၈. မလ္လိကာဝိမာနဝဏ္ဏနာ

ပီတဝတ္ထေ ပီတဓဇေတိ မလ္လိကာဝိမာနံ. တဿ ကာ ဥပ္ပတ္တိ? ဓမ္မစက္ကပ္ပဝတ္တနမာဒိံ ကတွာ ယာဝ သုဘဒ္ဒပရိဗ္ဗာဇကဝိနယနာ ကတဗုဒ္ဓကိစ္စေ ကုသိနာရာယံ ဥပဝတ္တနေ မလ္လရာဇူနံ သာလဝနေ ယမကသာလာနမန္တရေ ဝိသာခပုဏ္ဏမာယံ ပစ္စူသဝေလာယံ အနုပါဒိသေသာယ နိဗ္ဗာနဓာတုယာ ပရိနိဗ္ဗုတေ ဘဂဝတိ လောကနာထေ ဒေဝမနုဿေဟိ တဿ သရီရပူဇာယ ကယိရမာနာယ တဒါ ကုသိနာရာယံ ဝသမာနာ ဗန္ဓုလမလ္လဿ ဘရိယာ မလ္လရာဇပုတ္တီ မလ္လိကာ နာမ ဥပါသိကာ သဒ္ဓါ ပသန္နာ ဝိသာခါယ မဟာဥပါသိကာယ ပသာဓနသဒိသံ အတ္တနော မဟာလတာပသာဓနံ ဂန္ဓောဒကေန ဓောဝိတွာ ဒုကူလစုမ္ဗဋကေန မဇ္ဇိတွာ အညဉ္စ ဗဟုံ ဂန္ဓမာလာဒိံ ဂဟေတွာ ဘဂဝတော သရီရံ ပူဇေသိ. အယမေတ္ထ သင်္ခေပေါ၊ ဝိတ္ထာရတော ပန မလ္လိကာဝတ္ထု ဓမ္မပဒဝဏ္ဏနာယံ အာဂတမေဝ.

သာ အပရဘာဂေ ကာလံ ကတွာ တာဝတိံသေသု နိဗ္ဗတ္တိ၊ တေန ပူဇာနုဘာဝေန အဿာ အညေဟိ အသာဓာရဏာ ဥဠာရာ ဒိဗ္ဗသမ္ပတ္တိ အဟောသိ. ဝတ္ထာလင်္ကာရဝိမာနာနိ သတ္တရတနသမုဇ္ဇလာနိ ဝိသေသတော သိင်္ဂီသုဝဏ္ဏောဘာသာနိ အတိဝိယ ပဘဿရာနိ သဗ္ဗာ ဒိသာ အာသိဉ္စမာနာဝ သုဝဏ္ဏရသဓာရာပိဉ္ဇရာ ကရောန္တိ. အထာယသ္မာ နာရဒေါ ဒေဝစာရိကံ စရန္တော တံ ဒိသွာ ဥပဂဉ္ဆိ. သာ တံ ဒိသွာ ဝန္ဒိတွာ အဉ္ဇလိံ ပဂ္ဂယှ အဋ္ဌာသိ. သော တံ –

၆၅၈. ‘‘ပီတဝတ္ထေ ပီတဓဇေ၊ ပီတာလင်္ကာရဘူသိတေ၊

ပီတန္တရာဟိ ဝဂ္ဂူဟိ၊ အပိဠန္ဓာဝ သောဘသိ.

၆၅၉. ‘‘ကာ ကမ္ဗုကာယူရဓရေ၊ ကဉ္စနာဝေဠဘူသိတေ၊

ဟေမဇာလကသဉ္ဆန္နေ၊ နာနာရတနမာလိနီ.

၆၆၀. ‘‘သောဝဏ္ဏမယာ လောဟိတင်္ဂမယာ စ၊ မုတ္တာမယာ ဝေဠုရိယမယာ စ၊

မသာရဂလ္လာ သဟလောဟိတင်္ဂါ၊ ပါရေဝတက္ခီဟိ မဏီဟိ စိတ္တတာ.

၆၆၁. ‘‘ကောစိ ကောစိ ဧတ္ထ မယူရသုဿရော၊ ဟံသဿရညော ကရဝီကသုဿရော၊

တေသံ သရော သုယျတိ ဝဂ္ဂုရူပေါ၊ ပဉ္စင်္ဂိကံ တူရိယမိဝပ္ပဝါဒိတံ.

၆၆၂. ‘‘ရထော စ တေ သုဘော ဝဂ္ဂု၊ နာနာရတနစိတ္တိတော၊

နာနာဝဏ္ဏာဟိ ဓာတူဟိ၊ သုဝိဘတ္တောဝ သောဘတိ.

