၇. ယသတ္ထေရဂါထာဝဏ္ဏနာ

သုဝိလိတ္တော သုဝသနောတိ အာယသ္မတော ယသတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယာနိ ပုညာနိ ဥပစိနန္တော သုမေဓဿ ဘဂဝတော ကာလေ မဟာနုဘာဝေါ နာဂရာဇာ ဟုတွာ ဗုဒ္ဓပ္ပမုခံ ဘိက္ခုသံဃံ အတ္တနော ဘဝနံ နေတွာ မဟာဒါနံ ပဝတ္တေသိ. ဘဂဝန္တံ မဟဂ္ဃေန တိစီဝရေန အစ္ဆာဒေသိ၊ ဧကမေကဉ္စ ဘိက္ခုံ မဟဂ္ဃေနေဝ ပစ္စေကဒုဿယုဂေန သဗ္ဗေန သမဏပရိက္ခာရေန အစ္ဆာဒေသိ. သော တေန ပုညကမ္မေန ဒေဝမနုဿေသု သံသရန္တော သိဒ္ဓတ္ထဿ ဘဂဝတော ကာလေ သေဋ္ဌိပုတ္တော ဟုတွာ မဟာဗောဓိမဏ္ဍံ သတ္တဟိ ရတနေဟိ ပူဇေသိ. ကဿပဿ ဘဂဝတော ကာလေ သာသနေ ပဗ္ဗဇိတွာ သမဏဓမ္မံ အကာသိ. ဧဝံ သုဂတီသုယေဝ သံသရန္တော ဣမသ္မိံ အမှာကံ ဘဂဝတော ကာလေ ဗာရာဏသိယံ မဟာဝိဘဝဿ သေဋ္ဌိနော ပုတ္တော ဟုတွာ နိဗ္ဗတ္တိ၊ ယသော နာမ နာမေန ပရမသုခုမာလော. ‘‘တဿ တယော ပါသာဒါ’’တိ သဗ္ဗံ ခန္ဓကေ (မဟာဝ. ၂၅) အာဂတနယေန ဝေဒိတဗ္ဗံ.

သော ပုဗ္ဗဟေတုနာ စောဒိယမာနော ရတ္တိဘာဂေ နိဒ္ဒါဘိဘူတဿ ပရိဇနဿ ဝိပ္ပကာရံ ဒိသွာ သဉ္ဇာတသံဝေဂေါ သုဝဏ္ဏပါဒုကာရူဠှောဝ ဂေဟတော နိဂ္ဂတော ဒေဝတာဝိဝဋေန နဂရဒွါရေန နိက္ခမိတွာ ဣသိပတနသမီပံ ဂတော ‘‘ဥပဒ္ဒုတံ ဝတ၊ ဘော၊ ဥပဿဋ္ဌံ ဝတ၊ ဘော’’တိ အာဟ. တေန သမယေန ဘဂဝတာ ဣသိပတနေ ဝိဟရန္တေန တဿေဝ အနုဂ္ဂဏှနတ္ထံ အဗ္ဘောကာသေ စင်္ကမန္တေန ‘‘ဧဟိ၊ ယသ၊ ဣဒံ အနုပဒ္ဒုတံ၊ ဣဒံ အနုပဿဋ္ဌ’’န္တိ ဝုတ္တော၊ ‘‘အနုပဒ္ဒုတံ အနုပဿဋ္ဌံ ကိရ အတ္ထီ’’တိ သောမနဿဇာတော သုဝဏ္ဏပါဒုကာ ဩရုယှ ဘဂဝန္တံ ဥပသင်္ကမိတွာ ဧကမန္တံ နိသိန္နော သတ္ထာရာ အနုပုဗ္ဗိကထံ ကထေတွာ သစ္စဒေသနာယ ကတာယ သစ္စပရိယောသာနေ သောတာပန္နော ဟုတွာ ဂဝေသနတ္ထံ အာဂတဿ ပိတု ဘဂဝတာ သစ္စဒေသနာယ ကရိယမာနာယ အရဟတ္တံ သစ္ဆာကာသိ. တေန ဝုတ္တံ အပဒါနေ (အပ. ထေရ ၁.၄၀.၄၅၆-၄၈၃) –

‘‘မဟာသမုဒ္ဒံ ဩဂ္ဂယှ၊ ဘဝနံ မေ သုနိမ္မိတံ၊

သုနိမ္မိတာ ပေါက္ခရဏီ၊ စက္ကဝါကပကူဇိတာ.

‘‘မန္ဒာလကေဟိ သဉ္ဆန္နာ၊ ပဒုမုပ္ပလကေဟိ စ၊

နဒီ စ သန္ဒတေ တတ္ထ၊ သုပတိတ္ထာ မနောရမာ.

