၅. ကုဉ္ဇရဝိမာနဝဏ္ဏနာ

ကုဉ္ဇရော တေ ဝရာရောဟောတိ ကုဉ္ဇရဝိမာနံ. တဿ ကာ ဥပ္ပတ္တိ? ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. အထေကဒိဝသံ ရာဇဂဟနဂရေ နက္ခတ္တံ ဃောသိတံ. နာဂရာ ဝီထိယော သောဓေတွာ ဝါလုကံ ဩကိရိတွာ လာဇပဉ္စမကာနိ ပုပ္ဖါနိ ဝိပ္ပကိရိံသု၊ ဂေဟဒွါရေ ဂေဟဒွါရေ ကဒလိယော စ ပုဏ္ဏဃဋေ စ ဌပေသုံ၊ ယထာဝိဘဝံ နာနာဝိရာဂဝဏ္ဏဝိစိတ္တာ ဓဇပဋာကာဒယော ဥဿာပေသုံ၊ သဗ္ဗော ဇနော အတ္တနော အတ္တနော ဝိဘဝါနုရူပံ သုမဏ္ဍိတပသာဓိတော နက္ခတ္တကီဠံ ကီဠိ၊ သကလနဂရံ ဒေဝနဂရံ ဝိယ အလင်္ကတပဋိယတ္တံ အဟောသိ. အထ ဗိမ္ဗိသာရမဟာရာဇာ ပုဗ္ဗစာရိတ္တဝသေန မဟာဇနဿ စိတ္တာနုရက္ခဏတ္ထဉ္စ အတ္တနော ရာဇဘဝနတော နိက္ခမိတွာ မဟန္တေန ပရိဝါရေန မဟတာ ရာဇာနုဘာဝေန ဥဠာရေန သိရိသောဘဂ္ဂေန နဂရံ ပဒက္ခိဏံ ကရောတိ.

တေန စ သမယေန ရာဇဂဟဝါသိနီ ဧကာ ကုလဓီတာ ရညော တံ ဝိဘဝသမ္ပတ္တိံ သိရိသောဘဂ္ဂံ ရာဇာနုဘာဝဉ္စ ပဿိတွာ အစ္ဆရိယဗ္ဘုတစိတ္တဇာတာ ‘‘အယံ ဒေဝိဒ္ဓိသဒိသာ ဝိဘဝသမ္ပတ္တိ ကီဒိသေန နု ခေါ ကမ္မုနာ လဗ္ဘတီ’’တိ ပဏ္ဍိတသမ္မတေ ပုစ္ဆိ. တေ တဿာ ကထေသုံ ‘‘ဘဒ္ဒေ၊ ပုညကမ္မံ နာမ စိန္တာမဏိသဒိသံ ကပ္ပရုက္ခသဒိသံ၊ ခေတ္တသမ္ပတ္တိယာ စိတ္တသမ္ပတ္တိယာ စ သတိ ယံ ယံ ပတ္ထေတွာ ကရောတိ၊ တံ တံ နိပ္ဖါဒေတိယေဝ. အပိစ အာသနဒါနေန ဥစ္စာကုလီနတာ ဟောတိ၊ အန္နဒါနေန ဗလသမ္ပတ္တိပဋိလာဘော၊ ဝတ္ထဒါနေန ဝဏ္ဏသမ္ပတ္တိပဋိလာဘော၊ ယာနဒါနေန သုခဝိသေသပဋိလာဘော၊ ဒီပဒါနေန စက္ခုသမ္ပတ္တိပဋိလာဘော၊ အာဝါသဒါနေန သဗ္ဗသမ္ပတ္တိပဋိလာဘော ဟောတီ’’တိ. သာ တံ သုတွာ ‘‘ဒေဝသမ္ပတ္တိ ဣတော ဥဠာရာ ဟောတိ မညေ’’တိ တတ္ထ စိတ္တံ ဌပေတွာ ပုညကိရိယာယ အတိဝိယ ဥဿာဟဇာတာ အဟောသိ.

