၁၀. ပါရိစ္ဆတ္တကဝိမာနဝဏ္ဏနာ

ပါရိစ္ဆတ္တကေ ကောဝိဠာရေတိ ပါရိစ္ဆတ္တကဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တေန သမယေန သာဝတ္ထိဝါသီ အညတရော ဥပါသကော ဘဂဝန္တံ ဥပသင်္ကမိတွာ၊ သွာတနာယ နိမန္တေတွာ၊ အတ္တနော ဂေဟဒွါရေ မဟန္တံ မဏ္ဍပံ သဇ္ဇေတွာ သာဏိပါကာရံ ပရိက္ခိပိတွာ ဥပရိ ဝိတာနံ ဗန္ဓိတွာ ဓဇပဋာကာဒယော ဥဿာပေတွာ နာနာဝိရာဂဝဏ္ဏာနိ ဝတ္ထာနိ ဂန္ဓဒါမမာလာဒါမာနိ စ ဩလမ္ဗေတွာ သိတ္တသမ္မဋ္ဌေ ပဒေသေ အာသနာနိ ပညာပေတွာ ဘဂဝတော ကာလံ အာရောစေသိ. အထ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ ဒေဝဝိမာနံ ဝိယ အလင်္ကတပဋိယတ္တံ မဏ္ဍပံ ပဝိသိတွာ သဟဿရံသီ ဝိယ အဏ္ဏဝကုစ္ဆိံ ဩဘာသယမာနော ပညတ္တေ အာသနေ နိသီဒိ. ဥပါသကော ဂန္ဓပုပ္ဖဓူမဒီပေဟိ ဘဂဝန္တံ ပူဇေသိ.

တေန စ သမယေန အညတရာ ကဋ္ဌဟာရိကာ ဣတ္ထီ အန္ဓဝနေ သုပုပ္ဖိတံ အသောကရုက္ခံ ဒိသွာ သပလ္လဝင်္ကုရာနိ ပိဏ္ဍီကတာနိ ဗဟူနိ အသောကပုပ္ဖါနိ ဂဟေတွာ အာဂစ္ဆန္တီ၊ ဘဂဝန္တံ တတ္ထ နိသိန္နံ ဒိသွာ ပသန္နစိတ္တာ အာသနဿ သမန္တတော တေဟိ ပုပ္ဖေဟိ ပုပ္ဖသန္ထရံ သန္ထရန္တီ၊ ဘဂဝတော ပူဇံ ကတွာ ဝန္ဒိတွာ တိက္ခတ္တုံ ပဒက္ခိဏံ ကတွာ နမဿမာနာ အဂမာသိ. သာ အပရေန သမယေန ကာလံ ကတွာ တာဝတိံသေသု နိဗ္ဗတ္တိ၊ အစ္ဆရာသဟဿပရိဝါရာ ယေဘုယျေန နန္ဒနဝနေ နစ္စန္တီ ဂါယန္တီ ပါရိစ္ဆတ္တကမာလာ ဂန္ထေန္တီ ပမောဒမာနာ ကီဠန္တီ သုခံ အနုဘဝတိ. အထာယသ္မာ မဟာမောဂ္ဂလ္လာနော ဟေဋ္ဌာ ဝုတ္တနယေန ဒေဝစာရိကံ စရန္တော တာဝတိံသဘဝနံ ဂန္တွာ တံ ဒိသွာ တာယ ကတကမ္မံ ဣမာဟိ ဂါထာဟိ ပုစ္ဆိ –

၆၈၀. ‘‘ပါရိစ္ဆတ္တကေ ကောဝိဠာရေ၊ ရမဏီယေ မနောရမေ၊

ဒိဗ္ဗမာလံ ဂန္ထမာနာ၊ ဂါယန္တီ သမ္ပမောဒသိ.

၆၈၁. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ သဒ္ဒါ နိစ္ဆရန္တိ၊ သဝနီယာ မနောရမာ.

၆၈၂. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ ဂန္ဓာ ပဝါယန္တိ၊ သုစိဂန္ဓာ မနောရမာ.

၆၈၃. ‘‘ဝိဝတ္တမာနာ ကာယေန၊ ယာ ဝေဏီသု ပိဠန္ဓနာ၊

တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ.

