၈. အင်္ဂုလိမာလတ္ထေရဂါထာဝဏ္ဏနာ

ဂစ္ဆံ ဝဒေသီတိအာဒိကာ အာယသ္မတော အင်္ဂုလိမာလတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယံ ကုသလံ ဥပစိနိတွာ ဣမသ္မိံ ဗုဒ္ဓုပ္ပါဒေ သာဝတ္ထိယံ ကောသလရညော ပုရောဟိတဿ ဘဂ္ဂဝဿ နာမ ဗြာဟ္မဏဿ ပုတ္တော ဟုတွာ နိဗ္ဗတ္တိ. တဿ ဇာတဒိဝသေ သကလနဂရေ အာဝုဓာနိ ပဇ္ဇလိံသု၊ ရညော စ မင်္ဂလာဝုဓံ သယနပီဌေ ဌပိတံ ပဇ္ဇလိ၊ တံ ဒိသွာ ရာဇာ ဘီတော သံဝိဂ္ဂေါ နိဒ္ဒံ န လဘိ. ပုရောဟိတော တာယံ ဝေလာယံ နက္ခတ္တယောဂံ ဥလ္လောကေန္တော ‘‘စောရနက္ခတ္တေန ဇာတော’’တိ သန္နိဋ္ဌာနမကာသိ. သော ဝိဘာတာယ ရတ္တိယာ ရညော သန္တိကံ ဂတော သုခသေယျံ ပုစ္ဆိ. ရာဇာ ‘‘ကုတော၊ အာစရိယ၊ သုခသေယျံ၊ ရတ္တိယံ မယှံ မင်္ဂလာဝုဓံ ပဇ္ဇလိ၊ တဿ ကော နု ခေါ ဝိပါကော ဘဝိဿတီ’’တိ? ‘‘မာ ဘာယိ၊ မဟာရာဇ၊ မယှံ ဃရေ ဒါရကော ဇာတော. တဿ အာနုဘာဝေန သကလနဂရေပိ အာဝုဓာနိ ပဇ္ဇလိံသူ’’တိ. ‘‘ကိံ ဘဝိဿတိ၊ အာစရိယာ’’တိ? ‘‘ဒါရကော စောရော ဘဝိဿတီ’’တိ. ‘‘ကိံ ဧကစာရီ စောရော၊ ဥဒါဟု ဂဏဇေဋ္ဌကော’’တိ? ‘‘ဧကစာရိကော၊ ဒေဝ’’. ‘‘ကိံ နံ မာရေမာ’’တိ? ‘‘ဧကစာရိကော စေ၊ ပဋိဇဂ္ဂထ တာဝ န’’န္တိ အာဟ. တဿ နာမံ ကရောန္တာ ယသ္မာ ဇာယမာနော ရညော စိတ္တံ ဝိဟေသေန္တော ဇာတော၊ တသ္မာ ဟိံသကောတိ ကတွာ ပစ္ဆာ ဒိဋ္ဌံ အဒိဋ္ဌန္တိ ဝိယ အဟိံသကောတိ ဝေါဟရိံသု.

သော ဝယပ္ပတ္တော ပုဗ္ဗကမ္မဗလေန သတ္တန္နံ ဟတ္ထီနံ ဗလံ ဓာရေတိ. တဿိဒံ ပုဗ္ဗကမ္မံ – ဗုဒ္ဓသုညေ လောကေ ကဿကော ဟုတွာ နိဗ္ဗတ္တော ဧကံ ပစ္စေကဗုဒ္ဓံ ဝဿောဒကေန တိန္တံ အလ္လစီဝရံ သီတပီဠိတံ အတ္တနော ခေတ္တဘူမိံ ဥပဂတံ ဒိသွာ ‘‘ပုညက္ခေတ္တံ မေ ဥပဋ္ဌိတ’’န္တိ သောမနဿဇာတော အဂ္ဂိံ ကတွာ အဒါသိ. သော တဿ ကမ္မဿ ဗလေန နိဗ္ဗတ္တနိဗ္ဗတ္တဋ္ဌာနေ ထာမဇဝဗလသမ္ပန္နော စ ဟုတွာ ဣမသ္မိံ ပစ္ဆိမတ္တဘာဝေ သတ္တန္နံ ဟတ္ထီနံ ဗလံ ဓာရေတိ. သော တက္ကသိလံ ဂန္တွာ ဒိသာပါမောက္ခဿ အာစရိယဿ သန္တိကေ ဓမ္မန္တေဝါသီ ဟုတွာ သိပ္ပံ ဥဂ္ဂဏှတော အာစရိယဗြာဟ္မဏံ တဿ ဘရိယဉ္စ သက္ကစ္စံ ပဋိဇဂ္ဂတိ. တေနဿ သာ ဗြာဟ္မဏီ ဂေဟေ လဗ္ဘမာနေန ဘတ္တာဒိနာ သင်္ဂဟံ ကရောတိ. တံ အသဟမာနာ အညေ မာဏဝါ အာစရိယေန သဒ္ဓိံ ဘေဒံ အကံသု. ဗြာဟ္မဏော တေသံ ဝစနံ ဒွေ တယော ဝါရေ အသဒ္ဒဟန္တော ဟုတွာ ပစ္ဆာ သဒ္ဒဟိတွာ ‘‘မဟာဗလော မာဏဝေါ၊ န သက္ကာ ကေနစိ မာရာပေတုံ၊ ဥပါယေန နံ မာရေဿာမီ’’တိ စိန္တေတွာ နိဋ္ဌိတသိပ္ပံ အတ္တနော နဂရံ ဂန္တုံ အာပုစ္ဆန္တံ မာဏဝံ အာဟ – ‘‘တာတ အဟိံသက၊ နိဋ္ဌိတသိပ္ပေန နာမ အန္တေဝါသိနာ အာစရိယဿ ဂရုဒက္ခိဏာ ဒါတဗ္ဗာ၊ တံ မယှံ ဒေဟီ’’တိ. ‘‘သာဓု၊ အာစရိယ၊ ကိံ ဒဿာမီ’’တိ? ‘‘မနုဿာနံ သဟဿဒက္ခိဏဟတ္ထင်္ဂလိယော အာနေဟီ’’တိ. ဗြာဟ္မဏဿ ကိရ အယမဿ အဓိပ္ပါယော – ဗဟူသု မာရိယမာနေသု ဧကန္တတော ဧကော နံ မာရေယျာတိ. တံ သုတွာ အဟိံသကော အတ္တနော စိရပရိစိတံ နိက္ကရုဏတံ ပုရက္ခတွာ သန္နဒ္ဓပဉ္စာဝုဓော ကောသလရညော ဝိဇိတေ ဇာလိနံ ဝနံ ပဝိသိတွာ မဟာမဂ္ဂသမီပေ ပဗ္ဗတန္တရေ ဝသန္တော ပဗ္ဗတသိခရေ ဌတွာ မဂ္ဂေန ဂစ္ဆန္တေ မနုဿေ ဩလောကေတွာ ဝေဂေန ဂန္တွာ အင်္ဂုလိယော ဂဟေတွာ ရုက္ခဂ္ဂေ ဩလမ္ဗေသိ. တာ ဂိဇ္ဈာပိ ကာကာပိ ခါဒိံသု၊ ဘူမိယံ နိက္ခိတ္တာ ပူတိဘာဝံ အဂမံသု. ဧဝံ ဂဏနာယ အပရိပူရမာနာယ လဒ္ဓါ လဒ္ဓါ အင်္ဂုလိယော သုတ္တေန ဂန္ထိတွာ မာလံ ကတွာ ယညောပစိတံ ဝိယ အံသေ ဩလမ္ဗေသိ. တတော ပဋ္ဌာယ အင်္ဂုလိမာလောတွေဝဿ သမညာ အဟောသိ.

