၆. ဒဒ္ဒလ္လဝိမာနဝဏ္ဏနာ

ဒဒ္ဒလ္လမာနာ ဝဏ္ဏေနာတိ ဒဒ္ဒလ္လဝိမာနံ. တဿ ကာ ဥပ္ပတ္တိ? ဘဂဝါ သာဝတ္ထိယံ ဝိဟရတိ ဇေတဝနေ. တေန စ သမယေန နာလကဂါမကေ အာယသ္မတော ရေဝတတ္ထေရဿ ဥပဋ္ဌာကဿ အညတရဿ ကုဋုမ္ဗိကဿ ဒွေ ဓီတရော အဟေသုံ၊ ဧကာ ဘဒ္ဒါ နာမ၊ ဣတရာ သုဘဒ္ဒါ နာမ. တာသု ဘဒ္ဒါ ပတိကုလံ ဂတာ သဒ္ဓါ ပသန္နာ ဗုဒ္ဓိသမ္ပန္နာ ဝဉ္ဈာ စ အဟောသိ. သာ သာမိကံ အာဟ ‘‘မမ ကနိဋ္ဌာ သုဘဒ္ဒါ နာမ အတ္ထိ၊ တံ အာနေဟိ၊ သစဿာ ပုတ္တော ဘဝေယျ၊ သော မမပိ ပုတ္တော သိယာ၊ အယဉ္စ ကုလဝံသော န နဿေယျာ’’တိ. သော ‘‘သာဓူ’’တိ သမ္ပဋိစ္ဆိတွာ တထာ အကာသိ.

အထ ဘဒ္ဒါ သုဘဒ္ဒံ ဩဝဒိ ‘‘သုဘဒ္ဒေ၊ ဒါနသံဝိဘာဂရတာ ဓမ္မစရိယာယ အပ္ပမတ္တာ ဟောဟိ၊ ဧဝံ တေ ဒိဋ္ဌဓမ္မိကော သမ္ပရာယိကော စ အတ္ထော ဟတ္ထဂတော ဧဝ ဟောတီ’’တိ. သာ တဿာ ဩဝါဒေ ဌတွာ ဝုတ္တနယေန ပဋိပဇ္ဇမာနာ ဧကဒိဝသံ အာယသ္မန္တံ ရေဝတတ္ထေရံ အတ္တဋ္ဌမံ နိမန္တေသိ. ထေရော သုဘဒ္ဒါယ ပုညူပစယံ အာကင်္ခန္တော သင်္ဃုဒ္ဒေသဝသေန သတ္တ ဘိက္ခူ ဂဟေတွာ တဿာ ဂေဟံ အဂမာသိ. သာ ပသန္နစိတ္တာ အာယသ္မန္တံ ရေဝတတ္ထေရံ တေ စ ဘိက္ခူ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေသိ၊ ထေရော အနုမောဒနံ ကတွာ ပက္ကာမိ. သာ အပရဘာဂေ ကာလံ ကတွာ နိမ္မာနရတီနံ ဒေဝါနံ သဟဗျတံ ဥပပဇ္ဇိ. ဘဒ္ဒါ ပန ပုဂ္ဂလေသု ဒါနာနိ ဒတွာ သက္ကဿ ဒေဝါနမိန္ဒဿ ပရိစာရိကာ ဟုတွာ နိဗ္ဗတ္တိ.

အထ သုဘဒ္ဒါ အတ္တနော သမ္ပတ္တိံ ပစ္စဝေက္ခိတွာ ‘‘ကေန နု ခေါ အဟံ ပုညေန ဣဓူပပန္နာ’’တိ အာဝဇ္ဇေန္တီ ‘‘ဘဒ္ဒါယ ဩဝါဒေ ဌတွာ သံဃဂတာယ ဒက္ခိဏာယ ဣမံ သမ္ပတ္တိံ သမ္ပတ္တာ၊ ဘဒ္ဒါ နု ခေါ ကဟံ နိဗ္ဗတ္တာ’’တိ ဩလောကေန္တီ တံ သက္ကဿ ပရိစာရိကာဘာဝေန နိဗ္ဗတ္တံ ဒိသွာ အနုကမ္ပမာနာ တဿာ ဝိမာနံ ပါဝိသိ. အထ နံ ဘဒ္ဒါ –

၆၁၉. ‘‘ဒဒ္ဒလ္လမာနာ ဝဏ္ဏေန၊ ယသသာ စ ယသဿိနီ၊

သဗ္ဗေ ဒေဝေ တာဝတိံသေ၊ ဝဏ္ဏေန အတိရောစသိ.