မာတာပိတရော စဿာ အဟတံ ဝတ္ထယုဂံ နဝပီဌံ ဧကံ ပဒုမကလာပံ သပ္ပိမဓုသက္ခရာ တဏ္ဍုလခီရာနိ စ ပရိဘောဂတ္ထာယ ပေသေသုံ. သာ တာနိ ဒိသွာ ‘‘အဟဉ္စ ဒါနံ ဒါတုကာမာ၊ အယဉ္စ မေ ဒေယျဓမ္မော လဒ္ဓေါ’’တိ တုဋ္ဌမာနသာ ဒုတိယဒိဝသေ ဒါနံ သဇ္ဇေန္တီ အပ္ပေါဒကမဓုပါယာသံ သမ္ပာဒေတွာ၊ တဿ ပရိဝါရဘာဝေန အညမ္ပိ ဗဟုံ ခါဒနီယဘောဇနီယံ ပဋိယာဒေတွာ ဒါနဂ္ဂေ ဂန္ဓပရိဘဏ္ဍံ ကတွာ ဝိကသိတပဒုမပတ္တကိဉ္ဇက္ခကေသရောပသောဘိတေသု ပဒုမေသု အာသနံ ပညာပေတွာ၊ အဟတေန သေတဝတ္ထေန အတ္ထရိတွာ အာသနဿ စတုန္နံ ပါဒါနံ ဥပရိ စတ္တာရိ ပဒုမာနိ မာလာဂုဠဉ္စ ဌပေတွာ၊ အာသနဿ ဥပရိ ဝိတာနံ ဗန္ဓိတွာ မာလာဒါမဩလမ္ဗကဒါမာနိ ဩလမ္ဗိတွာ၊ အာသနဿ သမန္တတော ဘူမိံ သကေသရေဟိ ပဒုမပတ္တေဟိ သဗ္ဗသန္ထရံ သန္ထရိတွာ ‘‘ဒက္ခိဏေယျေ အာဂတေ ပူဇေဿာမီ’’တိ ပုပ္ဖပူရိတံ စင်္ကောဋကံ ဧကမန္တေ ဌပေသိ.

အထေဝံ ကတဒါနူပကရဏသံဝိဓာနာ သီသံနှာတာ သုဒ္ဓဝတ္ထနိဝတ္ထာ သုဒ္ဓုတ္တရာသင်္ဂါ ဝေလံ သလ္လက္ခေတွာ ဧကံ ဒါသိံ အာဏာပေသိ ‘‘ဂစ္ဆ ဇေ၊ အမှာကံ တာဒိသံ ဒက္ခိဏေယျံ ပရိယေသာဟီ’’တိ. တေန စ သမယေန အာယသ္မာ သာရိပုတ္တော သဟဿထဝိကံ နိက္ခိပန္တော ဝိယ ရာဇဂဟေ ပိဏ္ဍာယ စရန္တော အန္တရဝီထိံ ပဋိပန္နော ဟောတိ. အထ သာ ဒါသီ ထေရံ ဝန္ဒိတွာ အာဟ ‘‘ဘန္တေ၊ တုမှာကံ ပတ္တံ မေ ဒေထာ’’တိ. ‘‘ဧကိဿာ ဥပါသိကာယ အနုဂ္ဂဟတ္ထံ ဣတော ဧထာ’’တိ စ အာဟ. ထေရော တဿာ ပတ္တံ အဒါသိ. သာ ထေရံ ဂေဟံ ပဝေသေသိ. အထ သာ ဣတ္ထီ ထေရဿ ပစ္စုဂ္ဂမနံ ကတွာ အာသနံ ဒဿေတွာ ‘‘နိသီဒထ၊ ဘန္တေ၊ ဣဒမာသနံ ပညတ္တ’’န္တိ ဝတွာ ထေရေ တတ္ထ နိသိန္နေ သကေသရေဟိ ပဒုမပတ္တေဟိ ထေရံ ပူဇယမာနာ အာသနဿ သမန္တတော ဩကိရိတွာ ပဉ္စပတိဋ္ဌိတေန ဝန္ဒိတွာ သပ္ပိမဓုသက္ခရာသမ္မိဿေန အပ္ပေါဒကမဓုပါယာသေန ပရိဝိသိ. ပရိဝိသန္တီ စ ‘‘ဣမဿ မေ ပုညဿာနုဘာဝေန ဒိဗ္ဗဂဇကူဋာဂါရပလ္လင်္ကသောဘိတာ ဒိဗ္ဗသမ္ပတ္တိယော ဟောန္တု၊ သဗ္ဗာသု ပဝတ္တီသု ပဒုမာ နာမ မာ ဝိဂတာ ဟောန္တူ’’တိ ပတ္ထနံ အကာသိ. ပုန ထေရေ ကတဘတ္တကိစ္စေ ပတ္တံ ဓောဝိတွာ သပ္ပိမဓုသက္ခရာဟိ ပူရေတွာ ပလ္လင်္ကေ အတ္ထတံ သာဋကံ စုမ္ဗဋကံ ကတွာ ထေရဿ ဟတ္ထေ ဌပေတွာ ထေရေ စ အနုမောဒနံ ကတွာ ပက္ကမန္တေ ဒွေ ပုရိသေ အာဏာပေသိ ‘‘ထေရဿ ဟတ္ထေ ပတ္တံ ဣမဉ္စ ပလ္လင်္ကံ ဝိဟာရံ နေတွာ ထေရဿ နိယျာတေတွာ အာဂစ္ဆထာ’’တိ. တေ တထာ အကံသု.

