန္ဓသုတ္တဝဏ္ဏနာ

၁၆၃. ဧဝံ မေ သုတန္တိ မဟာဒုက္ခက္ခန္ဓသုတ္တံ. တတ္ထ ဝိနယပရိယာယေန တယော ဇနာ သမ္ဗဟုလာတိ ဝုစ္စန္တိ၊ တတော ပရံ သံဃော. သုတ္တန္တပရိယာယေန တယော တယော ဧဝ၊ တတော ဥဒ္ဓံ သမ္ဗဟုလာတိ ဝုစ္စန္တိ. ဣဓ သုတ္တန္တပရိယာယေန သမ္ဗဟုလာတိ ဝေဒိတဗ္ဗာ. ပိဏ္ဍာယ ပါဝိသိံသူတိ ပဝိဋ္ဌာ၊ တေ ပန န တာဝ ပဝိဋ္ဌာ၊ ပဝိသိဿာမာတိ နိက္ခန္တတ္တာ ပန ပဝိသိံသူတိ ဝုတ္တာ. ယထာ ဂါမံ ဂမိဿာမီတိ နိက္ခန္တပုရိသော တံ ဂါမံ အပ္ပတ္တောပိ ‘‘ကုဟိံ ဣတ္ထန္နာမော’’တိ ဝုတ္တေ ‘‘ဂါမံ ဂတော’’တိ ဝုစ္စတိ၊ ဧဝံ. ပရိဗ္ဗာဇကာနံ အာရာမောတိ ဇေတဝနတော အဝိဒူရေ အညတိတ္ထိယာနံ ပရိဗ္ဗာဇကာနံ အာရာမော အတ္ထိ၊ တံ သန္ဓာယ ဧဝမာဟံသု. သမဏော၊ အာဝုသောတိ၊ အာဝုသော၊ တုမှာကံ သတ္ထာ သမဏော ဂေါတမော. ကာမာနံ ပရိညန္တိ ကာမာနံ ပဟာနံ သမတိက္ကမံ ပညပေတိ. ရူပဝေဒနာသုပိ ဧသေဝ နယော.

တတ္ထ တိတ္ထိယာ သကသမယံ ဇာနန္တာ ကာမာနံ ပရိညံ ပညပေယျုံ ပဌမဇ္ဈာနံ ဝဒမာနာ၊ ရူပါနံ ပရိညံ ပညပေယျုံ အရူပဘဝံ ဝဒမာနာ၊ ဝေဒနာနံ ပရိညံ ပညပေယျုံ အသညဘဝံ ဝဒမာနာ. တေ ပန ‘‘ဣဒံ နာမ ပဌမဇ္ဈာနံ အယံ ရူပဘဝေါ အယံ အရူပဘဝေါ’’တိပိ န ဇာနန္တိ. တေ ပညပေတုံ အသက္ကောန္တာပိ ကေဝလံ ‘‘ပညပေမ ပညပေမာ’’တိ ဝဒန္တိ. တထာဂတော ကာမာနံ ပရိညံ အနာဂါမိမဂ္ဂေန ပညပေတိ၊ ရူပဝေဒနာနံ အရဟတ္တမဂ္ဂေန. တေ ဧဝံ မဟန္တေ ဝိသေသေ ဝိဇ္ဇမာနေပိ ဣဓ နော၊ အာဝုသော၊ ကော ဝိဝေသောတိအာဒိမာဟံသု.

