၇. ပေသဝတီဝိမာနဝဏ္ဏနာ

ဖလိကရဇတဟေမဇာလဆန္နန္တိ ပေသဝတီဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တေန သမယေန မဂဓေသု နာလကဂါမေ ဧကသ္မိံ ဂဟပတိမဟာသာရကုလေ ပေသဝတီ နာမ ကုလသုဏှာ အဟောသိ. သာ ကိရ ကဿပဿ ဘဂဝတော ယောဇနိကေ ကနကထူပေ ကယိရမာနေ ဒါရိကာ ဟုတွာ မာတရာ သဒ္ဓိံ စေတိယဋ္ဌာနံ ဂန္တွာ မာတရံ ပုစ္ဆိ ‘‘ကိံ ဣမေ၊ အမ္မ၊ ကရောန္တီ’’တိ? ‘‘စေတိယံ ကာတုံ သုဝဏ္ဏိဋ္ဌကာ ကရောန္တီ’’တိ. တံ သုတွာ ဒါရိကာ ပသန္နမာနသာ မာတရံ အာဟ – ‘‘အမ္မ၊ မမ ဂီဝါယ ဣဒံ သောဝဏ္ဏမယံ ခုဒ္ဒကပိဠန္ဓနံ အတ္ထိ၊ ဣမာဟံ စေတိယတ္ထာယ ဒေမီ’’တိ. မာတာ ‘‘သာဓု ဒေဟီ’’တိ ဝတွာ တံ ဂီဝတော ဩမုဉ္စိတွာ သုဝဏ္ဏကာရဿ ဟတ္ထေ အဒါသိ ‘‘ဣဒံ ဣမာယ ဒါရိကာယ ပရိစ္စဇိတံ၊ ဣမမ္ပိ ပက္ခိပိတွာ ဣဋ္ဌကံ ကရောဟီ’’တိ. သုဝဏ္ဏကာရော တထာ အကာသိ. သာ ဒါရိကာ အပရဘာဂေ ကာလံ ကတွာ တေနေဝ ပုညကမ္မေန ဒေဝလောကေ နိဗ္ဗတ္တိတွာ သုဂတိယံယေဝ အပရာပရံ သံသရန္တီ အမှာကံ ဘဂဝတော ကာလေ နာလကဂါမေ နိဗ္ဗတ္တာ အနုက္ကမေန ဒွါဒသဝဿိကာ ဇာတာ.

သာ ဧကဒိဝသံ မာတရာ ပေသိတံ မူလံ ဂဟေတွာ တေလတ္ထာယ အညတရံ အာပဏံ အဂမာသိ. တသ္မိဉ္စ အာပဏေ အညတရော ကုဋုမ္ဗိယပုတ္တော ပိတရာ နိဒဟိတွာ ဌပိတံ ဗဟုံ ဟိရညသုဝဏ္ဏံ မုတ္တာမဏိရတနာနိ စ ဂဟေတုံ ဥဒ္ဓရန္တော အာပဏိကော ကမ္မဗလေန ကထလပါသာဏသက္ခရရူပေန ဥပဋ္ဌဟန္တာနိ ဒိသွာ တတော ဧကဒေသံ ‘‘ပုညဝန္တာနံ ဝသေန ဟိရညသုဝဏ္ဏာဒိ ဘဝိဿတီ’’တိ ဝီမံသိတုံ ရာသိံ ကတွာ ဌပေသိ. အထ နံ သာ ဒါရိကာ ဒိသွာ ‘‘ကသ္မာ အာပဏေ ရတနာနိ ဧဝံ ဌပိတာနိ၊ နနု နာမ သမ္မဒေဝ ပဋိသာမေတဗ္ဗာနီ’’တိ အာဟ. အာပဏိကော တံ သုတွာ ‘‘မဟာပုညာ အယံ ဒါရိကာ၊ ဣမိဿာ ဝသေန သဗ္ဗမိဒံ ဟိရညာဒိ ဧဝ ဟုတွာ အမှာကံ ဝိနိယောဂံ ဂမိဿတိ၊ သင်္ဂဏှိဿာမိ န’’န္တိ စိန္တေတွာ တဿာ မာတု သန္တိကံ ဂန္တွာ ‘‘ဣမံ ဒါရိကံ မယှံ ပုတ္တဿတ္ထာယ ဒေဟီ’’တိ ဝါရေတွာ ဗဟုဓနံ ဒတွာ အာဝါဟဝိဝါဟံ ကတွာ တံ အတ္တနော ဂေဟံ အာနေသိ. အထဿာ သီလာစာရံ ဉတွာ ဘဏ္ဍာဂါရံ ဝိဝရိတွာ ‘‘ကိံ ဧတ္ထ ပဿသီ’’တိ ဝတွာ တာယ ‘‘ဟိရညသုဝဏ္ဏမဏိမေဝ ရာသိကတံ ပဿာမီ’’တိ ဝုတ္တေ ‘‘ဧတာနိ အမှာကံ ကမ္မဗလေန အန္တရဓာယန္တာနိ တဝ ပုညဝိသေသေန ပုန ဝိသေသာနိ ဇာတာနိ၊ တသ္မာ ဣတော ပဋ္ဌာယ ဣမသ္မိံ ဂေဟေ သဗ္ဗံ တွံယေဝ ဝိစာရေဟိ၊ တယာ ဒိန္နမေဝ မယံ ပရိဘုဉ္ဇိဿာမာ’’တိ ဝတွာ တတော ပဘုတိ တံ ‘‘ပေသဝတီ’’တိ ဝေါဟရိံသု.