ဧဝံ တသ္မိံ မနုဿေ မာရေန္တေ မဂ္ဂေါ အဝဠဉ္ဇော အဟောသိ. သော မဂ္ဂေ မနုဿေ အလဘန္တော ဂါမူပစာရံ ဂန္တွာ နိလီယိတွာ အာဂတာဂတေ မနုဿေ မာရေတွာ အင်္ဂုလိယော ဂဟေတွာ ဂစ္ဆတိ. တံ ဉတွာ မနုဿာ ဂါမတော အပက္ကမိံသု၊ ဂါမာ သုညာ အဟေသုံ၊ တထာ နိဂမာ ဇနပဒါ စ. ဧဝံ တေန သော ပဒေသော ဥဗ္ဗာသိတော အဟောသိ. အင်္ဂုလိမာလဿ စ ဧကာယ ဦနာ သဟဿအင်္ဂုလိယော သင်္ဂဟာ အဟေသုံ. အထ မနုဿာ တံ စောရုပဒ္ဒဝံ ကောသလရညော အာရောစေသုံ. ရာဇာ ပါတောဝ နဂရေ ဘေရိံ စရာပေသိ၊ ‘‘သီဃံ အင်္ဂုလိမာလစောရံ ဂဏှာမ၊ ဗလကာယော အာဂစ္ဆတူ’’တိ. တံ သုတွာ အင်္ဂုလိမာလဿ မာတာ မန္တာဏီ နာမ ဗြာဟ္မဏီ တဿ ပိတရံ အာဟ – ‘‘ပုတ္တော ကိရ တေ စောရော ဟုတွာ ဣဒဉ္စိဒဉ္စ ကရောတိ၊ တံ ‘ဤဒိသံ မာ ကရီ’တိ သညာပေတွာ အာနေဟိ၊ အညထာ နံ ရာဇာ ဃာတေယျာ’’တိ. ဗြာဟ္မဏော ‘‘န မယှံ တာဒိသေဟိ ပုတ္တေဟိ အတ္ထော၊ ရာဇာ ယံ ဝါ တံ ဝါ ကရောတူ’’တိ အာဟ. အထ ဗြာဟ္မဏီ ပုတ္တသိနေဟေန ပါထေယျံ ဂဟေတွာ ‘‘မမ ပုတ္တံ သညာပေတွာ အာနေဿာမီ’’တိ မဂ္ဂံ ပဋိပဇ္ဇိ.

ဘဂဝါ ‘‘အယံ ‘အင်္ဂုလိမာလံ အာနေဿာမီ’တိ ဂစ္ဆတိ၊ သစေ သာ ဂမိဿတိ၊ အင်္ဂုလိမာလော ‘အင်္ဂုလိသဟဿံ ပူရေဿာမီ’တိ မာတရမ္ပိ မာရေဿတိ. သော စ ပစ္ဆိမဘဝိကော၊ သစာဟံ န ဂမိဿံ၊ မဟာဇာနိ အဘဝိဿာ’’တိ ဉတွာ ပစ္ဆာဘတ္တံ ပိဏ္ဍပါတပဋိက္ကန္တော သယမေဝ ပတ္တစီဝရံ ဂဟေတွာ အင်္ဂုလိမာလံ ဥဒ္ဒိဿ တိံသယောဇနိကံ မဂ္ဂံ ပဒသာဝ ပဋိပဇ္ဇမာနော အန္တရာမဂ္ဂေ ဂေါပါလကာဒီဟိ ဝါရိယမာနောပိ ဇာလိနံ ဝနံ ဥပဂစ္ဆိ. တသ္မိဉ္စ ခဏေ တဿ မာတာ တေန ဒိဋ္ဌာ၊ သော မာတရံ ဒူရတောဝ ဒိသွာ ‘‘မာတရမ္ပိ မာရေတွာ အဇ္ဇ ဦနင်္ဂုလိံ ပူရေဿာမီ’’တိ အသိံ ဥက္ခိပိတွာ ဥပဓာဝိ. တေသံ ဥဘိန္နံ အန္တရေ ဘဂဝါ အတ္တာနံ ဒဿေသိ. အင်္ဂုလိမာလော ဘဂဝန္တံ ဒိသွာ ‘‘ကိံ မေ မာတရံ ဝဓိတွာ အင်္ဂုလိယာ ဂဟိတေန? ဇီဝတု မေ မာတာ၊ ယံနူနာဟံ ဣမံ သမဏံ ဇီဝိတာ ဝေါရောပေတွာ အင်္ဂုလိံ ဂဏှေယျ’’န္တိ ဥက္ခိတ္တာသိကော ဘဂဝန္တံ ပိဋ္ဌိတော ပိဋ္ဌိတော အနုဗန္ဓိ. အထ ခေါ ဘဂဝါ တထာရူပံ ဣဒ္ဓါဘိသင်္ခါရံ အဘိသင်္ခါသိ၊ ယထာ ပကတိဣရိယာပထေန ဂစ္ဆန္တမ္ပိ အတ္တာနံ အင်္ဂုလိမာလော သဗ္ဗထာမေန ဓာဝန္တောပိ န သက္ကောတိ သမ္ပာပုဏိတုံ. သော ပရိဟီနဇဝေါ ဃုရုဃုရုပဿာသီ ကစ္ဆေဟိ သေဒံ မုဉ္စန္တော ပဒံ ဥဒ္ဓရိတုမ္ပိ အသက္ကောန္တော ခါဏု ဝိယ ဌိတော ဘဂဝန္တံ ‘‘တိဋ္ဌ တိဋ္ဌ၊ သမဏာ’’တိ အာဟ. ဘဂဝါ ဂစ္ဆန္တောဝ ‘‘ဌိတော အဟံ၊ အင်္ဂုလိမာလ၊ တွဉ္စ တိဋ္ဌာ’’တိ အာဟ. သော ‘‘ဣမေ ခေါ သမဏာ သကျပုတ္တိယာ သစ္စဝါဒိနော၊ အယံ သမဏော ဂစ္ဆန္တောယေဝ ‘ဌိတော အဟံ၊ အင်္ဂုလိမာလ၊ တွဉ္စ တိဋ္ဌာ’တိ အာဟ၊ အဟဉ္စမှိ ဌိတော၊ ကော နု ခေါ ဣမဿ အဓိပ္ပါယော၊ ပုစ္ဆိတွာ နံ ဇာနိဿာမီ’’တိ ဘဂဝန္တံ ဂါထာယ အဇ္ဈဘာသိ –