တတ္ထ ဣဓာတိ ဣမသ္မိံ ပညာပနေ. ဓမ္မဒေသနာယ ဝါ ဓမ္မဒေသနန္တိ ယဒိဒံ သမဏဿ ဝါ ဂေါတမဿ ဓမ္မဒေသနာယ သဒ္ဓိံ အမှာကံ ဓမ္မဒေသနံ၊ အမှာကံ ဝါ ဓမ္မဒေသနာယ သဒ္ဓိံ သမဏဿ ဂေါတမဿ ဓမ္မဒေသနံ အာရဗ္ဘ နာနာကရဏံ ဝုစ္စေထ၊ တံ ကိန္နာမာတိ ဝဒန္တိ. ဒုတိယပဒေပိ ဧသေဝ နယော. ဣတိ ဝေမဇ္ဈေ ဘိန္နသုဝဏ္ဏံ ဝိယ သာသနေန သဒ္ဓိံ အတ္တနော လဒ္ဓိဝစနမတ္တေန သမဓုရံ ဌပယိံသု. နေဝ အဘိနန္ဒိံသူတိ ဧဝမေတန္တိ န သမ္ပဋိစ္ဆိံသု. နပ္ပဋိက္ကောသိံသူတိ နယိဒံ ဧဝန္တိ နပ္ပဋိသေဓေသုံ. ကသ္မာ? တေ ကိရ တိတ္ထိယာ နာမ အန္ဓသဒိသာ၊ ဇာနိတွာ ဝါ အဇာနိတွာ ဝါ ကထေယျုန္တိ နာဘိနန္ဒိံသု၊ ပရိညန္တိ ဝစနေန ဤသကံ သာသနဂန္ဓော အတ္ထီတိ နပ္ပဋိက္ကောသိံသု. ဇနပဒဝါသိနော ဝါ တေ သကသမယပရသမယေသု န သုဋ္ဌု ကုသလာတိပိ ဥဘယံ နာကံသု.

၁၆၅. န စေဝ သမ္ပာယိဿန္တီတိ သမ္ပာဒေတွာ ကထေတုံ န သက္ခိဿန္တိ. ဥတ္တရိဉ္စ ဝိဃာတန္တိ အသမ္ပာယနတော ဥတ္တရိမ္ပိ ဒုက္ခံ အာပဇ္ဇိဿန္တိ. သမ္ပာဒေတွာ ကထေတုံ အသက္ကောန္တာနံ နာမ ဟိ ဒုက္ခံ ဥပ္ပဇ္ဇတိ. ယထာ တံ၊ ဘိက္ခဝေ၊ အဝိသယသ္မိန္တိ ဧတ္ထ ယထာတိ ကာရဏဝစနံ၊ တန္တိ နိပါတမတ္တံ. ယသ္မာ အဝိသယေ ပဉှော ပုစ္ဆိတော ဟောတီတိ အတ္ထော. သဒေဝကေတိ သဟ ဒေဝေဟိ သဒေဝကေ. သမာရကာဒီသုပိ ဧသေဝ နယော. ဧဝံ တီဏိ ဌာနာနိ လောကေ ပက္ခိပိတွာ ဒွေ ပဇာယာတိ ပဉ္စဟိပိ သတ္တလောကမေဝ ပရိယာဒိယိတွာ ဧတသ္မိံ သဒေဝကာဒိဘေဒေ လောကေ တံ ဒေဝံ ဝါ မနုဿံ ဝါ န ပဿာမီတိ ဒီပေတိ. ဣတော ဝါ ပန သုတွာတိ ဣတော ဝါ ပန မမ သာသနတော သုတွာ အတထာဂတောပိ အတထာဂတသာဝကောပိ အာရာဓေယျ ပရိတောသေယျ. အညထာ အာရာဓနံ နာမ နတ္ထီတိ ဒဿေတိ.

