၁၀. ပါရာပရိယတ္ထေရဂါထာဝဏ္ဏနာ

သမဏဿ အဟု စိန္တာတိအာဒိကာ အာယသ္မတော ပါရာပရိယတ္ထေရဿ ဂါထာ. ဣမဿ ဝတ္ထု ဟေဋ္ဌာ အာဂတမေဝ. တာ စ ဂါထာ သတ္ထရိ ဓရန္တေ အတ္တနော ပုထုဇ္ဇနကာလေ မနစ္ဆဋ္ဌာနံ ဣန္ဒြိယာနံ နိဂ္ဂဏှနစိန္တာယ ပကာသနဝသေန ဘာသိတာ. ဣမာ ပန အပရဘာဂေ သတ္ထရိ ပရိနိဗ္ဗုတေ အတ္တနော စ ပရိနိဗ္ဗာနေ ဥပဋ္ဌိတေ တဒါ အာယတိဉ္စ ဘိက္ခူနံ ဥဒ္ဓမ္မပဋိပတ္တိယာ ပကာသနဝသေန ဘာသိတာ. တတ္ထ –

၉၂၀. ‘‘သမဏဿ အဟု စိန္တာ၊ ပုပ္ဖိတမှိ မဟာဝနေ၊

ဧကဂ္ဂဿ နိသိန္နဿ၊ ပဝိဝိတ္တဿ ဈာယိနော’’တိ. –

အယံ ဂါထာ သင်္ဂီတိကာရေဟိ ဌပိတာ. တဿတ္ထော ဟေဋ္ဌာ ဝုတ္တနယောဝ. အယံ ပန သမ္ဗန္ဓော – သတ္ထရိ အဂ္ဂသာဝကေသု ဧကစ္စေသု မဟာထေရေသု စ ပရိနိဗ္ဗုတေသု အတီတသတ္ထုကေ ပါဝစနေ သုဗ္ဗစေသု သိက္ခာကာမေသု ဘိက္ခူသု ဒုလ္လဘေသု၊ ဒုဗ္ဗစေသု မိစ္ဆာပဋိပတ္တိဗဟုလေသု ဘိက္ခူသု စ ဇာတေသု သုပုပ္ဖိတေ မဟန္တေ သာလဝနေ နိသိန္နဿ ပဝိဝိတ္တဿ ဧကဂ္ဂဿ ဈာယနသီလဿ၊ သမိတပါပတာယ သမဏဿ၊ ပါရာပရိယတ္ထေရဿ ပဋိပတ္တိံ နိဿာယ စိန္တာ ဝီမံသာ အဟောသီတိ ဣတရာ –

၉၂၁. ‘‘အညထာ လောကနာထမှိ၊ တိဋ္ဌန္တေ ပုရိသုတ္တမေ၊

ဣရိယံ အာသိ ဘိက္ခူနံ၊ အညထာ ဒါနိ ဒိဿတိ.

၉၂၂. ‘‘သီတဝါတပရိတ္တာဏံ၊ ဟိရိကောပီနဆာဒနံ၊

မတ္တဋ္ဌိယံ အဘုဉ္ဇိံသု၊ သန္တုဋ္ဌာ ဣတရီတရေ.

၉၂၃. ‘‘ပဏီတံ ယဒိ ဝါ လူခံ၊ အပ္ပံ ဝါ ယဒိ ဝါ ဗဟုံ၊

ယာပနတ္ထံ အဘုဉ္ဇိံသု၊ အဂိဒ္ဓါ နာဓိမုစ္ဆိတာ.

၉၂၄. ‘‘ဇီဝိတာနံ ပရိက္ခာရေ၊ ဘေသဇ္ဇေ အထ ပစ္စယေ၊

န ဗာဠှံ ဥဿုကာ အာသုံ၊ ယထာ တေ အာသဝက္ခယေ.

၉၂၅. ‘‘အရညေ ရုက္ခမူလေသု၊ ကန္ဒရာသု ဂုဟာသု စ၊

ဝိဝေကမနုဗြူဟန္တာ၊ ဝိဟံသု တပ္ပရာယဏာ.

၉၂၆. ‘‘နီစာ နိဝိဋ္ဌာ သုဘရာ၊ မုဒူ အထဒ္ဓမာနသာ၊

အဗျာသေကာ အမုခရာ၊ အတ္ထစိန္တာဝသာနုဂါ.

၉၂၇. ‘‘တတော ပါသာဒိကံ အာသိ၊ ဂတံ ဘုတ္တံ နိသေဝိတံ၊

သိနိဒ္ဓါ တေလဓာရာဝ၊ အဟောသိ ဣရိယာပထော.

၉၂၈. ‘‘သဗ္ဗာသဝပရိက္ခီဏာ၊ မဟာဈာယီ မဟာဟိတာ၊

နိဗ္ဗုတာ ဒါနိ တေ ထေရာ၊ ပရိတ္တာ ဒါနိ တာဒိသာ.

၉၂၉. ‘‘ကုသလာနဉ္စ ဓမ္မာနံ၊ ပညာယ စ ပရိက္ခယာ၊

သဗ္ဗာကာရဝရူပေတံ၊ လုဇ္ဇတေ ဇိနသာသနံ.

၉၃၀. ‘‘ပါပကာနဉ္စ ဓမ္မာနံ၊ ကိလေသာနဉ္စ ယော ဥတု၊

ဥပဋ္ဌိတာ ဝိဝေကာယ၊ ယေ စ သဒ္ဓမ္မသေသကာ.