၈၆၆. ‘‘ဂစ္ဆံ ဝဒေသိ သမဏ ဌိတောမှိ၊ မမဉ္စ ဗြူသိ ဌိတမဋ္ဌိတောတိ၊

ပုစ္ဆာမိ တံ သမဏ ဧတမတ္ထံ၊ ကထံ ဌိတော တွံ အဟမဋ္ဌိတောမှီ’’တိ.

တတ္ထ သမဏာတိ ဘဂဝန္တံ အာလပတိ. မမန္တိ မံ. ကထန္တိ ကေနာကာရေန. အယဉှေတ္ထ အတ္ထော – သမဏ၊ တွံ ဂစ္ဆန္တောဝ သမာနော ‘‘ဌိတောမှီ’’တိ ဝဒေသိ. မမဉ္စ ဌိတံယေဝ ‘‘အဋ္ဌိတော’’တိ ဗြူသိ၊ ဝဒေသိ. ကာရဏေနေတ္ထ ဘဝိတဗ္ဗံ၊ တသ္မာ တံ သမဏံ အဟံ ဧဝမတ္ထံ ပုစ္ဆာမိ. ကထံ ကေနာကာရေန တွံ ဌိတော အဟောသိ၊ အဟဉ္စ အဋ္ဌိတောမှီတိ. ဧဝံ ဝုတ္တေ ဘဂဝါ –

၈၆၇. ‘‘ဌိတော အဟံ အင်္ဂုလိမာလ သဗ္ဗဒါ၊ သဗ္ဗေသု ဘူတေသု နိဓာယ ဒဏ္ဍံ၊

တုဝဉ္စ ပါဏေသု အသညတောသိ၊ တသ္မာ ဌိတောဟံ တုဝမဋ္ဌိတောသီ’’တိ. –

ဂါထာယ တံ အဇ္ဈဘာသိ.

တတ္ထ ဌိတော အဟံ၊ အင်္ဂုလိမာလ၊ သဗ္ဗဒါ၊ သဗ္ဗေသု ဘူတေသု နိဓာယ ဒဏ္ဍန္တိ၊ အင်္ဂုလိမာလ၊ အဟံ သဗ္ဗဒါ သဗ္ဗကာလေ အာဒိမဇ္ဈပရိယောသာနေသု တသထာဝရဘေဒေသု သဗ္ဗေသု သတ္တေသု ဒဏ္ဍံ နိဓာယ နိဟိတဒဏ္ဍော နိဟိတသတ္ထော လဇ္ဇီ ဒယာပန္နော၊ တတော အညထာ အဝတ္တနတော ဧဝရူပေနေဝ ဌိတော. တုဝဉ္စ ပါဏေသု အသညတောသီတိ တွံ ပန သတ္တေသု သညမရဟိတော အသိ၊ လုဒ္ဒေါ လောဟိတပါဏိ ဟတပဟတေ နိဝိဋ္ဌော အဒယာပန္နော၊ တသ္မာ အသညတော ဝိရတိဝသေန အဋ္ဌိတော. တတော ဧဝ တာသု တာသု ဂတီသု ပရိဗ္ဘမနတောပိ တုဝံ ဣဒါနိ ဣရိယာပထေန ဌိတောပိ အဋ္ဌိတော အသိ၊ အဟံ ပန ဝုတ္တပ္ပကာရေန ဌိတောတိ. တတော အင်္ဂုလိမာလော ယထာဘုစ္စဂုဏပ္ပဘာဝိတဿ ဇလတလေ တေလဿ ဝိယ သကလံ လောကံ အဘိဗျာပေတွာ ဌိတဿ ဘဂဝတော ကိတ္တိသဒ္ဒဿ သုတပုဗ္ဗတ္တာ ဟေတုသမ္ပတ္တိယာ ဉာဏဿ စ ပရိပါကဂတတ္တာ ‘‘အယံ သော ဘဂဝါ’’တိ သဉ္ဇာတပီတိသောမနဿော ‘‘မဟာ အယံ သီဟနာဒေါ၊ မဟန္တံ ဂဇ္ဇိတံ၊ နယိဒံ အညဿ ဘဝိဿတိ၊ သမဏဿ မညေ ဂေါတမဿ ဧတံ ဂဇ္ဇိတံ၊ ဒိဋ္ဌော ဝတမှိ မဟေသိနာ သမ္မာသမ္ဗုဒ္ဓေန၊ မယှံ သင်္ဂဟကရဏတ္ထံ ဘဂဝါ ဣဓာဂတော’’တိ စိန္တေတွာ –

၈၆၈. ‘‘စိရဿံ ဝတ မေ မဟိတော မဟေသီ၊ မဟာဝနံ သမဏော ပစ္စပါဒိ၊

သောဟံ စဇိဿာမိ သဟဿပါပံ၊ သုတွာန ဂါထံ တဝ ဓမ္မယုတ္တ’’န္တိ. –

ဣမံ ဂါထံ အဘာသိ.

