၉. ဝိသာလက္ခိဝိမာနဝဏ္ဏနာ

ကာ နာမ တွံ ဝိသာလက္ခီတိ ဝိသာလက္ခိဝိမာနံ. တဿ ကာ ဥပ္ပတ္တိ? ဘဂဝတိ ပရိနိဗ္ဗုတေ ရညာ အဇာတသတ္တုနာ အတ္တနာ ပဋိလဒ္ဓါ ဘဂဝတာ သရီရဓာတုယော ဂဟေတွာ ရာဇဂဟေ ထူပေ စ မဟေ စ ကတေ ရာဇဂဟဝါသိနီ ဧကာ မာလာကာရဓီတာ သုနန္ဒာ နာမ ဥပါသိကာ အရိယသာဝိကာ သောတာပန္နာ ပိတုံ ဂေဟတော ပေသိတံ ဗဟုံ မာလဉ္စ ဂန္ဓဉ္စ ပေသေတွာ ဒေဝသိကံ စေတိယေ ပူဇံ ကာရေသိ၊ ဥပေါသထဒိဝသေသု ပန သယမေဝ ဂန္တွာ ပူဇံ အကာသိ. သာ အပရဘာဂေ အညတရေန ရောဂေန ဖုဋ္ဌာ ကာလံ ကတွာ သက္ကဿ ဒေဝရညော ပရိစာရိကာ ဟုတွာ နိဗ္ဗတ္တိ. အထေကဒိဝသံ သာ သက္ကေန ဒေဝါနမိန္ဒေန သဟ စိတ္တလတာဝနံ ပါဝိသိ. တတ္ထ စ အညာသံ ဒေဝတာနံ ပဘာ ပုပ္ဖါဒီနံ ပဘာဟိ ပဋိဟတာ ဟုတွာ ဝိစိတ္တဝဏ္ဏာ ဟောတိ၊ သုနန္ဒာယ ပန ပဘာ တာဟိ အနဘိဘူတာ သဘာဝေနေဝ အဋ္ဌာသိ. တံ ဒိသွာ သက္ကော ဒေဝရာဇာ တာယ ကတသုစရိတံ ဉာတုကာမော ဣမာဟိ ဂါထာဟိ ပုစ္ဆိ –

၆၆၆. ‘‘ကာ နာမ တွံ ဝိသာလက္ခိ၊ ရမ္မေ စိတ္တလတာဝနေ၊

သမန္တာ အနုပရိယာသိ၊ နာရီဂဏပုရက္ခတာ.

၆၆၇. ‘‘ယဒါ ဒေဝါ တာဝတိံသာ၊ ပဝိသန္တိ ဣမံ ဝနံ၊

သယောဂ္ဂါ သရထာ သဗ္ဗေ၊ စိတြာ ဟောန္တိ ဣဓာဂတာ.

၆၆၈. ‘‘တုယှဉ္စ ဣဓ ပတ္တာယ၊ ဥယျာနေ ဝိစရန္တိယာ၊

ကာယေ န ဒိဿတီ စိတ္တံ၊ ကေန ရူပံ တဝေဒိသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၆၆. တတ္ထ ကာ နာမ တွန္တိ ပုရိမတ္တဘာဝေ ကာ နာမ ကီဒိသီ နာမ တွံ၊ ယတ္ထ ကတေန သုစရိတေန အယံ တေ ဤဒိသီ အာနုဘာဝသမ္ပတ္တိ အဟောသီတိ အဓိပ္ပါယော. ဝိသာလက္ခီတိ ဝိပုလလောစနေ.

၆၆၇. ယဒါတိ ယသ္မိံ ကာလေ. ဣမံ ဝနန္တိ ဣမံ စိတ္တလတာနာမကံ ဥပဝနံ. စိတြာ ဟောန္တီတိ ဣမသ္မိံ စိတ္တလတာဝနေ ဝိစိတ္တပဘာသံသဂ္ဂေန အတ္တနော သရီရဝတ္ထာလင်္ကာရာဒီနံ ပကတိဩဘာသတောပိ ဝိသိဋ္ဌဘာဝပ္ပတ္တိယာ ဝိစိတြာကာရာ ဟောန္တိ. ဣဓာဂတာတိ ဣဓ အာဂတာ သမ္ပတ္တာ၊ ဣဓ ဝါ အာဂမနဟေတု.

