၁၇. ကေသကာရီဝိမာနဝဏ္ဏနာ

ဣဒံ ဝိမာနံ ရုစိရံ ပဘဿရန္တိ ကေသကာရီဝိမာနံ. တဿ ကာ ဥပ္ပတ္တိ? ဘဂဝါ ဗာရာဏသိယံ ဝိဟရတိ ဣသိပတနေ မိဂဒါယေ. တေန ခေါ ပန သမယေန သမ္ဗဟုလာ ဘိက္ခူ ပုဗ္ဗဏှသမယံ နိဝါသေတွာ ပတ္တစီဝရမာဒါယ ဗာရာဏသိံ ပိဏ္ဍာယ ပဝိသိံသု. တေ အညတရဿ ဗြာဟ္မဏဿ ဂေဟဒွါရသမီပေန ဂစ္ဆန္တိ. တသ္မိဉ္စ ဂေဟေ ဗြာဟ္မဏဿ ဓီတာ ကေသကာရီ နာမ ဂေဟဒွါရသမီပေ မာတု သီသတော ဦကာ ဂဏှန္တီ တေ ဘိက္ခူ ဂစ္ဆန္တေ ဒိသွာ မာတရံ အာဟ ‘‘အမ္မ၊ ဣမေ ပဗ္ဗဇိတာ ပဌမေန ယောဗ္ဗနေန သမန္နာဂတာ အဘိရူပါ ဒဿနီယာ ပါသာဒိကာ သုခုမာလာ ကေနစိ ပါရိဇုညေန အနဘိဘူတာ မညေ၊ ကသ္မာ နု ခေါ ဣမေ ဣမသ္မိံယေဝ ဝယေ ပဗ္ဗဇန္တီ’’တိ? တံ မာတာ အာဟ ‘‘အတ္ထိ၊ အမ္မ၊ သကျပုတ္တော သကျကုလာ ပဗ္ဗဇိတော ဗုဒ္ဓေါ လောကေ ဥပ္ပန္နော၊ သော ဓမ္မံ ဒေသေတိ အာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ ကေဝလပရိပုဏ္ဏံ၊ ပရိသုဒ္ဓံ ဗြဟ္မစရိယံ ပကာသေတိ၊ တဿ ဣမေ ဓမ္မံ သုတွာ ပဗ္ဗဇန္တီ’’တိ.

တေန စ သမယေန အာဂတဖလော ဝိညာတသာသနော အညတရော ဥပါသကော တာယ ဝီထိယာ ဂစ္ဆန္တော တံ ကထံ သုတွာ တာသံ သန္တိကံ ဥပသင်္ကမိ. အထ နံ ဗြာဟ္မဏီ အာဟ ‘‘ဧတရဟိ ခေါ ဥပါသက ဗဟူ ကုလပုတ္တာ မဟန္တံ ဘောဂက္ခန္ဓံ မဟန္တံ ဉာတိပရိဝဋ္ဋံ ပဟာယ သကျသမယေ ပဗ္ဗဇန္တိ၊ တေ ကိံ နု ခေါ အတ္ထဝသံ သမ္ပဿန္တာ ပဗ္ဗဇန္တီ’’တိ? တံ သုတွာ ဥပါသကော ‘‘ကာမေသု အာဒီနဝံ၊ နေက္ခမ္မေ စ အာနိသံသံ သမ္ပဿန္တာ’’တိ ဝတွာ အတ္တနော ဉာဏဗလာနုရူပံ တမတ္ထံ ဝိတ္ထာရတော ကထေသိ၊ တိဏ္ဏဉ္စ ရတနာနံ ဂုဏေ ပကာသေသိ၊ ပဉ္စန္နံ သီလာနံ ဒိဋ္ဌဓမ္မိကံ သမ္ပရာယိကဉ္စ ဂုဏာနိသံသံ ပဝေဒေသိ. အထ ဗြာဟ္မဏဓီတာ တံ ‘‘ကိံ အမှေဟိပိ သရဏေသု စ သီလေသု စ ပတိဋ္ဌာယ တယာ ဝုတ္တေ ဂုဏာနိသံသေ အဓိဂန္တုံ သက္ကာ’’တိ ပုစ္ဆိ. သော ‘‘သဗ္ဗသာဓာရဏာ ဣမေ ဓမ္မာ ဘဂဝတာ ဘာသိတာ၊ ကသ္မာ န သက္ကာ’’တိ ဝတွာ တဿာ သရဏာနိ စ သီလာနိ စ အဒါသိ. သာ ဂဟိတသရဏာ သမာဒိန္နသီလာ စ ဟုတွာ ပုန အာဟ ‘‘ကိံ ဣတော ဥတ္တရိ အညမ္ပိ ကရဏီယံ အတ္ထီ’’တိ. သော တဿာ ဝိညုဘာဝံ သလ္လက္ခေန္တော ‘‘ဥပနိဿယသမ္ပန္နာ ဘဝိဿတီ’’တိ ဉတွာ သရီရသဘာဝံ ဝိဘာဝေန္တော ဒွတ္တိံသာကာရကမ္မဋ္ဌာနံ ကထေတွာ ကာယေ ဝိရာဂံ ဥပ္ပါဒေတွာ ဥပရိ အနိစ္စတာဒိပဋိသံယုတ္တာယ ဓမ္မိယာ ကထာယ သံဝေဇေတွာ ဝိပဿနာမဂ္ဂံ အာစိက္ခိတွာ ဂတော. သာ တေန ဝုတ္တနယံ သဗ္ဗံ မနသိ ကတွာ ပဋိကူလမနသိကာရေ သမာဟိတစိတ္တာ ဝိပဿနံ ပဋ္ဌပေတွာ ဥပနိဿယသမ္ပတ္တိယာ န စိရဿေဝ သောတာပတ္တိဖလေ ပတိဋ္ဌဟိ. အထာပရေန သမယေန ကာလံ ကတွာ သက္ကဿ ဒေဝရညော ပရိစာရိကာ ဟုတွာ နိဗ္ဗတ္တိ၊ သတသဟဿဉ္စဿာ အစ္ဆရာပရိဝါရော အဟောသိ. တံ သက္ကော ဒေဝရာဇာ ဒိသွာ အစ္ဆရိယဗ္ဘုတစိတ္တဇာတော ပမုဒိတဟဒယော –