၆၈၄. ‘‘ဝဋံသကာ ဝါတဓုတာ၊ ဝါတေန သမ္ပကမ္ပိတာ၊

တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ.

၆၈၅. ‘‘ယာပိ တေ သိရသ္မိံ မာလာ၊ သုစိဂန္ဓာ မနောရမာ၊

ဝါတိ ဂန္ဓော ဒိသာ သဗ္ဗာ၊ ရုက္ခော မဉ္ဇူသကော ယထာ.

၆၈၆. ‘‘ဃာယသေ တံ သုစိဂန္ဓံ၊ ရူပံ ပဿသိ အမာနုသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၈၀. တတ္ထ ပါရိစ္ဆတ္တကေ ကောဝိဠာရေတိ ပါရိစ္ဆတ္တကနာမကေ ကောဝိဠာရပုပ္ဖေ အာဒါယ ဒိဗ္ဗမာလံ ဂန္ထမာနာတိ ယောဇနာ. ယဉှိ လောကိယာ ‘‘ပါရိဇာတ’’န္တိ ဝဒန္တိ၊ တံ မာဂဓဘာသာယ ‘‘ပါရိစ္ဆတ္တက’’န္တိ ဝုစ္စတိ. ကောဝိဠာရောတိ စ ကောဝိဠာရဇာတိကော၊ သော စ မနုဿလောကေပိ ဒေဝလောကေပိ ကောဝိဠာရော၊ တဿာပိ ဇာတီတိ ဝဒန္တိ.

၆၈၁. တဿာ ပန ဒေဝတာယ နစ္စနကာလေ အင်္ဂဘာရဝသေန သရီရတော စ ပိဠန္ဓနတော စ အတိဝိယ မဓုရော သဒ္ဒေါ နိစ္ဆရတိ၊ ဂန္ဓော သဒါ သဗ္ဗာ ဒိသာပိ ဖရိတွာ တိဋ္ဌတိ. တေနာဟ ‘‘တဿာ တေ နစ္စမာနာယာ’’တိအာဒိ. တတ္ထ သဝနီယာတိ သောတုံ ယုတ္တာ၊ သဝနဿ ဝါ ဟိတာ၊ ကဏ္ဏသုခါတိ အတ္ထော.

၆၈၃. ဝိဝတ္တမာနာ ကာယေနာတိ တဝ ကာယေန သရီရေန ပရိဝတ္တမာနေန၊ ဣတ္ထမ္ဘူတလက္ခဏေ စေတံ ကရဏဝစနံ. ယာ ဝေဏီသု ပိဠန္ဓနာတိ ယာနိ တေ ကေသဝေဏီသု ပိဠန္ဓနာနိ၊ ဝိဘတ္တိလောပေါ စေတ္ထ ဒဋ္ဌဗ္ဗော၊ လိင်္ဂဝိပလ္လာသော ဝါ.

၆၈၄. ဝဋံသကာတိ ရတနမယာ ကဏ္ဏိကာ ဝဋံသကာတိ အတ္ထော. ဝါတဓုတာတိ မန္ဒေန မာလုတေန ဓူပယမာနာ. ဝါတေန သမ္ပကမ္ပိတာတိ ဝါတေန သမန္တတော ဝိသေသတော ကမ္ပိတာ စလိတာ. အထ ဝါ ဝဋံသကာ ဝါတဓုတာ၊ ဝါတေန သမ္ပကမ္ပိတာတိ အဝါတေရိတာပိ ဝါတေရိတာပိ ယေ တေ ဝဋံသကာ ကမ္ပိတာ၊ တေသံ သုယျတိ နိဂ္ဃေါသောတိ အတ္ထယောဇနာ.