၉၃၁. ‘‘တေ ကိလေသာ ပဝဍ္ဎန္တာ၊ အာဝိသန္တိ ဗဟုံ ဇနံ၊

ကီဠန္တိ မညေ ဗာလေဟိ၊ ဥမ္မတ္တေဟိဝ ရက္ခသာ.

၉၃၂. ‘‘ကိလေသေဟာဘိဘူတာ တေ၊ တေန တေန ဝိဓာဝိတာ၊

နရာ ကိလေသဝတ္ထူသု၊ သသင်္ဂါမေဝ ဃောသိတေ.

၉၃၃. ‘‘ပရိစ္စဇိတွာ သဒ္ဓမ္မံ၊ အညမညေဟိ ဘဏ္ဍရေ၊

ဒိဋ္ဌိဂတာနိ အနွေန္တာ၊ ဣဒံ သေယျောတိ မညရေ.

၉၃၄. ‘‘ဓနဉ္စ ပုတ္တံ ဘရိယဉ္စ၊ ဆဍ္ဍယိတွာန နိဂ္ဂတာ၊

ကဋစ္ဆုဘိက္ခဟေတူပိ၊ အကိစ္ဆာနိ နိသေဝရေ.

၉၃၅. ‘‘ဥဒရာဝဒေဟကံ ဘုတွာ၊ သယန္တုတ္တာနသေယျကာ၊

ကထာ ဝဍ္ဎေန္တိ ပဋိဗုဒ္ဓါ၊ ယာ ကထာ သတ္ထုဂရဟိတာ.

၉၃၆. ‘‘သဗ္ဗကာရုကသိပ္ပါနိ၊ စိတ္တိံ ကတွာန သိက္ခရေ၊

အဝူပသန္တာ အဇ္ဈတ္တံ၊ သာမညတ္ထောတိအစ္ဆတိ.

၉၃၇. ‘‘မတ္တိကံ တေလစုဏ္ဏဉ္စ၊ ဥဒကာသနဘောဇနံ၊

ဂိဟီနံ ဥပနာမေန္တိ၊ အာကင်္ခန္တာ ဗဟုတ္တရံ.

၉၃၈. ‘‘ဒန္တပေါနံ ကပိတ္ထဉ္စ၊ ပုပ္ဖံ ခါဒနိယာနိ စ၊

ပိဏ္ဍပါတေ စ သမ္ပန္နေ၊ အမ္ဗေ အာမလကာနိ စ.

၉၃၉. ‘‘ဘေသဇ္ဇေသု ယထာ ဝေဇ္ဇာ၊ ကိစ္စာကိစ္စေ ယထာ ဂိဟီ၊

ဂဏိကာဝ ဝိဘူသာယံ၊ ဣဿရေ ခတ္တိယာ ယထာ.

၉၄၀. ‘‘နေကတိကာ ဝဉ္စနိကာ၊ ကူဋသက္ခီ အပါဋုကာ၊

ဗဟူဟိ ပရိကပ္ပေဟိ၊ အာမိသံ ပရိဘုဉ္ဇရေ.

၉၄၁. ‘‘လေသကပ္ပေ ပရိယာယေ၊ ပရိကပ္ပေနုဓာဝိတာ၊

ဇီဝိကတ္ထာ ဥပါယေန၊ သင်္ကဍ္ဎန္တိ ဗဟုံ ဓနံ.

၉၄၂. ‘‘ဥပဋ္ဌာပေန္တိ ပရိသံ၊ ကမ္မတော နော စ ဓမ္မတော၊

ဓမ္မံ ပရေသံ ဒေသေန္တိ၊ လာဘတော နော စ အတ္ထတော.

၉၄၃. ‘‘သံဃလာဘဿ ဘဏ္ဍန္တိ၊ သင်္ဃတော ပရိဗာဟိရာ၊

ပရလာဘောပဇီဝန္တာ၊ အဟိရီကာ န လဇ္ဇရေ.

၉၄၄. ‘‘နာနုယုတ္တာ တထာ ဧကေ၊ မုဏ္ဍာ သင်္ဃာဋိပါရုတာ၊

သမ္ဘာဝနံယေဝိစ္ဆန္တိ၊ လာဘသက္ကာရမုစ္ဆိတာ.

၉၄၅. ‘‘ဧဝံ နာနပ္ပယာတမှိ၊ န ဒါနိ သုကရံ တထာ၊

အဖုသိတံ ဝါ ဖုသိတုံ၊ ဖုသိတံ ဝါနုရက္ခိတုံ.

၉၄၆. ‘‘ယထာ ကဏ္ဋကဋ္ဌာနမှိ၊ စရေယျ အနုပါဟနော၊

သတိံ ဥပဋ္ဌပေတွာန၊ ဧဝံ ဂါမေ မုနီ စရေ.

၉၄၇. ‘‘သရိတွာ ပုဗ္ဗကေ ယောဂီ၊ တေသံ ဝတ္တမနုဿရံ၊

ကိဉ္စာပိ ပစ္ဆိမော ကာလော၊ ဖုသေယျ အမတံ ပဒံ.

၉၄၈. ‘‘ဣဒံ ဝတွာ သာလဝနေ၊ သမဏော ဘာဝိတိန္ဒြိယော၊

ဗြာဟ္မဏော ပရိနိဗ္ဗာယီ၊ ဣသိ ခီဏပုနဗ္ဘဝေါ’’တိ. –

ဣမာ ဂါထာ ထေရေနေဝ ဘာသိတာ.