၆၆၃. ‘‘တသ္မိံ ရထေ ကဉ္စနဗိမ္ဗဝဏ္ဏေ၊ ယာ တွံ ဌိတာ ဘာသသိမံ ပဒေသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ. – ပုစ္ဆိ၊

၆၅၈. တတ္ထ ပီတဝတ္ထေတိ ပရိသုဒ္ဓစာမီကရပဘဿရတာယ ပီတောဘာသနိဝါသနေ. ပီတဓဇေတိ ဝိမာနဒွါရေ ရထေ စ သမုဿိတဟေမမယဝိပုလကေတုဘာဝတော ပီတောဘာသဓဇေ. ပီတာလင်္ကာရဘူသိတေတိ ပီတောဘာသေဟိ အာဘရဏေဟိ အလင်္ကတေ. သတိပိ အလင်္ကာရာနံ နာနာဝိဓရံသိဇာလသမုဇ္ဇလဝိဝိဓရတနဝိစိတ္တဘာဝေ တာဒိသသုစရိတဝိသေသနိဗ္ဗတ္တတာယ ပန သုပရိသုဒ္ဓစာမီကရမရီစိဇာလဝိဇ္ဇောတိတတ္တာ ဝိသေသတော ပီတနိဘာသာနိ တဿာ အာဘရဏာနိ အဟေသုံ. ပီတန္တရာဟီတိ ပီတဝဏ္ဏေဟိ ဥတ္တရိယေဟိ. ‘‘သန္တရုတ္တရပရမံ တေန ဘိက္ခုနာ တတော စီဝရံ သာဒိတဗ္ဗ’’န္တိအာဒီသု (ပါရာ. ၅၂၃-၅၂၄) နိဝါသနေ အန္တရသဒ္ဒေါ အာဂတော၊ ဣဓ ပန ‘‘အန္တရသာဋကာ’’တိအာဒီသု ဝိယ ဥတ္တရိယေ ဒဋ္ဌဗ္ဗော. အန္တရာ ဥတ္တရိယံ ဥတ္တရာသင်္ဂေါ ဥပသံဗျာနန္တိ ပရိယာယသဒ္ဒါ ဧတေ. ဝဂ္ဂူဟီတိ သောဘနေဟိ သဏှမဋ္ဌေဟိ. အပိဠန္ဓာဝ သောဘသီတိ တွံ ဣမေဟိ အလင်္ကာရေဟိ အနလင်္ကတာပိ အတ္တနော ရူပသမ္ပတ္တိယာဝ သောဘသိ. တေ ပန အလင်္ကာရာ တဝ သရီရံ ပတွာ သောဘန္တိ၊ တသ္မာ အနလင်္ကတာပိ တွံ အလင်္ကတသဒိသီတိ အဓိပ္ပါယော.

၆၅၉. ကာ ကမ္ဗုကာယူရဓရေတိ ကာ တွံ ကတရဒေဝနိကာယပရိယာပန္နာ သုဝဏ္ဏမယပရိဟာရကဓရေ၊ သုဝဏ္ဏမယကေယူရဓရေ ဝါ. ကမ္ဗုပရိဟာရကန္တိ စ ဟတ္ထာလင်္ကာရဝိသေသော ဝုစ္စတိ၊ ကာယူရန္တိ ဘုဇာလင်္ကာရဝိသေသော. အထ ဝါ ကမ္ဗူတိ သုဝဏ္ဏံ၊ တသ္မာ ကမ္ဗုကာယူရဓရေ သုဝဏ္ဏမယဗာဟာဘရဏဓရေတိ အတ္ထော. ကဉ္စနာဝေဠဘူသိတေတိ ကဉ္စနမယာဝေဠပိဠန္ဓနဘူသိတေ. ဟေမဇာလကသဉ္ဆန္နေတိ ရတနပရိသိဗ္ဗိတေန ဟေမမယေန ဇာလကေန ဆာဒိတသရီရေ. နာနာရတနမာလိနီတိ နက္ခတ္တမာလာယ ဝိယ ကာဠပက္ခရတ္တိယံ သီသေ ပဋိမုက္ကာဟိ ဝိဝိဓာဟိ ရတနာဝလီဟိ နာနာရတနမာလိနီ ကာ တွန္တိ ပုစ္ဆတိ.

