၈. အနေကဝဏ္ဏဝိမာနဝဏ္ဏနာ

အနေကဝဏ္ဏံ ဒရသောကနာသနန္တိ အနေကဝဏ္ဏဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တေန သမယေန အာယသ္မာ မဟာမောဂ္ဂလ္လာနော ဟေဋ္ဌာ ဝုတ္တနယေန ဒေဝစာရိကံ စရန္တော တာဝတိံသဘဝနံ အဂမာသိ. အထ နံ အနေကဝဏ္ဏော ဒေဝပုတ္တော ဒိသွာ သဉ္ဇာတဂါရဝဗဟုမာနော ဥပသင်္ကမိတွာ အဉ္ဇလိံ ပဂ္ဂယှ အဋ္ဌာသိ. ထေရော –

၁၁၉၉. ‘‘အနေကဝဏ္ဏံ ဒရသောကနာသနံ၊ ဝိမာနမာရုယှ အနေကစိတ္တံ၊

ပရိဝါရိတော အစ္ဆရာသင်္ဂဏေန၊ သုနိမ္မိတော ဘူတပတီဝ မောဒသိ.

၁၂၀၀. ‘‘သမဿမော နတ္ထိ ကုတော ပနုတ္တရော၊ ယသေန ပုညေန စ ဣဒ္ဓိယာ စ၊

သဗ္ဗေ စ ဒေဝါ တိဒသဂဏာ သမေစ္စ၊ တံ တံ နမဿန္တိ သသိံဝ ဒေဝါ၊

ဣမာ စ တေ အစ္ဆရာယော သမန္တတော၊ နစ္စန္တိ ဂါယန္တိ ပမောဒယန္တိ.

၁၂၀၁. ‘‘ဒေဝိဒ္ဓိပတ္တောသိ မဟာနုဘာဝေါ၊

မနုဿဘူတော ကိမကာသိ ပုညံ၊

ကေနာသိ ဧဝံ ဇလိတာနုဘာဝေါ၊

ဝဏ္ဏော စ တေ သဗ္ဗဒိသာ ပဘာသတီ’’တိ. –

အဓိဂတသမ္ပတ္တိကိတ္တနမုခေန ကတကမ္မံ ပုစ္ဆိ. တံ ဒဿေတုံ –

၁၂၀၂. ‘‘သော ဒေဝပုတ္တော အတ္တမနော။ပေ။ယဿ ကမ္မဿိဒံ ဖလ’’န္တိ. –

ဝုတ္တံ. သောပိ –

၁၂၀၃. ‘‘အဟံ ဘဒန္တေ အဟုဝါသိ ပုဗ္ဗေ၊ သုမေဓနာမဿ ဇိနဿ သာဝကော၊

ပုထုဇ္ဇနော အနနုဗောဓောဟမသ္မိ၊ သော သတ္တ ဝဿာနိ ပရိဗ္ဗဇိဿဟံ.

၁၂၀၄. ‘‘သောဟံ သုမေဓဿ ဇိနဿ သတ္ထုနော၊ ပရိနိဗ္ဗုတဿောဃတိဏ္ဏဿ တာဒိနော၊

ရတနုစ္စယံ ဟေမဇာလေန ဆန္နံ၊ ဝန္ဒိတွာ ထူပသ္မိံ မနံ ပသာဒယိံ.

၁၂၀၅. ‘‘န မာသိ ဒါနံ န စ မတ္ထိ ဒါတုံ၊ ပရေ စ ခေါ တတ္ထ သမာဒပေသိံ၊

ပူဇေထ နံ ပူဇနီယဿ ဓာတုံ၊ ဧဝံ ကိရ သဂ္ဂမိတော ဂမိဿထ.