တတ္ထ ဣရိယံ အာသိ ဘိက္ခူနန္တိ ပုရိသုတ္တမေ လောကနာထမှိ သမ္မာသမ္ဗုဒ္ဓေ တိဋ္ဌန္တေ ဓရန္တေ ဧတရဟိ ပဋိပတ္တိဘာဝတော. အညထာ အညေန ပကာရေန ဘိက္ခူနံ ဣရိယံ စရိတံ အဟောသိ ယထာနုသိဋ္ဌံ ပဋိပတ္တိဘာဝတော. အညထာ ဒါနိ ဒိဿတီတိ ဣဒါနိ ပန တတော အညထာ ဘိက္ခူနံ ဣရိယံ ဒိဿတိ အယာထာဝပဋိပတ္တိဘာဝတောတိ အဓိပ္ပါယော.

ဣဒါနိ သတ္ထရိ ဓရန္တေ ယေနာကာရေန ဘိက္ခူနံ ပဋိပတ္တိ အဟောသိ၊ တံ တာဝ ဒဿေတုံ ‘‘သီတဝါတပရိတ္တာဏ’’န္တိအာဒိ ဝုတ္တံ. တတ္ထ မတ္တဋ္ဌိယန္တိ တံ မတ္တံ ပယောဇနံ. ယာဝဒေဝ သီတဝါတပရိတ္တာဏံ၊ ယာဝဒေဝ ဟိရီကောပီနပဋိစ္ဆာဒနံ ကတွာ စီဝရံ ပရိဘုဉ္ဇိံသု. ကထံ? သန္တုဋ္ဌာ ဣတရီတရေ ယသ္မိံ တသ္မိံ ဟီနေ ပဏီတေ ဝါ ယထာလဒ္ဓေ ပစ္စယေ သန္တောသံ အာပန္နာ.

ပဏီတန္တိ ဥဠာရံ သပ္ပိအာဒိနာ သံသဋ္ဌံ၊ တဒဘာဝေန လူခံ. အပ္ပန္တိ၊ စတုပဉ္စာလောပမတ္တမ္ပိ. ဗဟုံ ယာပနတ္ထံ အဘုဉ္ဇိံသူတိ ပဏီတံ ဗဟုံ ဘုဉ္ဇန္တာပိ ယာပနမတ္တမေဝ အာဟာရံ ဘုဉ္ဇိံသု. တတော ဧဝ အဂိဒ္ဓါ ဂေဓံ အနာပန္နာ. နာဓိမုစ္ဆိတာ န အဇ္ဈောသိတာ အက္ခဗ္ဘဉ္ဇနံ ဝိယ သာကဋိကာ၊ ဝဏလေပနံ ဝိယ ဝဏိနော အဘုဉ္ဇိံသု.

ဇီဝိတာနံ ပရိက္ခာရေ၊ ဘေသဇ္ဇေ အထ ပစ္စယေပိ ဇီဝိတာနံ ပဝတ္တိယာ ပရိက္ခာရဘူတေ ဘေသဇ္ဇသင်္ခါတေ ပစ္စယေ ဂိလာနပစ္စယေ. ယထာ တေတိ ယထာ တေ ပုရိမကာ ဘိက္ခူ အာသဝက္ခယေ ဥဿုကာ ယုတ္တာ အာသုံ၊ တထာ တေ ရောဂါဘိဘူတာပိ ဂိလာနပစ္စယေ ဗာဠှံ အတိဝိယ ဥဿုကာ နာဟေသုန္တိ အတ္ထော.

တပ္ပရာယဏာတိ ဝိဝေကပရာယဏာ ဝိဝေကပေါဏာ. ဧဝံ စတူဟိ ဂါထာဟိ စတုပစ္စယသန္တောသံ ဘာဝနာဘိရတိဉ္စ ဒဿေန္တေန တေသံ အရိယဝံသပဋိပဒါ ဒဿိတာ.

နီစာတိ ‘‘မယံ ပံသုကူလိကာ ပိဏ္ဍပါတိကာ’’တိ အတ္တုက္ကံသနပရဝမ္ဘနာနိ အကတွာ နီစဝုတ္တိနော၊ နိဝါတဝုတ္တိနောတိ အတ္ထော. နိဝိဋ္ဌာတိ သာသနေ နိဝိဋ္ဌသဒ္ဓါ. သုဘရာတိ အပ္ပိစ္ဆတာဒိဘာဝေန သုပေါသာ. မုဒူတိ ဝတ္တပဋိပတ္တိယံ သကလေ စ ဗြဟ္မစရိယေ မုဒူ၊ သုပရိကမ္မကတသုဝဏ္ဏံ ဝိယ ဝိနိယောဂက္ခမာ. မုဒူတိ ဝါ အဘာကုဋိကာ ဥတ္တာနမုခါ ပုပ္ဖိတမုခေန ပဋိသန္ထာရဝုတ္တိနော၊ သုတိတ္ထံ ဝိယ သုခါဝဟာတိ ဝုတ္တံ ဟောတိ. အထဒ္ဓမာနသာတိ အကထိနစိတ္တာ တေန သုဗ္ဗစဘာဝမာဟ. အဗျာသေကာတိ သတိဝိပ္ပဝါသာဘာဝတော ကိလေသဗျာသေကရဟိတာ၊ အန္တရန္တရာ တဏှာဒိဋ္ဌိမာနာဒီဟိ အဝေါကိဏ္ဏာတိ အတ္ထော. အမုခရာတိ န မုခရာ၊ န မုခေန ခရာ ဝစီပါဂဗ္ဘိယရဟိတာတိ ဝါ အတ္ထော. အတ္ထစိန္တာဝသာနုဂါတိ ဟိတစိန္တာဝသာနုဂါဟိတစိန္တာဝသိကာ၊ အတ္တနော ပရေသဉ္စ ဟိတစိန္တမေဝ အနုပရိဝတ္တနကာ.

