၇. ကဏ္ဍကဝိမာနဝဏ္ဏနာ

ပုဏ္ဏမာသေ ယထာ စန္ဒောတိ ကဏ္ဍကဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တေန စ သမယေန အာယသ္မာ မဟာမောဂ္ဂလ္လာနော ဟေဋ္ဌာ ဝုတ္တနယေနေဝ ဒေဝစာရိကံ စရန္တော တာဝတိံသဘဝနံ ဂတော. တသ္မိံ ခဏေ ကဏ္ဍကော ဒေဝပုတ္တော သကဘဝနတော နိက္ခမိတွာ ဒိဗ္ဗယာနံ အဘိရုဟိတွာ မဟန္တေန ပရိဝါရေန မဟတိယာ ဒေဝိဒ္ဓိယာ ဥယျာနံ ဂစ္ဆန္တော အာယသ္မန္တံ မဟာမောဂ္ဂလ္လာနံ ဒိသွာ သဉ္ဇာတဂါရဝဗဟုမာနော သဟသာ ယာနတော ဩရုယှ ထေရံ ဥပသင်္ကမိတွာ ပဉ္စပတိဋ္ဌိတေန ဝန္ဒိတွာ သိရသ္မိံ အဉ္ဇလိံ ပဂ္ဂယှ အဋ္ဌာသိ. အထ နံ ထေရော –

၁၁၇၁. ‘‘ပုဏ္ဏမာသေ ယထာ စန္ဒော၊ နက္ခတ္တပရိဝါရိတော၊

သမန္တာ အနုပရိယာတိ၊ တာရကာဓိပတီ သသီ.

၁၁၇၂. ‘‘တထူပမံ ဣဒံ ဗျမှံ၊ ဒိဗ္ဗံ ဒေဝပုရမှိ စ၊

အတိရောစတိ ဝဏ္ဏေန၊ ဥဒယန္တောဝ ရံသိမာ.

၁၁၇၃. ‘‘ဝေဠူရိယသုဝဏ္ဏဿ၊ ဖလိကာ ရူပိယဿ စ၊

မသာရဂလ္လမုတ္တာဟိ၊ လောဟိတင်္ဂမဏီဟိ စ.

၁၁၇၄. ‘‘စိတြာ မနောရမာ ဘူမိ၊ ဝေဠူရိယဿ သန္ထတာ၊

ကူဋာဂါရာ သုဘာ ရမ္မာ၊ ပါသာဒေါ တေ သုမာပိတော.

၁၁၇၅. ‘‘ရမ္မာ စ တေ ပေါက္ခရဏီ၊ ပုထုလောမနိသေဝိတာ၊

အစ္ဆောဒကာ ဝိပ္ပသန္နာ၊ သောဏ္ဏဝါလုကသန္ထတာ.

၁၁၇၆. ‘‘နာနာပဒုမသဉ္ဆန္နာ၊ ပုဏ္ဍရီကသမောတတာ၊

သုရဘိံ သမ္ပဝါယန္တိ၊ မနုညာ မာတုတေရိတာ.

၁၁၇၇. ‘‘တဿာ တေ ဥဘတော ပဿေ၊ ဝနဂုမ္ဗာ သုမာပိတာ၊

ဥပေတာ ပုပ္ဖရုက္ခေဟိ၊ ဖလရုက္ခေဟိ စူဘယံ.

၁၁၇၈. ‘‘သောဝဏ္ဏပါဒေ ပလ္လင်္ကေ၊ မုဒုကေ ဂေါနကတ္ထတေ၊

နိသိန္နံ ဒေဝရာဇံဝ၊ ဥပတိဋ္ဌန္တိ အစ္ဆရာ.

၁၁၇၉. ‘‘သဗ္ဗာဘရဏသဉ္ဆန္နာ၊ နာနာမာလာဝိဘူသိတာ၊

ရမေန္တိ တံ မဟိဒ္ဓိကံ၊ ဝသဝတ္တီဝ မောဒသိ.

၁၁၈၀. ‘‘ဘေရိသင်္ခမုဒိင်္ဂါဟိ၊ ဝီဏာဟိ ပဏဝေဟိ စ၊

ရမသိ ရတိသမ္ပန္နော၊ နစ္စဂီတေ သုဝါဒိတေ.