တတ္ထ စိရဿံ ဝတာတိ စိရကာလေန ဝတ. မေတိ မယှံ အနုဂ္ဂဟတ္ထာယ. မဟိတောတိ သဒေဝကေန လောကေန မဟတိယာ ပူဇာယ ပူဇိတော. မဟန္တေ သီလက္ခန္ဓာဒိဂုဏေ ဧသိ၊ ဂဝေသီတိ မဟေသီ. မဟာဝနံ သမဏော ပစ္စပါဒီတိ ဣမံ မဟာရညံ သမိတသဗ္ဗပါပေါ ဘဂဝါ ပဋိပဇ္ဇိ. သောဟံ စဇိဿာမိ သဟဿပါပံ၊ သုတွာန ဂါထံ တဝ ဓမ္မယုတ္တန္တိ သောဟံ ဓမ္မယုတ္တံ ဓမ္မူပသံဟိတံ တဝ ဂါထံ သုဏိံ. သောဟံ တံ သုတွာန ‘‘စိရဿမ္ပိ စိရကာလေနပိ သင်္ဂတံ ပရိစိတံ ပါပသဟဿံ ပဇဟိဿ’’န္တိ စိန္တေတွာ ဣဒါနိ နံ အညဒတ္ထု ပရိစ္စဇိဿာမီတိ အတ္ထော. ဧဝံ ပန ဝတွာ ယထာ ပဋိပဇ္ဇိ၊ ယထာ စ ဘဂဝတာ အနုဂ္ဂဟိတော၊ တံ ဒဿေတုံ –

၈၆၉. ‘‘ဣစ္စေဝ စောရော အသိမာဝုဓဉ္စ၊ သောဗ္ဘေ ပပါတေ နရကေ အနွကာသိ၊

အဝန္ဒိ စောရော သုဂတဿ ပါဒေ၊ တတ္ထေဝ ပဗ္ဗဇ္ဇမယာစိ ဗုဒ္ဓံ.

၈၇၀. ‘‘ဗုဒ္ဓေါ စ ခေါ ကာရုဏိကော မဟေသိ၊ ယော သတ္ထာ လောကဿ သဒေဝကဿ၊

တမေဟိ ဘိက္ခူတိ တဒါ အဝေါစ၊ ဧသေဝ တဿ အဟု ဘိက္ခုဘာဝေါ’’တိ.

သင်္ဂီတိကာရာ ဣမာ ဒွေ ဂါထာ ဌပေသုံ.

တတ္ထ ဣစ္စေဝါတိ ဣတိ ဧဝ ဧဝံ ဝတွာ အနန္တရမေဝ. စောရောတိ အင်္ဂုလိမာလော. အသိန္တိ ခဂ္ဂံ. အာဝုဓန္တိ သေသာဝုဓံ. သောဗ္ဘေတိ သမန္တတော ဆိန္နတဋေ. ပပါတေတိ ဧကတော ဆိန္နတဋေ. နရကေတိ ဘူမိယာ ဖလိတဝိဝရေ. ဣဓ ပန တီဟိပိ ပဒေဟိ ယတ္ထ ပတိတံ အညေန ဂဟေတုံ န သက္ကာ၊ တာဒိသံ ပဗ္ဗတန္တရမေဝ ဝဒတိ. အနွကာသီတိ အနု အကာသိ၊ ပဉ္စဝိဓမ္ပိ အတ္တနော အာဝုဓံ အနု ခိပိ ဆဍ္ဍေသိ၊ တာနိ ဆဍ္ဍေတွာ ဘဂဝတော ပါဒေသု သိရသာ နိပတိတွာ ‘‘ပဗ္ဗာဇေထ မံ၊ ဘန္တေ’’တိ အာဟ. တေန ဝုတ္တံ ‘‘အဝန္ဒိ စောရော သုဂတဿ ပါဒေ၊ တတ္ထေဝ ပဗ္ဗဇ္ဇမယာစိ ဗုဒ္ဓ’’န္တိ. ဧဝံ တေန ပဗ္ဗဇ္ဇာယ ယာစိတာယ သတ္ထာ တဿ ပုရိမကမ္မံ ဩလောကေန္တော ဧဟိဘိက္ခုဘာဝါယ ဟေတုသမ္ပတ္တိံ ဒိသွာ ဒက္ခိဏဟတ္ထံ ပသာရေတွာ – ‘‘ဧဟိ၊ ဘိက္ခု၊ သွာခါတော ဓမ္မော၊ စရ ဗြဟ္မစရိယံ၊ သမ္မာ ဒုက္ခဿ အန္တကိရိယာယာ’’တိ အာဟ. သာ ဧဝ စ တဿ ပဗ္ဗဇ္ဇာ ဥပသမ္ပဒါ စ အဟောသိ. တေနာဟ ‘‘တမေဟိ ဘိက္ခူတိ တဒါ အဝေါစ၊ ဧသေဝ တဿ အဟု ဘိက္ခုဘာဝေါ’’တိ.

ဧဝံ ထေရော သတ္ထု သန္တိကေ ဧဟိဘိက္ခုဘာဝေန ပဗ္ဗဇ္ဇံ ဥပသမ္ပဒဉ္စ လဘိတွာ ဝိပဿနာယ ကမ္မံ ကရောန္တော အရဟတ္တံ ပတွာ ဝိမုတ္တိသုခံ ပဋိသံဝေဒေန္တော ပီတိသောမနဿဇာတော ဥဒါနဝသေန –

၈၇၁. ‘‘ယော စ ပုဗ္ဗေ ပမဇ္ဇိတွာ၊ ပစ္ဆာ သော နပ္ပမဇ္ဇတိ၊

သောမံ လောကံ ပဘာသေတိ၊ အဗ္ဘာ မုတ္တောဝ စန္ဒိမာ.

၈၇၂. ‘‘ယဿ ပါပံ ကတံ ကမ္မံ၊ ကုသလေန ပိဓီယတိ၊

သောမံ လောကံ ပဘာသေတိ၊ အဗ္ဘာ မုတ္တောဝ စန္ဒိမာ.