၁၆၆. ဣဒါနိ အတ္တနော တေသံ ပဉှာနံ ဝေယျာကရဏေန စိတ္တာရာဓနံ ဒဿေန္တော ကော စ၊ ဘိက္ခဝေတိအာဒိမာဟ. ကာမဂုဏာတိ ကာမယိတဗ္ဗဋ္ဌေန ကာမာ. ဗန္ဓနဋ္ဌေန ဂုဏာ. ‘‘အနုဇာနာမိ၊ ဘိက္ခဝေ၊ အဟတာနံ ဝတ္ထာနံ ဒွိဂုဏံ သင်္ဃာဋိ’’န္တိ (မဟာဝ. ၃၄၈) ဧတ္ထ ဟိ ပဋလဋ္ဌော ဂုဏဋ္ဌော. ‘‘အစ္စေန္တိ ကာလာ တရယန္တိ ရတ္တိယော၊ ဝယောဂုဏာ အနုပုဗ္ဗံ ဇဟန္တီ’’တိ (သံ. နိ. ၁.၄) ဧတ္ထ ရာသဋ္ဌော ဂုဏဋ္ဌော. ‘‘သတဂုဏာ ဒက္ခိဏာ ပါဋိကင်္ခိတဗ္ဗာ’’တိ (မ. နိ. ၃.၃၇၉) ဧတ္ထ အာနိသံသဋ္ဌော ဂုဏဋ္ဌော. ‘‘အန္တံ အန္တဂုဏံ (ခု. ပါ. ၃ ဒွတ္တိံသာကာရေ၊ ဒီ. နိ. ၂.၃၇၇) ကယိရာ မာလာဂုဏေ ဗဟူ’’တိ (ဓ. ပ. ၅၃) ဧတ္ထ ဗန္ဓနဋ္ဌော ဂုဏဋ္ဌော. ဣဓာပိ ဧသေဝ အဓိပ္ပေတော၊ တေန ဝုတ္တံ ‘‘ဗန္ဓနဋ္ဌေန ဂုဏာ’’တိ. စက္ခုဝိညေယျာတိ စက္ခုဝိညာဏေန ပဿိတဗ္ဗာ. ဧတေနုပါယေန သောတဝိညေယျာဒီသုပိ အတ္ထော ဝေဒိတဗ္ဗော. ဣဋ္ဌာတိ ပရိယိဋ္ဌာ ဝါ ဟောန္တု မာ ဝါ၊ ဣဋ္ဌာရမ္မဏဘူတာတိ အတ္ထော. ကန္တာတိ ကမနီယာ. မနာပါတိ မနဝဍ္ဎနကာ. ပိယရူပါတိ ပိယဇာတိကာ. ကာမူပသံဟိတာတိ အာရမ္မဏံ ကတွာ ဥပ္ပဇ္ဇမာနေန ကာမေန ဥပသံဟိတာ. ရဇနီယာတိ ရဇ္ဇနိယာ၊ ရာဂုပ္ပတ္တိကာရဏဘူတာတိ အတ္ထော.

၁၆၇. ယဒိ မုဒ္ဒါယာတိအာဒီသု မုဒ္ဒါတိ အင်္ဂုလိပဗ္ဗေသု သညံ ဌပေတွာ ဟတ္ထမုဒ္ဒါ. ဂဏနာတိ အစ္ဆိဒ္ဒဂဏနာ. သင်္ခါနန္တိ ပိဏ္ဍဂဏနာ. ယာယ ခေတ္တံ ဩလောကေတွာ ဣဓ ဧတ္တကာ ဝီဟီ ဘဝိဿန္တိ၊ ရုက္ခံ ဩလောကေတွာ ဣဓ ဧတ္တကာနိ ဖလာနိ ဘဝိဿန္တိ၊ အာကာသံ ဩလောကေတွာ ဣမေ အာကာသေ သကုဏာ ဧတ္တကာ နာမ ဘဝိဿန္တီတိ ဇာနန္တိ.

