၆. ပဌမနာဝါဝိမာနဝဏ္ဏနာ

သုဝဏ္ဏစ္ဆဒနံ နာဝန္တိ နာဝါဝိမာနံ. တဿ ကာ ဥပ္ပတ္တိ? ဘဂဝတိ သာဝတ္ထိယံ ဝိဟရန္တေ သောဠသမတ္တာ ဘိက္ခူ အညတရသ္မိံ ဂါမကာဝါသေ ဝသိတွာ ဝုတ္ထဝဿာ ‘‘ဘဂဝန္တံ ပဿိဿာမ၊ ဓမ္မဉ္စ သုဏိဿာမာ’’တိ သာဝတ္ထိံ ဥဒ္ဒိဿ ဂိမှသမယေ အဒ္ဓါနမဂ္ဂံ ပဋိပန္နာ၊ အန္တရာမဂ္ဂေ စ နိရုဒကော ကန္တာရော၊ တေ စ တတ္ထ ဃမ္မာဘိတတ္တာ ကိလန္တာ တသိတာ ပါနီယံ အလဘမာနာ အညတရဿ ဂါမဿ အဝိဒူရေန ဂစ္ဆန္တိ. တတ္ထ အညတရာ ဣတ္ထီ ဥဒကဘာဇနံ ဂဟေတွာ ဥဒကတ္ထာယ ဥဒပါနာဘိမုခီ ဂစ္ဆတိ. အထ တေ ဘိက္ခူ တံ ဒိသွာ ‘‘ယတ္ထာယံ ဣတ္ထီ ဂစ္ဆတိ၊ တတ္ထ ဂတေ ပါနီယံ လဒ္ဓုံ သက္ကာ’’တိ ပိပါသာပရေတာ တံဒိသာဘိမုခါ ဂန္တွာ ဥဒပါနံ ဒိသွာ တဿာ အဝိဒူရေ အဋ္ဌံသု. သာ ဣတ္ထီ တတော ဥဒကံ ဂဟေတွာ နိဝတ္တိတုကာမာ တေ ဘိက္ခူ ဒိသွာ ‘‘ဣမေ အယျာ ဥဒကေန အတ္ထိကာ ပိပါသိတာ’’တိ ဉတွာ ဂရုစိတ္တီကာရံ ဥပဋ္ဌပေတွာ ဥဒကေန နိမန္တေသိ. တေ ပတ္တထဝိကတော ပရိဿာဝနံ နီဟရိတွာ ပရိဿာဝေတွာ ယာဝဒတ္ထံ ပါနီယံ ပိဝိတွာ ဟတ္ထပါဒေ သီတလေ ကတွာ တဿာ ဣတ္ထိယာ ပါနီယဒါနေ အနုမောဒနံ ဝတွာ အဂမံသု.

သာ တံ ပုညံ ဟဒယေ ဌပေတွာ အန္တရန္တရာ အနုဿရန္တီ အပရဘာဂေ ကာလံ ကတွာ တာဝတိံသဘဝနေ နိဗ္ဗတ္တိ. တဿာ ပုညာနုဘာဝေန ကပ္ပရုက္ခောပသောဘိတံ မဟန္တံ ဝိမာနံ ဥပ္ပဇ္ဇိ. တံ ဝိမာနံ ပရိက္ခိပိတွာ မုတ္တဇာလရဇတဝိဘူသိတာ ဝိယ သိကတာဝကိဏ္ဏပဏ္ဍရပုလိနတဋာ မဏိက္ခန္ဓနိမ္မလသလိလဝါဟိနီ သရိတာ. တဿာ ဥဘောသု တီရေသု ဥယျာနဝိမာနဒွါရေ စ မဟတီ ပေါက္ခရဏီ ပဉ္စဝဏ္ဏပဒုမသဏ္ဍမဏ္ဍိတာ သဟ သုဝဏ္ဏနာဝါယ နိဗ္ဗတ္တိ. သာ တတ္ထ ဒိဗ္ဗသမ္ပတ္တိံ အနုဘဝန္တီ နာဝါယ ကီဠန္တီ လဠန္တီ ဝိစရတိ. အထေကဒိဝသံ အာယသ္မာ မဟာမောဂ္ဂလ္လာနော ဒေဝစာရိကံ စရန္တော တံ ဒေဝဓီတရံ နာဝါယ ကီဠန္တိံ ဒိသွာ တာယ ကတပုညကမ္မံ ပုစ္ဆန္တော –

၄၃. ‘‘သုဝဏ္ဏစ္ဆဒနံ နာဝံ၊ နာရိ အာရုယှ တိဋ္ဌသိ၊

ဩဂါဟသိ ပေါက္ခရဏိံ၊ ပဒ္မံ ဆိန္ဒသိ ပါဏိနာ.