၈၇၃. ‘‘ယော ဟဝေ ဒဟရော ဘိက္ခု၊ ယုဉ္ဇတိ ဗုဒ္ဓသာသနေ၊

သောမံ လောကံ ပဘာသေတိ၊ အဗ္ဘာ မုတ္တောဝ စန္ဒိမာ’’တိ. – ဂါထတ္တယံ အဘာသိ၊

တဿတ္ထော – ယော ပုဂ္ဂလော ဂဟဋ္ဌော ဝါ ပဗ္ဗဇိတော ဝါ ကလျာဏမိတ္တသံသဂ္ဂတော ပုဗ္ဗေ ပါပမိတ္တသံသဂ္ဂေန ဝါ အတ္တနော ဝါ ပဋိသင်္ခါနာဘာဝေန ပမဇ္ဇိတွာ သမ္မာပဋိပတ္တိယံ ပမာဒံ အာပဇ္ဇိတွာ၊ ပစ္ဆာ ကလျာဏမိတ္တသံသဂ္ဂေန ယောနိသော ဥမ္မုဇ္ဇန္တော နပ္ပမဇ္ဇတိ၊ သမ္မာ ပဋိပဇ္ဇတိ၊ သမထဝိပဿနံ အနုယုဉ္ဇန္တော တိဿော ဝိဇ္ဇာ ဆ အဘိညာ ပါပုဏာတိ၊ သော အဗ္ဘာဒီဟိ မုတ္တော စန္ဒော ဝိယ ဩကာသလောကံ အတ္တနာ အဓိဂတာဟိ ဝိဇ္ဇာဘိညာဟိ ဣမံ ခန္ဓာဒိလောကံ ဩဘာသေတီတိ.

ယဿ ပုဂ္ဂလဿ ကတံ ဥပစိတံ ပါပကမ္မံ ကမ္မက္ခယကရေန လောကုတ္တရကုသလေန အဝိပါကာရဟဘာဝဿ အာဟရိတတ္တာ ဝိပါကုပ္ပါဒနေ ဒွါရပိဓာနေန ပိဓီယတိ ထကီယတိ. သေသံ ဝုတ္တနယမေဝ.

ဒဟရောတိ တရုဏော၊ တေနဿ ယောဂက္ခမသရီရတံ ဒဿေတိ. သော ဟိ ဥပ္ပန္နံ ဝါတာတပပရိဿယံ အဘိဘဝိတွာ ယောဂံ ကာတုံ သက္ကောတိ. ယုဉ္ဇတိ ဗုဒ္ဓသာသနေ သိက္ခတ္တယေ ယုတ္တပ္ပယုတ္တော ဟောတိ၊ သက္ကစ္စံ သမ္ပာဒေတီတိ အတ္ထော.

ဧဝံ ပီတိသောမနဿဇာတော ဝိမုတ္တိသုခေန ဝိဟရန္တော ယဒါ နဂရံ ပိဏ္ဍာယ ပဝိသတိ၊ တဒါ အညေနပိ ခိတ္တော လေဍ္ဍု ထေရဿ ကာယေ နိပတတိ၊ အညေနပိ ခိတ္တော ဒဏ္ဍော တဿေဝ ကာယေ နိပတတိ. သော ဘိန္နေန ပတ္တေန ဝိဟာရံ ပဝိသိတွာ သတ္ထု သန္တိကံ ဂစ္ဆတိ. သတ္ထာ တံ ဩဝဒတိ ‘‘အဓိဝါသေဟိ၊ တွံ ဗြာဟ္မဏ၊ အဓိဝါသေဟိ၊ တွံ ဗြာဟ္မဏ၊ ယဿ ခေါ၊ တွံ ဗြာဟ္မဏ၊ ကမ္မဿ ဝိပါကေန ဗဟူနိ ဝဿသဟဿာနိ နိရယေ ပစ္စေယျာသိ၊ တဿ၊ တွံ ဗြာဟ္မဏ၊ ကမ္မဿ ဝိပါကံ ဒိဋ္ဌေဝ ဓမ္မေ ပဋိသံဝေဒေသီ’’တိ. အထ ထေရော အနောဓိသော သဗ္ဗသတ္တေသု မေတ္တစိတ္တံ ဥပဋ္ဌပေတွာ –

၈၇၄. ‘‘ဒိသာပိ မေ ဓမ္မကထံ သုဏန္တု၊ ဒိသာပိ မေ ယုဉ္ဇန္တု ဗုဒ္ဓသာသနေ၊

ဒိသာပိ မေ တေ မနုဇေ ဘဇန္တု၊ ယေ ဓမ္မမေဝါဒပယန္တိ သန္တော.

၈၇၅. ‘‘ဒိသာ ဟိ မေ ခန္တိဝါဒါနံ၊ အဝိရောဓပ္ပသံသိနံ၊

သုဏန္တု ဓမ္မံ ကာလေန၊ တဉ္စ အနုဝိဓီယန္တု.

၈၇၆. ‘‘န ဟိ ဇာတု သော မမံ ဟိံသေ၊ အညံ ဝါ ပန ကဉ္စိ နံ၊

ပပ္ပုယျ ပရမံ သန္တိံ၊ ရက္ခေယျ တသထာဝရေ.

၈၇၇. ‘‘ဥဒကဉှိ နယန္တိ နေတ္တိကာ၊ ဥသုကာရာ ဒမယန္တိ တေဇနံ၊

ဒါရုံ ဒမယန္တိ တစ္ဆကာ၊ အတ္တာနံ ဒမယန္တိ ပဏ္ဍိတာ.

၈၇၈. ‘‘ဒဏ္ဍေနေကေ ဒမယန္တိ၊ အင်္ကုသေဘိ ကသာဟိ စ၊

အဒဏ္ဍေန အသတ္ထေန၊ အဟံ ဒန္တောမှိ တာဒိနာ.

၈၇၉. ‘‘အဟိံသကောတိ မေ နာမံ၊ ဟိံသကဿ ပုရေ သတော၊

အဇ္ဇာဟံ သစ္စနာမောမှိ၊ န နံ ဟိံသာမိ ကဉ္စိ နံ.

၈၈၀. ‘‘စောရော အဟံ ပုရေ အာသိံ၊ အင်္ဂုလိမာလောတိ ဝိဿုတော၊

ဝုယှမာနော မဟောဃေန၊ ဗုဒ္ဓံ သရဏမာဂမံ.