၆၈၅. ဝါတိ ဂန္ဓော ဒိသာ သဗ္ဗာတိ တဿာ တေ သိရသ္မိံ ဒိဗ္ဗမာလာယ ဂန္ဓော ဝါယတိ သဗ္ဗာ ဒိသာ. ယထာ ကိံ? ရုက္ခော မဉ္ဇူသကော ယထာတိ၊ ယထာ နာမ မဉ္ဇူသကော ရုက္ခော သုပုပ္ဖိတော အတ္တနော ဂန္ဓေန ဗဟူနိ ယောဇနာနိ ဖရမာနော သဗ္ဗာ ဒိသာ ဝါယတိ၊ ဧဝံ တဝ သိရသ္မိံ ပိဠန္ဓနမာလာယ ဂန္ဓောတိ အတ္ထော. သော ကိရ ရုက္ခော ဂန္ဓမာဒနေ ပစ္စေကဗုဒ္ဓါနံ ဥပေါသထကရဏမဏ္ဍလမာဠကမဇ္ဈေ တိဋ္ဌတိ. ယတ္တကာနိ ဒေဝလောကေ စ မနုဿလောကေ စ သုရဘိကုသုမာနိ၊ တာနိ တဿ သာခဂ္ဂေသု နိဗ္ဗတ္တန္တိ. တေန သော အတိဝိယ သုဂန္ဓော ဟောတိ. ဧဝံ တာယ ဒေဝတာယ ပိဠန္ဓနမာလာယ ဂန္ဓောတိ. တေန ဝုတ္တံ ‘‘ရုက္ခော မဉ္ဇူသကော ယထာ’’တိ.

၆၈၆. ယဒိပိ တဿ သဂ္ဂဿ ဆဖဿာယတနိကဘာဝတော သဗ္ဗာနိပိ တတ္ထ အာရမ္မဏာနိ ပိယရူပါနိယေဝ၊ ဂန္ဓရူပါနံ ပန သဝိသေသာနံ တဿာ ဒေဝတာယ လာဘိဘာဝတော ‘‘ဃာယသေ တံ သုစိဂန္ဓံ၊ ရူပံ ပဿသိ အမာနုသ’’န္တိ ဝုတ္တံ.

အထ ဒေဝတာ ဒွီဟိ ဂါထာဟိ ဗျာကာသိ –

၆၈၇. ‘‘ပဘဿရံ အစ္စိမန္တံ၊ ဝဏ္ဏဂန္ဓေန သံယုတံ၊

အသောကပုပ္ဖမာလာဟံ၊ ဗုဒ္ဓဿ ဥပနာမယိံ.

၆၈၈. ‘‘တာဟံ ကမ္မံ ကရိတွာန၊ ကုသလံ ဗုဒ္ဓဝဏ္ဏိတံ၊

အပေတသောကာ သုခိတာ၊ သမ္ပမောဒါမနာမယာ’’တိ.

၆၈၇. တတ္ထ သုဓောတပဝါဠသင်္ဃာတသန္နိဘဿ ကိဉ္ဇက္ခကေသရသမုဒါယေန ဘာဏုရံသိဇာလဿ ဝိယ အသောကပုပ္ဖုတ္တမဿ တဒါ ဥပဋ္ဌိတတံ သန္ဓာယာဟ ‘‘ပဘဿရံ အစ္စိမန္တ’’န္တိ. သေသံ ဝုတ္တနယမေဝ.

အထာယသ္မာ မဟာမောဂ္ဂလ္လာနော တာယ ဒေဝတာယ အတ္တနော သုစရိတကမ္မေ ကထိတေ သပရိဝါရာယ တဿာ ဓမ္မံ ဒေသေတွာ တတော မနုဿလောကံ အာဂန္တွာ ဘဂဝတော တံ ပဝတ္တိံ ကထေသိ. ဘဂဝါ တံ အဋ္ဌုပ္ပတ္တိံ ကတွာ သမ္ပတ္တမဟာဇနဿ ဓမ္မံ ဒေသေသိ၊ သာ ဒေသနာ မဟာဇနဿ သာတ္ထိကာ အဟောသီတိ.

ပါရိစ္ဆတ္တကဝိမာနဝဏ္ဏနာ နိဋ္ဌိတာ.

ဣတိ ပရမတ္ထဒီပနိယာ ခုဒ္ဒက-အဋ္ဌကထာယ ဝိမာနဝတ္ထုသ္မိံ

ဒသဝတ္ထုပဋိမဏ္ဍိတဿ တတိယဿ ပါရိစ္ဆတ္တကဝဂ္ဂဿ

အတ္ထဝဏ္ဏနာ နိဋ္ဌိတာ.