၆၆၀. သောဝဏ္ဏမယာတိအာဒိ ယာဟိ ရတနမာလာဟိ သာ ဒေဝတာ နာနာရတနမာလိနီတိ ဝုတ္တာ၊ တာသံ ဒဿနံ. တတ္ထ သောဝဏ္ဏမယာတိ သိင်္ဂီသုဝဏ္ဏမယာ မာလာ. လောဟိတင်္ဂမယာတိ ပဒုမရာဂါဒိရတ္တမဏိမယာ. မသာရဂလ္လာတိ မသာရဂလ္လမဏိမယာ. သဟလောဟိတင်္ဂါတိ လောဟိတင်္ဂမဏိမယာဟိ သဒ္ဓိံ ကဗရမဏိမယာ စေဝ လောဟိတင်္ဂသင်္ခါတရတ္တမဏိမယာ စာတိ အတ္ထော. ပါရေဝတက္ခီဟိ မဏီဟိ စိတ္တတာတိ ပါရေဝတက္ခိသဒိသေဟိ မဏီဟိ ယထာဝုတ္တမဏီဟိ စ သင်္ခတစိတ္တဘာဝါ ဣမာ တဝ ကေသဟတ္ထေ ရတနမာလာတိ အဓိပ္ပါယော.

၆၆၁. ကောစိ ကောစီတိ ဧကစ္စော ဧကစ္စော. ဧတ္ထာတိ ဧတေသု မာလာဒါမေသု. မယူရသုဿရောတိ မယူရော ဝိယ သုန္ဒရနာဒေါ. ဟံသဿရညောတိ ဟံသဿရော အညော၊ ဟံသသဒိသဿရော အပရော. ကရဝီကသုဿရောတိ ကရဝီကော ဝိယ သောဘနဿရော. တေသံ မာလာဒါမာနံ ယထာ မယူရဿရော၊ ဟံသဿရော၊ ကရဝီကဿရော၊ ဧဝံ ဝဂ္ဂုရူပေါ မဓုရာကာရော သရော သုယျတိ. ကိမိဝ? ပဉ္စင်္ဂိကံ တူရိယမိဝပ္ပဝါဒိတံ. ယထာ ကုသလေန ဝါဒိတေ ပဉ္စင်္ဂိကေ တူရိယေ၊ ဧဝံ တေသံ သရော သုယျတိ၊ ဝဂ္ဂုရူပေါတိ အတ္ထော. ဘုမ္မတ္ထေ ဟိ ဣဒံ ဥပယောဂဝစနံ.

၆၆၂. နာနာဝဏ္ဏာဟိ ဓာတူဟီတိ အနေကရူပါဟိ အက္ခစက္ကဤသာဒိအဝယဝဓာတူဟိ. သုဝိဘတ္တောဝ သောဘတီတိ အဝယဝါနံ အညမညံ ယုတ္တပ္ပမာဏတာယ ဝိဘတ္တိဝိဘာဂသမ္ပတ္တိယာ စ သုဝိဘတ္တောဝ ဟုတွာ ဝိရာဇတိ. အထ ဝါ သုဝိဘတ္တောဝါတိ ကေဝလံ ကမ္မနိဗ္ဗတ္တောပိ သုသိက္ခိတေန သိပ္ပါစရိယေန ဝိဘတ္တောဝ ဝိရစိတော ဝိယ သောဘတီတိ အတ္ထော.

၆၆၃. ကဉ္စနဗိမ္ဗဝဏ္ဏေတိ သာတိသယံ ပီတောဘာသတာယ ကဉ္စနဗိမ္ဗကသဒိသေ တသ္မိံ ရထေ. ကဉ္စနဗိမ္ဗဝဏ္ဏေတိ ဝါ တဿာ ဒေဝတာယ အာလပနံ၊ ဂန္ဓောဒကေန ဓောဝိတွာ ဇာတိဟိင်္ဂုလကရသေန မဇ္ဇိတွာ ဒုကူလစုမ္ဗဋကေန မဇ္ဇိတကဉ္စနပဋိမာသဒိသေတိ အတ္ထော. ဘာသသိမံ ပဒေသန္တိ ဣမံ သကလမ္ပိ ဘူမိပဒေသံ ဘာသယသိ ဝိဇ္ဇောတယသိ.

ဧဝံ ထေရေန ပုစ္ဆိတာ သာပိ ဒေဝတာ ဣမာဟိ ဂါထာဟိ ဗျာကာသိ –

၆၆၄. ‘‘သောဝဏ္ဏဇာလံ မဏိသောဏ္ဏစိတ္တိတံ၊ မုတ္တာစိတံ ဟေမဇာလေန ဆန္နံ၊

ပရိနိဗ္ဗုတေ ဂေါတမေ အပ္ပမေယျေ၊ ပသန္နစိတ္တာ အဟမာဘိရောပယိံ.