၆၂၀. ‘‘ဒဿနံ နာဘိဇာနာမိ၊ ဣဒံ ပဌမဒဿနံ၊

ကသ္မာ ကာယာ နု အာဂမ္မ၊ နာမေန ဘာသသေ မမ’’န္တိ. –

ဒွီဟိ ဂါထာဟိ ပုစ္ဆိ. သာပိ တဿာ –

၆၂၁. ‘‘အဟံ ဘဒ္ဒေ သုဘဒ္ဒါသိံ၊ ပုဗ္ဗေ မာနုသကေ ဘဝေ၊

သဟဘရိယာ စ တေ အာသိံ၊ ဘဂိနီ စ ကနိဋ္ဌိကာ.

၆၂၂. ‘‘သာ အဟံ ကာယဿ ဘေဒါ၊ ဝိပ္ပမုတ္တာ တတော စုတာ၊

နိမ္မာနရတီနံ ဒေဝါနံ၊ ဥပပန္နာ သဟဗျတ’’န္တိ. – ဒွီဟိ ဂါထာဟိ ဗျာကာသိ၊

၆၁၉-၂၀. တတ္ထ ဝဏ္ဏေနာတိ ဝဏ္ဏာဒိသမ္ပတ္တိယာ. ဒဿနံ နာဘိဇာနာမီတိ ဣတော ပုဗ္ဗေ တဝ ဒဿနံ နာဘိဇာနာမိ၊ တွံ မယာ န ဒိဋ္ဌပုဗ္ဗာတိ အတ္ထော. တေနာဟ ‘‘ဣဒံ ပဌမဒဿန’’န္တိ. ကသ္မာ ကာယာ နု အာဂမ္မ၊ နာမေန ဘာသသေ မမန္တိ ကတရဒေဝနိကာယတော အာဂန္တွာ ‘‘ဘဒ္ဒေ’’တိ နာမေန မံ အာလပသိ.

၆၂၁. အဟံ ဘဒ္ဒေတိ ဧတ္ထ ဘဒ္ဒေတိ အာလပနံ. သုဘဒ္ဒါသိန္တိ အဟံ သုဘဒ္ဒါ နာမ တဝ ဘဂိနီ ကနိဋ္ဌိကာ အာသိံ အဟောသိံ၊ တတ္ထ ပုဗ္ဗေ မာနုသကေ ဘဝေ သဟဘရိယာ သမာနဘရိယာ တေ တယာ ဧကဿေဝ ဘရိယာ၊ တဝ ပတိနော ဧဝ ဘရိယာ၊ အာသိန္တိ အတ္ထော. ပုန ဘဒ္ဒါ –

၆၂၃. ‘‘ပဟူတကတကလျာဏာ၊ တေ ဒေဝေ ယန္တိ ပါဏိနော၊

ယေသံ တွံ ကိတ္တယိဿသိ၊ သုဘဒ္ဒေ ဇာတိမတ္တနော.

၆၂၄. ‘‘အထ တွံ ကေန ဝဏ္ဏေန၊ ကေန ဝါ အနုသာသိတာ၊

ကီဒိသေနေဝ ဒါနေန၊ သုဗ္ဗတေန ယသဿိနီ.

၆၂၅. ‘‘ယသံ ဧတာဒိသံ ပတ္တာ၊ ဝိသေသံ ဝိပုလမဇ္ဈဂါ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ. –

တီဟိ ဂါထာဟိ ပုစ္ဆိ. ပုန သုဘဒ္ဒါ –

၆၂၆. ‘‘အဋ္ဌေဝ ပိဏ္ဍပါတာနိ၊ ယံ ဒါနံ အဒဒံ ပုရေ၊

ဒက္ခိဏေယျဿ သံဃဿ၊ ပသန္နာ သေဟိ ပါဏိဘိ.