၁၁၈၁. ‘‘ဒိဗ္ဗာ တေ ဝိဝိဓာ ရူပါ၊ ဒိဗ္ဗာ သဒ္ဒါ အထော ရသာ၊

ဂန္ဓာ စ တေ အဓိပ္ပေတာ၊ ဖောဋ္ဌဗ္ဗာ စ မနောရမာ.

၁၁၈၂. ‘‘တသ္မိံ ဝိမာနေ ပဝရေ၊ ဒေဝပုတ္တ မဟပ္ပဘော၊

အတိရောစသိ ဝဏ္ဏေန၊ ဥဒယန္တောဝ ဘာဏုမာ.

၁၁၈၃. ‘‘ဒါနဿ တေ ဣဒံ ဖလံ၊ အထော သီလဿ ဝါ ပန၊

အထော အဉ္ဇလိကမ္မဿ၊ တံ မေ အက္ခာဟိ ပုစ္ဆိတော’’တိ. –

အဓိဂတသမ္ပတ္တိကိတ္တနမုခေန ကတကမ္မံ ပုစ္ဆိ.

၁၁၈၄. ‘‘သော ဒေဝပုတ္တော အတ္တမနော၊ မောဂ္ဂလ္လာနေန ပုစ္ဆိတော၊

ပဉှံ ပုဋ္ဌော ဝိယာကာသိ၊ ယဿ ကမ္မဿိဒံ ဖလံ’’.

၁၁၈၅. ‘‘အဟံ ကပိလဝတ္ထုသ္မိံ၊ သာကိယာနံ ပုရုတ္တမေ၊

သုဒ္ဓေါဒနဿ ပုတ္တဿ၊ ကဏ္ဍကော သဟဇော အဟံ.

၁၁၈၆. ‘‘ယဒါ သော အဍ္ဎရတ္တာယံ၊ ဗောဓာယ မဘိနိက္ခမိ၊

သော မံ မုဒူဟိ ပါဏီဟိ၊ ဇာလိတမ္ဗနခေဟိ စ.

၁၁၈၇. ‘‘သတ္ထိံ အာကောဋယိတွာန၊ ဝဟ သမ္မာတိ စဗြဝိ၊

‘အဟံ လောကံ တာရယိဿံ၊ ပတ္တော သမ္ဗောဓိမုတ္တမံ’.

၁၁၈၈. ‘‘တံ မေ ဂိရံ သုဏန္တဿ၊ ဟာသော မေ ဝိပုလော အဟု၊

ဥဒဂ္ဂစိတ္တော သုမနော၊ အဘိသီသိံ တဒါ အဟံ.

၁၁၈၉. ‘‘အဘိရူဠှဉ္စ မံ ဉတွာ၊ သကျပုတ္တံ မဟာယသံ၊

ဥဒဂ္ဂစိတ္တော မုဒိတော၊ ဝဟိဿံ ပုရိသုတ္တမံ.

၁၁၉၀. ‘‘ပရေသံ ဝိဇိတံ ဂန္တွာ၊ ဥဂ္ဂတသ္မိံ ဒိဝါကရေ၊

မမံ ဆန္နဉ္စ ဩဟာယ၊ အနပေက္ခော သော အပက္ကမိ.

၁၁၉၁. ‘‘တဿ တမ္ဗနခေ ပါဒေ၊ ဇိဝှါယ ပရိလေဟိသံ၊

ဂစ္ဆန္တဉ္စ မဟာဝီရံ၊ ရုဒမာနော ဥဒိက္ခိသံ.

၁၁၉၂. ‘‘အဒဿနေနဟံ တဿ၊ သကျပုတ္တဿ သိရီမတော၊

အလတ္ထံ ဂရုကာဗာဓံ၊ ခိပ္ပံ မေ မရဏံ အဟု.

၁၁၉၃. ‘‘တဿေဝ အာနုဘာဝေန၊ ဝိမာနံ အာဝသာမိဒံ၊

သဗ္ဗကာမဂုဏောပေတံ၊ ဒေဝေါ ဒေဝပုရမှိဝ.

၁၁၉၄. ‘‘ယဉ္စ မေ အဟုဝါ ဟာသော၊ သဒ္ဒံ သုတွာန ဗောဓိယာ၊

တေနေဝ ကုသလမူလေန၊ ဖုသိဿံ အာသဝက္ခယံ.

၁၁၉၅. ‘‘သစေ ဟိ ဘန္တေ ဂစ္ဆေယျာသိ၊ သတ္ထု ဗုဒ္ဓဿ သန္တိကေ၊

မမာပိ နံ ဝစနေန၊ သိရသာ ဝဇ္ဇာသိ ဝန္ဒနံ.