၈၈၁. ‘‘လောဟိတပါဏိ ပုရေ အာသိံ၊ အင်္ဂုလိမာလောတိ ဝိဿုတော၊

သရဏဂမနံ ပဿ၊ ဘဝနေတ္တိ သမူဟတာ.

၈၈၂. ‘‘တာဒိသံ ကမ္မံ ကတွာန၊ ဗဟုံ ဒုဂ္ဂတိဂါမိနံ၊

ဖုဋ္ဌော ကမ္မဝိပါကေန၊ အနဏော ဘုဉ္ဇာမိ ဘောဇနံ.

၈၈၃. ‘‘ပမာဒမနုယုဉ္ဇန္တိ၊ ဗာလာ ဒုမ္မေဓိနော ဇနာ၊

အပ္ပမာဒဉ္စ မေဓာဝီ၊ ဓနံ သေဋ္ဌံဝ ရက္ခတိ.

၈၈၄. ‘‘မာ ပမာဒမနုယုဉ္ဇေထ၊ မာ ကာမရတိသန္ထဝံ၊

အပ္ပမတ္တော ဟိ ဈာယန္တော၊ ပပ္ပေါတိ ပရမံ သုခံ.

၈၈၅. ‘‘သွာဂတံ နာပဂတံ၊ နေတံ ဒုမ္မန္တိတံ မမ၊

သဝိဘတ္တေသု ဓမ္မေသု၊ ယံ သေဋ္ဌံ တဒုပါဂမံ.

၈၈၆. ‘‘သွာဂတံ နာပဂတံ၊ နေတံ ဒုမ္မန္တိတံ မမ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၈၈၇. ‘‘အရညေ ရုက္ခမူလေ ဝါ၊ ပဗ္ဗတေသု ဂုဟာသု ဝါ၊

တတ္ထ တတ္ထေဝ အဋ္ဌာသိံ၊ ဥဗ္ဗိဂ္ဂမနသော တဒါ.

၈၈၈. ‘‘သုခံ သယာမိ ဌာယာမိ၊ သုခံ ကပ္ပေမိ ဇီဝိတံ၊

အဟတ္ထပါသော မာရဿ၊ အဟော သတ္ထာနုကမ္ပိတော.

၈၈၉. ‘‘ဗြဟ္မဇစ္စော ပုရေ အာသိံ၊ ဥဒိစ္စော ဥဘတော အဟု.

သောဇ္ဇ ပုတ္တော သုဂတဿ၊ ဓမ္မရာဇဿ သတ္ထုနော.

၈၉၀. ‘‘ဝီတတဏှော အနာဒါနော၊ ဂုတ္တဒွါရော သုသံဝုတော၊

အဃမူလံ ဝဓိတွာန၊ ပတ္တော မေ အာသဝက္ခယော.

၈၉၁. ‘‘ပရိစိဏ္ဏော မယာ သတ္ထာ၊ ကတံ ဗုဒ္ဓဿ သာသနံ၊

ဩဟိတော ဂရုကော ဘာရော၊ ဘဝနေတ္တိ သမူဟတာ’’တိ. – ဣမာ ဂါထာ အဘာသိ၊

တတ္ထ ဒိသာပီတိ မယှံ ဒိသာပိ အမိတ္တာ ပစ္စတ္ထိကာပိ ယေ မံ ဧဝံ ဥပဝဒန္တိ ‘‘ယထာ မယံ အင်္ဂုလိမာလဿ ဝသေန ဉာတိဝိယောဂဒုက္ခပရေတာ ဒုက္ခံ ပါပုဏာမ၊ ဧဝံ အင်္ဂုလိမာလောပိ ဒုက္ခံ ပါပုဏာတူ’’တိ. မေ ဓမ္မကထံ သုဏန္တူတိ မယာ သတ္ထု သန္တိကေ သုတံ စတုသစ္စဓမ္မပဋိသံယုတ္တံ ကထံ သုဏန္တု. ယုဉ္ဇန္တူတိ သုတွာ စ တဒတ္ထာယ ပဋိပဇ္ဇန္တု. တေ မနုဇေ ဘဇန္တူတိ တာဒိသေ သပ္ပုရိသေ ကလျာဏမိတ္တေ ဘဇန္တု သေဝန္တု. ယေ ဓမ္မမေဝါဒပယန္တိ သန္တောတိ ယေ သပ္ပုရိသာ ကုသလဓမ္မမေဝ၊ ဥတ္တရိမနုဿဓမ္မမေဝ၊ နိဗ္ဗတ္တိတလောကုတ္တရဓမ္မမေဝ စ အာဒပေန္တိ သမာဒပေန္တိ ဂဏှာပေန္တိ.

ခန္တိဝါဒါနန္တိ အဓိဝါသနခန္တိမေဝ ဝဒန္တာနံ တတော ဧဝ အဝိရောဓပ္ပသံသိနန္တိ ကေနစိ အဝိရောဓဘူတာယ မေတ္တာယ ဧဝ ပသံသနသီလာနံ. သုဏန္တု ဓမ္မံ ကာလေနာတိ ယုတ္တပ္ပယုတ္တကာလေ တေသံ သန္တိကေ ဓမ္မံ သုဏန္တု. တဉ္စ အနုဝိဓီယန္တူတိ တဉ္စ ယထာသုတံ ဓမ္မံ သမ္မဒေဝ ဥဂ္ဂဟိတွာ အနုကရောန္တု ဓမ္မာနုဓမ္မံ ပဋိပဇ္ဇန္တူတိ အတ္ထော.

န ဟိ ဇာတု သော မမံ ဟိံသေတိ သော မယှံ ဒိသော ပစ္စတ္ထိကော ဇာတု၊ ဧကံသေနေဝ မံ န ဟိံသေ၊ န ဗာဓေယျ. အညံ ဝါ ပန ကဉ္စိ နန္တိ န ကေဝလံ မံယေဝ၊ အညံ ဝါပိ ကဉ္စိ သတ္တံ န ဟိံသေယျ၊ ပပ္ပုယျ ပရမံ သန္တိန္တိ၊ ပရမံ ဥတ္တမံ သန္တိံ နိဗ္ဗာနံ ပါပုဏေယျ၊ ပါပုဏိတွာ စ ရက္ခေယျ တသထာဝရေတိ သဗ္ဗေ စ သတ္တေ ပရမာယ ရက္ခာယ ရက္ခေယျ၊ သိဿံ ပုတ္တံ ဝိယ ပရိပါလေယျာတိ အတ္ထော.