သာ အပရဘာဂေ ကာလံ ကတွာ တာဝတိံသဘဝနေ ယောဇနသတုဗ္ဗေဓေ ကနကဝိမာနေ နိဗ္ဗတ္တိ အစ္ဆရာသဟဿပရိဝါရာ. ပတ္ထနာဝသေန စဿာ ပဉ္စယောဇနုဗ္ဗေဓော ပဒုမမာလာလင်္ကတော သမန္တတော ပဒုမပတ္တကိဉ္ဇက္ခကေသရောပသောဘိတော မနုညဒဿနော သုခသမ္ဖဿော ဝိဝိဓရတနရံသိဇာလသမုဇ္ဇလဟေမာဘရဏဝိဘူသိတော ဂဇဝရော နိဗ္ဗတ္တိ. တဿူပရိ ယထာဝုတ္တသောဘာတိသယယုတ္တော ယောဇနိကော ကနကပလ္လင်္ကော နိဗ္ဗတ္တိ. သာ ဒိဗ္ဗသမ္ပတ္တိံ အနုဘဝန္တီ အန္တရန္တရာ တံ ကုဉ္ဇရဝိမာနဿ ဥပရိ ရတနဝိစိတ္တံ ပလ္လင်္ကံ အဘိရုယှ မဟတာ ဒေဝတာနုဘာဝေန နန္ဒနဝနံ ဂစ္ဆတိ. အထေကသ္မိံ ဥဿဝဒိဝသေ ဒေဝတာသု ယထာသကံ ဒိဗ္ဗာနုဘာဝေန ဥယျာနကီဠနတ္ထံ နန္ဒနဝနံ ဂစ္ဆန္တီသူတိအာဒိနာ သဗ္ဗံ ပဌမပီဌဝိမာနဝဏ္ဏနာယံ အာဂတသဒိသံ၊ တသ္မာ တတ္ထ ဝုတ္တနယေနေဝ ဝေဒိတဗ္ဗံ. ဣဓ ပန ထေရော –

၃၁. ‘‘ကုဉ္ဇရော တေ ဝရာရောဟော၊ နာနာရတနကပ္ပနော၊

ရုစိရော ထာမဝါ ဇဝသမ္ပန္နော၊ အာကာသမှိ သမီဟတိ.

၃၂. ‘‘ပဒုမိ ပဒ္မပတ္တက္ခိ၊ ပဒ္မုပ္ပလဇုတိန္ဓရော၊

ပဒ္မစုဏ္ဏာဘိကိဏ္ဏင်္ဂေါ၊ သောဏ္ဏပေါက္ခရမာလဓာ.

၃၃. ‘‘ပဒုမာနုသဋံ မဂ္ဂံ၊ ပဒ္မပတ္တဝိဘူသိတံ၊

ဌိတံ ဝဂ္ဂု မနုဂ္ဃါတီ၊ မိတံ ဂစ္ဆတိ ဝါရဏော.

၃၄. ‘‘တဿ ပက္ကမမာနဿ၊ သောဏ္ဏကံသာ ရတိဿရာ၊

တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ.

၃၅. ‘‘တဿ နာဂဿ ခန္ဓမှိ၊ သုစိဝတ္ထာ အလင်္ကတာ၊

မဟန္တံ အစ္ဆရာသံဃံ၊ ဝဏ္ဏေန အတိရောစသိ.

