၈. သိင်္ဂါလပိတုတ္ထေရဂါထာဝဏ္ဏနာ

အဟု ဗုဒ္ဓဿ ဒါယာဒေါတိ သိင်္ဂါလကပိတုတ္ထေရဿ ဂါထာ. ကာ ဥပ္ပတ္တိ? သော ကိရ ဣတော စတုနဝုတေ ကပ္ပေ သတရံသိံ နာမ ပစ္စေကသမ္ဗုဒ္ဓံ ပိဏ္ဍာယ စရန္တံ ဒိသွာ ပသန္နမာနသော ဝန္ဒိတွာ အတ္တနော ဟတ္ထဂတံ တာလဖလံ အဒါသိ. တေန ပုညကမ္မေန ဒေဝလောကေ နိဗ္ဗတ္တော အပရာပရံ ပုညာနိ ကတွာ သုဂတီသုယေဝ သံသရန္တော ကဿပဿ ဘဂဝတော ကာလေ မနုဿယောနိယံ နိဗ္ဗတ္တော သာသနေ ပဋိလဒ္ဓသဒ္ဓေါ ဟုတွာ ပဗ္ဗဇိတွာ အဋ္ဌိကသညံ ဘာဝေသိ. ပုန ဣမသ္မိံ ဗုဒ္ဓုပ္ပါဒေ သာဝတ္ထိယံ ကုလဂေဟေ နိဗ္ဗတ္တိတွာ ဝယပ္ပတ္တော ဒါရပရိဂ္ဂဟံ ကတွာ ဧကံ ပုတ္တံ လဘိတွာ တဿ ‘‘သိင်္ဂါလကော’’တိ နာမံ အကာသိ. တေန နံ သိင်္ဂါလကပိတာတိ ဝေါဟရန္တိ. သော အပရဘာဂေ ဃရဗန္ဓနံ ပဟာယ သာသနေ ပဗ္ဗဇိ. တဿ ဘဂဝါ အဇ္ဈာသယံ ဩလောကေန္တော အဋ္ဌိကသညာကမ္မဋ္ဌာနံ အဒါသိ. သော တံ ဂဟေတွာ ဘဂ္ဂေသု ဝိဟရတိ သုသုမာရဂိရေ ဘေသကဠာဝနေ၊ အထဿ တသ္မိံ ဝနေ အဓိဝတ္ထာ ဒေဝတာ ဥဿာဟဇနနတ္ထံ ‘‘ဘာဝနာဖလံ နစိရဿေဝ ဟတ္ထဂတံ ကရိဿတီ’’တိ ဣမမတ္ထံ အညာပဒေသေန ဝိဘာဝေန္တီ ‘‘အဟု ဗုဒ္ဓဿ ဒါယာဒေါ’’တိ ဂါထံ အဘာသိ.