၁၁၉၆. ‘‘အဟမ္ပိ ဒဋ္ဌုံ ဂစ္ဆိဿံ၊ ဇိနံ အပ္ပဋိပုဂ္ဂလံ၊

ဒုလ္လဘံ ဒဿနံ ဟောတိ၊ လောကနာထာန တာဒိန’’န္တိ. –

သောပိ အတ္တနာ ကတကမ္မံ ကထေသိ. အယဉှိ အနန္တရေ အတ္တဘာဝေ အမှာကံ ဗောဓိသတ္တေန သဟဇာတော ကဏ္ဍကော အဿရာဇာ အဟောသိ. သော အဘိနိက္ခမနသမယေ အဘိရုဠှော တေနေဝ ရတ္တာဝသေသေန တီဏိ ရဇ္ဇာနိ မဟာပုရိသံ အတိက္ကမာပေတွာ အနောမာနဒီတီရံ သမ္ပာပေသိ. အထ သော မဟာသတ္တေန သူရိယေ ဥဂ္ဂတေ ဃဋိကာရမဟာဗြဟ္မုနာ ဥပနီတာနိ ပတ္တစီဝရာနိ ဂဟေတွာ ပဗ္ဗဇိတွာ ဆန္နေန သဒ္ဓိံ ကပိလဝတ္ထုံ ဥဒ္ဒိဿ ဝိဿဇ္ဇိတော. သိနေဟဘာရိကေန ဟဒယေန မဟာပုရိသဿ ပါဒေ အတ္တနော ဇိဝှါယ လေဟိတွာ ပသာဒသောမ္မာနိ အက္ခီနိ ဥမ္မီလေတွာ ယာဝ ဒဿနပထာ ဩလောကေန္တော ဒဿနူပစာရံ ပန အတိက္ကန္တေ လောကနာထေ ‘‘ဧဝံဝိဓံ နာမ လောကဂ္ဂနာယကံ မဟာပုရိသံ အဟံ ဝဟိံ၊ သဖလံ ဝတ မေ သရီရံ အဟောသီ’’တိ ပသန္နမာနသော ဟုတွာ ပုန စိရကာလံ သင်္ဂတဿ ပေမဿ ဝသေန ဝိယောဂဒုက္ခံ အသဟန္တော ဘာဝိနိယာ ဒိဗ္ဗသမ္ပတ္တိယာ ဝသေန ဓမ္မတာယ စောဒိယမာနော ကာလံ ကတွာ တာဝတိံသဘဝနေ နိဗ္ဗတ္တိ. တံ သန္ဓာယ ဝုတ္တံ ‘‘ပုဏ္ဏမာသေ ယထာ စန္ဒော။ပေ။ အဟံ ကပိလဝတ္ထုသ္မိ’’န္တိအာဒိ.

၁၁၇၁. တတ္ထ ပုဏ္ဏမာသေတိ ပုဏ္ဏမာသိယံ သုက္ကပက္ခေ ပန္နရသိယံ. တာရကာဓိပတီတိ တာရကာနံ အဓိပတိ. သသီတိ သသလဉ္ဆနဝါ. ‘‘တာရကာဓိပ ဒိဿတီ’’တိ ကေစိ ပဌန္တိ၊ တေသံ တာရကာဓိပါတိ အဝိဘတ္တိကနိဒ္ဒေသော၊ တာရကာနံ အဓိပေါ ဟုတွာ ဒိဿတိ အနုပရိယာတိ စာတိ ယောဇနာ ကာတဗ္ဗာ.

၁၁၇၂. ဒိဗ္ဗံ ဒေဝပုရမှိ စာတိ ဒေဝပုရသ္မိမ္ပိ ဒိဗ္ဗံ. ယထာ မနုဿာနံ ဌာနတော ဒေဝပုရံ ဥတ္တမံ၊ ဧဝံ ဒေဝပုရတော စာပိ ဣဒံ တဝ ဝိမာနံ ဥတ္တမန္တိ ဒဿေတိ. တေနာဟ ‘‘အတိရောစတိ ဝဏ္ဏေန၊ ဥဒယန္တောဝ ရံသိမာ’’တိ၊ ဥဂ္ဂစ္ဆန္တော သူရိယော ဝိယာတိ အတ္ထော.