တေန စ သမယေန အာယသ္မာ ဓမ္မသေနာပတိ အတ္တနော အာယုသင်္ခါရာနံ ပရိက္ခီဏဘာဝံ ဉတွာ ‘‘မယှံ မာတုယာ ရူပသာရိဗြာဟ္မဏိယာ ပေါသာဝနိကမူလံ ဒတွာ ပရိနိဗ္ဗာယိဿာမီ’’တိ စိန္တေတွာ ဘဂဝန္တံ ဥပသင်္ကမိတွာ ပရိနိဗ္ဗာနံ အနုဇာနာပေတွာ သတ္ထု အာဏာယ မဟန္တံ ပါဋိဟာရိယံ ဒဿေတွာ အနေကေဟိ ထုတိသဟဿေဟိ ဘဂဝန္တံ ထောမေတွာ ယာဝ ဒဿနဝိသယာတိက္ကမာ အဘိမုခေါဝ အပက္ကမိတွာ ပုန ဝန္ဒိတွာ ဘိက္ခုသံဃပရိဝုတော ဝိဟာရာ နိက္ခမ္မ ဘိက္ခုသံဃဿ ဩဝါဒံ ဒတွာ အာယသ္မန္တံ အာနန္ဒံ သမဿာသေတွာ စတဿောပိ ပရိသာ နိဝတ္တေတွာ အနုက္ကမေန နာလကဂါမံ ပတွာ မာတရံ သောတာပတ္တိဖလေ ပတိဋ္ဌာပေတွာ ပစ္စူသသမယေ ဇာတောဝရကေ ပရိနိဗ္ဗာယိ. ပရိနိဗ္ဗုတဿ စဿ သရီရသက္ကာရကရဏဝသေန ဒေဝါ စေဝ မနုဿာ စ သတ္တာဟံ ဝီတိနာမေသုံ၊ အဂရုစန္ဒနာဒီဟိ ဟတ္ထသတုဗ္ဗေဓံ စိတကမကံသု.

