၉. စန္ဒနတ္ထေရဂါထာဝဏ္ဏနာ

ဇာတရူပေနာတိအာဒိကာ အာယသ္မတော စန္ဒနတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ဥပစိနန္တော ဣတော ဧကတိံသေ ကပ္ပေ ဗုဒ္ဓသုညေ လောကေ ရုက္ခဒေဝတာ ဟုတွာ နိဗ္ဗတ္တော သုဒဿနံ နာမ ပစ္စေကဗုဒ္ဓံ ပဗ္ဗတန္တရေ ဝသန္တံ ဒိသွာ ပသန္နမာနသော ကုဋဇပုပ္ဖေဟိ ပူဇံ အကာသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ သာဝတ္ထိယံ ဝိဘဝသမ္ပန္နေ ကုလေ နိဗ္ဗတ္တိတွာ စန္ဒနောတိ လဒ္ဓနာမော ဝယပ္ပတ္တော ဃရာဝါသံ ဝသန္တော သတ္ထု သန္တိကေ ဓမ္မံ သုတွာ သောတာပန္နော အဟောသိ. သော ဧကံ ပုတ္တံ လဘိတွာ ဃရာဝါသံ ပဟာယ ပဗ္ဗဇိတွာ ဝိပဿနာယ ကမ္မဋ္ဌာနံ ဂဟေတွာ အရညေ ဝိဟရန္တော သတ္ထာရံ ဝန္ဒိတုံ သာဝတ္ထိံ အာဂတော သုသာနေ ဝသတိ. တဿ အာဂတဘာဝံ သုတွာ ပုရာဏဒုတိယိကာ အလင်္ကတပဋိယတ္တာ ဒါရကံ အာဒါယ မဟတာ ပရိဝါရေန ထေရဿ သန္တိကံ ဂစ္ဆတိ – ‘‘ဣတ္ထိကုတ္တာဒီဟိ နံ ပလောဘေတွာ ဥပ္ပဗ္ဗာဇေဿာမီ’’တိ. ထေရော တံ အာဂစ္ဆန္တိံ ဒူရတောဝ ဒိသွာ ‘‘ဣဒါနိဿာ အဝိသယော ဘဝိဿာမီ’’တိ ယထာရဒ္ဓံ ဝိပဿနံ ဥဿုက္ကာပေတွာ ဆဠဘိညော အဟောသိ. တေန ဝုတ္တံ အပဒါနေ (အပ. ထေရ ၂.၅၂.၃၇-၄၃) –

‘‘ဟိမဝန္တဿာဝိဒူရေ၊ ဝသလော နာမ ပဗ္ဗတော၊

ဗုဒ္ဓေါ သုဒဿနော နာမ၊ ဝသတေ ပဗ္ဗတန္တရေ.

‘‘ပုပ္ဖံ ဟေမဝန္တံ မယှ၊ ဝေဟာသံ အဂမာသဟံ၊

တတ္ထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ.

‘‘ပုပ္ဖံ ကုဋဇမာဒါယ၊ သိရေ ကတွာန အဉ္ဇလိံ၊

ဗုဒ္ဓဿ အဘိရောပေသိံ၊ သယမ္ဘုဿ မဟေသိနော.

‘‘ဧကတိံသေ ဣတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

ဆဠဘိညော ပန ဟုတွာ အာကာသေ ဌတွာ တဿာ ဓမ္မံ ဒေသေတွာ သရဏေသု စ သီလေသု စ ပတိဋ္ဌာပေတွာ သယံ အတ္တနာ ပုဗ္ဗေ ဝသိတဋ္ဌာနမေဝ ဂတော. သဟာယဘိက္ခူဟိ – ‘‘ဝိပ္ပသန္နာနိ ခေါ တေ၊ အာဝုသော၊ ဣန္ဒြိယာနိ၊ ကစ္စိ တယာ သစ္စာနိ ပဋိဝိဒ္ဓါနီ’’တိ ပုဋ္ဌော –

၂၉၉. ‘‘ဇာတရူပေန သဉ္ဆန္နာ၊ ဒါသီဂဏပုရက္ခတာ၊

အင်္ကေန ပုတ္တမာဒါယ၊ ဘရိယာ မံ ဥပါဂမိ.

၃၀၀. ‘‘တဉ္စ ဒိသွာန အာယန္တိံ၊ သကပုတ္တဿ မာတရံ၊

အလင်္ကတံ သုဝသနံ၊ မစ္စုပါသံဝ ဩဍ္ဍိတံ.

၃၀၁. ‘‘တတော မေ မနသီကာရော၊ ယောနိသော ဥဒပဇ္ဇထ၊

အာဒီနဝေါ ပါတုရဟု၊ နိဗ္ဗိဒါ သမတိဋ္ဌထ.

၃၀၂. ‘‘တတော စိတ္တံ ဝိမုစ္စိ မေ၊ ပဿ ဓမ္မသုဓမ္မတံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ. –

ဣမာဟိ ဂါထာဟိ အတ္တနော ပဋိပတ္တိံ ကထေန္တော အညံ ဗျာကာသိ.

တတ္ထ ဇာတရူပေန သဉ္ဆန္နာတိ ဇာတရူပမယေန သီသူပဂါဒိအလင်္ကာရေန အလင်္ကရဏဝသေန ပဋိစ္ဆာဒိတသရီရာ၊ သဗ္ဗာဘရဏဘူသိတာတိ အတ္ထော. ဒါသီဂဏပုရက္ခတာတိ ယထာရဟံ အလင်္ကတပဋိယတ္တေန အတ္တနော ဒါသိဂဏေန ပုရတော ကတာ ပရိဝါရိတာတိ အတ္ထော. အင်္ကေန ပုတ္တမာဒါယာတိ ‘‘အပိ နာမ ပုတ္တမ္ပိ ဒိသွာ ဂေဟဿိတသာတော ဘဝေယျာ’’တိ ပုတ္တံ အတ္တနော အင်္ကေန ဂဟေတွာ.

အာယန္တိန္တိ အာဂစ္ဆန္တိံ. သကပုတ္တဿ မာတရန္တိ မမ ဩရသပုတ္တဿ ဇနနိံ၊ မယှံ ပုရာဏဒုတိယိကန္တိ အတ္ထော. သဗ္ဗမိဒံ ထေရော အတ္တနော ကာမရာဂသမုစ္ဆေဒံ ဗဟုမညန္တော ဝဒတိ. ယောနိသော ဥဒပဇ္ဇထာတိ ‘‘ဧဝရူပါပိ နာမ သမ္ပတ္တိ ဇရာဗျာဓိမရဏေဟိ အဘိဘုယျတိ၊ အဟော သင်္ခါရာ အနိစ္စာ အဓုဝါ အနဿာသိကာ’’တိ ဧဝံ ယောနိသောမနသိကာရော ဥပ္ပဇ္ဇိ. သေသံ ဟေဋ္ဌာ ဝုတ္တနယမေဝ.

စန္ဒနတ္ထေရဂါထာဝဏ္ဏနာ နိဋ္ဌိတာ.