၆၆၈. ဣဓ ပတ္တာယာတိ ဣမံ ဌာနံ သမ္ပတ္တာယ ဥပဂတာယ. ကေန ရူပံ တဝေဒိသန္တိ ကေန ကာရဏေန တဝ ရူပံ သရီရံ ဧဒိသံ ဧဝရူပံ၊ စိတ္တလတာဝနဿ ပဘံ အဘိဘဝန္တံ တိဋ္ဌတီတိ အဓိပ္ပါယော.

ဧဝံ သက္ကေန ပုဋ္ဌာ သာ ဒေဝတာ ဣမာဟိ ဂါထာဟိ ဗျာကာသိ –

၆၆၉. ‘‘ယေန ကမ္မေန ဒေဝိန္ဒ၊ ရူပံ မယှံ ဂတီ စ မေ၊

ဣဒ္ဓိ စ အာနုဘာဝေါ စ၊ တံ သုဏောဟိ ပုရိန္ဒဒ.

၆၇၀. ‘‘အဟံ ရာဇဂဟေ ရမ္မေ၊ သုနန္ဒာ နာမုပါသိကာ၊

သဒ္ဓါ သီလေန သမ္ပန္နာ၊ သံဝိဘာဂရတာ သဒါ.

၆၇၁. ‘‘အစ္ဆာဒနဉ္စ ဘတ္တဉ္စ၊ သေနာသနံ ပဒီပိယံ၊

အဒါသိံ ဥဇုဘူတေသု၊ ဝိပ္ပသန္နေန စေတသာ.

၆၇၂. ‘‘စာတုဒ္ဒသိံ ပဉ္စဒသိံ၊ ယာ စ ပက္ခဿ အဋ္ဌမီ၊

ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ.

၆၇၃. ‘‘ဥပေါသထံ ဥပဝသိဿံ၊ သဒါ သီလေသု သံဝုတာ၊

သညမာ သံဝိဘာဂါ စ၊ ဝိမာနံ အာဝသာမဟံ.

၆၇၄. ‘‘ပါဏာတိပါတာ ဝိရတာ၊ မုသာဝါဒါ စ သညတာ၊

ထေယျာ စ အတိစာရာ စ၊ မဇ္ဇပါနာ စ အာရကာ.

၆၇၅. ‘‘ပဉ္စသိက္ခာပဒေ ရတာ၊ အရိယသစ္စာန ကောဝိဒါ၊

ဥပါသိကာ စက္ခုမတော၊ ဂေါတမဿ ယသဿိနော.

၆၇၆. ‘‘တဿာ မေ ဉာတိကုလာ ဒါသီ၊ သဒါ မာလာဘိဟာရတိ၊

တာဟံ ဘဂဝတော ထူပေ၊ သဗ္ဗမေဝါဘိရောပယိံ.

၆၇၇. ‘‘ဥပေါသထေ စဟံ ဂန္တွာ၊ မာလာဂန္ဓဝိလေပနံ၊

ထူပသ္မိံ အဘိရောပေသိံ၊ ပသန္နာ သေဟိ ပါဏိဘိ.

၆၇၈. ‘‘တေန ကမ္မေန ဒေဝိန္ဒ၊ ရူပံ မယှံ ဂတီ စ မေ၊

ဣဒ္ဓိ စ အာနုဘာဝေါ စ၊ ယံ မာလံ အဘိရောပယိံ.

၆၇၉. ‘‘ယဉ္စ သီလဝတီ အာသိံ၊ န တံ တာဝ ဝိပစ္စတိ၊

အာသာ စ ပန မေ ဒေဝိန္ဒ၊ သကဒါဂါမိနီ သိယ’’န္တိ.