ပေသဝတီပိ ထေရဿ ပရိနိဗ္ဗာနံ သုတွာ ‘‘ဂန္တာ ပူဇေဿာမီ’’တိ သုဝဏ္ဏပုပ္ဖေဟိ ဂန္ဓဇာတေဟိ စ ပူရိတာနိ စင်္ကောဋကာနိ ဂါဟာပေတွာ ဂန္တုကာမာ သသုရံ အာပုစ္ဆိတွာ တေန ‘‘တွံ ဂရုဘာရာ၊ တတ္ထ စ မဟာဇနသမ္မဒ္ဒေါ၊ ပုပ္ဖဂန္ဓာနိ ပေသေတွာ ဣဓေဝ ဟောဟီ’’တိ ဝုတ္တာပိ သဒ္ဓါဇာတာ ‘‘ယဒိပိ မေ တတ္ထ ဇီဝိတန္တရာယော သိယာ၊ ဂန္တာဝ ပူဇာသက္ကာရံ ကရိဿာမီ’’တိ တံ ဝစနံ အဂ္ဂဟေတွာ သပရိဝါရာ တတ္ထ ဂန္တွာ ဂန္ဓပုပ္ဖါဒီဟိ ပူဇေတွာ ကတဉ္ဇလီ အဋ္ဌာသိ. တသ္မိဉ္စ သမယေ ထေရံ ပူဇေတုံ အာဂတာနံ ရာဇပရိသာနံ ဟတ္ထီ မတ္တော ဟုတွာ တံ ပဒေသံ ဥပဂဉ္ဆိ. တံ ဒိသွာ မရဏဘယဘီတေသု မနုဿေသု ပလာယန္တေသု ဇနသမ္မဒ္ဒေန ပတိတံ ပေသဝတိံ မဟာဇနော အက္ကမိတွာ မာရေသိ. သာ ပူဇာသက္ကာရံ ကတွာ ထေရဂတာယ သဒ္ဓါယ သမ္ပန္နစိတ္တာ ဧဝ ကာလံ ကတွာ တာဝတိံသဘဝနေ နိဗ္ဗတ္တိ၊ အစ္ဆရာသဟဿဉ္စဿာ ပရိဝါရော အဟောသိ.

သာ တာဝဒေဝ အတ္တနော ဒိဗ္ဗသမ္ပတ္တိံ ဩလောကေတွာ ‘‘ကီဒိသေန နု ခေါ ပုညေန မယာ ဧသာ လဒ္ဓါ’’တိ၊ တဿာ ဟေတုံ ဥပဓာရေန္တီ ထေရံ ဥဒ္ဒိဿ ကတံ ပူဇာသက္ကာရံ ဒိသွာ၊ ရတနတ္တယေ အဘိပ္ပသန္နမာနသာ သတ္ထာရံ ဝန္ဒိတုံ အစ္ဆရာသဟဿပရိဝုတာ သဋ္ဌိသကဋဘာရာလင်္ကာရပဋိမဏ္ဍိတတ္တဘာဝါ သုမဟတိယာ ဒေဝိဒ္ဓိယာ စန္ဒော ဝိယ စ သူရိယော ဝိယ စ ဒသ ဒိသာ ဩဘာသယမာနာ သဟ ဝိမာနေန အာဂန္တွာ ဝိမာနတော ဩရုယှ ဘဂဝန္တံ ဝန္ဒိတွာ အဉ္ဇလိံ ပဂ္ဂယှ အဋ္ဌာသိ. တေန စ သမယေန အာယသ္မာ ဝင်္ဂီသော ဘဂဝတော သမီပေ နိသိန္နော ဘဂဝန္တံ ဧဝမာဟ ‘‘ပဋိဘာတိ မံ ဘဂဝါ ဣမိဿာ ဒေဝတာယ ကတကမ္မံ ပုစ္ဆိတု’’န္တိ. ‘‘ပဋိဘာတု တံ၊ ဝင်္ဂီသာ’’တိ ဘဂဝါ အဝေါစ. အထ အာယသ္မာ ဝင်္ဂီသော တာယ ဒေဝတာယ ကတကမ္မံ ပုစ္ဆိတုကာမော ပဌမံ တာဝဿာ ဝိမာနံ သံဝဏ္ဏေန္တော အာဟ –

၆၄၆. ‘‘ဖလိကရဇတဟေမဇာလဆန္နံ၊ ဝိဝိဓစိတြတလမဒ္ဒသံ သုရမ္မံ၊

ဗျမှံ သုနိမ္မိတံ တောရဏူပပန္နံ၊ ရုစကုပကိဏ္ဏမိဒံ သုဘံ ဝိမာနံ.