ကသီတိ ကသိကမ္မံ. ဝဏိဇ္ဇာတိ ဇင်္ဃဝဏိဇ္ဇထလဝဏိဇ္ဇာဒိဝဏိပ္ပထော. ဂေါရက္ခန္တိ အတ္တနော ဝါ ပရေသံ ဝါ ဂါဝေါ ရက္ခိတွာ ပဉ္စဂေါရသဝိက္ကယေန ဇီဝနကမ္မံ. ဣဿတ္ထော ဝုစ္စတိ အာဝုဓံ ဂဟေတွာ ဥပဋ္ဌာနကမ္မံ. ရာဇပေါရိသန္တိ အာဝုဓေန ရာဇကမ္မံ ကတွာ ဥပဋ္ဌာနံ. သိပ္ပညတရန္တိ ဂဟိတာဝသေသံ ဟတ္ထိအဿသိပ္ပါဒိ. သီတဿ ပုရက္ခတောတိ လက္ခံ ဝိယ သရဿ သီတဿ ပုရတော၊ သီတေန ဗာဓီယမာနောတိ အတ္ထော. ဥဏှေပိ ဧသေဝ နယော. ဍံသာဒီသု ဍံသာတိ ပိင်္ဂလမက္ခိကာ. မကသာတိ သဗ္ဗမက္ခိကာ၊ သရီသပါတိ ယေ ကေစိ သရိတွာ ဂစ္ဆန္တိ. ရိဿမာနောတိ ရုပ္ပမာနော၊ ဃဋ္ဋိယမာနော. မီယမာနောတိ မရမာနော. အယံ၊ ဘိက္ခဝေတိ၊ ဘိက္ခဝေ၊ အယံ မုဒ္ဒါဒီဟိ ဇီဝိကကပ္ပနံ အာဂမ္မ သီတာဒိပစ္စယော အာဗာဓော. ကာမာနံ အာဒီနဝေါတိ ကာမေသု ဥပဒ္ဒဝေါ၊ ဥပဿဂ္ဂေါတိ အတ္ထော. သန္ဒိဋ္ဌိကောတိ ပစ္စက္ခော သာမံ ပဿိတဗ္ဗော. ဒုက္ခက္ခန္ဓောတိ ဒုက္ခရာသိ. ကာမဟေတူတိအာဒီသု ပစ္စယဋ္ဌေန ကာမာ အဿ ဟေတူတိ ကာမဟေတု. မူလဋ္ဌေန ကာမာ နိဒါနမဿာတိ ကာမနိဒါနော. လိင်္ဂဝိပလ္လာသေန ပန ကာမနိဒါနန္တိ ဝုတ္တော. ကာရဏဋ္ဌေန ကာမာ အဓိကရဏံ အဿာတိ ကာမာဓိကရဏော. လိင်္ဂဝိပလ္လာသေနေဝ ပန ကာမာဓိကရဏန္တိ ဝုတ္တော. ကာမာနမေဝ ဟေတူတိ ဣဒံ နိယမဝစနံ၊ ကာမပစ္စယာ ဥပ္ပဇ္ဇတိယေဝါတိ အတ္ထော.

ဥဋ္ဌဟတောတိ အာဇီဝသမုဋ္ဌာပကဝီရိယေန ဥဋ္ဌဟန္တဿ. ဃဋတောတိ တံ ဝီရိယံ ပုဗ္ဗေနာပရံ ဃဋေန္တဿ. ဝါယမတောတိ ဝါယာမံ ပရက္ကမံ ပယောဂံ ကရောန္တဿ. နာဘိနိပ္ဖဇ္ဇန္တီတိ န နိပ္ဖဇ္ဇန္တိ၊ ဟတ္ထံ နာဘိရုဟန္တိ. သောစတီတိ စိတ္တေ ဥပ္ပန္နဗလဝသောကေန သောစတိ. ကိလမတီတိ ကာယေ ဥပ္ပန္နဒုက္ခေန ကိလမတိ. ပရိဒေဝတီတိ ဝါစာယ ပရိဒေဝတိ. ဥရတ္တာဠိန္တိ ဥရံ တာဠေတွာ. ကန္ဒတီတိ ရောဒတိ. သမ္မောဟံ အာပဇ္ဇတီတိ ဝိသညီ ဝိယ သမ္မူဠှော ဟောတိ. မောဃန္တိ တုစ္ဆံ. အဖလောတိ နိပ္ဖလော. အာရက္ခာဓိကရဏန္တိ အာရက္ခကာရဏာ. ကိန္တီတိ ကေန နု ခေါ ဥပါယေန. ယမ္ပိ မေတိ ယမ္ပိ မယှံ ကသိကမ္မာဒီနိ ကတွာ ဥပ္ပါဒိတံ ဓနံ အဟောသိ. တမ္ပိ နော နတ္ထီတိ တမ္ပိ အမှာကံ ဣဒါနိ နတ္ထိ.