တတောတိ တသ္မာ နီစဝုတ္တာဒိဟေတု. ပါသာဒိကန္တိ ပသာဒဇနိကံ ပဋိပတ္တိံ ပဿန္တာနံ သုဏန္တာနဉ္စ ပသာဒါဝဟံ. ဂတန္တိ အဘိက္ကန္တပဋိက္ကန္တပရိဝတ္တနာဒိဂမနံ. ဂတန္တိ ဝါ ကာယဝါစာပဝတ္တိ. ဘုတ္တန္တိ စတုပစ္စယပရိဘောဂေါ. နိသေဝိတန္တိ ဂေါစရနိသေဝနံ. သိနိဒ္ဓါ တေလဓာရာဝါတိ ယထာ အနိဝတ္တိတာ ကုသလဇနာဘိသိဉ္စိတာ သဝန္တီ တေလဓာရာ အဝိစ္ဆိန္နာ သိနိဒ္ဓါ မဋ္ဌာ ဒဿနီယာ ပါသာဒိကာ ဟောတိ၊ ဧဝံ တေသံ အာကပ္ပသမ္ပန္နာနံ ဣရိယာပထော အစ္ဆိဒ္ဒေါ သဏှော မဋ္ဌော ဒဿနီယော ပါသာဒိကော အဟောသိ.

မဟာဈာယီတိ မဟန္တေဟိ ဈာနေဟိ ဈာယနသီလာ၊ မဟန္တံ ဝါ နိဗ္ဗာနံ ဈာယန္တီတိ မဟာဈာယီ. တတော ဧဝ မဟာဟိတာ၊ မဟန္တေဟိ ဟိတေဟိ သမန္နာဂတာတိ အတ္ထော. တေ ထေရာတိ တေ ယထာဝုတ္တပ္ပကာရာ ပဋိပတ္တိပရာယဏာ ထေရာ ဣဒါနိ ပရိနိဗ္ဗုတာတိ အတ္ထော. ပရိတ္တာ ဒါနိ တာဒိသာတိ ဣဒါနိ ပစ္ဆိမေ ကာလေ တာဒိသာ တထာရူပါ ထေရာ ပရိတ္တာ အပ္ပကာ ကတိပယာ ဧဝါတိ ဝုတ္တံ ဟောတိ.

ကုသလာနဉ္စ ဓမ္မာနန္တိ ဝိဝဋ္ဋဿ ဥပနိဿယဘူတာနံ ဝိမောက္ခသမ္ဘာရာနံ အနဝဇ္ဇဓမ္မာနံ. ပညာယ စာတိ တထာရူပါယ ပညာယ စ. ပရိက္ခယာတိ အဘာဝတော အနုပ္ပတ္တိတော. ကာမဉ္စေတ္ထ ပညာပိ သိယာ အနဝဇ္ဇဓမ္မာ၊ ဗဟုကာရဘာဝဒဿနတ္ထံ ပနဿာ ဝိသုံ ဂဟဏံ ယထာ ပုညဉာဏသမ္ဘာရာတိ. သဗ္ဗာကာရဝရူပေတန္တိ အာဒိကလျာဏတာဒီဟိ သဗ္ဗေဟိ အာကာရဝရေဟိ ပကာရဝိသေသေဟိ ဥပေတံ ယုတ္တံ ဇိနဿ ဘဂဝတော သာသနံ လုဇ္ဇတိ ဝိနဿတီတိ အတ္ထော.

ပါပကာနဉ္စ ဓမ္မာနံ၊ ကိလေသာနဉ္စ ယော ဥတူတိ ကာယဒုစ္စရိတာဒီနံ ပါပဓမ္မာနံ လောဘာဒီနဉ္စ ကိလေသာနံ ယော ဥတု ယော ကာလော၊ သော အယံ ဝတ္တတီတိ ဝစနသေသော. ဥပဋ္ဌိတာ ဝိဝေကာယ၊ ယေ စ သဒ္ဓမ္မသေသကာတိ ယေ ပန ဧဝရူပေ ကာလေ ကာယစိတ္တဥပဓိဝိဝေကတ္ထာယ ဥပဋ္ဌိတာ အာရဒ္ဓဝီရိယာ၊ တေ စ သေသပဋိပတ္တိသဒ္ဓမ္မကာ ဟောန္တိ. အယဉှေတ္ထ အဓိပ္ပါယော – သုဝိသုဒ္ဓသီလာစာရာပိ သမာနာ ဣဒါနိ ဧကစ္စေ ဘိက္ခူ ဣရိယာပထသဏ္ဌာပနံ၊ သမထဝိပဿနာဘာဝနာဝိဓာနံ၊ မဟာပလိဗောဓူပစ္ဆေဒေါ၊ ခုဒ္ဒကပလိဗောဓူပစ္ဆေဒေါတိ ဧဝမာဒိပုဗ္ဗကိစ္စံ သမ္ပာဒေတွာ ဘာဝနမနုယုဉ္ဇန္တိ. တေ သေသပဋိပတ္တိသဒ္ဓမ္မကာ၊ ပဋိပတ္တိံ မတ္ထကံ ပါပေတုံ န သက္ကောန္တီတိ.