၃၆. ‘‘ဒါနဿ တေ ဣဒံ ဖလံ၊ အထော သီလဿ ဝါ ပန၊

အထော အဉ္ဇလိကမ္မဿ၊ တံ မေ အက္ခာဟိ ပုစ္ဆိတာ’’တိ. – အာဟ၊

၃၁. တတ္ထ ကုဉ္ဇရော တေ ဝရာရောဟောတိ ကုဉ္ဇေ ဂိရိတဋေ ရမတိ အဘိရမတိ၊ တတ္ထ ဝါ ရဝတိ ကောဉ္စနာဒံ နဒန္တော ဝိစရတိ. ကုံ ဝါ ပထဝိံ တဒဘိဃာတေန ဇရယတီတိ ကုဉ္ဇရော၊ ဂိရိစရာဒိဘေဒေါ မနုဿလောကေ ဟတ္ထီ၊ အယံ ပန ကီဠနကာလေ ကုဉ္ဇရသဒိသတာယ ဧဝံ ဝုတ္တော. အာရုယှတီတိ အာရောဟော၊ အာရောဟနီယောတိ အတ္ထော. ဝရော အဂ္ဂေါ သေဋ္ဌော အာရောဟောတိ ဝရာရောဟော၊ ဥတ္တမယာနန္တိ ဝုတ္တံ ဟောတိ. နာနာရတနကပ္ပနောတိ နာနာဝိဓာနိ ရတနာနိ ဧတေသန္တိ နာနာရတနာ၊ ကုမ္ဘာလင်္ကာရာဒိဟတ္ထာလင်္ကာရာ. တေဟိ ဝိဟိတော ကပ္ပန္နော သန္နာဟော ယဿ သော နာနာရတနကပ္ပနော. ရုစိံ အဘိရတိံ ဒေတီတိ ရုစိရော၊ မနုညောတိ အတ္ထော. ထာမဝါတိ ထိရော၊ ဗလဝါတိ အတ္ထော. ဇဝသမ္ပန္နောတိ သမ္ပန္နဇဝေါ၊ သီဃဇဝေါတိ ဝုတ္တံ ဟောတိ. အာကာသမှိ သမီဟတီတိ အာကာသေ အန္တလိက္ခေ သမ္မာ ဤဟတိ၊ အာရုဠှာနံ ခေါဘံ အကရောန္တော စရတိ ဂစ္ဆတီတိ အတ္ထော.

၃၂. ပဒုမီတိ ပဒုမသမာနဝဏ္ဏတာယ ‘‘ပဒုမ’’န္တိ လဒ္ဓနာမေန ကုမ္ဘဝဏ္ဏေန သမန္နာဂတတ္တာ ပဒုမီ. ပဒ္မပတ္တက္ခီတိ ကမလဒလသဒိသနယနေ၊ အာလပနမေတံ တဿာ ဒေဝတာယ. ပဒ္မုပ္ပလဇုတိန္ဓရောတိ ဒိဗ္ဗပဒုမုပ္ပလမာလာလင်္ကတသရီရတာယ တဟံ တဟံ ဝိပ္ဖုရန္တံ ဝိဇ္ဇောတမာနံ ပဒုမုပ္ပလဇုတိံ ဓာရေတီတိ ပဒုမုပ္ပလဇုတိန္ဓရော. ပဒ္မစုဏ္ဏာဘိကိဏ္ဏင်္ဂေါတိ ပဒုမပတ္တကိဉ္ဇက္ခကေသရေဟိ သမန္တတော ဩကိဏ္ဏဂတ္တော. သောဏ္ဏပေါက္ခရမာလဓာတိ ဟေမမယကမလမာလာဘာရီ.