၆၂၇. ‘‘တေန မေတာဒိသော ဝဏ္ဏော။ပေ။

ဝဏ္ဏော စ မေ သဗ္ဗဒိသာ ပဘာသတီ’’တိ. –

ဗျာကာသိ.

၆၂၃. တတ္ထ ပဟူတကတကလျာဏာ တေ ဒေဝေ ယန္တီတိ ပဟူတကတကလျာဏာ မဟာပုညာ တေ နိမ္မာနရတိနော ဒေဝေ ယန္တိ ဥပ္ပဇ္ဇနဝသေန ဂစ္ဆန္တိ ပါဏိနော သတ္တာ၊ ယေသံ နိမ္မာနရတီနံ ဒေဝါနံ အန္တရေ တွံ အတ္တနော ဇာတိံ ကိတ္တယိဿသိ ကထေသီတိ ယောဇနာ.

၆၂၄. ကေန ဝဏ္ဏေနာတိ ကေန ကာရဏေန. ကီဒိသေနေဝါတိ ဧဝသဒ္ဒေါ သမုစ္စယတ္ထော၊ ကီဒိသေန စာတိ အတ္ထော၊ အယမေဝ ဝါ ပါဌော. သုဗ္ဗတေနာတိ သုန္ဒရေန ဝတေန၊ သုဝိသုဒ္ဓေန သီလေနာတိ အတ္ထော.

၆၂၆. အဋ္ဌေဝ ပိဏ္ဍပါတာနီတိ အဋ္ဌန္နံ ဘိက္ခူနံ ဒိန္နပိဏ္ဍပါတေ သန္ဓာယ ဝဒတိ. အဒဒန္တိ အဒါသိံ.

ဧဝံ သုဘဒ္ဒါယ ကထိတေ ပုန ဘဒ္ဒါ –

၆၂၉. ‘‘အဟံ တယာ ဗဟုတရေ ဘိက္ခူ၊ သညတေ ဗြဟ္မစာရယော၊

တပ္ပေသိံ အန္နပါနေန၊ ပသန္နာ သေဟိ ပါဏိဘိ.

၆၃၀. ‘‘တယာ ဗဟုတရံ ဒတွာ၊ ဟီနကာယူပဂါ အဟံ၊

ကထံ တွံ အပ္ပတရံ ဒတွာ၊ ဝိသေသံ ဝိပုလမဇ္ဈဂါ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ. –

ပုစ္ဆိ. တတ္ထ တယာတိ နိဿက္ကေ ကရဏဝစနံ. ပုန သုဘဒ္ဒါ –

၆၃၁. ‘‘မနောဘာဝနီယော ဘိက္ခု၊ သန္ဒိဋ္ဌော မေ ပုရေ အဟု၊

တာဟံ ဘတ္တေန နိမန္တေသိံ၊ ရေဝတံ အတ္တနဋ္ဌမံ.

၆၃၂. ‘‘သော မေ အတ္ထပုရေက္ခာရော၊ အနုကမ္ပာယ ရေဝတော၊

သံဃေ ဒေဟီတိ မံဝေါစ၊ တဿာဟံ ဝစနံ ကရိံ.

၆၃၃. ‘‘သာ ဒက္ခိဏာ သံဃဂတာ၊ အပ္ပမေယျေ ပတိဋ္ဌိတာ၊

ပုဂ္ဂလေသု တယာ ဒိန္နံ၊ န တံ တဝ မဟပ္ဖလ’’န္တိ. –

အတ္တနာ ကတကမ္မံ ကထေသိ.

၆၃၁. တတ္ထ မနောဘာဝနီယောတိ မနဝဍ္ဎနကော ဥဠာရဂုဏတာယ သမ္ဘာဝနီယော. သန္ဒိဋ္ဌောတိ နိမန္တနဝသေန ဗောဓိတော ကထိတော. တေနာဟ ‘‘တာဟံ ဘတ္တေန နိမန္တေသိံ၊ ရေဝတံ အတ္တနဋ္ဌမ’’န္တိ၊ တံ မနောဘာဝနီယံ အယျံ ရေဝတံ အတ္တနဋ္ဌမံ ဘတ္တေန အဟံ နိမန္တေသိံ.