၁၂၀၆. ‘‘တဒေဝ ကမ္မံ ကုသလံ ကတံ မယာ၊

သုခဉ္စ ဒိဗ္ဗံ အနုဘောမိ အတ္တနာ၊

မောဒါမဟံ တိဒသဂဏဿ မဇ္ဈေ၊

န တဿ ပုညဿ ခယမ္ပိ အဇ္ဈဂ’’န္တိ. – ကထေသိ၊

ဣတော ကိရ တိံသကပ္ပသဟဿေ သုမေဓော နာမ သမ္မာသမ္ဗုဒ္ဓေါ လောကေ ဥပ္ပဇ္ဇိတွာ သဒေဝကံ လောကံ ဧကောဘာသံ ကတွာ ကတဗုဒ္ဓကိစ္စော ပရိနိဗ္ဗုတော၊ မနုဿေဟိ စ ဘဂဝတော ဓာတုံ ဂဟေတွာ ရတနစေတိယေ ကတေ အညတရော ပုရိသော သတ္ထု သာသနေ ပဗ္ဗဇိတွာ သတ္တ ဝဿာနိ ဗြဟ္မစရိယံ စရိတွာ အနဝဋ္ဌိတစိတ္တတာယ ကုက္ကုစ္စကော ဟုတွာ ဥပ္ပဗ္ဗဇိ. ဥပ္ပဗ္ဗဇိတော စ သံဝေဂဗဟုလတာယ ဓမ္မစ္ဆန္ဒဝန္တတာယ စ စေတိယင်္ဂဏေ သမ္မဇ္ဇနပရိဘဏ္ဍာဒီနိ ကရောန္တော နိစ္စသီလဥပေါသထသီလာနိ ရက္ခန္တော ဓမ္မံ သုဏန္တော အညေ စ ပုညကိရိယာယ သမာဒပေန္တော ဝိစရိ. သော အာယုပရိယောသာနေ ကာလကတော တာဝတိံသေသု နိဗ္ဗတ္တိ. သော ပုညကမ္မဿ ဥဠာရဘာဝေန မဟေသက္ခော မဟာနုဘာဝေါ သက္ကာဒီဟိ ဒေဝတာဟိ သက္ကတပူဇိတော ဟုတွာ တတ္ထ ယာဝတာယုကံ ဌတွာ တတော စုတော အပရာပရံ ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ တဿေဝ ကမ္မဿ ဝိပါကာဝသေသေန တာဝတိံသဘဝနေ နိဗ္ဗတ္တိ၊ ‘‘အနေကဝဏ္ဏော’’တိ နံ ဒေဝတာ သဉ္ဇာနိံသု. တံ သန္ဓာယ ဝုတ္တံ ‘‘အထ နံ အနေကဝဏ္ဏော ဒေဝပုတ္တော။ပေ။ န တဿ ပုညဿ ခယမ္ပိ အဇ္ဈဂန္တိ ကထေသီ’’တိ.

၁၁၉၉. တတ္ထ အနေကဝဏ္ဏန္တိ နီလပီတာဒိဝသေန ဝိဝိဓဝဏ္ဏတာယ အနန္တရဝိမာနာဒီနံ ဝိဝိဓသဏ္ဌာနတာယ စ နာနာဝိဓဝဏ္ဏံ. ဒရသောကနာသနန္တိ သီတလဘာဝေန ဒရထပရိဠာဟာနံ ဝိနောဒနတော မနုညတာယ ဒဿနီယတာယ စ သောကဿ အနောကာသတော ဒရသောကနာသနံ. အနေကစိတ္တန္တိ နာနာဝိဓစိတ္တရူပံ. သုနိမ္မိတော ဘူတပတီဝါတိ တာဝတိံသကာယိကောပိ ဥဠာရဒိဗ္ဗဘောဂတာယ သုနိမ္မိတဒေဝရာဇာ ဝိယ မောဒသိ တုဿသိ အဘိရမသိ.

၁၂၀၀. သမဿမောတိ သမော ဧဝ ဟုတွာ သမော၊ နိဗ္ဗရိယာယေန သဒိသော တေ တုယှံ နတ္ထိ၊ ကုတော ပန ကေန ကာရဏေန ဥတ္တရိ အဓိကော ကော နာမ သိယာ. ကေန ပန သမတာ ဥတ္တရိတရတာ စာတိ အာဟ ‘‘ယသေန ပုညေန စ ဣဒ္ဓိယာ စာ’’တိ. တတ္ထ ယသေနာတိ ပရိဝါရေန. ဣဒ္ဓိယာတိ အာနုဘာဝေန. ယသေနာတိ ဝါ ဣဿရိယေန၊ ဣဒ္ဓိယာတိ ဒေဝိဒ္ဓိယာ. ယသေနာတိ ဝါ ဝိဘဝသမ္ပတ္တိယာ၊ ဣဒ္ဓိယာတိ ယထိစ္ဆိ တဿ ကာမဂုဏဿ ဣဇ္ဈနေန. ယသေနာတိ ဝါ ကိတ္တိဃောသေန၊ ဣဒ္ဓိယာတိ သမိဒ္ဓိယာ. ပုညေနာတိ တတ္ထ တတ္ထ ဝုတ္တာဝသိဋ္ဌပုညဖလေန၊ ပုညကမ္မေနေဝ ဝါ.

