၇. သမ္ဘူတတ္ထေရဂါထာဝဏ္ဏနာ

ယော ဒန္ဓကာလေတိအာဒိကာ အာယသ္မတော သမ္ဘူတတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ကရောန္တော ဗုဒ္ဓသုညေ လောကေ စန္ဒဘာဂါယ နဒိယာ တီရေ ကိန္နရယောနိယံ နိဗ္ဗတ္တော. ဧကဒိဝသံ အညတရံ ပစ္စေကဗုဒ္ဓံ ဒိသွာ ပသန္နမာနသော ဝန္ဒိတွာ ကတဉ္ဇလီ အဇ္ဇုနပုပ္ဖေဟိ ပူဇံ အကာသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ကုလဂေဟေ နိဗ္ဗတ္တိတွာ သမ္ဘူတောတိ လဒ္ဓနာမော ဝယပ္ပတ္တော ဘဂဝတော ပရိနိဗ္ဗာနဿ ပစ္ဆာ ဓမ္မဘဏ္ဍာဂါရိကဿ သန္တိကေ ဓမ္မံ သုတွာ ပဋိလဒ္ဓသဒ္ဓေါ ပဗ္ဗဇိတွာ သမဏဓမ္မံ ကရောန္တော ဝိပဿနံ ဝဍ္ဎေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၅၂.၂၈-၃၆) –

‘‘စန္ဒဘာဂါနဒီတီရေ၊ အဟောသိံ ကိန္နရော တဒါ၊

အဒ္ဒသံ ဝိရဇံ ဗုဒ္ဓံ၊ သယမ္ဘုံ အပရာဇိတံ.

‘‘ပသန္နစိတ္တော သုမနော၊ ဝေဒဇာတော ကတဉ္ဇလီ၊

ဂဟေတွာ အဇ္ဇုနံ ပုပ္ဖံ၊ သယမ္ဘုံ အဘိပူဇယိံ.

‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ ကိန္နရံ ဒေဟံ၊ တာဝတိံသမဂစ္ဆဟံ.

‘‘ဆတ္တိသက္ခတ္တုံ ဒေဝိန္ဒော၊ ဒေဝရဇ္ဇမကာရယိံ၊

ဒသက္ခတ္တုံ စက္ကဝတ္တီ၊ မဟာရဇ္ဇမကာရယိံ.

‘‘ပဒေသရဇ္ဇံ ဝိပုလံ၊ ဂဏနာတော အသင်္ခိယံ၊

သုခေတ္တေ ဝပ္ပိတံ ဗီဇံ၊ သယမ္ဘုမှိ အဟော မမ.

‘‘ကုသလံ ဝိဇ္ဇတေ မယှံ၊ ပဗ္ဗဇိံ အနဂါရိယံ၊

ပူဇာရဟော အဟံ အဇ္ဇ၊ သကျပုတ္တဿ သာသနေ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ ဝိမုတ္တိသုခေန ဝိဟရန္တော ဝဿသတပရိနိဗ္ဗုတေ ဘဂဝတိ ဝေသာလိကေသု ဝဇ္ဇိပုတ္တကေသု ဒသ ဝတ္ထူနိ ပဂ္ဂယှ ဌိတေသု ကာကဏ္ဍကပုတ္တေန ယသတ္ထေရေန ဥဿာဟိတေဟိ သတ္တသတေဟိ ခီဏာသဝေဟိ တံ ဒိဋ္ဌိံ ဘိန္ဒိတွာ သဒ္ဓမ္မံ ပဂ္ဂဏှန္တေဟိ ဓမ္မဝိနယသင်္ဂဟေ ကတေ တေသံ ဝဇ္ဇိပုတ္တကာနံ ဥဒ္ဓမ္မဥဗ္ဗိနယဒီပနေ ဓမ္မသံဝေဂေန ထေရော –

၂၉၁. ‘‘ယော ဒန္ဓကာလေ တရတိ၊ တရဏီယေ စ ဒန္ဓယေ၊

အယောနိသံဝိဓာနေန၊ ဗာလော ဒုက္ခံ နိဂစ္ဆတိ.

၂၉၂. ‘‘တဿတ္ထာ ပရိဟာယန္တိ၊ ကာဠပက္ခေဝ စန္ဒိမာ၊

အာယသကျဉ္စ ပပ္ပေါတိ၊ မိတ္တေဟိ စ ဝိရုဇ္ဈတိ.

၂၉၃. ‘‘ယော ဒန္ဓကာလေ ဒန္ဓေတိ၊ တရဏီယေ စ တာရယေ၊

ယောနိသော သံဝိဓာနေန၊ သုခံ ပပ္ပေါတိ ပဏ္ဍိတော.

၂၉၄. ‘‘တဿတ္ထာ ပရိပူရေန္တိ၊ သုက္ကပက္ခေဝ စန္ဒိမာ၊

ယသော ကိတ္တိဉ္စ ပပ္ပေါတိ၊ မိတ္တေဟိ န ဝိရုဇ္ဈတီ’’တိ. –

ဣမာ ဂါထာ ဘဏန္တော အညံ ဗျာကာသိ.