၁၆၈. ပုန စပရံ၊ ဘိက္ခဝေ၊ ကာမဟေတူတိအာဒိနာပိ ကာရဏံ ဒဿေတွာဝ အာဒီနဝံ ဒီပေတိ. တတ္ထ ကာမဟေတူတိ ကာမပစ္စယာ ရာဇာနောပိ ရာဇူဟိ ဝိဝဒန္တိ. ကာမနိဒါနန္တိ ဘာဝနပုံသကံ၊ ကာမေ နိဒါနံ ကတွာ ဝိဝဒန္တီတိ အတ္ထော. ကာမာဓိကရဏန္တိပိ ဘာဝနပုံသကမေဝ၊ ကာမေ အဓိကရဏံ ကတွာ ဝိဝဒန္တီတိ အတ္ထော. ကာမာနမေဝ ဟေတူတိ ဂါမနိဂမနဂရသေနာပတိပုရောဟိတဋ္ဌာနန္တရာဒီနံ ကာမာနမေဝ ဟေတု ဝိဝဒန္တီတိ အတ္ထော. ဥပက္ကမန္တီတိ ပဟရန္တိ. အသိစမ္မန္တိ အသိဉ္စေဝ ခေဋကဖလကာဒီနိ စ. ဓနုကလာပံ သန္နယှိတွာတိ ဓနုံ ဂဟေတွာ သရကလာပံ သန္နယှိတွာ. ဥဘတောဗျူဠန္တိ ဥဘတော ရာသိဘူတံ. ပက္ခန္ဒန္တီတိ ပဝိသန္တိ. ဥသူသူတိ ကဏ္ဍေသု. ဝိဇ္ဇောတလန္တေသူတိ ဝိပရိဝတ္တန္တေသု. တေ တတ္ထာတိ တေ တသ္မိံ သင်္ဂါမေ.

အဒ္ဒါဝလေပနာ ဥပကာရိယောတိ စေတ္ထ မနုဿာ ပါကာရပါဒံ အဿခုရသဏ္ဌာနေန ဣဋ္ဌကာဟိ စိနိတွာ ဥပရိ သုဓာယ လိမ္ပန္တိ. ဧဝံ ကတာ ပါကာရပါဒါ ဥပကာရိယောတိ ဝုစ္စန္တိ. တာ တိန္တေန ကလလေန သိတ္တာ အဒ္ဒါဝလေပနာ နာမ ဟောန္တိ. ပက္ခန္ဒန္တီတိ တာသံ ဟေဋ္ဌာ တိခိဏအယသူလာဒီဟိ ဝိဇ္ဈီယမာနာပိ ပါကာရဿ ပိစ္ဆိလဘာဝေန အာရောဟိတုံ အသက္ကောန္တာပိ ဥပဓာဝန္တိယေဝ. ဆကဏကာယာတိ ကုထိတဂေါမယေန. အဘိဝဂ္ဂေနာတိ သတဒန္တေန. တံ အဋ္ဌဒန္တာကာရေန ကတွာ ‘‘နဂရဒွါရံ ဘိန္ဒိတွာ ပဝိသိဿာမာ’’တိ အာဂတေ ဥပရိဒွါရေ ဌိတာ တဿ ဗန္ဓနယောတ္တာနိ ဆိန္ဒိတွာ တေန အဘိဝဂ္ဂေန ဩမဒ္ဒန္တိ.

