၈. မေဏ္ဍသိရတ္ထေရဂါထာဝဏ္ဏနာ

အနေကဇာတိသံသာရန္တိ အာယသ္မတော မေဏ္ဍသိရတ္ထေရဿ ဂါထာ. ကာ ဥပ္ပတ္တိ? သောပိ ကိရ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယာနိ ပုညာနိ ကရောန္တော ဣတော ဧကနဝုတေ ကပ္ပေ ဗြာဟ္မဏကုလေ နိဗ္ဗတ္တိတွာ ဝယပ္ပတ္တော ကာမေ ပဟာယ ဣသိပဗ္ဗဇ္ဇံ ပဗ္ဗဇိတွာ မဟတာ ဣသိဂဏေန သဒ္ဓိံ ဟိမဝန္တေ ဝသန္တော သတ္ထာရံ ဒိသွာ ပသန္နမာနသော ဣသိဂဏေန ပဒုမာနိ အာဟရာပေတွာ သတ္ထု ပုပ္ဖပူဇံ ကတွာ သာဝကေ အပ္ပမာဒပဋိပတ္တိယံ ဩဝဒိတွာ ကာလံ ကတွာ ဒေဝလောကေ နိဗ္ဗတ္တော အပရာပရံ သံသရန္တော ဣမသ္မိံ ဗုဒ္ဓုပ္ပါဒေ သာကေတေ ဂဟပတိကုလေ နိဗ္ဗတ္တိ၊ တဿ မေဏ္ဍသရိက္ခသီသတာယ မေဏ္ဍသိရောတွေဝ သမညာ အဟောသိ. သော ဘဂဝတိ သာကေတေ အဉ္ဇနဝနေ ဝိဟရန္တေ သတ္ထာရံ ဥပသင်္ကမိတွာ ပဋိလဒ္ဓသဒ္ဓေါ ပဗ္ဗဇိတွာ သမထဝိပဿနာသု ကမ္မံ ကရောန္တော ဆဠဘိညော အဟောသိ. တေဝ ဝုတ္တံ အပဒါနေ (အပ. ထေရ ၁.၁၃.၉၇-၁၀၅) –

‘‘ဟိမဝန္တဿာဝိဒူရေ၊ ဂေါတမော နာမ ပဗ္ဗတော၊

နာနာရုက္ခေဟိ သဉ္ဆန္နော၊ မဟာဘူတဂဏာလယော.

‘‘ဝေမဇ္ဈမှိ စ တဿာသိ၊ အဿမော အဘိနိမ္မိတော၊

ပုရက္ခတော သသိဿေဟိ၊ ဝသာမိ အဿမေ အဟံ.

‘‘အာယန္တု မေ သိဿဂဏာ၊ ပဒုမံ အာဟရန္တု မေ၊

ဗုဒ္ဓပူဇံ ကရိဿာမိ၊ ဒွိပဒိန္ဒဿ တာဒိနော.

‘‘ဧဝန္တိ တေ ပဋိဿုတွာ၊ ပဒုမံ အာဟရိံသု မေ၊

တထာ နိမိတ္တံ ကတွာဟံ၊ ဗုဒ္ဓဿ အဘိရောပယိံ.

‘‘သိဿေ တဒါ သမာနေတွာ၊ သာဓုကံ အနုသာသဟံ၊

မာ ခေါ တုမှေ ပမဇ္ဇိတ္ထ၊ အပ္ပမာဒေါ သုခါဝဟော.

‘‘ဧဝံ သမနုသာသိတွာ၊ တေ သိဿေ ဝစနက္ခမေ၊

အပ္ပမာဒဂုဏေ ယုတ္တော၊ တဒါ ကာလင်္ကတော အဟံ.

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ဧကပညာသကပ္ပမှိ၊ ရာဇာ အာသိံ ဇလုတ္တမော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

သော အတ္တနော ပုဗ္ဗေနိဝါသံ အနုဿရန္တော –

၇၈. ‘‘အနေကဇာတိသံသာရံ၊ သန္ဓာဝိဿံ အနိဗ္ဗိသံ၊

တဿ မေ ဒုက္ခဇာတဿ၊ ဒုက္ခက္ခန္ဓော အပရဒ္ဓေါ’’တိ. – ဂါထံ အဘာသိ၊

တတ္ထ အနေကဇာတိသံသာရန္တိ အနေကဇာတိသတသဟဿသင်္ချံ ဣဒံ သံသာရဝဋ္ဋံ၊ အဒ္ဓုနော အဓိပ္ပေတတ္တာ အစ္စန္တသံယောဂေကဝစနံ. သန္ဓာဝိဿန္တိ သံသရိံ၊ အပရာပရံ စဝနုပ္ပဇ္ဇနဝသေန ပရိဗ္ဘမိံ. အနိဗ္ဗိသန္တိ တဿ နိဝတ္တကဉာဏံ အဝိန္ဒန္တော အလဘန္တော. တဿ မေတိ ဧဝံ သံသရန္တဿ မေ. ဒုက္ခဇာတဿာတိ ဇာတိအာဒိဝသေန ဥပ္ပန္နဒုက္ခဿ၊ တိဿန္နံ ဝါ ဒုက္ခတာနံ ဝသေန ဒုက္ခသဘာဝဿ. ဒုက္ခက္ခန္ဓောတိ ကမ္မကိလေသဝိပါကဝဋ္ဋပ္ပကာရော ဒုက္ခရာသိ. အပရဒ္ဓေါတိ အရဟတ္တမဂ္ဂပ္ပတ္တိတော ပဋ္ဌာယ ပရိဗ္ဘဋ္ဌော စုတော န အဘိနိဗ္ဗတ္တိဿတိ. ‘‘အပရဋ္ဌော’’တိ ဝါ ပါဌော၊ အပဂတသမိဒ္ဓိတော သမုစ္ဆိန္နကာရဏတ္တာ အပဂတောတိ အတ္ထော. ဣဒမေဝ စ ထေရဿ အညာဗျာကရဏံ အဟောသိ.

မေဏ္ဍသိရတ္ထေရဂါထာဝဏ္ဏနာ နိဋ္ဌိတာ.