တတ္ထ ယော ဒန္ဓကာလေ တရတီတိ ကိသ္မိဉ္စိ ကတ္တဗ္ဗဝတ္ထုသ္မိံ – ‘‘ကပ္ပတိ နု ခေါ၊ န နု ခေါ ကပ္ပတီ’’တိ ဝိနယကုက္ကုစ္စေ ဥပ္ပန္နေ ယာဝ ဝိယတ္တံ ဝိနယဓရံ ပုစ္ဆိတွာ တံ ကုက္ကုစ္စံ န ဝိနောဒေတိ၊ တာဝ ဒန္ဓကာလေ တဿ ကိစ္စဿ ဒန္ဓာယိတဗ္ဗသမယေ တရတိ မဒ္ဒိတွာ ဝီတိက္ကမံ ကရောတိ. တရဏီယေ စ ဒန္ဓယေတိ ဂဟဋ္ဌဿ တာဝ သရဏဂမနသီလသမာဒါနာဒိကေ၊ ပဗ္ဗဇိတဿ ဝတ္တပဋိဝတ္တကရဏာဒိကေ သမထဝိပဿနာနုယောဂေ စ တရိတဗ္ဗေ သမ္ပတ္တေ သီဃံ တံ ကိစ္စံ အနနုယုဉ္ဇိတွာ – ‘‘အာဂမနမာသေ ပက္ခေ ဝါ ကရိဿာမီ’’တိ ဒန္ဓာယေယျ၊ တံ ကိစ္စံ အကရောန္တောဝ ကာလံ ဝီတိနာမေယျ. အယောနိသံဝိဓာနေနာတိ ဧဝံ ဒန္ဓာယိတဗ္ဗေ တရန္တော တရိတဗ္ဗေ စ ဒန္ဓာယန္တော အနုပါယသံဝိဓာနေန ဥပါယသံဝိဓာနာဘာဝေန ဗာလော၊ မန္ဒဗုဒ္ဓိကော ပုဂ္ဂလော၊ သမ္ပတိ အာယတိဉ္စ ဒုက္ခံ အနတ္ထံ ပါပုဏာတိ.

တဿတ္ထာ ပရိဟာယန္တီတိ တဿ တထာရူပဿ ပုဂ္ဂလဿ ဒိဋ္ဌဓမ္မိကာဒိဘေဒါ အတ္ထာ ကာဠပက္ခေ စန္ဒိမာ ဝိယ၊ ပရိဟာယန္တိ ဒိဝသေ ဒိဝသေ ပရိက္ခယံ ပရိယာဒါနံ ဂစ္ဆန္တိ. ‘‘အသုကော ပုဂ္ဂလော အဿဒ္ဓေါ အပ္ပသန္နော ကုသီတော ဟီနဝီရိယော’’တိအာဒိနာ. အာယသကျံ ဝိညူဟိ ဂရဟိတဗ္ဗတံ ပပ္ပေါတိ ပါပုဏာတိ. မိတ္တေဟိ စ ဝိရုဇ္ဈတီတိ ‘‘ဧဝံ ပဋိပဇ္ဇ၊ မာ ဧဝံ ပဋိပဇ္ဇာ’’တိ ဩဝါဒဒါယကေဟိ ကလျာဏမိတ္တေဟိ ‘‘အဝစနီယာ မယ’’န္တိ ဩဝါဒဿ အနာဒါနေနေဝ ဝိရုဒ္ဓေါ နာမ ဟောတိ.

သေသဂါထာဒွယဿ ဝုတ္တဝိပရိယာယေန အတ္ထော ဝေဒိတဗ္ဗော. ကေစိ ပနေတ္ထ – ‘‘တရတိ ဒန္ဓယေ’’တိပဒါနံ အတ္ထဘာဝေန ဘာဝနာစိတ္တဿ ပဂ္ဂဟနိဂ္ဂဟေ ဥဒ္ဓရန္တိ. တံ ပစ္ဆိမဂါထာသု ယုဇ္ဇတိ. ပုရိမာ ဟိ ဒွေ ဂါထာ ပဗ္ဗဇိတကာလတော ပဋ္ဌာယ စရိတဗ္ဗံ သမဏဓမ္မံ အကတွာ ကုက္ကုစ္စပကတတာယ ဒသ ဝတ္ထူနိ ဒီပေတွာ သံဃေန နိက္ကဍ္ဎိတေ ဝဇ္ဇိပုတ္တကေ သန္ဓာယ ထေရေန ဝုတ္တာ. ပစ္ဆိမာ ပန အတ္တသဒိသေ သမ္မာ ပဋိပန္နေ သကတ္ထံ နိပ္ဖါဒေတွာ ဌိတေတိ.

သမ္ဘူတတ္ထေရဂါထာဝဏ္ဏနာ နိဋ္ဌိတာ.