၁၅၀. ‘‘ဣဒံ ဝိမာနံ ရုစိရံ ပဘဿရံ၊ ဝေဠုရိယထမ္ဘံ သတတံ သုနိမ္မိတံ၊

သုဝဏ္ဏရုက္ခေဟိ သမန္တမောတ္ထတံ၊ ဌာနံ မမံ ကမ္မဝိပါကသမ္ဘဝံ.

၁၅၁. ‘‘တတြူပပန္နာ ပုရိမစ္ဆရာ ဣမာ၊ သတံ သဟဿာနိ သကေန ကမ္မုနာ၊

တုဝံသိ အဇ္ဈုပဂတာ ယသဿိနီ၊ ဩဘာသယံ တိဋ္ဌသိ ပုဗ္ဗဒေဝတာ.

၁၅၂. ‘‘သသီ အဓိဂ္ဂယှ ယထာ ဝိရောစတိ၊ နက္ခတ္တရာဇာရိဝ တာရကာဂဏံ၊

တထေဝ တွံ အစ္ဆရာသင်္ဂဏံ ဣမံ၊ ဒဒ္ဒလ္လမာနာ ယသသာ ဝိရောစသိ.

၁၅၃. ‘‘ကုတော နု အာဂမ္မ အနောမဒဿနေ၊ ဥပပန္နာ တွံ ဘဝနံ မမံ ဣဒံ၊

ဗြဟ္မံဝ ဒေဝါ တိဒသာ သဟိန္ဒကာ၊ သဗ္ဗေ န တပ္ပါမသေ ဒဿနေန တ’’န္တိ. –

စတူဟိ ဂါထာဟိ တာယ ကတကမ္မံ ပုစ္ဆိ.