၄၄. ‘‘ကေန တေတာဒိသော ဝဏ္ဏော၊ ကေန တေ ဣဓ မိဇ္ဈတိ၊

ဥပ္ပဇ္ဇန္တိ စ တေ ဘောဂါ၊ ယေ ကေစိ မနသော ပိယာ.

၄၅. ‘‘ပုစ္ဆာမိ တံ ဒေဝိ မဟာနုဘာဝေ၊

မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊

ဝဏ္ဏော စ တေ သဗ္ဗဒိသာ ပဘာသတီ’’တိ. – အာဟ၊

တတော ထေရေန ပုဋ္ဌာယ ဒေဝတာယ ဝိဿဇ္ဇိတာကာရံ ဒဿေတုံ သင်္ဂီတိကာရေဟိ –

၄၆. ‘‘သာ ဒေဝတာ အတ္တမနာ၊ မောဂ္ဂလ္လာနေန ပုစ္ဆိတာ၊

ပဉှံ ပုဋ္ဌာ ဝိယာကာသိ၊ ယဿ ကမ္မဿိဒံ ဖလ’’န္တိ. –

အယံ ဂါထာ ဝုတ္တာ.

၄၇. ‘‘အဟံ မနုဿေသု မနုဿဘူတာ၊ ပုရိမာယ ဇာတိယာ မနုဿလောကေ၊

ဒိသွာန ဘိက္ခူ တသိတေ ကိလန္တေ၊ ဥဋ္ဌာယ ပါတုံ ဥဒကံ အဒါသိံ.

၄၈. ‘‘ယော ဝေ ကိလန္တာန ပိပါသိတာနံ၊ ဥဋ္ဌာယ ပါတုံ ဥဒကံ ဒဒါတိ၊

သီတောဒကာ တဿ ဘဝန္တိ နဇ္ဇော၊ ပဟူတမလျာ ဗဟုပုဏ္ဍရီကာ.

၄၉. ‘‘တံ အာပဂါ အနုပရိယန္တိ သဗ္ဗဒါ၊ သီတောဒကာ ဝါလုကသန္ထတာ နဒီ၊

အမ္ဗာ စ သာလာ တိလကာ စ ဇမ္ဗုယော၊ ဥဒ္ဒါလကာ ပါဋလိယော စ ဖုလ္လာ.

၅၀. ‘‘တံဘူမိဘာဂေဟိ ဥပေတရူပံ၊ ဝိမာနသေဋ္ဌံ ဘုသ သောဘမာနံ၊

တဿီဓ ကမ္မဿ အယံ ဝိပါကော၊ ဧတာဒိသံ ပုညကတာ လဘန္တိ.

၅၁. ‘‘တေန မေတာဒိသော ဝဏ္ဏော၊ တေန မေ ဣဓ မိဇ္ဈတိ၊

ဥပ္ပဇ္ဇန္တိ စ မေ ဘောဂါ၊ ယေ ကေစိ မနသော ပိယာ.

၅၂. ‘‘အက္ခာမိ တေ ဘိက္ခု မဟာနုဘာဝ၊ မနုဿဘူတာ ယမကာသိ ပုညံ၊

တေနမှိ ဧဝံ ဇလိတာနုဘာဝါ၊ ဝဏ္ဏော စ မေ သဗ္ဗဒိသာ ပဘာသတီ’’တိ. –

အယံ ဒေဝတာယ ဝိဿဇ္ဇိတာကာရော.