၆၄၇. ‘‘ဘာတိ စ ဒသ ဒိသာ နဘေဝ သုရိယော၊ သရဒေ တမောနုဒေါ သဟဿရံသီ၊

တထာ တပတိ မိဒံ တဝ ဝိမာနံ၊ ဇလမိဝ ဓူမသိခေါ နိသေ နဘဂ္ဂေ.

၆၄၈. ‘‘မုသတီဝ နယနံ သတေရတာဝ၊ အာကာသေ ဌပိတမိဒံ မနုညံ၊

ဝီဏာမုရဇသမ္မတာဠဃုဋ္ဌံ၊ ဣဒ္ဓံ ဣန္ဒပုရံ ယထာ တဝေဒံ.

၆၄၉. ‘‘ပဒုမကုမုဒုပ္ပလကုဝလယံ၊ ယောဓိကဗန္ဓုကနောဇကာ စ သန္တိ၊

သာလကုသုမိတပုပ္ဖိတာ အသောကာ၊ ဝိဝိဓဒုမဂ္ဂသုဂန္ဓသေဝိတမိဒံ.

၆၅၀. ‘‘သဠလလဗုဇဘုဇကသံယုတ္တာ၊ ကုသကသုဖုလ္လိတလတာဝလမ္ဗိနီဟိ၊

မဏိဇာလသဒိသာ ယသဿိနီ၊ ရမ္မာ ပေါက္ခရဏီ ဥပဋ္ဌိတာ တေ.

၆၅၁. ‘‘ဥဒကရုဟာ စ ယေတ္ထိ ပုပ္ဖဇာတာ၊ ထလဇာ ယေ စ သန္တိ ရုက္ခဇာတာ၊

မာနုသကာမာနုဿကာ စ ဒိဗ္ဗာ၊ သဗ္ဗေ တုယှံ နိဝေသနမှိ ဇာတာ.

၆၅၂. ‘‘ကိဿ သံယမဒမဿယံ ဝိပါကော၊ ကေနာသိ ကမ္မဖလေနိဓူပပန္နာ၊

ယထာ စ တေ အဓိဂတမိဒံ ဝိမာနံ၊ တဒနုပဒံ အဝစာသိဠာရပမှေ’’တိ.

၆၄၆. တတ္ထ ဖလိကရဇတဟေမဇာလဆန္နန္တိ ဖလိကမဏီဟိ ရဇတဟေမဇာလေဟိ စ ဆာဒိတံ၊ ဖလိကမဏိမယာဟိ ဘိတ္တီဟိ ရဇတဟေမမယေဟိ ဇာလေဟိ စ သမန္တတော ဟေဋ္ဌာ စ ဥပရိ စ ဆာဒိတံ၊ ဝိဝိဓဝဏ္ဏာနံ ဝိစိတ္တသန္နိဝေသာနဉ္စ တလာနံ ဘူမီနံ ဝသေန ဝိဝိဓစိတြတလံ အဒ္ဒသံ ပဿိံ. သုရမ္မန္တိ သုဋ္ဌု ရမဏီယံ. ဝိဟရိတုကာမာ ဝသန္တိ ဧတ္ထာတိ ဗျမှံ၊ ဘဝနံ. တောရဏူပပန္နန္တိ ဝိဝိဓမာလာကမ္မာဒိဝိစိတ္တေန သတ္တရတနမယေန တောရဏေန ဥပေတံ. တောရဏန္တိ ဝါ ဒွါရကောဋ္ဌကပါသာဒဿ နာမံ၊ တေန စ အနေကဘူမကေန ဝိစိတ္တာကာရေန တံ ဝိမာနံ ဥပေတံ. ရုစကုပတိဏ္ဏန္တိ သုဝဏ္ဏဝါလိကာဟိ ဩကိဏ္ဏင်္ဂဏံ. ဝါလိကသဒိသာ ဟိ သုဝဏ္ဏခဏ္ဍာ ရုစာ နာမ၊ ရုစမေဝ ရုစကန္တိ ဝုတ္တံ. သုဘန္တိ သောဘတိ၊ သုဋ္ဌု ဘာတီတိ ဝါ သုဘံ. ဝိမာနန္တိ ဝိသိဋ္ဌမာနံ၊ ပမာဏတော မဟန္တန္တိ အတ္ထော.