တေ ကိလေသာ ပဝဍ္ဎန္တာတိ ယေ ဘဂဝတော ဩရသပုတ္တေဟိ စ တဒါ ပရိက္ခယံ ပရိယာဒါနံ ဂမိတာ ကိလေသာ၊ တေ ဧတရဟိ လဒ္ဓေါကာသာ ဘိက္ခူသု ဝုဒ္ဓိံ ဝိရူဠှိံ ဝေပုလ္လံ အာပဇ္ဇန္တာ. အာဝိသန္တိ ဗဟုံ ဇနန္တိ ကလျာဏမိတ္တရဟိတံ အယောနိသောမနသိကာရဗဟုလံ အန္ဓဗာလဇနံ အဘိဘဝိတွာ အဝသံ ကရောန္တာ အာဝိသန္တိ သန္တာနံ အနုပဝိသန္တိ. ဧဝံဘူတာ စ တေ ကီဠန္တိ မညေ ဗာလေဟိ၊ ဥမ္မတ္တေဟိဝ ရက္ခသာ၊ ယထာ နာမ ကေဠိသီလာ ရက္ခသာ ဘိသက္ကရဟိတေ ဥမ္မတ္တေ အာဝိသိတွာ တေ အနယဗျသနံ အာပါဒေန္တာ တေဟိ ကီဠန္တိ၊ ဧဝံ တေ ကိလေသာ သမ္မာသမ္ဗုဒ္ဓဘိသက္ကရဟိတေ အန္ဓဗာလေ ဘိက္ခူ အာဝိသိတွာ တေသံ ဒိဋ္ဌဓမ္မိကာဒိဘေဒံ အနတ္ထံ ဥပ္ပါဒေန္တာ တေဟိ သဒ္ဓိံ ကီဠန္တိ မညေ၊ ကီဠန္တာ ဝိယ ဟောန္တီတိ အတ္ထော.

တေန တေနာတိ တေန တေန အာရမ္မဏဘာဂေန. ဝိဓာဝိတာတိ ဝိရူပံ ဓာဝိတာ အသာရုပ္ပဝသေန ပဋိပဇ္ဇန္တာ. ကိလေသဝတ္ထူသူတိ ပဌမံ ဥပ္ပန္နံ ကိလေသာ ပစ္ဆာ ဥပ္ပဇ္ဇနကာနံ ကာရဏဘာဝတော ကိလေသာဝ ကိလေသဝတ္ထူနိ၊ တေသု ကိလေသဝတ္ထူသု သမူဟိတေသု. သသင်္ဂါမေဝ ဃောသိတေတိ ဟိရညသုဝဏ္ဏမဏိမုတ္တာဒိကံ ဓနံ ဝိပ္ပကိရိတွာ ‘‘ယံ ယံ ဟိရညသုဝဏ္ဏာဒိ ယဿ ယဿ ဟတ္ထဂတံ၊ တံ တံ တဿ တဿေဝ ဟောတူ’’တိ ဧဝံ ကာမဃောသနာ သသင်္ဂါမဃောသနာ နာမ. တတ္ထာယမတ္ထော – ကိလေသဝတ္ထူသု ‘‘ယော ယော ကိလေသော ယံ ယံ သတ္တံ ဂဏှာတိ အဘိဘဝတိ၊ သော သော တဿ တဿ ဟောတူ’’တိ ကိလေသသေနာပတိနာ မာရေန သသင်္ဂါမေ ဃောသိတေ ဝိယ. တေဟိ တေဟိ ကိလေသေဟိ အဘိဘူတာ တေ ဗာလပုထုဇ္ဇနာ တေန တေန အာရမ္မဏဘာဂေန ဝိဓာဝိတာ ဝေါသိတာတိ.

တေ ဧဝံ ဝိဓာဝိတာ ကိံ ကရောန္တီတိ အာဟ ‘‘ပရိစ္စဇိတွာ သဒ္ဓမ္မံ၊ အညမညေဟိ ဘဏ္ဍရေ’’တိ. တဿတ္ထော – ပဋိပတ္တိသဒ္ဓမ္မံ ဆဍ္ဍေတွာ အာမိသကိဉ္ဇက္ခဟေတု အညမညေဟိ ဘဏ္ဍရေ ကလဟံ ကရောန္တီတိ. ဒိဋ္ဌိဂတာနီတိ ‘‘ဝိညာဏမတ္တမေဝ အတ္ထိ၊ နတ္ထေဝ ရူပဓမ္မာ’’တိ၊ ‘‘ယထာ ပုဂ္ဂလော နာမ ပရမတ္ထတော နတ္ထိ၊ ဧဝံ သဘာဝဓမ္မာပိ ပရမတ္ထတော နတ္ထိ၊ ဝေါဟာရမတ္တမေဝါ’’တိ စ ဧဝမာဒီနိ ဒိဋ္ဌိဂတာနိ မိစ္ဆာဂါဟေ အနွေန္တာ အနုဂစ္ဆန္တာ ဣဒံ သေယျော ဣဒမေဝ သေဋ္ဌံ၊ အညံ မိစ္ဆာတိ မညန္တိ.

နိဂ္ဂတာတိ ဂေဟတော နိက္ခန္တာ. ကဋစ္ဆုဘိက္ခဟေတူပီတိ ကဋစ္ဆုမတ္တဘိက္ခာနိမိတ္တမ္ပိ. တံ ဒဒန္တဿ ဂဟဋ္ဌဿ အနနုလောမိကသံသဂ္ဂဝသေန အကိစ္စာနိ ပဗ္ဗဇိတေန အကတ္တဗ္ဗာနိ ကမ္မာနိ နိသေဝရေ ကရောန္တိ.