၆၆၅. ‘‘တာဟံ ကမ္မံ ကရိတွာန၊ ကုသလံ ဗုဒ္ဓဝဏ္ဏိတံ၊

အပေတသောကာ သုခိတာ၊ သမ္ပမောဒါမနာမယာ’’တိ.

၆၆၄. တတ္ထ သောဝဏ္ဏဇာလန္တိ သရီရပ္ပမာဏေန ကတံ သုဝဏ္ဏမယံ ဇာလံ. မဏိသောဏ္ဏစိတ္တိတန္တိ သီသာဒိဋ္ဌာနေသု သီသူပဂဂီဝူပဂါဒိအာဘရဏဝသေန နာနာဝိဓေဟိ မဏီဟိ စ သုဝဏ္ဏေန စ စိတ္တိတံ. မုတ္တာစိတန္တိ အန္တရန္တရာ အာဗဒ္ဓါဟိ မုတ္တာဝလီဟိ အာစိတံ. ဟေမဇာလေန ဆန္နန္တိ ဟေမမယေန ပဘာဇာလေန ဆန္နံ. တဉှိ နာနာဝိဓေဟိ မဏီဟိ စေဝ သုဝဏ္ဏေန စ စိတ္တိတံ မုတ္တာဝလီဟိ အာစိတမ္ပိ သုပရိသုဒ္ဓဿ ရတ္တသုဝဏ္ဏဿေဝ ယေဘုယျတာယ ဒိဝါကရကိရဏသမ္ဖဿတော အတိဝိယ ပဘဿရေန ဟေမမယေန ပဘာဇာလေန သဉ္ဆာဒိတံ ဧကောဘာသံ ဟုတွာ ကဉ္စနာဒါသံ ဝိယ တိဋ္ဌတိ. ပရိနိဗ္ဗုတေတိ အနုပါဒိသေသာယ နိဗ္ဗာနဓာတုယာ ပရိနိဗ္ဗုတေ. ဂေါတမေတိ ဘဂဝန္တံ ဂေါတ္တေန နိဒ္ဒိသတိ. အပ္ပမေယျေတိ ဂုဏာနုဘာဝတော ပမိနိတုံ အသက္ကုဏေယျေ. ပသန္နစိတ္တာတိ ကမ္မဖလဝိသယာယ ဗုဒ္ဓါရမ္မဏာယ စ သဒ္ဓါယ ပသန္နမာနသာ. အဘိရောပယိန္တိ ပူဇာဝသေန သရီရေ ရောပေသိံ ပဋိမုဉ္စိံ.

၆၆၅. တာဟန္တိ တံ အဟံ. ကုသလန္တိ ကုစ္ဆိတသလနာဒိအတ္ထေန ကုသလံ. ဗုဒ္ဓဝဏ္ဏိတန္တိ ‘‘ယာဝတာ၊ ဘိက္ခဝေ၊ သတ္တာ အပဒါ ဝါ ဒွိပဒါ ဝါ’’တိအာဒိနာ (သံ. နိ. ၅.၁၃၉၊ အ. နိ. ၄.၃၄) သမ္မာသမ္ဗုဒ္ဓေန ပသတ္ထံ. အပေတသောကာတိ သောကဟေတူနံ ဘောဂဗျသနာဒီနံ အဘာဝေန အပဂတသောကာ. တေန စိတ္တဒုက္ခာဘာဝမာဟ. သုခိတာတိ သဉ္ဇာတသုခါ သုခပ္ပတ္တာ. ဧတေန သရီရဒုက္ခာဘာဝံ ဝဒတိ. စိတ္တဒုက္ခာဘာဝေန စဿာ ပမောဒါပတ္တိ၊ သရီရဒုက္ခာဘာဝေန အရောဂတာ. တေနာဟ ‘‘သမ္ပမောဒါမနာမယာ’’တိ. သေသံ ဝုတ္တနယမေဝ. အယဉ္စ အတ္ထော တဒါ အတ္တနာ ဒေဝတာယ စ ကထိတနိယာမေနေဝ သင်္ဂီတိကာလေ အာယသ္မတာ နာရဒေန ဓမ္မသင်္ဂါဟကာနံ အာရောစိတော၊ တေ စ တံ တထေဝ သင်္ဂဟံ အာရောပယိံသူတိ.

မလ္လိကာဝိမာနဝဏ္ဏနာ နိဋ္ဌိတာ.