၆၃၂-၃. သော မေ အတ္ထပုရေက္ခာရောတိ သော အယျော ရေဝတော ဒါနဿ မဟပ္ဖလဘာဝကရဏေန မမ အတ္ထပုရေက္ခာရော ဟိတေသီ. သံဃေ ဒေဟီတိ မံဝေါစာတိ ‘‘ယဒိ တွံ သုဘဒ္ဒေ အဋ္ဌန္နံ ဘိက္ခူနံ ဒါတုကာမာ၊ ယသ္မာ ပုဂ္ဂလဂတာယ ဒက္ခိဏာယ သံဃဂတာ ဧဝ ဒက္ခိဏာ မဟပ္ဖလတရာ၊ တသ္မာ သံဃေ ဒေဟိ၊ သံဃံ ဥဒ္ဒိဿ ဒါနံ ဒေဟီ’’တိ မံ အဘာသိ. တန္တိ တံ ဒါနံ.

ဧဝံ သုဘဒ္ဒါယ ဝုတ္တေ ဘဒ္ဒါ တမတ္ထံ သမ္ပဋိစ္ဆန္တီ ဥတ္တရိ စ တထာ ပဋိပဇ္ဇိတုကာမာ –

၆၃၄. ‘‘ဣဒါနေဝါဟံ ဇာနာမိ၊ သံဃေ ဒိန္နံ မဟပ္ဖလံ၊

သာဟံ ဂန္တွာ မနုဿတ္တံ၊ ဝဒညူ ဝီတမစ္ဆရာ၊

သံဃေ ဒါနာနိ ဒဿာမိ၊ အပ္ပမတ္တာ ပုနပ္ပုန’’န္တိ. –

ဂါထမာဟ. သုဘဒ္ဒါ ပန အတ္တနော ဒေဝလောကမေဝ ဂတာ. အထ သက္ကော ဒေဝါနမိန္ဒော သဗ္ဗေ ဒေဝေ တာဝတိံသေ အတ္တနော သရီရောဘာသေန အဘိဘုယျ ဝိရောစမာနံ သုဘဒ္ဒံ ဒေဝဓီတရံ ဒိသွာ တဉ္စ တာသံ ကထာသလ္လာပံ သုတွာ တာဝဒေဝ စ သုဘဒ္ဒါယ အန္တရဟိတာယ တံ ‘‘အယံ နာမာ’’တိ အဇာနန္တော –

၆၃၅. ‘‘ကာ ဧသာ ဒေဝတာ ဘဒ္ဒေ၊ တယာ မန္တယတေ သဟ၊

သဗ္ဗေ ဒေဝေ တာဝတိံသေ၊ ဝဏ္ဏေန အတိရောစတီ’’တိ. –

ဘဒ္ဒံ ပုစ္ဆိ. သာပိဿ –

၆၃၆. ‘‘မနုဿဘူတာ ဒေဝိန္ဒ၊ ပုဗ္ဗေ မာနုသကေ ဘဝေ၊

သဟဘရိယာ စ မေ အာသိ၊ ဘဂိနီ စ ကနိဋ္ဌိကာ၊

သံဃေ ဒါနာနိ ဒတွာန၊ ကတပုညာ ဝိရောစတီ’’တိ. –

ကထေသိ. အထ သက္ကော တဿာ သံဃဂတာယ ဒက္ခိဏာယ မဟပ္ဖလဘာဝံ ဒဿေန္တော ဓမ္မံ ကထေသိ. တေန ဝုတ္တံ –

၆၃၇. ‘‘ဓမ္မေန ပုဗ္ဗေ ဘဂိနီ၊ တယာ ဘဒ္ဒေ ဝိရောစတိ၊

ယံ သံဃမှိ အပ္ပမေယျေ၊ ပတိဋ္ဌာပေသိ ဒက္ခိဏံ.