ဥဒရာဝဒေဟကံ ဘုတွာတိ ‘‘ဦနူဒရော မိတာဟာရော’’တိ (ထေရဂါ. ၉၈၂၊ မိ. ပ. ၆.၅.၁၀) ဝုတ္တဝစနံ အစိန္တေတွာ ဥဒရပူရံ ဘုဉ္ဇိတွာ. သယန္တုတ္တာနသေယျကာတိ ‘‘ဒက္ခိဏေန ပဿေန သီဟသေယျံ ကပ္ပေတိ ပါဒေ ပါဒံ အစ္စာဓာယ သတော သမ္ပဇာနော’’တိ (အ. နိ. ၈.၉၊ ဝိဘ. ၅၁၉) ဝုတ္တဝိဓာနံ အနနုဿရိတွာ ဥတ္တာနသေယျကာ သယန္တိ. ယာ ကထာ သတ္ထုဂရဟိတာတိ ရာဇကထာဒိတိရစ္ဆာနကထံ သန္ဓာယ ဝဒတိ.

သဗ္ဗကာရုကသိပ္ပါနီတိ သဗ္ဗေဟိ ဝေဿာဒီဟိ ကာရုကေဟိ ကတ္တဗ္ဗာနိ ဘတ္တတာလဝဏ္ဋကရဏာဒီနိ ဟတ္ထသိပ္ပါနိ. စိတ္တိံ ကတွာနာတိ သက္ကစ္စံ သာဒရံ ကတွာ. အဝူပသန္တာ အဇ္ဈတ္တန္တိ ကိလေသဝူပသမာဘာဝတော ဂဒ္ဒုဟနမတ္တမ္ပိ သမာဓာနာဘာဝတော စ အဇ္ဈတ္တံ အဝူပသန္တာ၊ အဝူပသန္တစိတ္တာတိ အတ္ထော. သာမညတ္ထောတိ သမဏဓမ္မော. အတိအစ္ဆတီတိ တေသံ အာဇီဝကိစ္စပသုတတာယ ဧကဒေသမ္ပိ အဖုသနတော ဝိသုံယေဝ နိသီဒတိ၊ အနလ္လီယတီတိ ဝုတ္တံ ဟောတိ.

မတ္တိကန္တိ ပါကတိကံ ဝါ ပဉ္စဝဏ္ဏံ ဝါ ဂိဟီနံ ဝိနိယောဂက္ခမံ မတ္တိကံ. တေလစုဏ္ဏဉ္စာတိ ပါကတိကံ၊ အဘိသင်္ခတံ ဝါ တေလဉ္စ စုဏ္ဏဉ္စ. ဥဒကာသနဘောဇနန္တိ ဥဒကဉ္စ အာသနဉ္စ ဘောဇနဉ္စ. အာကင်္ခန္တာ ဗဟုတ္တရန္တိ ဗဟုံ ပိဏ္ဍပါတာဒိဥတ္တရုတ္တရံ အာကင်္ခန္တာ ‘‘အမှေဟိ မတ္တိကာဒီသု ဒိန္နေသု မနုဿာ ဒဠှဘတ္တိကာ ဟုတွာ ဗဟုံ ဥတ္တရုတ္တရံ စတုပစ္စယဇာတံ ဒဿန္တီ’’တိ အဓိပ္ပါယေန ဂိဟီနံ ဥပနာမေန္တီတိ အတ္ထော.

ဒန္တေ ပုနန္တိ သောဓေန္တိ ဧတေနာတိ ဒန္တပေါနံ၊ ဒန္တကဋ္ဌံ. ကပိတ္ထန္တိ ကပိတ္ထဖလံ. ပုပ္ဖန္တိ သုမနစမ္ပကာဒိပုပ္ဖံ. ခါဒနီယာနီတိ အဋ္ဌာရသဝိဓေပိ ခဇ္ဇကဝိသေသေ. ပိဏ္ဍပါတေ စ သမ္ပန္နေတိ ဝဏ္ဏာဒိသမ္ပယုတ္တေ ဩဒနဝိသေသေ. ‘‘အမ္ဗေ အာမလကာနိ စာ’’တိ စ-သဒ္ဒေန မာတုလုင်္ဂတာလနာဠိကေရာဒိဖလာနိ အဝုတ္တာနိ သင်္ဂဏှာတိ. သဗ္ဗတ္ထ ဂိဟီနံ ဥပနာမေန္တိ အာကင်္ခန္တာ ဗဟုတ္တရန္တိ ယောဇနာ.

ဘေသဇ္ဇေသု ယထာ ဝေဇ္ဇာတိ ဂိဟီနံ ဘေသဇ္ဇပ္ပယောဂေသု ယထာ ဝေဇ္ဇာ၊ တထာ ဘိက္ခူ ပဋိပဇ္ဇန္တီတိ အဓိပ္ပါယော. ကိစ္စာကိစ္စေ ယထာ ဂိဟီတိ ဂဟဋ္ဌာနံ ခုဒ္ဒကေ စေဝ မဟန္တေ စ ကိစ္စေ ကတ္တဗ္ဗေ ဂိဟီ ဝိယ. ဂဏိကာဝ ဝိဘူသာယန္တိ အတ္တနော သရီရဿ ဝိဘူသနေ ရူပူပဇီဝိနိယော ဝိယ. ဣဿရေ ခတ္တိယာ ယထာတိ ဣဿရေ ဣဿရိယပဝတ္တနေ ယထာ ခတ္တိယာ၊ ဧဝံ ကုလပတီ ဟုတွာ ဝတ္တန္တီတိ အတ္ထော.