၁၅၀. တတ္ထ ဣဒံ ဝိမာနန္တိ ယသ္မိံ ဝိမာနေ သာ ဒေဝတာ ဥပ္ပန္နာ၊ တံ အတ္တနော ဝိမာနံ သန္ဓာယာဟ. သတတန္တိ သဗ္ဗကာလံ ရုစိရံ ပဘဿရန္တိ ယောဇနာ. သတတန္တိ ဝါ သမ္မာတတံ၊ အတိဝိယ ဝိတ္ထိဏ္ဏန္တိ အတ္ထော. သမန္တမောတ္ထတန္တိ သမန္တတော အဝတ္ထတံ ဆာဒိတံ. ဌာနန္တိ ဝိမာနမေဝ သန္ဓာယ ဝဒတိ. တဉှိ တိဋ္ဌန္တိ ဧတ္ထ ကတပုညာတိ ဌာနန္တိ ဝုစ္စတိ. ကမ္မဝိပါကသမ္ဘဝန္တိ ကမ္မဝိပါကဘာဝေန သမ္ဘူတံ၊ ကမ္မဝိပါကေန ဝါ သဟ သမ္ဘူတံ. မမန္တိ ဣဒံ မမ ဌာနံ မမ ကမ္မဝိပါကသမ္ဘဝန္တိ ဒွီဟိပိ ပဒေဟိ ယောဇေတဗ္ဗံ.

၁၅၁. တတြူပပန္နာတိ ဂါထာယ အယံ သင်္ခေပတ္ထော – တတြ တသ္မိံ ယထာဝုတ္တေ ဝိမာနေ ဥပပန္နာတိ နိဗ္ဗတ္တာ ပဂေဝ ဥပ္ပန္နတ္တာ ပုဗ္ဗဒေဝတာ ဣမာ ပုရိမာ အစ္ဆရာယော ပရိမာဏတော သတံ သဟဿာနိ. တုဝံသီတိ တွံ အသိ သကေန ကမ္မုနာ အဇ္ဈုပဂတာ ဥပပန္နာ. ယသဿိနီတိ ပရိဝါရသမ္ပန္နာ၊ တေနေဝ သကေန ကမ္မုနာ ကမ္မာနုဘာဝေန ဩဘာသယန္တီ ဝိရောစမာနာ တိဋ္ဌသီတိ.

၁၅၂. ဣဒါနိ တမေဝ ဩဘာသနံ ဥပမာယ ဝိဘာဝေန္တော ‘‘သသီ’’တိ ဂါထမာဟ. တဿတ္ထော – ယထာ သသလဉ္ဆနယောဂေန ‘‘သသီ’’တိ၊ နက္ခတ္တေဟိ အဓိကဂုဏတာယ ‘‘နက္ခတ္တရာဇာ’’တိ စ လဒ္ဓနာမော စန္ဒော သဗ္ဗံ တာရကာဂဏံ အဓိဂ္ဂယှ အဘိဘဝိတွာ ဝိရောစတိ ဝိရာဇတိ၊ တထေဝ တွံ ဣမံ အစ္ဆရာနံ ဒေဝကညာနံ ဂဏံ သမူဟံ အတ္တနော ယသသာ ဒဒ္ဒလ္လမာနာ အတိဝိယ ဝိဇ္ဇောတမာနာ ဝိရောစသီတိ. ဧတ္ထ စ ‘‘ဣမာ’’တိ ‘‘ဣမ’’န္တိ စ နိပါတမတ္တံ. ကေစိ ပန ‘‘နက္ခတ္တရာဇာရိဝ တာရာဂဏံ တထေဝ တွ’’န္တိ ပဌန္တိ.

၁၅၃. ဣဒါနိ တဿာ ဒေဝတာယ ပုရိမဘဝံ တတ္ထ ကတပုညဉ္စ ပုစ္ဆန္တော ‘‘ကုတော နု အာဂမ္မာ’’တိ ဂါထမာဟ. တတ္ထ ကုတော နု အာဂမ္မာတိ ကုတော နု ဘဝတော ကုတော နု ပုညကမ္မတော ကာရဏဘူတတော ဣဒံ မမ ဘဝနံ အာဂမ္မ ဘဒ္ဒေ အနောမဒဿနေ သဗ္ဗင်္ဂသောဘနေ တွံ ဥပပန္နာ ဥပ္ပတ္တိဂဟဏဝသေန ဥပဂတာ. ‘‘အနောမဒဿနေ’’တိ ဝုတ္တမေဝတ္ထံ ဥပမာယ ပကာသေန္တော ‘‘ဗြဟ္မံဝ ဒေဝါ တိဒသာ သဟိန္ဒကာ၊ သဗ္ဗေ န တပ္ပါမသေ ဒဿနေန တ’’န္တိ အာဟ. တတ္ထ ယထာ ဗြဟ္မာနံ သဟမ္ပတိံ သနင်္ကုမာရံ ဝါ ဥပဂတံ သဟ ဣန္ဒေနာတိ သဟိန္ဒကာ တာဝတိံသာ ဒေဝါ ပဿန္တာ ဒဿနေန န တပ္ပန္တိ၊ ဧဝံ တဝ ဒဿနေန မယံ သဗ္ဗေ ဒေဝါ န တပ္ပါမသေတိ အတ္ထော.