၃၃. ပဒုမာနုသဋံ မဂ္ဂံ ပဒ္မပတ္တဝိဘူသိတန္တိ ဟတ္ထိနော ပဒနိက္ခေပေ ပဒနိက္ခေပေ တဿ ပါဒံ သန္ဓာရေန္တေဟိ မဟန္တေဟိ ပဒုမေဟိ အနုသဋံ ဝိပ္ပကိဏ္ဏံ၊ နာနာဝိရာဂဝဏ္ဏေဟိ တေသံယေဝ စ ပတ္တေဟိ ဣတော စိတော စ ပရိဗ္ဘမန္တေဟိ ဝိသေသတော မဏ္ဍိတတာယ ဝိဘူသိတံ မဂ္ဂံ ဂစ္ဆတီတိ ယောဇနာ. ဌိတန္တိ ဣဒံ မဂ္ဂဝိသေသနံ၊ ပဒုမပတ္တဝိဘူသိတံ ဟုတွာ ဌိတံ မဂ္ဂန္တိ အတ္ထော. ဝဂ္ဂူတိ စာရု၊ ကိရိယာဝိသေသနဉ္စေတံ၊ မ-ကာရော ပဒသန္ဓိကရော. အနုဂ္ဃါတီတိ န ဥဂ္ဃါတိ၊ အတ္တနော ဥပရိ နိသိန္နာနံ ဤသကမ္ပိ ခေါဘံ အကရောန္တောတိ အတ္ထော. မိတန္တိ နိမ္မိတံ၊ နိက္ခေပပဒံ ဝီတိက္ကမန္တိ အတ္ထော. အယဉှေတ္ထ အတ္ထော ‘‘ဝဂ္ဂု စာရု ပဒနိက္ခေပံ ကတွာ ဂစ္ဆတီ’’တိ. မိတန္တိ ဝါ ပရိမိတံ ပမာဏယုတ္တံ၊ နာတိသီဃံ၊ နာတိသဏိကန္တိ ဝုတ္တံ ဟောတိ. ဝါရဏောတိ ဟတ္ထီ. သော ဟိ ပစ္စတ္ထိကဝါရဏတော ဂမနပရိက္ကိလေသဝါရဏတော စ ‘‘ဝါရဏော’’တိ ဝုစ္စတိ.

၃၄. တဿ ပက္ကမမာနဿ၊ သောဏ္ဏသံကာ ရတိဿရာတိ တဿ ယထာဝုတ္တဿ ကုဉ္ဇရဿ ဂစ္ဆန္တဿ သောဏ္ဏကံသာ သုဝဏ္ဏမယာ ဃဏ္ဋာ ရတိဿရာ ရမဏီယသဒ္ဒါ မနုညနိဂ္ဃေါသာ ဩလမ္ဗန္တီတိ အဓိပ္ပါယော. တဿ ဟိ ကုဉ္ဇရဿ ဥဘောသု ပဿေသု မဟာကောလမ္ဗပ္ပမာဏာ မဏိမုတ္တာဒိခစိတာ ဟေမမယာ အနေကသတာ မဟန္တိယော ဃဏ္ဋာ တဟံ တဟံ ဩလမ္ဗမာနာ ပစလန္တိ၊ ယတော ဆေကေန ဂန္ဓဗ္ဗကေန ပယုတ္တဝါဒိတတော အတိဝိယ မနောဟရသဒ္ဒေါ နိစ္ဆရတိ. တေနာဟ ‘‘တေသံ သုယျတိ နိဂ္ဃေါသော၊ တူရိယေ ပဉ္စင်္ဂိကေ ယထာ’’တိ. တဿတ္ထော – ယထာ နာမ အာတတံ ဝိတတံ အာတတဝိတတံ ဃနံ သုသိရန္တိ ဧဝံ ပဉ္စင်္ဂိကေ တူရိယေ ကုသလေဟိ ဝါဒိယမာနေ ဌာနုပ္ပတ္တိယာ မန္ဒတာရဝိဘာဂံ ဒဿေန္တေန ဂါယန္တေန သမီရိတော ဝါဒိတသရော ဝဂ္ဂု ရဇနီယော နိဂ္ဃေါသော သုယျတိ၊ ဧဝံ တေသံ သောဝဏ္ဏကံသာနံ တပနီယဃဏ္ဋာနံ နိဂ္ဃေါသော သုယျတီတိ.

၃၅. နာဂဿာတိ ဟတ္ထိနာဂဿ. မဟန္တန္တိ သမ္ပတ္တိမဟတ္တေနာပိ သင်္ချာမဟတ္တေနာပိ မဟန္တံ. အစ္ဆရာသံဃန္တိ ဒေဝကညာသမူဟံ. ဝဏ္ဏေနာတိ ရူပေန.