၆၃၈. ‘‘ပုစ္ဆိတော ဟိ မယာ ဗုဒ္ဓေါ၊ ဂိဇ္ဈကူဋမှိ ပဗ္ဗတေ၊

ဝိပါကံ သံဝိဘာဂဿ၊ ယတ္ထ ဒိန္နံ မဟပ္ဖလံ.

၆၃၉. ‘‘ယဇမာနာနံ မနုဿာနံ၊ ပုညပေက္ခာန ပါဏိနံ၊

ကရောတံ ဩပဓိကံ ပုညံ၊ ယတ္ထ ဒိန္နံ မဟပ္ဖလံ.

၆၄၀. ‘‘တံ မေ ဗုဒ္ဓေါ ဝိယာကာသိ၊ ဇာနံ ကမ္မဖလံ သကံ၊

ဝိပါကံ သံဝိဘာဂဿ၊ ယတ္ထ ဒိန္နံ မဟပ္ဖလံ.

၆၄၁. ‘‘စတ္တာရော စ ပဋိပန္နာ၊ စတ္တာရော စ ဖလေ ဌိတာ၊

ဧသ သံဃော ဥဇုဘူတော၊ ပညာသီလသမာဟိတော.

၆၄၂. ‘‘ယဇမာနာနံ မနုဿာနံ၊ ပုညပေက္ခာန ပါဏိနံ၊

ကရောတံ ဩပဓိကံ ပုညံ၊ သံဃေ ဒိန္နံ မဟပ္ဖလံ.

၆၄၃. ‘‘ဧသော ဟိ သံဃော ဝိပုလော မဟဂ္ဂတော၊ ဧသပ္ပမေယျော ဥဒဓီဝ သာဂရော၊

ဧတေ ဟိ သေဋ္ဌာ နရဝီရသာဝကာ၊ ပဘင်္ကရာ ဓမ္မမုဒီရယန္တိ.

၆၄၄. ‘‘တေသံ သုဒိန္နံ သုဟုတံ သုယိဋ္ဌံ၊ ယေ သံဃမုဒ္ဒိဿ ဒဒန္တိ ဒါနံ၊

သာ ဒက္ခိဏာ သံဃဂတာ ပတိဋ္ဌိတာ၊ မဟပ္ဖလာ လောကဝိဒူန ဝဏ္ဏိတာ.

၆၄၅. ‘‘ဧတာဒိသံ ယညမနုဿရန္တာ၊ ယေ ဝေဒဇာတာ ဝိစရန္တိ လောကေ၊

ဝိနေယျ မစ္ဆေရမလံ သမူလံ၊ အနိန္ဒိတာ သဂ္ဂမုပေန္တိ ဌာန’’န္တိ.

၆၃၇. တတ္ထ ဓမ္မေနာတိ ကာရဏေန ဉာယေန ဝါ. တယာတိ နိဿက္ကေ ကရဏဝစနံ. ဣဒါနိ တံ ‘‘ဓမ္မေနာ’’တိ ဝုတ္တကာရဏံ ဒဿေတုံ ယံ သံဃမှိ အပ္ပမေယျေ၊ ပတိဋ္ဌာပေသိ ဒက္ခိဏ’’န္တိ ဝုတ္တံ. အပ္ပမေယျေတိ ဂုဏာနုဘာဝဿ အတ္တနိ ကတာနံ ကာရာနံ ဖလဝိသေသဿ စ ဝသေန ပမိနိတုံ အသက္ကုဏေယျေ.

၆၃၈-၉. အယဉ္စ အတ္ထော ဘဂဝတော သမ္မုခါ စ သုတော၊ သမ္မုခါ စ ပဋိဂ္ဂဟိတောတိ ဒဿေန္တော ‘‘ပုစ္ဆိတော’’တိအာဒိမာဟ. တတ္ထ ယဇမာနာနန္တိ ဒဒန္တာနံ. ပုညပေက္ခာန ပါဏိနန္တိ အနုနာသိကလောပံ ကတွာ နိဒ္ဒေသော၊ ပုညဖလံ အာကင်္ခန္တာနံ သတ္တာနံ. ဩပဓိကန္တိ ဥပဓိ နာမ ခန္ဓာ၊ ဥပဓိဿ ကရဏသီလံ၊ ဥပဓိပယောဇနန္တိ ဝါ ဩပဓိကံ၊ အတ္တဘာဝဇနကံ ပဋိသန္ဓိပဝတ္တိဝိပါကဒါယကံ.