နေကတိကာတိ နိကတိယံ နိယုတ္တာ၊ အမဏိံယေဝ မဏိံ၊ အသုဝဏ္ဏံယေဝ သုဝဏ္ဏံ ကတွာ ပဋိရူပသာစိယောဂနိရတာ. ဝဉ္စနိကာတိ ကူဋမာနာဒီဟိ ဝိပ္ပလမ္ဗကာ. ကူဋသက္ခီတိ အယာထာဝသက္ခိနော. အပါဋုကာတိ ဝါမကာ၊ အသံယတဝုတ္တီတိ အတ္ထော. ဗဟူဟိ ပရိကပ္ပေဟီတိ ယထာဝုတ္တေဟိ အညေဟိ စ ဗဟူဟိ မိစ္ဆာဇီဝပ္ပကာရေဟိ.

လေသကပ္ပေတိ ကပ္ပိယလေသေ ကပ္ပိယပဋိရူပေ. ပရိယာယေတိ၊ ပစ္စယေသု ပရိယာယဿ ယောဂေ. ပရိကပ္ပေတိ ဝဍ္ဎိအာဒိဝိကပ္ပနေ၊ သဗ္ဗတ္ထ ဝိသယေ ဘုမ္မံ. အနုဓာဝိတာတိ မဟိစ္ဆတာဒီဟိ ပါပဓမ္မေဟိ အနုဓာဝိတာ ဝေါသိတာ. ဇီဝိကတ္ထာ ဇီဝိကပ္ပယောဇနာ အာဇီဝဟေတုကာ. ဥပါယေနာတိ ပရိကထာဒိနာ ဥပါယေန ပစ္စယုပ္ပါဒနနယေန. သင်္ကဍ္ဎန္တီတိ သံဟရန္တိ.

ဥပဋ္ဌာပေန္တိ ပရိသန္တိ ပရိသာယ အတ္တာနံ ဥပဋ္ဌပေန္တိ၊ ယထာ ပရိသာ အတ္တာနံ ဥပဋ္ဌပေန္တိ၊ ဧဝံ ပရိသံ သင်္ဂဏှန္တီတိ အတ္ထော. ကမ္မတောတိ ကမ္မဟေတု. တေ ဟိ အတ္တနော ကတ္တဗ္ဗဝေယျာဝစ္စနိမိတ္တံ ဥပဋ္ဌပေန္တိ. နော စ ဓမ္မတောတိ ဓမ္မနိမိတ္တံ နော စ ဥပဋ္ဌပေန္တိ. ယော သတ္ထာရာ ဥလ္လုမ္ပနသဘာဝသဏ္ဌိတာယ ပရိသာယ သင်္ဂဟော အနုညာတော၊ တေန န သင်္ဂဏှန္တီတိ အတ္ထော. လာဘတောတိ လာဘဟေတု၊ ‘‘အယျော ဗဟုဿုတော၊ ဘာဏကော၊ ‘ဓမ္မကထိကော’တိ ဧဝံ သမ္ဘာဝေန္တော မဟာဇနော မယှံ လာဘသက္ကာရေ ဥပနယိဿတီ’’တိ ဣစ္ဆာစာရေ ဌတွာ လာဘနိမိတ္တံ ပရေသံ ဓမ္မံ ဒေသေန္တိ. နော စ အတ္ထတောတိ ယော သော ဝိမုတ္တာယတနသီသေ ဌတွာ သဒ္ဓမ္မံ ကထေန္တေန ပတ္တဗ္ဗော အတ္ထော၊ န တံဒိဋ္ဌဓမ္မိကာဒိဘေဒဟိတနိမိတ္တံ ဓမ္မံ ဒေသေန္တီတိ အတ္ထော.

သံဃလာဘဿ ဘဏ္ဍန္တီတိ သံဃလာဘဟေတု ဘဏ္ဍန္တိ ‘‘မယှံ ပါပုဏာတိ၊ န တုယှ’’န္တိအာဒိနာ ကလဟံ ကရောန္တိ. သင်္ဃတော ပရိဗာဟိရာတိ၊ အရိယသင်္ဃတော ဗဟိဘူတာ အရိယသံဃေ တဒဘာဝတော. ပရလာဘောပဇီဝန္တာတိ သာသနေ လာဘဿ အန္ဓဗာလပုထုဇ္ဇနေဟိ ပရေ သီလာဒိဂုဏသမ္ပန္နေ သေက္ခေ ဥဒ္ဒိဿ ဥပ္ပန္နတ္တာ တံ ပရလာဘံ၊ ပရတော ဝါ ဒါယကတော လဒ္ဓဗ္ဗလာဘံ ဥပဇီဝန္တာ ဘဏ္ဍနကာရကာ ဘိက္ခူ ပါပဇိဂုစ္ဆာယ အဘာဝတော အဟိရိကာ သမာနာ စ ‘‘မယံ ပရလာဘံ ဘုဉ္ဇာမ၊ ပရပဋိဗဒ္ဓဇီဝိကာ’’တိပိ န လဇ္ဇရေ န ဟိရီယန္တိ.