၁၈. တတ္ထ အဟူတိ ဟောတိ၊ ဝတ္တမာနတ္ထေ ဟိ ဣဒံ အတီတကာလဝစနံ. ဗုဒ္ဓဿာတိ သဗ္ဗညုဗုဒ္ဓဿ. ဒါယာဒေါတိ ဓမ္မဒါယာဒေါ နဝဝိဓဿ လောကုတ္တရဓမ္မဒါယဿ အတ္တနော သမ္မာပဋိပတ္တိယာ အာဒါယကော ဂဏှနကော. အထ ဝါ အဟူတိ အဟောသိ. ဧဝံနာမဿ ဗုဒ္ဓဿ ဒါယာဒဘာဝေ ကောစိ ဝိဗန္ဓော ဣဒါနေဝ ဘဝိဿတီတိ အဓိပ္ပါယော. တေနာဟ ‘‘မညေဟံ ကာမရာဂံ သော၊ ခိပ္ပမေဝ ဝဟိဿတီ’’တိ. ဘေသကဠာဝနေတိ ဘေသကေန နာမ ယက္ခေန လဘိတတ္တာ ပရိဂ္ဂဟိတတ္တာ၊ ဘေသကဠာနံ ဝါ ကဋ္ဌာဒီနံ ဗဟုလတာယ ‘‘ဘေသကဠာဝန’’န္တိ လဒ္ဓနာမေ အရညေ. တဿ ဘိက္ခုနော ဗုဒ္ဓဿ ဒါယာဒဘာဝေ ကာရဏံ ဝဒန္တော ‘‘ကေဝလံ အဋ္ဌိသညာယ၊ အဖရီ ပထဝိံ ဣမ’’န္တိ အာဟ. တတ္ထ ကေဝလန္တိ သကလံ အနဝသေသံ. အဋ္ဌိသညာယာတိ အဋ္ဌိကဘာဝနာယ. အဖရီတိ ‘‘အဋ္ဌီ’’တိ အဓိမုစ္စနဝသေန ပတ္ထရိ. ပထဝိန္တိ အတ္တဘာဝပထဝိံ. အတ္တဘာဝေါ ဟိ ဣဓ ‘‘ပထဝီ’’တိ ဝုတ္တော ‘‘ကော ဣမံ ပထဝိံ ဝိစ္စေဿတီ’’တိအာဒီသု ဝိယ. မညေဟန္တိ မညေ အဟံ. ‘‘မညာဟ’’န္တိပိ ပါဌော. သောတိ သော ဘိက္ခု. ခိပ္ပမေဝ နစိရဿေဝ ကာမရာဂံ ပဟိဿတိ ပဇဟိဿတီတိ မညေ. ကသ္မာ? အဋ္ဌိကသညာယ ကာမရာဂဿ ဥဇုပဋိပက္ခဘာဝတော. ဣဒံ ဝုတ္တံ ဟောတိ – ယော ဧကသ္မိံ ပဒေသေ လဒ္ဓါယ အတ္ထိကသညာယ သကလံ အတ္တနော သဗ္ဗေသံ ဝါ အတ္တဘာဝံ ‘‘အဋ္ဌီ’’တွေဝ ဖရိတွာ ဌိတော၊ သော ဘိက္ခု တံ အဋ္ဌိကဈာနံ ပါဒကံ ကတွာ ဝိပဿန္တော နစိရေနေဝ အနာဂါမိမဂ္ဂေန ကာမရာဂံ၊ သဗ္ဗံ ဝါ ကာမနဋ္ဌေန ‘‘ကာမော’’၊ ရဉ္ဇနဋ္ဌေန ‘‘ရာဂေါ’’တိ စ လဒ္ဓနာမံ တဏှံ အဂ္ဂမဂ္ဂေန ပဇဟိဿတီတိ. ဣမံ ဂါထံ သုတွာ သော ထေရော ‘‘အယံ ဒေဝတာ မယှံ ဥဿာဟဇနနတ္ထံ ဧဝမာဟာ’’တိ အပ္ပဋိဝါနဝီရိယံ အဓိဋ္ဌာယ ဝိပဿနံ ဝဍ္ဎေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၅၁.၈၅-၉၀) –

‘‘သတရံသီ နာမ ဘဂဝါ၊ သယမ္ဘူ အပရာဇိတော၊

ဝိဝေကာ ဥဋ္ဌဟိတွာန၊ ဂေါစရာယာဘိနိက္ခမိ.

‘‘ဖလဟတ္ထော အဟံ ဒိသွာ၊ ဥပဂစ္ဆိံ နရာသဘံ၊

ပသန္နစိတ္တော သုမနော၊ တာလဖလမဒါသဟံ.

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ တာယ ဒေဝတာယ ဝုတ္တဝစနံ ပတိမာနေန္တော တမေဝ ဂါထံ ဥဒါနဝသေန အဘာသိ. တဒေဝဿ ထေရဿ အညာဗျာကရဏံ အဟောသီတိ.

သိင်္ဂါလပိတုတ္ထေရဂါထာဝဏ္ဏနာ နိဋ္ဌိတာ.