၆၄၀. ဇာနံ ကမ္မဖလံ သကန္တိ သတ္တာနံ သကံ သကံ ယထာသကံ ပုညံ ပုညဖလဉ္စ ဟတ္ထတလေ အာမလကံ ဝိယ ဇာနန္တော. သကန္တိ ဝါ ယကာရဿ ကကာရံ ကတွာ ဝုတ္တံ၊ သယံ အတ္တနာတိ အတ္ထော.

၆၄၁. ပဋိပန္နာတိ ပဋိပဇ္ဇမာနာ၊ မဂ္ဂဋ္ဌာတိ အတ္ထော. ဥဇုဘူတောတိ ဥဇုပဋိပတ္တိယာ ဥဇုဘာဝံ ပတ္တော ဒက္ခိဏေယျော ဇာတော. ပညာသီလသမာဟိတောတိ ပညာယ သီလေန စ သမာဟိတော၊ ဒိဋ္ဌိသီလသမ္ပန္နော အရိယာယ ဒိဋ္ဌိယာ အရိယေန သီလေန စ သမန္နာဂတော. တေနာပိဿ ပရမတ္ထသံဃဘာဝမေဝ ဝိဘာဝေတိ. ဒိဋ္ဌိသီလသာမညေန သင်္ဃဋိတတ္တာ ဟိ သံဃော. အထ ဝါ သမာဟိတံ သမာဓိ၊ ပညာ သီလံ သမာဟိတဉ္စ အဿ အတ္ထီတိ ပညာသီလသမာဟိတော. တေနဿ သီလာဒိဓမ္မက္ခန္ဓတ္တယသမ္ပန္နတာယ အဂ္ဂဒက္ခိဏေယျဘာဝံ ဝိဘာဝေတိ.

၆၄၃. ဝိပုလော မဟဂ္ဂတောတိ ဂုဏေဟိ မဟတ္တံ ဂတောတိ မဟဂ္ဂတော၊ တတော ဧဝ အတ္တနိ ကတာနံ ကာရာနံ ဖလဝေပုလ္လဟေတုတာယ ဝိပုလော. ဥဒဓီဝ သာဂရောတိ ယထာ ဥဒကံ ဧတ္ထ ဓီယတီတိ ‘‘ဥဒဓီ’’တိ လဒ္ဓနာမော သာဂရော၊ ‘‘ဧတ္တကာနိ ဥဒကာဠှကာနီ’’တိအာဒိနာ ဥဒကတော အပ္ပမေယျော၊ ဧဝမေသ ဂုဏတောတိ အတ္ထော. ဧတေ ဟီတိ ဟိ-သဒ္ဒေါ အဝဓာရဏေ နိပါတော၊ ဧတေ ဧဝ သေဋ္ဌာတိ အတ္ထော. ဝုတ္တဉှေတံ –

‘‘ယာဝတာ၊ ဘိက္ခဝေ၊ သံဃာ ဝါ ဂဏာ ဝါ၊ တထာဂတသာဝကသံဃော တေသံ အဂ္ဂမက္ခာယတီ’’တိ (ဣတိဝု. ၉၀၊ အ. နိ. ၄.၃၄၊ ၅.၃၂).

နရဝီရသာဝကာတိ နရေသု ဝီရိယသမ္ပန္နဿ နရဿ သာဝကာ. ပဘင်္ကရာတိ လောကဿ ဉာဏာလောကကရာ. ဓမ္မမုဒီရယန္တီတိ ဓမ္မံ ဥဒ္ဒိသန္တိ. ကထံ? ဓမ္မသာမိနာ ဟိ ဓမ္မပဇ္ဇောတော အရိယသံဃေ ဌပိတော.