၁၁၇၃. ဝေဠူရိယသုဝဏ္ဏဿာတိ ဝေဠုရိယေန သုဝဏ္ဏေန စ ဣဒံ ဗျမှံ နိမ္မိတန္တိ ဝစနသေသေန ယောဇနာ. ဖလိကာတိ ဖလိကမဏိနာ.

၁၁၇၅. ပေါက္ခရဏီတိ ပေါက္ခရဏိယော.

၁၁၇၇-၈. တဿာတိ တဿာ ပေါက္ခရဏိယာ. ဝနဂုမ္ဗာတိ ဥယျာနေ သုပုပ္ဖဂစ္ဆေ သန္ဓာယ ဝဒတိ. ဒေဝရာဇံဝါတိ သက္ကံ ဝိယ. ဥပတိဋ္ဌန္တီတိ ဥပဋ္ဌာနံ ကရောန္တိ.

၁၁၇၉. သဗ္ဗာဘရဏသဉ္ဆန္နာတိ သဗ္ဗေဟိ ဣတ္ထာလင်္ကာရေဟိ ပဋိစ္ဆာဒိတာ၊ သဗ္ဗသော ဝိဘူသိတသရီရာတိ အတ္ထော. ဝသဝတ္တီဝါတိ ဝသဝတ္တိဒေဝရာဇာ ဝိယ.

၁၁၈၀. ဘေရိသင်္ခမုဒိင်္ဂါဟီတိ လိင်္ဂဝိပလ္လာသေန ဝုတ္တံ၊ ဘေရီဟိ စ သင်္ခေဟိ စ မုဒိင်္ဂေဟိ စာတိ ယောဇနာ. ရတိသမ္ပန္နောတိ ဒိဗ္ဗာယ ရတိယာ သမင်္ဂီဘူတော. နစ္စဂီတေ သုဝါဒိတေတိ နစ္စေ စ ဂီတေ စ သုန္ဒရေ ဝါဒိတေ စ၊ နစ္စနေ စ ဂါယနေ စ သုန္ဒရေ ဝါဒိတေ စ ဟေတုဘူတေ. နိမိတ္တတ္ထေ ဟိ ဧတံ ဘုမ္မံ၊ ပဝတ္တိတေတိ ဝါ ဝစနသေသော.

၁၁၈၁. ဒိဗ္ဗာ တေ ဝိဝိဓာ ရူပါတိ ဒေဝလောကပရိယာပန္နာ နာနပ္ပကာရာ စက္ခုဝိညေယျာ ရူပါ တုယှံ အဓိပ္ပေတာ ယထာဓိပ္ပေတာ မနောရမာ ဝိဇ္ဇန္တီတိ ကိရိယာပဒံ အာနေတွာ ယောဇေတဗ္ဗံ. ဒိဗ္ဗာ သဒ္ဒါတိအာဒီသုပိ ဧသေဝ နယော.

၁၁၈၅. ကဏ္ဍကော သဟဇော အဟန္တိ ဧတ္ထ အဟန္တိ နိပါတမတ္တံ. ‘‘အဟူ’’တိ ကေစိ ပဋ္ဌန္တိ၊ ကဏ္ဍကော နာမ အဿရာဇာ မဟာသတ္တေန သဟ ဧကသ္မိံယေဝ ဒိဝသေ ဇာတတ္တာ သဟဇော အဟောသိန္တိ အတ္ထော.

၁၁၈၆. အဍ္ဎရတ္တာယန္တိ အဍ္ဎရတ္တိယံ၊ မဇ္ဈိမယာမသမယေတိ အတ္ထော. ဗောဓာယ မဘိနိက္ခမီတိ မ-ကာရော ပဒသန္ဓိကရော၊ အဘိသမ္ဗောဓိအတ္ထံ မဟာဘိနိက္ခမနံ နိက္ခမီတိ အတ္ထော. မုဒူဟိ ပါဏီဟီတိ မုဒုဟတ္ထတံ မဟာပုရိသလက္ခဏံ ဝဒတိ. ဇာလိတမ္ဗနခေဟီတိ ဇာလဝန္တေဟိ အဘိလောဟိတနခေဟိ. တေန ဇာလဟတ္ထတံ မဟာပုရိသလက္ခဏံ တမ္ဗနခတံ အနုဗျဉ္ဇနဉ္စ ဒဿေတိ.