၃၆. ဒါနဿာတိ ဒါနမယပုညဿ. သီလဿာတိ ကာယိကသံဝရာဒိသံဝရသီလဿ. ဝါ-သဒ္ဒေါ အဝုတ္တဝိကပ္ပနတ္ထော. တေန အဘိဝါဒနာဒိံ အဝုတ္တံ စာရိတ္တသီလံ သင်္ဂဏှာတိ.

ဧဝံ ထေရေန ပုစ္ဆိတာ သာ ဒေဝတာ ပဉှံ ဝိဿဇ္ဇေသိ၊ တမတ္ထံ ဒဿေတုံ –

၃၇. ‘‘သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလ’’န္တိ. –

အယံ ဂါထာ ဓမ္မသင်္ဂါဟကေဟိ ဝုတ္တာ၊ တဿာ အတ္ထော ဟေဋ္ဌာ ဝုတ္တော ဧဝ.

၃၈. ‘‘ဒိသွာန ဂုဏသမ္ပန္နံ၊ ဈာယိံ ဈာနရတံ သတံ၊

အဒါသိံ ပုပ္ဖါဘိကိဏ္ဏံ၊ အာသနံ ဒုဿသန္ထတံ.

၃၉. ‘‘ဥပဍ္ဎံ ပဒ္မမာလာဟံ၊ အာသနဿ သမန္တတော၊

အဗ္ဘောကိရိဿံ ပတ္တေဟိ၊ ပသန္နာ သေဟိ ပါဏိဘိ.

၄၀. ‘‘တဿ ကမ္မကုသလဿ၊ ဣဒံ မေ ဤဒိသံ ဖလံ၊

သက္ကာရော ဂရုကာရော စ၊ ဒေဝါနံ အပစိတာ အဟံ.

၄၁. ‘‘ယော ဝေ သမ္မာဝိမုတ္တာနံ၊ သန္တာနံ ဗြဟ္မစာရိနံ၊

ပသန္နော အာသနံ ဒဇ္ဇာ၊ ဧဝံ နန္ဒေ ယထာ အဟံ.

၄၂. ‘‘တသ္မာ ဟိ အတ္တကာမေန၊ မဟတ္တမဘိကင်္ခတာ၊

အာသနံ ဒါတဗ္ဗံ ဟောတိ၊ သရီရန္တိမဓာရိန’’န္တိ. – ဒေဝတာယ ဝုတ္တဂါထာ၊

၃၈. တတ္ထ ဂုဏသမ္ပန္နန္တိ သဗ္ဗေဟိ သာဝကဂုဏေဟိ သမန္နာဂတံ၊ တေဟိ ဝါ ပရိပုဏ္ဏံ. ဧတေန သာဝကပါရမိဉာဏဿ မတ္ထကပ္ပတ္တိံ ဒဿေတိ. ဈာယိန္တိ အာရမ္မဏူပနိဇ္ဈာနံ လက္ခဏူပနိဇ္ဈာနန္တိ ဒုဝိဓေနာပိ ဈာနေန ဈာယနသီလံ၊ တေန ဝါ ဈာပေတဗ္ဗံ သဗ္ဗသံကိလေသပက္ခံ ဈာပေတွာ ဌိတံ. တတော ဧဝ ဈာနေ ရတန္တိ ဈာနရတံ. သတန္တိ သမာနံ၊ သန္တံ ဝါ၊ သပ္ပုရိသန္တိ အတ္ထော. ပုပ္ဖါဘိကိဏ္ဏန္တိ ပုပ္ဖေဟိ အဘိကိဏ္ဏံ၊ ကမလဒလေဟိ အဘိပ္ပကိဏ္ဏန္တိ အတ္ထော. ဒုဿသန္ထတန္တိ ဝတ္ထေန ဥပရိ အတ္ထတံ.

၃၉. ဥပဍ္ဎံ ပဒ္မမာလာဟန္တိ ဥပဍ္ဎံ ပဒုမပုပ္ဖံ အဟံ. အာသနဿ သမန္တတောတိ ထေရေန နိသိန္နဿ အာသနဿ သမန္တာ ဘူမိယံ. အဗ္ဘောကိရိဿန္တိ အဘိဩကိရိံ အဘိပ္ပကိရိံ. ကထံ? ပတ္တေဟီတိ၊ တဿ ဥပဍ္ဎပဒုမဿ ဝိသုံ ဝိသုံ ကတေဟိ ပတ္တေဟိ ပုပ္ဖဝဿာဘိဝဿနကနိယာမေန ဩကိရိန္တိ အတ္ထော.