၆၄၄. ယေ သံဃမုဒ္ဒိဿ ဒဒန္တိ ဒါနန္တိ ယေ သတ္တာ အရိယသံဃံ ဥဒ္ဒိဿ သမ္မုတိသံဃေ အန္တမသော ဂေါတြဘုပုဂ္ဂလေသုပိ ဒါနံ ဒဒန္တိ၊ တံ ဒါနံ သံဝိဘာဂဝသေန ဒိန္နမ္ပိ သုဒိန္နံ၊ အာဟုနပါဟုနဝသေန ဟုတမ္ပိ သုဟုတံ၊ မဟာယာဂဝသေန ယိဋ္ဌမ္ပိ သုယိဋ္ဌမေဝ ဟောတိ. ကသ္မာ? ယသ္မာ သာ ဒက္ခိဏာ သံဃဂတာ ပတိဋ္ဌိတာ မဟပ္ဖလာ လောကဝိဒူန ဝဏ္ဏိတာတိ၊ လောကဝိဒူဟိ သမ္မာသမ္ဗုဒ္ဓေဟိ ‘‘န တွေဝါဟံ၊ အာနန္ဒ၊ ကေနစိ ပရိယာယေန သံဃဂတာယ ဒက္ခိဏာယ ပါဋိပုဂ္ဂလိကံ ဒက္ခိဏံ မဟပ္ဖလတရံ ဝဒါမိ (မ. နိ. ၃.၃၈၀). ပုညံ အာကင်္ခမာနာနံ၊ သံဃော ဝေ ယဇတံ မုခံ (မ. နိ. ၂.၄၀၀၊ သု. နိ. ၅၇၄၊ မဟာဝ. ၃၀၀). အနုတ္တရံ ပုညက္ခေတ္တံ လောကဿာ’’တိ (မ. နိ. ၁.၇၄၊ သံ. နိ. ၅.၉၉၇) စ အာဒိနာ မဟပ္ဖလတာ ဝဏ္ဏိတာ ပသတ္ထာ ထောမိတာတိ အတ္ထော.

၆၄၅. ဤဒိသံ ယညမနုဿရန္တာတိ ဧတာဒိသံ သံဃံ ဥဒ္ဒိဿ အတ္တနာ ကတံ ဒါနံ အနုဿရန္တာ. ဝေဒဇာတာတိ ဇာတသောမနဿာ. ဝိနေယျ မစ္ဆေရမလံ သမူလန္တိ မစ္ဆေရမေဝ စိတ္တဿ မလိနဘာဝကရဏတော မစ္ဆေရမလံ၊ အထ ဝါ မစ္ဆေရဉ္စ အညံ ဣဿာလောဘဒေါသာဒိမလဉ္စာတိ မစ္ဆေရမလံ. တဉ္စ အဝိဇ္ဇာဝိစိကိစ္ဆာဝိပလ္လာသာဒီဟိ သဟ မူလေဟီတိ သမူလံ ဝိနေယျ ဝိနယိတွာ ဝိက္ခမ္ဘေတွာ အနိန္ဒိတွာ သဂ္ဂမုပေန္တိ ဌာနန္တိ ယောဇနာ. သေသံ ဝုတ္တနယမေဝ.

ဣမံ ပန သဗ္ဗံ ပဝတ္တိံ သက္ကော ဒေဝါနမိန္ဒော ‘‘ဒဒ္ဒလ္လမာနာ ဝဏ္ဏေနာ’’တိအာဒိနာ အာယသ္မတော မဟာမောဂ္ဂလ္လာနဿ အာစိက္ခိ၊ အာယသ္မာ မဟာမောဂ္ဂလ္လာနော ဘဂဝတော အာရောစေသိ၊ ဘဂဝါ တမတ္ထံ အဋ္ဌုပ္ပတ္တိံ ကတွာ သမ္ပတ္တပရိသာယ ဓမ္မံ ဒေသေသိ. သာ ဒေသနာ မဟာဇနဿ သာတ္ထိကာ အဟောသိ.

ဒဒ္ဒလ္လဝိမာနဝဏ္ဏနာ နိဋ္ဌိတာ.