၆၄၇. ဘာတီတိ ဇောတတိ ဥဇ္ဇလတိ. နဘေဝ သုရိယောတိ အာကာသေ အာဒိစ္စော ဝိယ. သရဒေတိ သရဒသမယေ. တမောနုဒေါတိ အန္ဓကာရဝိဒ္ဓံသနော. တထာ တပတိ မိဒန္တိ ယထာ သရဒကာလေ သဟဿရံသီ သူရိယော၊ တထာ တပတိ ဒိဗ္ဗတိ ဣဒံ တဝ ဝိမာနံ၊ မ-ကာရော ပဒသန္ဓိကရော. ဇလမိဝ ဓူမသိခေါတိ ဇလန္တော အဂ္ဂိ ဝိယ. အဂ္ဂိ ဟိ တဿ အဂ္ဂတော ဓူမော ပညာယတီတိ ‘‘ဓူမသိခေါ ဓူမကေတူ’’တိ စ ဝုစ္စတိ. နိသေတိ နိသတိ၊ ရတ္တိယန္တိ အတ္ထော. နဘဂ္ဂေတိ နဘကောဋ္ဌာသေ၊ အာကာသပဒေသေတိ ဝုတ္တံ ဟောတိ. ‘‘နဂဂ္ဂေ’’တိ ဝါ ပါဌော၊ ပဗ္ဗတသိခရေတိ အတ္ထော. ဣဒံ တဝ ဝိမာနန္တိ ယောဇနာ.

၆၄၈. မုသတီဝ နယနန္တိ အတိဝိယ အတ္တနော ပဘဿရတာယ ပဋိဟနန္တံ ဒဿနကိစ္စံ ကာတုံ အဒေန္တံ ဩလောကေန္တာနံ စက္ခုံ မုသတိ ဝိယ. တေနာဟ ‘‘သတေရတာဝါ’’တိ၊ ဝိဇ္ဇုလတာ ဝိယာတိ အတ္ထော. ဝီဏာမုရဇသမ္မတာဠဃုဋ္ဌန္တိ မဟတီအာဒိဝီဏာနံ ဘေရိအာဒိပဋဟာနံ ဟတ္ထတာဠကံသတာဠာနဉ္စ သဒ္ဒေဟိ ဃောသိတံ ဧကနိန္နာဒံ. ဣဒ္ဓန္တိ ဒေဝပုတ္တေဟိ ဒေဝဓီတာဟိ ဒိဗ္ဗသမ္ပတ္တိယာ စ သမိဒ္ဓံ. ဣန္ဒပုရံ ယထာတိ သုဒဿနနဂရံ ဝိယ.