‘‘သဗ္ဗေ စ ဒေဝါ’’တိ သာမညတော ဂဟိတမတ္ထံ ‘‘တိဒသဂဏာ’’တိ ဣမိနာ ဝိသေသေတွာ ဝုတ္တံ. ဧကစ္စဿ ပစ္စေကံ နိပစ္စကာရံ ကရောန္တာပိ ပမုဒိတာ န ကရောန္တိ၊ န ဧဝမေတဿ. ဧတဿ ပန ပမုဒိတာပိ ကရောန္တိယေဝါတိ ဒဿေတုံ ‘‘သမေစ္စာ’’တိ ဝုတ္တံ. တံ တန္တိ တံ တွံ. သသိံဝ ဒေဝါတိ ယထာ နာမ သုက္ကပက္ခပါဋိပဒိယံ ဒိဿမာနံ သသိံ စန္ဒံ မနုဿာ ဒေဝါ စ အာဒရဇာတာ နမဿန္တိ၊ ဧဝံ တံ သဗ္ဗေပိ တိဒသဂဏာ နမဿန္တီတိ အတ္ထော.

၁၂၀၃. ဘဒန္တေတိ ထေရံ ဂါရဝဗဟုမာနေန သမုဒါစရတိ. အဟုဝါသိန္တိ အဟောသိံ. ပုဗ္ဗေတိ ပုရိမဇာတိယံ. သုမေဓနာမဿ ဇိနဿ သာဝကောတိ သုမေဓောတိ ဧဝံ ပါကဋနာမဿ သမ္မာသမ္ဗုဒ္ဒဿ သာသနေ ပဗ္ဗဇိတဘာဝေန သာဝကော. ပုထူဇ္ဇနောတိ အနရိယော. တတ္ထာပိ သစ္စာနံ အနုဗောဓမတ္တဿာပိ အဘာဝေန အနနုဗောဓော. သော သတ္တ ဝဿာနိ ပရိဗ္ဗဇိဿဟန္တိ သော အဟံ သတ္တ သံဝစ္ဆရာနိ ပဗ္ဗဇ္ဇာဂုဏမတ္တေန ဝိစရိံ၊ ဥတ္တရိမနုဿဓမ္မံ နာဓိဂစ္ဆိန္တိ အဓိပ္ပါယော.

၁၂၀၄. ရတနုစ္စယန္တိ မဏိကနကာဒိရတနေဟိ ဥစ္စိတံ ဥဿိတရတနစေတိယံ. ဟေမဇာလေန ဆန္နန္တိ သမန္တတော ဥပရိ စ ကဉ္စနဇာလေန ပဋိစ္ဆာဒိတံ. ဝန္ဒိတွာတိ ပဉ္စပတိဋ္ဌိတေန တတ္ထ တတ္ထ ပဏာမံ ကတွာ. ထူပသ္မိံ မနံ ပသာဒယိန္တိ ‘‘သဗ္ဗညုဂုဏာဓိဋ္ဌာနာယ ဝတ ဓာတုယာ အယံ ထူပေါ’’တိ ထူပသ္မိံ စိတ္တံ ပသာဒေသိံ.

၁၂၀၅. န မာသိ ဒါနန္တိ မေ မယာ ကတံ ဒါနံ နာသိ နာဟောသိ. ကသ္မာ ပန? န စ မေတ္ထိ ဒါတုန္တိ မေ မမ ပရိဂ္ဂဟဘူတံ ဒါနံ ဒါတုံ န အတ္ထိ၊ န ကိဉ္စိ ဒေယျဝတ္ထု ဝိဇ္ဇတိ၊ ပရေ စ ခေါ သတ္တေ တတ္ထ ဒါနေ သမာဒပေသိံ. ‘‘ပရေသဉ္စ တတ္ထ သမာဒပေသိ’’န္တိ စ ပဌန္တိ၊ တတ္ထ ပရေသန္တိ ဥပယောဂတ္ထေ သာမိဝစနံ ဒဋ္ဌဗ္ဗံ. ပူဇေထ နန္တိအာဒိ သမာဒပနာကာရဒဿနံ၊ တံ ဓာတုန္တိ ယောဇနာ. ဧဝံ ကိရာတိ ကိရ-သဒ္ဒေါ အနုဿဝတ္ထော.

၁၂၀၆. န တဿ ပုညဿ ခယမ္ပိ အဇ္ဈဂန္တိ တဿ တဒါ သုမေဓံ ဘဂဝန္တံ ဥဒ္ဒိဿ ကတဿ ပုညကမ္မဿ ပရိက္ခယံ နာဓိဂစ္ဆိံ၊ တဿေဝ ကမ္မဿ ဝိပါကာဝသေသံ ပစ္စနုဘောမီတိ ဒဿေတိ. ယံ ပနေတ္ထ န ဝုတ္တံ၊ တံ ဟေဋ္ဌာ ဝုတ္တနယတ္တာ သုဝိညေယျမေဝါတိ ဒဋ္ဌဗ္ဗံ.

အနေကဝဏ္ဏဝိမာနဝဏ္ဏနာ နိဋ္ဌိတာ.