၆၆၉. တတ္ထ ဂတီတိ အယံ ဒေဝဂတိ၊ နိဗ္ဗတ္တိ ဝါ. ဣဒ္ဓီတိ အယံ ဒေဝိဒ္ဓိ၊ အဓိပ္ပါယသမိဇ္ဈနံ ဝါ. အာနုဘာဝေါတိ ပဘာဝေါ. ပုရိန္ဒဒါတိ သက္ကံ အာလပတိ. သော ဟိ ပုရေ ဒါနံ အဒါသီတိ ‘‘ပုရိန္ဒဒေါ’’တိ ဝုစ္စတိ.

၆၇၆. ဉာတိကုလာတိ ပိတု ဂေဟံ သန္ဓာယ ဝဒတိ. သဒါ မာလာဘိဟာရတီတိ သဒါ သဗ္ဗကာလံ ဒိဝသေ ဒိဝသေ ဉာတိကုလတော ဒါသိယာ ပုပ္ဖံ မယှံ အဘိဟရီယတိ. သဗ္ဗမေဝါဘိရောပယိန္တိ မယှံ ပိဠန္ဓနတ္ထာယ ပိတုဂေဟတော အာဟဋံ မာလံ အညဉ္စ ဂန္ဓာဒိံ သဗ္ဗမေဝ အတ္တနာ အပရိဘုဉ္ဇိတွာ ဘဂဝတော ထူပေ ပူဇနဝသေန အဘိရောပယိံ ပူဇံ ကာရေသိံ.

၆၇၇-၈. ဥပေါသထေ စဟံ ဂန္တွာတိ ဥပေါသထဒိဝသေ အဟမေဝ ထူပဋ္ဌာနံ ဂန္တွာ. ယံ မာလံ အဘိရောပယိန္တိ ယံ တဒါ ဘဂဝတော ထူပေ မာလာဂန္ဓာဘိရောပနံ ကတံ၊ တေန ကမ္မေနာတိ ယောဇနာ.

၆၇၉. န တံ တာဝ ဝိပစ္စတီတိ ယံ သီလဝတီ အာသိံ၊ တံ သီလရက္ခဏံ တံ ရက္ခိတံ သီလံ ပူဇာမယပုညဿ ဗလဝဘာဝေန အလဒ္ဓေါကာသံ န တာဝ ဝိပစ္စတိ၊ န ဝိပစ္စိတုံ အာရဒ္ဓံ၊ အပရသ္မိံယေဝ အတ္တဘာဝေ တဿ ဝိပါကောတိ အတ္ထော. အာသာ စ ပန မေ ဒေဝိန္ဒ၊ သကဒါဂါမိနီ သိယန္တိ ‘‘ကထံ နု ခေါ အဟံ သကဒါဂါမိနီ ဘဝေယျ’’န္တိ ပတ္ထနာ စ မေ ဒေဝိန္ဒ၊ အရိယဓမ္မဝိသယာဝ၊ န ဘဝဝိသေသဝိသယာ. သာ ပန သပ္ပိမဏ္ဍံ ဣစ္ဆတော ဒဓိတော ပစိတံ ဝိယ အနိပ္ဖါဒိနီတိ ဒဿေတိ. သေသံ ဝုတ္တနယမေဝ.

ဣမံ ပန အတ္ထံ သက္ကော ဒေဝါနမိန္ဒော အတ္တနာ စ တာယ ဒေဝဓီတာယ စ ဝုတ္တနိယာမေနေဝ အာယသ္မတော ဝင်္ဂီသတ္ထေရဿ အာရောစေသိ. အာယသ္မာ ဝင်္ဂီသော သင်္ဂီတိကာလေ ဓမ္မသင်္ဂါဟကာနံ မဟာထေရာနံ အာရောစေသိ၊ တေ စ တံ တထေဝ သင်္ဂီတိံ အာရောပယိံသူတိ.

ဝိသာလက္ခိဝိမာနဝဏ္ဏနာ နိဋ္ဌိတာ.