၆၄၉. ပဒုမာနိ စ ကုမုဒါနိ စ ဥပ္ပလာနိ စ ကုဝလယာနိ စ ပဒုမကုမုဒုပ္ပလကုဝလယန္တိ ဧကတ္တဝသေန ဝုတ္တံ. အတ္ထီတိ ဝစနံ ပရိဏာမေတွာ ယောဇေတဗ္ဗံ. တတ္ထ ပဒုမဂ္ဂဟဏေန ပုဏ္ဍရီကမ္ပိ ဂဟိတံ၊ ကုမုဒဂ္ဂဟဏေန သေတရတ္တဘေဒါနိ သဗ္ဗာနိ ကုမုဒါနိ၊ ဥပ္ပလဂ္ဂဟဏေန ရတ္တဥပ္ပလံ သဗ္ဗာ ဝါ ဥပ္ပလဇာတိ၊ ကုဝလယဂ္ဂဟဏေန နီလုပ္ပလမေဝ ဂဟိတန္တိ ဝေဒိတဗ္ဗံ. ယောဓိကဗန္ဓုကနောဇကာ စ သန္တီတိ စ-ကာရော နိပါတမတ္တံ၊ ယောဓိကဗန္ဓုဇီဝကအနောဇကရုက္ခာ စ သန္တီတိ အတ္ထော. ကေစိ ‘‘အနောဇကာပိ သန္တီ’’တိ ပါဌံ ဝတွာ ‘‘အနောဇကာပီတိ ဝုတ္တံ ဟောတီ’’တိ အတ္ထံ ဝဒန္တိ. သာလကုသုမိတပုပ္ဖိတာ အသောကာတိ သာလာ ကုသုမိတာ ပုပ္ဖိတာ အသောကာတိ ယောဇေတဗ္ဗံ. ဝိဝိဓဒုမဂ္ဂသုဂန္ဓသေဝိတမိဒန္တိ နာနာဝိဓာနံ ဥတ္တမရုက္ခာနံ သောဘနေဟိ ဂန္ဓေဟိ သေဝိတံ ပရိဘာဝိတံ ဣဒံ တေ ဝိမာနန္တိ အတ္ထော.

၆၅၀. သဠလလဗုဇဘုဇကသံယုတ္တာတိ တီရေ ဌိတေဟိ သဠလေဟိ လဗုဇေဟိ ဘုဇကရုက္ခေဟိ စ သဟိတာ. ဘုဇကော နာမ ဧကော သုဂန္ဓရုက္ခော ဒေဝလောကေ စ ဂန္ဓမာဒနေ စ အတ္ထိ၊ အညတ္ထ နတ္ထီတိ ဝဒန္တိ. ကုသကသုဖုလ္လိတလတာဝလမ္ဗိနီဟီတိ ကုသကေဟိ တာလနာဠိကေရာဒီဟိ တိဏဇာတီဟိ ဩလမ္ဗမာနာဟိ သန္တာနကဝလ္လိအာဒီဟိ သုဋ္ဌု ကုသုမိတလတာဟိ စ သံယုတ္တာတိ ယောဇနာ. မဏိဇာလသဒိသာတိ မဏိဇာလသဒိသဇလာ. ‘‘မဏိဇလသဒိသာ’’တိပိ ပါဠိ၊ မဏိသဒိသဇလာတိ အတ္ထော. ယသဿိနီတိ ဒေဝတာယ အာလပနံ. ဥပဋ္ဌိတာ တေတိ ယထာဝုတ္တဂုဏာ ရမဏီယာ ပေါက္ခရဏီ တဝ ဝိမာနသမီပေ ဌိတာ.

၆၅၁. ဥဒကရုဟာတိ ယထာဝုတ္တေ ပဒုမာဒိကေ သန္ဓာယ ဝဒတိ. ယေတ္ထီတိ ယေ အတ္ထိ. ထလဇာတိ ယောဓိကာဒိကာ. ယေ စ သန္တီတိ ယေ အညေပိ ရုက္ခဇာတာ ပုပ္ဖူပဂါ စ ဖလူပဂါ စ၊ တေပိ တဝ ဝိမာနသမီပေ သန္တိယေဝ.

၆၅၂. ကိဿ သံယမဒမဿယံ ဝိပါကောတိ ကာယသံယမာဒီသု ကီဒိသဿ သံယမဿ၊ ဣန္ဒြိယဒမနာဒီသု ကီဒိသဿ ဒမဿ အယံ ဝိပါကော. ကေနာသီတိ အညမေဝ ဥပပတ္တိနိဗ္ဗတ္တကံ၊ အညံ ဥပဘောဂသုခနိဗ္ဗတ္တကံ ဟောတီတိ ‘‘ကေနာသိ ကမ္မဖလေနိဓူပပန္နာ’’တိ ဝတွာ ပုန ‘‘ယထာ စ တေ အဓိဂတမိဒံ ဝိမာန’’န္တိ အာဟ. တတ္ထ ကမ္မဖလေနာတိ ကမ္မဖလေန ဝိပစ္စိတုံ အာရဒ္ဓေနာတိ ဝစနသေသော၊ ဣတ္ထမ္ဘူတလက္ခဏေ စေတံ ကရဏဝစနံ. တဒနုပဒံ အဝစာသီတိ တံ ကမ္မံ မယာ ဝုတ္တပဒဿ အနုပဒံ အနုရူပပဒံ ကတွာ ကထေယျာသိ. အဠာရပမှေတိ ဗဟလသံဟတပခုမေ၊ ဂေါပခုမေတိ အဓိပ္ပါယော.