၁၁၈၇. သတ္ထိ နာမ ဇင်္ဃာ၊ ဣဓ ပန သတ္ထိနော အာသန္နဋ္ဌာနဘူတော ဦရုပ္ပဒေသော ‘‘သတ္ထီ’’တိ ဝုတ္တော. အာကောဋယိတွာနာတိ အပ္ပေါဌေတွာ. ‘‘ဝဟ သမ္မာ’’တိ စဗြဝီတိ ‘‘သမ္မ ကဏ္ဍက၊ အဇ္ဇေကရတ္တိံ မံ ဝဟ၊ မယှံ ဩပဝုယှံ ဟောဟီ’’တိ စ ကထေသိ. ဝဟနေ ပန ပယောဇနံ တဒါ မဟာသတ္တေန ဒဿိတံ ဝဒန္တော ‘‘အဟံ လောကံ တာရယိဿံ၊ ပတ္တော သမ္ဗောဓိမုတ္တမ’’န္တိ အာဟ. တေန ‘‘အဟံ ဥတ္တမံ အနုတ္တရံ သမ္မာသမ္ဗောဓိံ ပတ္တော အဓိဂတော ဟုတွာ သဒေဝကံ လောကံ သံသာရမဟောဃတော တာရယိဿာမိ၊ တသ္မာ နယိဒံ ဂမနံ ယံကိဉ္စီတိ စိန္တေယျာသီ’’တိ ဂမနေ ပယောဇနဿ အနုတ္တရဘာဝံ ဒဿေတိ.

၁၁၈၈-၉. ဟာသောတိ တုဋ္ဌိ. ဝိပုလောတိ မဟာဥဠာရော. အဘိသီသိန္တိ အာသိသိံ ဣစ္ဆိံ သမ္ပဋိစ္ဆိံ. အဘိရူဠှဉ္စ မံ ဉတွာ၊ သကျပုတ္တံ မဟာယသန္တိ ပတ္ထဋဝိပုလယသံ သကျရာဇပုတ္တံ မဟာသတ္တံ မံ အဘိရုယှ နိသိန္နံ ဇာနိတွာ. ဝဟိဿန္တိ နေသိံ.

၁၁၉၀-၉၁. ပရေသန္တိ ပရရာဇူနံ. ဝိဇိတန္တိ ဒေသံ ပရရဇ္ဇံ. ဩဟာယာတိ ဝိဿဇ္ဇိတွာ. အပက္ကမီတိ အပက္ကမိတုံ အာရဘိ. ‘‘ပရိဗ္ဗဇီ’’တိ စ ပဌန္တိ. ပရိလေဟိသန္တိ ပရိတော လေဟိံ. ဥဒိက္ခိသန္တိ ဩလောကေသိံ.

၁၁၉၂-၃. ဂရုကာဗာဓန္တိ ဂရုကံ ဗာဠှံ အာဗာဓံ၊ မရဏန္တိကံ ဒုက္ခန္တိ အတ္ထော. တေနာဟ ‘‘ခိပ္ပံ မေ မရဏံ အဟူ’’တိ. သော ဟိ အနေကာသု ဇာတီသု မဟာသတ္တေန ဒဠှဘတ္တိကော ဟုတွာ အာဂတော၊ တသ္မာ ဝိယောဂဒုက္ခံ သဟိတုံ နာသက္ခိ၊ ‘‘သမ္မာသမ္ဗောဓိံ အဓိဂန္တုံ နိက္ခန္တော’’တိ ပန သုတွာ နိရာမိသံ ဥဠာရံ ပီတိသောမနဿဉ္စ ဥပ္ပဇ္ဇိ၊ တေန မရဏာနန္တရံ တာဝတိံသေသု နိဗ္ဗတ္တိ၊ ဥဠာရာ စဿ ဒိဗ္ဗသမ္ပတ္တိယော ပါတုရဟေသုံ. တေန ဝုတ္တံ ‘‘တဿေဝ အာနုဘာဝေနာ’’တိ၊ ဌာနဂတဿ ပသာဒမယပုညဿ ဗလေန. ဒေဝေါ ဒေဝပုရမှိဝါတိ တာဝတိံသဘဝနေ သက္ကော ဒေဝရာဇာ ဝိယ.

၁၁၉၄. ယဉ္စ မေ အဟုဝါ ဟာသော၊ သဒ္ဒံ သုတွာန ဗောဓိယာတိ ‘‘ပတ္တော သမ္ဗောဓိမုတ္တမ’’န္တိ ပဌမတရံ ဗောဓိသဒ္ဒံ သုတွာ တဒါ မယှံ ဟာသော အဟု၊ ယံ ဟာသဿ ဘဝနံ သုဿနံ၊ တေနေဝ ကုသလမူလေန တေနေဝ ကုသလဗီဇေန ဖုသိဿန္တိ ဖုသိဿာမိ ပါပုဏိဿာမိ.