၁၆၉. သန္ဓိမ္ပိ ဆိန္ဒန္တီတိ ဃရသန္ဓိမ္ပိ ဆိန္ဒန္တိ. နိလ္လောပန္တိ ဂါမေ ပဟရိတွာ မဟာဝိလောပံ ကရောန္တိ. ဧကာဂါရိကန္တိ ပဏ္ဏာသမတ္တာပိ သဋ္ဌိမတ္တာပိ ပရိဝါရေတွာ ဇီဝဂ္ဂါဟံ ဂဟေတွာ အာဟရာပေန္တိ. ပရိပန္ထေပိ တိဋ္ဌန္တီတိ ပန္ထဒူဟနကမ္မံ ကရောန္တိ. အဍ္ဎဒဏ္ဍကေဟီတိ မုဂ္ဂရေဟိ ပဟာရသာဓနတ္ထံ ဝါ စတုဟတ္ထဒဏ္ဍံ ဒွေဓာ ဆေတွာ ဂဟိတဒဏ္ဍကေဟိ. ဗိလင်္ဂထာလိကန္တိ ကဉ္ဇိယဥက္ခလိကမ္မကာရဏံ၊ တံ ကရောန္တာ သီသကပါလံ ဥပ္ပါဋေတွာ တတ္တံ အယောဂုဠံ သဏ္ဍာသေန ဂဟေတွာ တတ္ထ ပက္ခိပန္တိ၊ တေန မတ္ထလုင်္ဂံ ပက္ကုထိတွာ ဥပရိ ဥတ္တရတိ. သင်္ခမုဏ္ဍိကန္တိ သင်္ခမုဏ္ဍကမ္မကာရဏံ၊ တံ ကရောန္တာ ဥတ္တရောဋ္ဌဥဘတောကဏ္ဏစူဠိကဂဠဝါဋပရိစ္ဆေဒေန စမ္မံ ဆိန္ဒိတွာ သဗ္ဗကေသေ ဧကတော ဂဏ္ဌိံ ကတွာ ဒဏ္ဍကေန ဝလ္လိတွာ ဥပ္ပါဋေန္တိ၊ သဟ ကေသေဟိ စမ္မံ ဥဋ္ဌဟတိ. တတော သီသကဋာဟံ ထူလသက္ခရာဟိ ဃံသိတွာ ဓောဝန္တာ သင်္ခဝဏ္ဏံ ကရောန္တိ.

ရာဟုမုခန္တိ ရာဟုမုခကမ္မကာရဏံ၊ တံ ကရောန္တာ သင်္ကုနာ မုခံ ဝိဝရိတွာ အန္တောမုခေ ဒီပံ ဇာလေန္တိ. ကဏ္ဏစူဠိကာဟိ ဝါ ပဋ္ဌာယ မုခံ နိခါဒနေန ခဏန္တိ. လောဟိတံ ပဂ္ဃရိတွာ မုခံ ပူရေတိ. ဇောတိမာလိကန္တိ သကလသရီရံ တေလပိလောတိကာယ ဝေဌေတွာ အာလိမ္ပန္တိ. ဟတ္ထပဇ္ဇောတိကန္တိ ဟတ္ထေ တေလပိလောတိကာယ ဝေဌေတွာ ဒီပံ ဝိယ ဇာလေန္တိ. ဧရကဝတ္တိကန္တိ ဧရကဝတ္တကမ္မကာရဏံ၊ တံ ကရောန္တာ ဂီဝတော ပဋ္ဌာယ စမ္မဗဒ္ဓေ ကန္တိတွာ ဂေါပ္ဖကေ ဌပေန္တိ. အထ နံ ယောတ္တေဟိ ဗန္ဓိတွာ ကဍ္ဎန္တိ. သော အတ္တနော စမ္မဗဒ္ဓေ အက္ကမိတွာ အက္ကမိတွာ ပတတိ. စီရကဝါသိကန္တိ စီရကဝါသိကကမ္မကာရဏံ၊ တံ ကရောန္တာ တထေဝ စမ္မဗဒ္ဓေ ကန္တိတွာ ကဋိယံ ဌပေန္တိ. ကဋိတော ပဋ္ဌာယ ကန္တိတွာ ဂေါပ္ဖကေသု ဌပေန္တိ. ဥပရိမေဟိ ဟေဋ္ဌိမသရီရံ စီရကနိဝါသနနိဝတ္ထံ ဝိယ ဟောတိ. ဧဏေယျကန္တိ ဧဏေယျကကမ္မကာရဏံ. တံ ကရောန္တာ ဥဘောသု ကပ္ပရေသု စ ဇာဏူသု စ အယဝလယာနိ ဒတွာ အယသူလာနိ ကောဋ္ဋေန္တိ. သော စတူဟိ အယသူလေဟိ ဘူမိယံ ပတိဋ္ဌဟတိ. အထ နံ ပရိဝါရေတွာ အဂ္ဂိံ ကရောန္တိ. ‘‘ဧဏေယျကော ဇောတိပရိဂ္ဂဟော ယထာ’’တိ အာဂတဋ္ဌာနေပိ ဣဒမေဝ ဝုတ္တံ. တံ ကာလေန ကာလံ သူလာနိ အပနေတွာ စတူဟိ အဋ္ဌိကောဋီဟိယေဝ ဌပေန္တိ. ဧဝရူပါ ကာရဏာ နာမ နတ္ထိ.