ဧဝံ ထေရော ဣမာဟိ ဂါထာဟိ ပရေ ပါပတော ပရိမောစေန္တော ပရိတ္တကိရိယံ နာမ ကတွာ အတ္တနော ပဋိပတ္တိံ ပကာသေန္တော ‘‘ဥဒကံ ဟီ’’တိ ဂါထမာဟ. တတ္ထ ပထဝိယာ ထလဋ္ဌာနံ ခဏိတွာ နိန္နဋ္ဌာနံ ပူရေတွာ မာတိကံ ဝါ ကတွာ ရုက္ခဒေါဏိံ ဝါ ဌပေတွာ အတ္တနာ ဣစ္ဆိကိစ္ဆိတဋ္ဌာနံ ဥဒကံ နေန္တီတိ နေတ္တိကာ၊ ဥဒကဟာရိနော. တေဇနန္တိ ကဏ္ဍံ. ဣဒံ ဝုတ္တံ ဟောတိ – နေတ္တိကာ အတ္တနော ရုစိယာ ဥဒကံ နယန္တိ၊ ဥသုကာရာပိ တာပေတွာ ဝင်္ကာဘာဝံ ဟရန္တာ တေဇနံ ဥသုံ ဒမယန္တိ၊ ဥဇုကံ ကရောန္တိ၊ တစ္ဆကာပိ နေမိအာဒီနံ အတ္ထာယ တစ္ဆန္တာ ဒါရုံ ဒမယန္တိ အတ္တနော ရုစိယာ ဥဇုံ ဝါ ဝင်္ကံ ဝါ ကရောန္တိ. ဧဝံ ဧတ္တကံ အာရမ္မဏံ ကတွာ ပဏ္ဍိတာ သပ္ပညာ အရိယမဂ္ဂံ ဥပ္ပါဒေန္တာ အတ္တာနံ ဒမေန္တိ၊ အရဟတ္တပ္ပတ္တာ ပန ဧကန္တဒန္တာ နာမ ဟောန္တီတိ.

ဣဒါနိ ပုရိသဒမ္မသာရထိနာ သတ္ထာရာ အတ္တနော ဒမိတာကာရံ ကတညုတဉ္စ ပကာသေန္တော ‘‘ဒဏ္ဍေနေကေ’’တိအာဒိကာ ပဉ္စ ဂါထာ အဘာသိ. တတ္ထ ဒဏ္ဍေနေကေ ဒမယန္တီတိ ရာဇရာဇမဟာမတ္တာဒယော ဒဏ္ဍေန၊ ဟတ္ထိအဿာဒိနာ ဗလကာယေန စ ပစ္စတ္ထိကာဒိကေ ဒမေန္တိ၊ ဂေါပါလာဒယော စ ဂါဝါဒိကေ ဒဏ္ဍေန ယဋ္ဌိယာ ဒမေန္တိ. ဟတ္ထာစရိယာ ဟတ္ထိံ အင်္ကုသေဟိ၊ အဿာစရိယာ အဿေ ကသာဟိ စ ဒမေန္တိ. အဒဏ္ဍေန အသတ္ထေန၊ အဟံ ဒန္တောမှိ တာဒိနာတိ အဟံ ပန ဣဋ္ဌာဒီသု တာဒိဘာဝပ္ပတ္တေန သမ္မာသမ္ဗုဒ္ဓေန ဝိနာ ဧဝ ဒဏ္ဍေန၊ ဝိနာ သတ္ထေန၊ နိဟိတဒဏ္ဍနိဟိတသတ္ထဘာဝေန ဒန္တော ဒမိတော နိဗ္ဗိသေဝနော ဂတော အမှိ.

အဟိံသကောတိ မေ နာမံ၊ ဟိံသကဿ ပုရေ သတောတိ သတ္ထာရာ သမာဂမတော ပုဗ္ဗေ ဟိံသကဿ မေ သမာနဿ အဟိံသကောတိ နာမမတ္တံ အဟောသိ. အဇ္ဇာဟန္တိ ဣဒါနိ ပနာဟံ ‘‘အဟိံသကော’’တိ သစ္စနာမော အဝိတထနာမော အမှိ. တသ္မာ န နံ ဟိံသာမိ ကဉ္စိပိ သတ္တံ န ဟိံသာမိ န ဗာဓေမိ၊ နန္တိ နိပါတမတ္တံ.

ဝိဿုတောတိ ‘‘ပါဏာတိပါတီ လုဒ္ဒေါ လောဟိတပါဏီ’’တိအာဒိနာ ပညာတော. မဟောဃေနာတိ ကာမောဃာဒိနာ မဟတာ ဩဃေန၊ တဿ ဩဃဿ ဝိစ္ဆေဒကရံ ဗုဒ္ဓံ သရဏံ ဗုဒ္ဓသင်္ခါတံ သရဏံ အဂမံ ဥပဂစ္ဆိံ.

လောဟိတပါဏီတိ ပါဏမတိပါတနေန ပရေသံ လောဟိတေန ရုဟိရေန မက္ခိတပါဏိ. သရဏဂမနံ ပဿာတိ မဟပ္ဖလံ မမ သရဏဂမနံ ပဿာတိ အတ္တာနမေဝါလပတိ.

တာဒိသံ ကမ္မန္တိ အနေကသတပုရိသဝဓံ ဒါရုဏံ တထာရူပံ ပါပကမ္မံ. ဖုဋ္ဌော ကမ္မဝိပါကေနာတိ ပုဗ္ဗေ ကတဿ ပါပကမ္မဿ ဝိပါကေန ဖုဋ္ဌော၊ သဗ္ဗသော ပဟီနကမ္မော ဝိပါကမတ္တံ ပစ္စနုဘောန္တော. အထ ဝါ ဖုဋ္ဌော ကမ္မဝိပါကေနာတိ ဥပနိဿယဘူတဿ ကုသလကမ္မဿ ဖလဘူတေန လောကုတ္တရမဂ္ဂေန၊ လောကုတ္တရကမ္မဿေဝ ဝါ ဖလေန ဝိမုတ္တိသုခေန ဖုဋ္ဌော. သဗ္ဗသော ကိလေသာနံ ခီဏတ္တာ အနဏော ဘုဉ္ဇာမိ ဘောဇနံ၊ ဘောဇနာပဒေသေန စတ္တာရောပိ ပစ္စယေ ဝဒတိ.