၁၁၉၅. ဧဝံ ဒေဝပုတ္တော ယထာဓိဂတာယ အနာဂတာယ ဘဝသမ္ပတ္တိယာ ကာရဏဘူတံ အတ္တနော ကုသလကမ္မံ ကထေန္တော ဣဒါနိ အတ္တနာ ဘဂဝတော သန္တိကံ ဂန္တုကာမောပိ ပုရေတရံ ထေရေန သတ္ထု ဝန္ဒနံ ပေသေန္တော ‘‘သစေ’’တိ ဂါထမာဟ. တတ္ထ သစေ ဂစ္ဆေယျာသီတိ ယဒိ ဂမိဿသိ. ‘‘သစေ ဂစ္ဆသီ’’တိ ကေစိ ပဌန္တိ၊ သော ဧဝတ္ထော. မမာပိ နံ ဝစနေနာတိ န ကေဝလံ တဝ သဘာဝေနေဝ၊ အထ ခေါ မမာပိ ဝစနေန ဘဂဝန္တံ. ဝဇ္ဇာသီတိ ဝဒေယျာသိ၊ မမာပိ သိရသာ ဝန္ဒနန္တိ ယောဇနာ.

၁၁၉၆. ယဒိပိ ဒါနိ ဝန္ဒနဉ္စ ပေသေမိ၊ ပေသေတွာ ဧဝ ပန န တိဋ္ဌာမီတိ ဒဿေန္တော အာဟ ‘‘အဟမ္ပိ ဒဋ္ဌုံ ဂစ္ဆိဿံ၊ ဇိနံ အပ္ပဋိပုဂ္ဂလ’’န္တိ. ဂမနေ ပန ဒဠှတရံ ကာရဏံ ဒဿေတုံ ‘‘ဒုလ္လဘံ ဒဿနံ ဟောတိ၊ လောကနာထာန တာဒိန’’န္တိ အာဟ.

၁၁၉၇. ‘‘သော ကတညူ ကတဝေဒီ၊ သတ္ထာရံ ဥပသင်္ကမိ၊

သုတွာ ဂိရံ စက္ခုမတော၊ ဓမ္မစက္ခုံ ဝိသောဓယိ.

၁၁၉၈. ‘‘ဝိသောဓေတွာ ဒိဋ္ဌိဂတံ၊ ဝိစိကိစ္ဆံ ဝတာနိ စ၊

ဝန္ဒိတွာ သတ္ထုနော ပါဒေ၊ တတ္ထေဝန္တရဓာယထာ’’တိ. –

ဣမာ ဒွေ ဂါထာ သင်္ဂီတိကာရေဟိ ဌပိတာ.

၁၁၉၇. တတ္ထ သုတွာ ဂိရံ စက္ခုမတောတိ ပဉ္စဟိ စက္ခူဟိ စက္ခုမတော သမ္မာသမ္ဗုဒ္ဓဿ ဝစနံ သုတွာ. ဓမ္မစက္ခုန္တိ သောတာပတ္တိမဂ္ဂံ. ဝိသောဓယီတိ အဓိဂစ္ဆိ. အဓိဂမောယေဝ ဟိ တဿ ဝိသောဓနံ.

၁၁၉၈. ဝိသောဓေတွာ ဒိဋ္ဌိဂတန္တိ ဒိဋ္ဌိဂတံ သမုဂ္ဃါတေတွာ. ဝိစိကိစ္ဆံ ဝတာနိ စာတိ သောဠသဝတ္ထုကံ အဋ္ဌဝတ္ထုကဉ္စ ဝိစိကိစ္ဆဉ္စ ‘‘သီလဗ္ဗတေဟိ သုဒ္ဓီ’’တိ ပဝတ္တနကသီလဗ္ဗတပရာမာသေ စ ဝိသောဓယီတိ ယောဇနာ. တတ္ထ ဟိ သဟ ပရိယာယေဟိ တထာ ပဝတ္တာ ပရာမာသာ ‘‘ဝတာနီ’’တိ ဝုတ္တံ. သေသံ ဝုတ္တနယမေဝ.

ကဏ္ဍကဝိမာနဝဏ္ဏနာ နိဋ္ဌိတာ.