ဗဠိသမံသိကန္တိ ဥဘတောမုခေဟိ ဗဠိသေဟိ ပဟရိတွာ စမ္မမံသနှာရူနိ ဥပ္ပါဋေန္တိ. ကဟာပဏိကန္တိ သကလသရီရံ တိဏှာဟိ ဝါသီဟိ ကောဋိတော ပဋ္ဌာယ ကဟာပဏမတ္တံ ကဟာပဏမတ္တံ ပါတေန္တာ ကောဋ္ဋေန္တိ. ခါရာပတစ္ဆိကန္တိ သရီရံ တတ္ထ တတ္ထ အာဝုဓေဟိ ပဟရိတွာ ကောစ္ဆေဟိ ခါရံ ဃံသန္တိ. စမ္မသံသနှာရူနိ ပဂ္ဃရိတွာ သဝန္တိ. အဋ္ဌိကသင်္ခလိကာဝ တိဋ္ဌတိ. ပလိဃပရိဝတ္တိကန္တိ ဧကေန ပဿေန နိပဇ္ဇာပေတွာ ကဏ္ဏစ္ဆိဒ္ဒေ အယသူလံ ကောဋ္ဋေတွာ ပထဝိယာ ဧကာဗဒ္ဓံ ကရောန္တိ. အထ နံ ပါဒေ ဂဟေတွာ အာဝိဇ္ဈန္တိ. ပလာလပီဌကန္တိ ဆေကော ကာရဏိကော ဆဝိစမ္မံ အစ္ဆိန္ဒိတွာ နိသဒပေါတေဟိ အဋ္ဌီနိ ဘိန္ဒိတွာ ကေသေသု ဂဟေတွာ ဥက္ခိပန္တိ. မံသရာသိယေဝ ဟောတိ၊ အထ နံ ကေသေဟေဝ ပရိယောနန္ဓိတွာ ဂဏှန္တိ. ပလာလဝဋ္ဋိံ ဝိယ ကတွာ ပန ဝေဌေန္တိ. သုနခေဟိပီတိ ကတိပယာနိ ဒိဝသာနိ အာဟာရံ အဒတွာ ဆာတကေဟိ သုနခေဟိ ခါဒါပေန္တိ. တေ မုဟုတ္တေန အဋ္ဌိသင်္ခလိကမေဝ ကရောန္တိ. သမ္ပရာယိကောတိ သမ္ပရာယေ ဒုတိယတ္တဘာဝေ ဝိပါကောတိ အတ္ထော.

၁၇၀. ဆန္ဒရာဂဝိနယော ဆန္ဒရာဂပ္ပဟာနန္တိ နိဗ္ဗာနံ. နိဗ္ဗာနဉှိ အာဂမ္မ ကာမေသု ဆန္ဒရာဂေါ ဝိနီယတိ စေဝ ပဟီယတိ စ၊ တသ္မာ နိဗ္ဗာနံ ဆန္ဒရာဂဝိနယော ဆန္ဒရာဂပ္ပဟာနန္တိ စ ဝုတ္တံ. သာမံ ဝါ ကာမေ ပရိဇာနိဿန္တီတိ သယံ ဝါ တေ ကာမေ တီဟိ ပရိညာဟိ ပရိဇာနိဿန္တိ. တထတ္တာယာတိ တထဘာဝါယ. ယထာပဋိပန္နောတိ ယာယ ပဋိပဒါယ ပဋိပန္နော.