နာနုယုတ္တာတိ သမဏကရဏေဟိ ဓမ္မေဟိ အနနုယုတ္တာ. တထာတိ ယထာ ပုဗ္ဗေ ဝုတ္တာ ဗန္ဓနကာရကာဒယော၊ တထာ. ဧကေတိ ဧကစ္စေ. မုဏ္ဍာ သင်္ဃာဋိပါရုတာတိ ကေဝလံ မုဏ္ဍိတကေသတာယ မုဏ္ဍာ ပိလောတိကခဏ္ဍေဟိ သင်္ဃဋိတဋ္ဌေန ‘‘သင်္ဃာဋီ’’တိ လဒ္ဓနာမေန စီဝရေန ပါရုတသရီရာ. သမ္ဘာဝနံယေဝိစ္ဆန္တိ၊ လာဘသက္ကာရမုစ္ဆိတာတိ လာဘသက္ကာရာသာယ မုစ္ဆိတာ အဇ္ဈောသိတာ ဟုတွာ၊ ‘‘ပေသလော ဓုတဝါဒေါ ဗဟုဿုတော’’တိ ဝါ မဓုရဝစနမနုယုတ္တာ ‘‘အရိယော’’တိ စ ကေဝလံ သမ္ဘာဝနံ ဗဟုမာနံယေဝ ဣစ္ဆန္တိ ဧသန္တိ၊ န တန္နိမိတ္တေ ဂုဏေတိ အတ္ထော.

ဧဝန္တိ ‘‘ကုသလာနဉ္စ ဓမ္မာနံ ပညာယ စ ပရိက္ခယာ’’တိ ဝုတ္တနယေန. နာနပ္ပယာတမှီတိ နာနပ္ပကာရေ ဘေဒနဓမ္မေ ပယာတေ သမကတေ၊ နာနပ္ပကာရေန ဝါ သံကိလေသဓမ္မေ ပယာတုံ ပဝတ္တိတုံ အာရဒ္ဓေ. န ဒါနိ သုကရံ တထာတိ ဣဒါနိ ဣမသ္မိံ ဒုလ္လဘကလျာဏမိတ္တေ ဒုလ္လဘသပ္ပါယသဒ္ဓမ္မဿဝနေ စ ကာလေ ယထာ သတ္ထရိ ဓရန္တေ အဖုသိတံ အဖုဋ္ဌံ၊ အနဓိဂတံ ဈာနဝိပဿနံ ဖုသိတုံ အဓိဂန္တုံ၊ ဖုသိတံ ဝါ ဟာနဘာဂိယံ ဌိတိဘာဂိယမေဝ ဝါ အဟုတွာ ယထာ ဝိသေသဘာဂိယံ ဟောတိ၊ တထာ အနုရက္ခိတုံ ပါလေတုံ သုကရံ၊ တထာ န သုကရံ၊ တထာ သမ္ပာဒေတုံ န သက္ကာတိ အတ္ထော.

ဣဒါနိ အတ္တနော ပရိနိဗ္ဗာနကာလဿ အာသန္နတ္တာ သံခိတ္တေန ဩဝါဒေန သဗြဟ္မစာရိံ ဩဝဒန္တော ‘‘ယထာ ကဏ္ဋကဋ္ဌာနမှီ’’တိအာဒိမာဟ. တဿတ္ထော – ယထာ ပုရိသော ကေနစိဒေဝ ပယောဇနေန ကဏ္ဋကနိစိတေ ပဒေသေ အနုပါဟနော ဝိစရန္တော ‘‘မာ မံ ကဏ္ဋကော ဝိဇ္ဈီ’’တိ သတိံ ဥပဋ္ဌပေတွာဝ ဝိစရတိ၊ ဧဝံ ကိလေသကဏ္ဋကနိစိတေ ဂေါစရဂါမေ ပယောဇနေန စရန္တော မုနိ သတိံ ဥပဋ္ဌပေတွာန သတိသမ္ပဇညယုတ္တော အပ္ပမတ္တောဝ စရေယျ ကမ္မဋ္ဌာနံ အဝိဇဟန္တောတိ ဝုတ္တံ ဟောတိ.

သရိတွာ ပုဗ္ဗကေ ယောဂီ၊ တေသံ ဝတ္တမနုဿရန္တိ ပုရိမကေ ယောဂေ ဘာဝနာယ ယုတ္တတာယ ယောဂီ အာရဒ္ဓဝိပဿကေ သရိတွာ တေသံ ဝတ္တံ အာဂမာနုသာရေန သမ္မာပဋိပတ္တိဘာဝနာဝိဓိံ အနုဿရန္တော ဓုရနိက္ခေပံ အကတွာ ယထာပဋိပဇ္ဇန္တော. ကိဉ္စာပိ ပစ္ဆိမော ကာလောတိ ယဒိပါယံ အတီတသတ္ထုကော စရိမော ကာလော၊ တထာပိ ယထာဓမ္မမေဝ ပဋိပဇ္ဇန္တော ဝိပဿနံ ဥဿုက္ကာပေန္တော ဖုသေယျ အမတံ ပဒံ နိဗ္ဗာနံ အဓိဂစ္ဆေယျ.

ဣဒံ ဝတွာတိ၊ ယထာဒဿိတံ သံကိလေသဝေါဒါနေသု ဣမံ ပဋိပတ္တိဝိဓိံ ကထေတွာ. အယဉ္စ ဩသာနဂါထာ သင်္ဂီတိကာရေဟိ ထေရဿ ပရိနိဗ္ဗာနံ ပကာသေတုံ ဝုတ္တာတိ ဝေဒိတဗ္ဗာ.

ပါရာပရိယတ္ထေရဂါထာဝဏ္ဏနာ နိဋ္ဌိတာ.

ဝီသတိနိပါတဝဏ္ဏနာ နိဋ္ဌိတာ.