ဧဝံ ပန သက္ကေန ဒေဝါနမိန္ဒေန ပုစ္ဆိတာ သာ ဒေဝတာ တမတ္ထံ ပကာသေန္တီ –

၁၅၄. ‘‘ယမေတံ သက္က အနုပုစ္ဆသေ မမံ၊ ကုတော စုတာ တွံ ဣဓ အာဂတာတိ၊

ဗာရာဏသီ နာမ ပုရတ္ထိ ကာသိနံ၊ တတ္ထ အဟောသိံ ပုရေ ကေသကာရိကာ.

၁၅၅. ‘‘ဗုဒ္ဓေ စ ဓမ္မေ စ ပသန္နမာနသာ၊ သံဃေ စ ဧကန္တဂတာ အသံသယာ၊

အခဏ္ဍသိက္ခာပဒါ အာဂတပ္ဖလာ၊ သမ္ဗောဓိဓမ္မေ နိယတာ အနာမယာ’’တိ. –

ဂါထဒွယမာဟ.

၁၅၄-၅. တတ္ထ ယမေတန္တိ ယံ ဧတံ ပဉှန္တိ အတ္ထော. အနုပုစ္ဆသေတိ အနုကူလဘာဝေန ပုစ္ဆသိ. မမန္တိ မံ. ပုရတ္ထီတိ ပုရံ အတ္ထိ. ကာသိနန္တိ ကာသိရဋ္ဌဿ. ကေသကာရိကာတိ ပုရိမတ္တဘာဝေ အတ္တနော နာမံ ဝဒတိ. ဗုဒ္ဓေ စ ဓမ္မေ စာတိအာဒိနာ အတ္တနော ပုညံ ဝိဘာဝေတိ.

ပုန သက္ကော တဿာ တံ ပုညသမ္ပတ္တိဉ္စ ဒိဗ္ဗသမ္ပတ္တိဉ္စ အနုမောဒမာနော –

၁၅၆. ‘‘တန္တျာဘိနန္ဒာမသေ သွာဂတဉ္စ တေ၊

ဓမ္မေန စ တွံ ယသသာ ဝိရောစသိ၊

ဗုဒ္ဓေ စ ဓမ္မေ စ ပသန္နမာနသေ၊

သံဃေ စ ဧကန္တဂတေ အသံသယေ၊

အခဏ္ဍသိက္ခာပဒေ အာဂတပ္ဖလေ၊

သမ္ဗောဓိဓမ္မေ နိယတေ အနာမယေ’’တိ. – အာဟ၊

၁၅၆. တတ္ထ တန္တျာဘိနန္ဒာမသေတိ တံ တေ ဒုဝိဓမ္ပိ သမ္ပတ္တိံ အဘိနန္ဒာမ အနုမောဒါမ. သွာဂတဉ္စ တေတိ တုယှဉ္စ ဣဓာဂမနံ သွာဂတံ၊ အမှာကံ ပီတိသောမနဿသံဝဒ္ဓနမေဝ. သေသံ ဝုတ္တနယမေဝါတိ.

တံ ပန ပဝတ္တိံ သက္ကော ဒေဝရာဇာ အာယသ္မတော မဟာမောဂ္ဂလ္လာနတ္ထေရဿ ကထေသိ၊ ထေရော ဘဂဝတော နိဝေဒေသိ. ဘဂဝါ တမတ္ထံ အဋ္ဌုပ္ပတ္တိံ ကတွာ သမ္ပတ္တပရိသာယ ဓမ္မံ ဒေသေသိ. သာ ဒေသနာ သဒေဝကဿ လောကဿ သာတ္ထိကာ ဇာတာတိ.

ကေသကာရီဝိမာနဝဏ္ဏနာ နိဋ္ဌိတာ.

ဣတိ ပရမတ္ထဒီပနိယာ ခုဒ္ဒက-အဋ္ဌကထာယ ဝိမာနဝတ္ထုသ္မိံ

သတ္တရသဝတ္ထုပဋိမဏ္ဍိတဿ ပဌမဿ ပီဌဝဂ္ဂဿ

အတ္ထဝဏ္ဏနာ နိဋ္ဌိတာ.