အထ ဒေဝတာ အာဟ –

၆၅၃. ‘‘ယထာ စ မေ အဓိဂတမိဒံ ဝိမာနံ၊ ကောဉ္စမယူရစကောရ သံဃစရိတံ၊

ဒိဗျပိလဝဟံသရာဇစိဏ္ဏံ၊ ဒိဇကာရဏ္ဍဝကောကိလာဘိနဒိတံ.

၆၅၄. ‘‘နာနာသန္တာနကပုပ္ဖရုက္ခဝိဝိဓာ၊ ပါဋလိဇမ္ဗုအသောကရုက္ခဝန္တံ၊

ယထာ စ မေ အဓိဂတမိဒံ ဝိမာနံ၊ တံ တေ ပဝေဒယာမိ သုဏောဟိ ဘန္တေ.

၆၅၅. ‘‘မဂဓဝရပုရတ္ထိမေန၊ နာလကဂါမော နာမ အတ္ထိ ဘန္တေ၊

တတ္ထ အဟောသိံ ပုရေ သုဏိသာ၊ ပေသဝတီတိ တတ္ထ ဇာနိံသု မမံ.

၆၅၆. ‘‘သာဟမပစိတတ္ထဓမ္မကုသလံ၊ ဒေဝမနုဿပူဇိတံ မဟန္တံ၊

ဥပတိဿံ နိဗ္ဗုတမပ္ပမေယျံ၊ မုဒိတမနာ ကုသုမေဟိ အဗ္ဘုကိရိံ.

၆၅၇. ‘‘ပရမဂတိဂတဉ္စ ပူဇယိတွာ၊ အန္တိမဒေဟဓရံ ဣသိံ ဥဠာရံ၊

ပဟာယ မာနုသကံ သမုဿယံ၊ တိဒသဂတာ ဣဓ မာဝသာမိ ဌာန’’န္တိ.

၆၅၃. တတ္ထ ကောဉ္စမယူရစကောရသံဃစရိတန္တိ သာရသသိခဏ္ဍိကုမ္ဘကာရကုက္ကုဋဂဏေဟိ တတ္ထ တတ္ထ ဝိစရိတံ. ဒိဗျပိလဝဟံသရာဇစိဏ္ဏန္တိ ဥဒကေ ပိလဝိတွာ ဝိစရဏတော ‘‘ပိလဝါ’’တိ လဒ္ဓနာမေဟိ ဥဒကသကုဏေဟိ ဟံသရာဇေဟိ စ တဟိံ တဟိံ ဝိစရိတံ. ဒိဇကာရဏ္ဍဝကောကိလာဘိနဒိတန္တိ ကာရဏ္ဍဝေဟိ ကာဒမ္ဗေဟိ ကောကိလေဟိ အညေဟိ စ ဒိဇေဟိ အဘိနာဒိတံ.