၄၀. ဣဒံ မေ ဤဒိသံ ဖလန္တိ ဣမိနာ ‘‘ကုဉ္ဇရော တေ ဝရာရောဟော’’တိအာဒိနာ ထေရေန ဂဟိတံ အဂ္ဂဟိတဉ္စ အာယုယသသုခရူပါဒိဘေဒံ အတ္တနော ဒိဗ္ဗသမ္ပတ္တိံ ဧကတော ဒဿေတွာ ပုနပိ ထေရေန အဂ္ဂဟိတမေဝ အတ္တနော အာနုဘာဝသမ္ပတ္တိံ ဒဿေတုံ ‘‘သက္ကာရော ဂရုကာရော’’တိအာဒိမာဟ. တေန ‘‘န ကေဝလံ ဘန္တေ တုမှေဟိ ယထာဝုတ္တမေဝ ဣဓ မယှံ ပုညဖလံ၊ အပိစ ခေါ ဣဒံ ဒိဗ္ဗံ အာဓိပတေယျမ္ပီ’’တိ ဒဿေတိ. တတ္ထ သက္ကာရောတိ အာဒရကိရိယာ၊ ဒေဝေဟိ အတ္တနော သက္ကာတဗ္ဗတာတိ အတ္ထော. တထာ ဂရုကာရောတိ ဂရုကာတဗ္ဗတာ. ဒေဝါနန္တိ ဒေဝေဟိ. အပစိတာတိ ပူဇိတာ.

၄၁. သမ္မာဝိမုတ္တာနန္တိ သုဋ္ဌု ဝိမုတ္တာနံ သဗ္ဗသံကိလေသပ္ပဟာယီနံ. သန္တာနန္တိ သန္တကာယဝစီမနောကမ္မာနံ သာဓူနံ. မဂ္ဂဗြဟ္မစရိယဿ စ သာသနဗြဟ္မစရိယဿ စ စိဏ္ဏတ္တာ ဗြဟ္မစာရိနံ. ပသန္နော အာသနံ ဒဇ္ဇာတိ ကမ္မဖလသဒ္ဓါယ ရတနတ္တယသဒ္ဓါယ စ ပသန္နမာနသော ဟုတွာ ယဒိ အာသနမတ္တမ္ပိ ဒဒေယျ. ဧဝံ နန္ဒေ ယထာ အဟန္တိ ယထာ အဟံ တေန အာသနဒါနေန ဧတရဟိ နန္ဒာမိ မောဒါမိ၊ ဧဝမေဝ အညောပိ နန္ဒေယျ မောဒေယျ.

၄၂. တသ္မာတိ တေန ကာရဏေန. ဟိ-သဒ္ဒေါ နိပါတမတ္တံ. အတ္တကာမေနာတိ အတ္တနော ဟိတကာမေန. ယော ဟိ အတ္တနော ဟိတာဝဟံ ကမ္မံ ကရောတိ၊ န အဟိတာဝဟံ၊ သော အတ္တကာမော. မဟတ္တန္တိ ဝိပါကမဟတ္တံ. သရီရန္တိမဓာရိနန္တိ အန္တိမံ ဒေဟံ ဓာရေန္တာနံ၊ ခီဏာသဝါနန္တိ အတ္ထော. အယဉှေတ္ထ အတ္ထော – ယသ္မာ အရဟတံ အာသနဒါနေန အဟံ ဧဝံ ဒိဗ္ဗသမ္ပတ္တိယာ မောဒါမိ၊ တသ္မာ အညေနာပိ အတ္တနော အဘိဝုဒ္ဓိံ ပတ္ထယမာနေန အန္တိမသမုဿယေ ဌိတာနံ အာသနံ ဒါတဗ္ဗံ၊ နတ္ထိ တာဒိသံ ပုညန္တိ ဒဿေတိ. တေသံ ဝုတ္တသဒိသမေဝါတိ.

ကုဉ္ဇရဝိမာနဝဏ္ဏနာ နိဋ္ဌိတာ.