၁၀. သာမိဒတ္တတ္ထေရဂါထာဝဏ္ဏနာ

ပဉ္စက္ခန္ဓာ ပရိညာတာတိ အာယသ္မတော သာမိဒတ္တတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော အတ္ထဒဿိဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတ္တော သတ္ထရိ ပရိနိဗ္ဗုတေ တဿ ထူပေ ပုပ္ဖေဟိ ဆတ္တာတိဆတ္တံ ကတွာ ပူဇံ အကာသိ. သော တေန ပုညကမ္မေန ဒေဝလောကေ နိဗ္ဗတ္တိတွာ အပရာပရံ ပုညာနိ ကတွာ ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ရာဇဂဟေ အညတရဿ ဗြာဟ္မဏဿ ပုတ္တော ဟုတွာ နိဗ္ဗတ္တိ၊ သာမိဒတ္တောတိဿ နာမံ အဟောသိ. သော အနုက္ကမေန ဝိညုတံ ပတ္တော ဗုဒ္ဓါနုဘာဝံ သုတွာ ဥပါသကေဟိ သဒ္ဓိံ ဝိဟာရံ ဂတော သတ္ထာရံ ဓမ္မံ ဒေသေန္တံ ဒိသွာ ပသန္နမာနသော ဧကမန္တံ နိသီဒိ. သတ္ထာ တဿ အဇ္ဈာသယံ ဩလောကေတွာ တထာ ဓမ္မံ ဒေသေသိ၊ ယထာ သဒ္ဓံ ပဋိလဘိ သံသာရေ စ သံဝေဂံ. သော ပဋိလဒ္ဓသဒ္ဓေါ သံဝေဂဇာတော ပဗ္ဗဇိတွာ ဉာဏဿ အပရိပက္ကတ္တာ ကတိပယကာလံ အလသဗဟုလီ ဝိဟာသိ. ပုန သတ္ထာရာ ဓမ္မဒေသနာယ သမုတ္တေဇိတော ဝိပဿနာယ ကမ္မဋ္ဌာနံ ဂဟေတွာ တတ္ထ ယုတ္တပ္ပယုတ္တော ဝိဟရန္တော နစိရေနေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၁၅.၁-၄) –

‘‘ပရိနိဗ္ဗုတေ ဘဂဝတိ၊ အတ္ထဒဿီနရုတ္တမေ၊

ဆတ္တာတိဆတ္တံ ကာရေတွာ၊ ထူပမှိ အဘိရောပယိံ.

‘‘ကာလေန ကာလမာဂန္တွာ၊ နမဿိံ လောကနာယကံ၊

ပုပ္ဖစ္ဆဒနံ ကတွာန၊ ဆတ္တမှိ အဘိရောပယိံ.

‘‘သတ္တရသေ ကပ္ပသတေ၊ ဒေဝရဇ္ဇမကာရယိံ၊

မနုဿတ္တံ န ဂစ္ဆာမိ၊ ထူပပူဇာယိဒံ ဖလံ.

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

‘‘သွာဂတံ ဝတ မေ အာသိ၊ ဗုဒ္ဓသေဋ္ဌဿ သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသန’’န္တိ.

သော အပရဘာဂေ ဘိက္ခူဟိ ‘‘ကိံ တယာ၊ အာဝုသော၊ ဥတ္တရိမနုဿဓမ္မော အဓိဂတော’’တိ ပုဋ္ဌော သာသနဿ နိယျာနိကဘာဝံ အတ္တနော စ ဓမ္မာနုဓမ္မပ္ပဋိပတ္တိံ တေသံ ပဝေဒေန္တော အညာဗျာကရဏဝသေန –

၉၀. ‘‘ပဉ္စက္ခန္ဓာ ပရိညာတာ၊ တိဋ္ဌန္တိ ဆိန္နမူလကာ၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ. – ဂါထံ အဘာသိ၊

တတ္ထ ပဉ္စက္ခန္ဓာ ပရိညာတာတိ မယာ ဣမေ ပဉ္စုပါဒါနက္ခန္ဓာ ‘‘ဣဒံ ဒုက္ခံ၊ ဧတ္တကံ ဒုက္ခံ၊ န တတော ဘိယျော’’တိ တီဟိ ပရိညာဟိ ပရိစ္ဆိန္ဒိတွာ ဉာတာ ဝိဒိတာ ပဋိဝိဒ္ဓါ. တိဋ္ဌန္တိ ဆိန္နမူလကာတိ တထာ ပရိညာတတ္တာယေဝ မူလဘူတဿ သမုဒယဿ သဗ္ဗသော ပဟီနတ္တာ တေ ဣဒါနိ ယာဝ စရိမကစိတ္တနိရောဓော တိဋ္ဌန္တိ ဆိန္နမူလကာ၊ စရိမကစိတ္တနိရောဓေန ပန အပ္ပဋိသန္ဓိကာဝ နိရုဇ္ဈန္တိ. တေနာဟ – ‘‘ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ. တဿတ္ထော ဟေဋ္ဌာ ဝုတ္တောယေဝ.

သာမိဒတ္တတ္ထေရဂါထာဝဏ္ဏနာ နိဋ္ဌိတာ.

နဝမဝဂ္ဂဝဏ္ဏနာ နိဋ္ဌိတာ.