၆၅၄. နာနာသန္တာနကပုပ္ဖရုက္ခဝိဝိဓာတိ နာနာဝိဓသာခါပသာခဝန္တာ နာနာပုပ္ဖရုက္ခာ နာနာသန္တာနကပုပ္ဖရုက္ခာ၊ တေဟိ ဝိဝိဓံ စိတ္တာကာရံ ဝိစိတ္တသန္နိဝေသံ နာနာသန္တာနကပုပ္ဖရုက္ခဝိဝိဓာ. ‘‘ဝိဝိဓ’’န္တိ ဟိ ဝတ္တဗ္ဗေ ‘‘ဝိဝိဓာ’’တိ ဝုတ္တံ. သန္တာနကာတိ ဟိ ကာမဝလ္လိယော၊ နာနာဝိဓပုပ္ဖရုက္ခာ စ ဝိဝိဓာ ဧတ္ထ သန္တိ၊ တေဟိ ဝါ ဝိဝိဓန္တိ နာနာသန္တာနကပုပ္ဖရုက္ခဝိဝိဓာ. ‘‘နာနာသန္တာနကပုပ္ဖရုက္ခဝိဝိဓံ၊ ပါဋလိဇမ္ဗုအသောကရုက္ခဝန္တ’’န္တိ စ ကေစိ ပဌန္တိ. တေဟိ ‘‘ပုပ္ဖရုက္ခာ သန္တီ’’တိ ပဒံ အာနေတွာ သမ္ဗန္ဓိတဗ္ဗံ. ‘‘ပုပ္ဖရုက္ခာ’’တိ ဝါ အဝိဘတ္တိကနိဒ္ဒေသော၊ ပုပ္ဖရက္ခန္တိ ဝုတ္တံ ဟောတိ.

၆၅၅. မဂဓဝရပုရတ္ထိမေနာတိ မဂဓဝရေ ပုရတ္ထိမေန၊ အဘိသမ္ဗောဓိဋ္ဌာနတာယ ဥတ္တမေ မဂဓရဋ္ဌေ ပုရတ္ထိမဒိသာယ. တတ္ထ အဟောသိံ ပုရေ သုဏိသာတိ ပုဗ္ဗေ အဟံ တသ္မိံ နာလကဂါမေ ဧကသ္မိံ ဂဟပတိကုလေ သုဏိသာ သုဏှာ အဟောသိံ.

၆၅၆. သာတိ သယံ. အတ္ထေ စ ဓမ္မေ စ ကုသလောတိ အတ္ထဓမ္မကုသလော၊ ဘဂဝါ. အပစိတော အတ္ထဓမ္မကုသလော ဧတေနာတိ အပစိတတ္ထဓမ္မကုသလော၊ ဓမ္မသေနာပတိ၊ တံ. အပစိတံ ဝါ အပစယော၊ နိဗ္ဗာနံ၊ တသ္မိံ အဝသိဋ္ဌအတ္ထဓမ္မေ စ ကုသလံ၊ အပစိတေ ဝါ ပူဇနီယေ အတ္ထေ ဓမ္မေ နိရောဓေ မဂ္ဂေ စ ကုသလံ. မဟန္တေဟိ ဥဠာရေဟိ သီလက္ခန္ဓာဒီဟိ သမန္နာဂတတ္တာ မဟန္တံ. ကုသုမေဟီတိ ရတနမယေဟိ ဣတရေဟိ စ ကုသုမေဟိ.

၆၅၇. ပရမဂတိဂတန္တိ အနုပါဒိသေသနိဗ္ဗာနံ ပတ္တံ. သမုဿယန္တိ သရီရံ. တိဒသဂတာတိ တိဒသဘဝနံ ဂတာ၊ တာဝတိံသံ ဒေဝနိကာယံ ဥပပန္နာ. ဣဓာတိ ဣမသ္မိံ ဒေဝလောကေ. အာဝသာမိ ဌာနန္တိ ဣမံ ဝိမာနံ အဓိဝသာမိ. သေသံ ဝုတ္တနယမေဝ.

ဧဝံ အာယသ္မတာ ဝင်္ဂီသေန ဒေဝတာယ စ ကထိတကထာမဂ္ဂံ အဋ္ဌုပ္ပတ္တိံ ကတွာ ဘဂဝါ သမ္ပတ္တပရိသာယ ဝိတ္ထာရေန ဓမ္မံ ဒေသေသိ. သာ ဒေသနာ မဟာဇနဿ သာတ္ထိကာ အဟောသီတိ.

ပေသဝတီဝိမာနဝဏ္ဏနာ နိဋ္ဌိတာ.