၄၃. တတ္ထ သုဝဏ္ဏစ္ဆဒနန္တိ ဝိစိတ္တဘိတ္တိဝိရစနေဟိ ရတ္တသုဝဏ္ဏမယေဟိ ဥဘောဟိ ပဿေဟိ ပဋိစ္ဆာဒိတဗ္ဘန္တရတာယ စေဝ နာနာရတနသမုဇ္ဇလိတေန ကနကမယာလင်္ကာရေန ဥပရိ ဆာဒိတတာယ စ သုဝဏ္ဏစ္ဆဒနံ. နာဝန္တိ ပေါတံ. သော ဟိ ဩရတော ပါရံ ပဝတိ ဂစ္ဆတီတိ ပေါတော၊ သတ္တေ နေတီတိ နာဝါတိ စ ဝုစ္စတိ. နာရီတိ တဿာ ဒေဝဓီတာယ အာလပနံ. နရတိ နေတီတိ နရော၊ ပုရိသော. ယထာ ဟိ ပဌမပကတိဘူတော သတ္တော ဣတရာယ ပကတိယာ သေဋ္ဌတ္ထေန ပုရိ သေတီတိ ‘‘ပုရိသော’’တိ ဝုစ္စတိ၊ ဧဝံ နယနဋ္ဌေန ‘‘နရော’’တိ. ပုတ္တဘာတုဘူတောပိ ဟိ ပုဂ္ဂလော မာတုဇေဋ္ဌဘဂိနီနံ ပိတုဋ္ဌာနေ တိဋ္ဌတိ၊ ပဂေဝ ဘတ္တုဘူတော. နရဿ ဧသာတိ နာရီ၊ အယဉ္စ သမညာ မနုဿိတ္ထီသု ပဝတ္တာ ရုဠှိဝသေန ဣတရာသုပိ တထာ ဝုစ္စတိ. ဩဂါဟသိ ပေါက္ခရဏိန္တိ သတိပိ ရတ္တုပ္ပလနီလုပ္ပလာဒိကေ ဗဟုဝိဓေ ရတနမယေ ဇလဇကုသုမေ ပေါက္ခရသင်္ခါတာနံ ဒိဗ္ဗပဒုမာနံ တတ္ထ ယေဘုယျေန အတ္ထိတာယ ‘‘ပေါက္ခရဏီ’’တိ လဒ္ဓနာမံ ဒိဗ္ဗသရံ ဇလဝိဟာရရတိယာ အနုပဝိသသိ. ပဒ္မံ ဆိန္ဒသိ ပါဏိနာတိ ရဇတမယနာဠံ ပဒုမရာဂရတနမယပတ္တသင်္ဃာတံ ကနကမယကဏ္ဏိကာကိဉ္ဇက္ခကေသရံ ဒိဗ္ဗကမလံ လီလာရဝိန္ဒံ ကတ္တုကာမတာယ တဝ ဟတ္ထေန ဘဉ္ဇသိ.

၄၇. တသိတေတိ ပိပါသိတေ. ကိလန္တေတိ တာယ ပိပါသာယ အဒ္ဓါနပရိဿမေန စ ကိလန္တကာယေ. ဥဋ္ဌာယာတိ ဥဋ္ဌာနဝီရိယံ ကတွာ၊ အာလသိယံ အနာပဇ္ဇိတွာတိ အတ္ထော.

၄၈. ယော ဝေတိအာဒိနာ ယထာ အဟံ၊ ဧဝံ အညေပိ အာယတနဂတေန ဥဒကဒါနပုညေန ဧတာဒိသံ ဖလံ ပဋိလဘန္တီတိ ဒိဋ္ဌေန အဒိဋ္ဌဿ အနုမာနဝိဓိံ ဒဿေန္တီ ထေရေန ပုဋ္ဌမတ္ထံ သာဓာရဏတော ဝိဿဇ္ဇေတိ. တတ္ထ တဿာတိ တန္တိ စ ယထာဝုတ္တပုညကာရိနံ ပစ္စာမသတိ.

၄၉. အနုပရိယန္တီတိ အနုရူပဝသေန ပရိက္ခိပန္တိ. တဿ ဝသနဋ္ဌာနပရိက္ခိပနေန သောပိ ပရိက္ခိတ္တော နာမ ဟောတိ. တိလကာတိ ဗန္ဓုဇီဝကပုပ္ဖသဒိသပုပ္ဖါ ဧကာ ရုက္ခဇာတိ. ဥဒ္ဒါလကာတိ ဝါတဃာတကာ၊ ယေ ‘‘ရာဇရုက္ခာ’’တိပိ ဝုစ္စန္တိ.

၅၀. တံဘူမိဘာဂေဟီတိ တာဒိသေဟိ ဘူမိဘာဂေဟိ၊ ယထာဝုတ္တပေါက္ခရဏီနဒီဥယျာနဝန္တေဟိ ဘူမိပဒေသေဟီတိ အတ္ထော. ဥပေတရူပန္တိ ပါသံသိယဘာဝေန ဥပေတံ၊ တေသံ ပေါက္ခရဏီအာဒီနံ ဝသေန ရမဏီယသန္နိဝေသန္တိ ဝုတ္တံ ဟောတိ. ဘုသ သောဘမာနန္တိ ဘုသံ အတိဝိယ ဝိရောစမာနံ ဝိမာနသေဋ္ဌံ လဘန္တီတိ ယောဇနာ. သေသံ ဝုတ္တနယမေဝါတိ.

ပဌမနာဝါဝိမာနဝဏ္ဏနာ နိဋ္ဌိတာ.