၁၇၁. ခတ္တိယကညာ ဝါတိအာဒိ အပရိတ္တေန ဝိပုလေန ကုသလေန ဂဟိတပဋိသန္ဓိကံ ဝတ္ထာလင်္ကာရာဒီနိ လဘနဋ္ဌာနေ နိဗ္ဗတ္တံ ဒဿေတုံ ဝုတ္တံ. ပန္နရသဝဿုဒ္ဒေသိကာတိ ပန္နရသဝဿဝယာ. ဒုတိယပဒေပိ ဧသေဝ နယော. ဝယပဒေသံ ကသ္မာ ဂဏှာတိ? ဝဏ္ဏသမ္ပတ္တိဒဿနတ္ထံ. မာတုဂါမဿ ဟိ ဒုဂ္ဂတကုလေ နိဗ္ဗတ္တဿာပိ ဧတသ္မိံ ကာလေ ထောကံ ထောကံ ဝဏ္ဏာယတနံ ပသီဒတိ. ပုရိသာနံ ပန ဝီသတိဝဿကာလေ ပဉ္စဝီသတိဝဿကာလေ ပသန္နံ ဟောတိ. နာတိဒီဃာတိအာဒီဟိ ဆဒေါသဝိရဟိတံ သရီရသမ္ပတ္တိံ ဒီပေတိ. ဝဏ္ဏနိဘာတိ ဝဏ္ဏောယေဝ.

ဇိဏ္ဏန္တိ ဇရာဇိဏ္ဏံ. ဂေါပါနသိဝင်္ကန္တိ ဂေါပါနသီ ဝိယ ဝင်္ကံ. ဘောဂ္ဂန္တိ ဘဂ္ဂံ၊ ဣမိနာပိဿ ဝင်္ကဘာဝမေဝ ဒီပေတိ. ဒဏ္ဍပရာယဏန္တိ ဒဏ္ဍပဋိသရဏံ ဒဏ္ဍဒုတိယံ. ပဝေဓမာနန္တိ ကမ္ပမာနံ. အာတုရန္တိ ဇရာတုရံ. ခဏ္ဍဒန္တန္တိ ဇိဏ္ဏဘာဝေန ခဏ္ဍိတဒန္တံ. ပလိတကေသန္တိ ပဏ္ဍရကေသံ. ဝိလူနန္တိ လုဉ္စိတွာ ဂဟိတကေသံ ဝိယ ခလ္လာဋံ. ခလိတသိရန္တိ မဟာခလ္လာဋသီသံ. ဝလိနန္တိ သဉ္ဇာတဝလိံ. တိလကာဟတဂတ္တန္တိ သေတကာဠတိလကေဟိ ဝိကိဏ္ဏသရီရံ. အာဗာဓိကန္တိ ဗျာဓိကံ. ဒုက္ခိတန္တိ ဒုက္ခပတ္တံ.

ဗာဠှဂိလာနန္တိ အဓိမတ္တဂိလာနံ. သိဝထိကာယ ဆဍ္ဍိတန္တိ အာမကသုသာနေ ပါတိတံ. သေသမေတ္ထ သတိပဋ္ဌာနေ ဝုတ္တမေဝ. ဣဓာပိ နိဗ္ဗာနံယေဝ ဆန္ဒရာဂဝိနယော.

၁၇၃. နေဝ တသ္မိံ သမယေ အတ္တဗျာဗာဓာယာတိ တသ္မိံ သမယေ အတ္တနောပိ ဒုက္ခတ္ထာယ န စေတေတိ. အဗျာဗဇ္ဈံယေဝါတိ နိဒ္ဒုက္ခမေဝ.

၁၇၄. ယံ၊ ဘိက္ခဝေ၊ ဝေဒနာ အနိစ္စာတိ၊ ဘိက္ခဝေ၊ ယသ္မာ ဝေဒနာ အနိစ္စာ၊ တသ္မာ အယံ အနိစ္စာဒိအာကာရောဝ ဝေဒနာယ အာဒီနဝေါတိ အတ္ထော၊ နိဿရဏံ ဝုတ္တပ္ပကာရမေဝါတိ.

ပပဉ္စသူဒနိယာ မဇ္ဈိမနိကာယဋ္ဌကထာယ

မဟာဒုက္ခက္ခန္ဓသုတ္တဝဏ္ဏနာ နိဋ္ဌိတာ.