ဣဒါနိ ပုဗ္ဗေ အတ္တနော ပမာဒဝိဟာရံ ဂရဟာမုခေန ပစ္ဆာ အပ္ပမာဒပဋိပတ္တိံ ပသံသန္တော တတ္ထ စ ပရေသံ ဥဿာဟံ ဇနေန္တော ‘‘ပမာဒမနုယုဉ္ဇန္တီ’’တိအာဒိကာ ဂါထာ အဘာသိ. တတ္ထ ဗာလာတိ ဗာလျေန သမန္နာဂတာ ဣဓလောကပရလောကတ္ထံ အဇာနန္တာ. ဒုမ္မေဓိနောတိ နိပ္ပညာ၊ တေ ပမာဒေ အာဒီနဝံ အပဿန္တာ ပမာဒံ အနုယုဉ္ဇန္တိ ပဝတ္တေန္တိ၊ ပမာဒေနေဝ ကာလံ ဝီတိနာမေန္တိ. မေဓာဝီတိ ဓမ္မောဇပညာယ သမန္နာဂတော ပန ပဏ္ဍိတော ကုလဝံသာဂတံ သေဋ္ဌံ ဥတ္တမံ သတ္တရတနဓနံ ဝိယ အပ္ပမာဒံ ရက္ခတိ. ယထာ ဟိ ‘‘ဥတ္တမံ ဓနံ နိဿာယ ဘောဂသမ္ပတ္တိံ ပါပုဏိဿာမ၊ ပုတ္တဒါရံ ပေါသေဿာမ၊ သုဂတိမဂ္ဂံ သောဓေဿာမာ’’တိ ဓနေ အာနိသံသံ ပဿန္တာ ဓနံ ရက္ခန္တိ၊ ဧဝံ ပဏ္ဍိတောပိ ‘‘အပ္ပမာဒံ နိဿာယ ပဌမဇ္ဈာနာဒီနိ ပဋိလဘိဿာမိ၊ မဂ္ဂဖလာနိ ပါပုဏိဿာမိ၊ တိဿော ဝိဇ္ဇာ ဆ အဘိညာ သမ္ပာဒေဿာမီ’’တိ အပ္ပမာဒေ အာနိသံသံ ပဿန္တော ဓနံ သေဋ္ဌံဝ အပ္ပမာဒံ ရက္ခတီတိ အတ္ထော.

မာ ပမာဒန္တိ ပမာဒံ မာ အနုယုဉ္ဇေထ ပမာဒေန ကာလံ မာ ဝီတိနာမယိတ္ထ. ကာမရတိသန္ထဝန္တိ ဝတ္ထုကာမေသု၊ ကိလေသကာမေသု စ ရတိသင်္ခါတံ တဏှာသန္ထဝမ္ပိ မာ အနုယုဉ္ဇေထ မာ ဝိန္ဒိတ္ထ မာ ပဋိလဘိတ္ထ. အပ္ပမတ္တော ဟီတိ ဥပဋ္ဌိတသတိတာယ အပ္ပမတ္တော ပုဂ္ဂလော ဈာယန္တော ဈာယနပ္ပသုတော ပရမံ ဥတ္တမံ နိဗ္ဗာနသုခံ ပါပုဏာတိ.

သွာဂတံ နာပဂတန္တိ ယံ တဒါ မမ သတ္ထု သန္တိကေ အာဂတံ အာဂမနံ၊ သတ္ထု ဝါ တသ္မိံ မဟာဝနေ အာဂမနံ၊ တံ သွာဂတံ သွာဂမနံ နာပဂတံ၊ အတ္ထတော အပေတံ ဝိဂတံ န ဟောတိ. နေတံ ဒုမ္မန္တိတံ မမာတိ ယံ တဒါ မယာ ‘‘သတ္ထု သန္တိကေ ပဗ္ဗဇိဿာမီ’’တိ မန္တိတံ၊ ဣဒမ္ပိ မမ န ဒုမ္မန္တိတံ၊ သုမန္တိတမေဝ. ကသ္မာ? သဝိဘတ္တေသု ဓမ္မေသူတိ သာဝဇ္ဇာနဝဇ္ဇာဒိဝသေန ပကာရတော ဝိဘတ္တေသု ဓမ္မေသု ယံ သေဋ္ဌံ ဥတ္တမံ ပဝရံ နိဗ္ဗာနံ. တဒုပါဂမံ တဒေဝ ဥပဂစ္ဆိန္တိ အတ္ထော.

‘‘တဒါ ပုထုဇ္ဇနကာလေ ပယောဂါသယဝိပန္နတာယ အရညာဒီသု ဒုက္ခံ ဝိဟာသိံ၊ ဣဒါနိ ပယောဂါသယသမ္ပန္နတာယ တတ္ထ သုခံ ဝိဟရာမီ’’တိ သုခဝိဟာရဘာဝဉ္စေဝ ‘‘ပုဗ္ဗေ ဇာတိမတ္တေန ဗြာဟ္မဏော၊ ဣဒါနိ သတ္ထု ဩရသပုတ္တတာယ ဗြာဟ္မဏော’’တိ ပရမတ္ထဗြာဟ္မဏဘာဝဉ္စ ဒဿေန္တော ‘‘အရညေ’’တိအာဒိမာဟ. တတ္ထ သုခံ သယာမီတိ သယန္တောပိ သုခံ သုခေန နိဒုက္ခေန စိတ္တုတြာသာဒီနံ အဘာဝေန စေတောဒုက္ခရဟိတော သယာမိ. ဌာယာမီတိ ဌာမိ. အဟတ္ထပါသော မာရဿာတိ ကိလေသမာရာဒီနံ အဂေါစရော. အဟော သတ္ထာနုကမ္ပိတောတိ သတ္ထာရာနုကမ္ပိတော အဟော.

ဗြဟ္မဇစ္စောတိ ဗြာဟ္မဏဇာတိကော. ဥဒိစ္စော ဥဘတောတိ မာတိတော စ ပိတိတော စ ဥဘတော ဥဒိတော သံသုဒ္ဓဂဟဏိကော. သေသံ တတ္ထ တတ္ထ ဝုတ္တနယမေဝ.

အင်္ဂုလိမာလတ္ထေရဂါထာဝဏ္ဏနာ နိဋ္ဌိတာ.