‘‘မစ္ဆကစ္ဆပသဉ္ဆန္နာ၊ နာနာဒိဇသမောတ္ထတာ၊

မယူရကောဉ္စာဘိရုဒါ၊ ကောကိလာဒီဟိ ဝဂ္ဂုဟိ.

‘‘ပါရေဝတာ ရဝိဟံသာ စ၊ စက္ကဝါကာ နဒီစရာ၊

ဒိန္ဒိဘာ သာဠိကာ စေတ္ထ၊ ပမ္မကာ ဇီဝဇီဝကာ.

‘‘ဟံသာ ကောဉ္စာပိ နဒိတာ၊ ကောသိယာ ပိင်္ဂလာ ဗဟူ၊

သတ္တရတနသမ္ပန္နာ၊ မဏိမုတ္တိကဝါလုကာ.

‘‘သဗ္ဗသောဏ္ဏမယာ ရုက္ခာ၊ နာနာဂန္ဓသမေရိတာ၊

ဥဇ္ဇောတေန္တိ ဒိဝါရတ္တိံ၊ ဘဝနံ သဗ္ဗကာလိကံ.

‘‘သဋ္ဌိတူရိယသဟဿာနိ၊ သာယံ ပါတော ပဝဇ္ဇရေ၊

သောဠသိတ္ထိသဟဿာနိ၊ ပရိဝါရေန္တိ မံ သဒါ.

‘‘အဘိနိက္ခမ္မ ဘဝနာ၊ သုမေဓံ လောကနာယကံ၊

ပသန္နစိတ္တော သုမနော၊ ဝန္ဒယိံ တံ မဟာယသံ.

‘‘သမ္ဗုဒ္ဓံ အဘိဝါဒေတွာ၊ သသံဃံ တံ နိမန္တယိံ၊

အဓိဝါသေသိ သော ဓီရော၊ သုမေဓော လောကနာယကော.

‘‘မမ ဓမ္မကထံ ကတွာ၊ ဥယျောဇေသိ မဟာမုနိ၊

သမ္ဗုဒ္ဓံ အဘိဝါဒေတွာ၊ ဘဝနံ မေ ဥပါဂမိံ.

‘‘အာမန္တယိံ ပရိဇနံ၊ သဗ္ဗေ သန္နိပတာထ ဝေါ၊

ပုဗ္ဗဏှသမယံ ဗုဒ္ဓေါ၊ ဘဝနံ အာဂမိဿတိ.

‘‘လာဘာ အမှံ သုလဒ္ဓံ နော၊ ယေ ဝသာမ တဝန္တိကေ၊

မယမ္ပိ ဗုဒ္ဓသေဋ္ဌဿ၊ ပူဇံ ကဿာမ သတ္ထုနော.

‘‘အန္နံ ပါနံ ပဋ္ဌပေတွာ၊ ကာလံ အာရောစယိံ အဟံ၊

ဝသီသတသဟဿေဟိ၊ ဥပေသိ လောကနာယကော.

‘‘ပဉ္စင်္ဂိကေဟိ တူရိယေဟိ၊ ပစ္စုဂ္ဂမနမကာသဟံ၊

သဗ္ဗသောဏ္ဏမယေ ပီဌေ၊ နိသီဒိ ပုရိသုတ္တမော.

‘‘ဥပရိစ္ဆဒနံ အာသိ၊ သဗ္ဗသောဏ္ဏမယံ တဒါ၊

ဗီဇနိယော ပဝါယန္တိ၊ ဘိက္ခုသံဃဿ အန္တရေ.

‘‘ပဟူတေနန္နပါနေန၊ ဘိက္ခုသံဃမတပ္ပယိံ၊

ပစ္စေကဒုဿယုဂဠေ၊ ဘိက္ခုသံဃဿဒါသဟံ.

‘‘ယံ ဝဒန္တိ သုမေဓောတိ၊ လောကာဟုတိပဋိဂ္ဂဟံ၊

ဘိက္ခုသံဃေ နိသီဒိတွာ၊ ဣမာ ဂါထာ အဘာသထ.

‘‘ယော မေ အန္နေန ပါနေန၊ သဗ္ဗေ ဣမေ စ တပ္ပယိံ၊

တမဟံ ကိတ္တယိဿာမိ၊ သုဏာထ မမ ဘာသတော.

‘‘အဋ္ဌာရသေ ကပ္ပသတေ၊ ဒေဝလောကေ ရမိဿတိ၊

သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ.

‘‘ဥပပဇ္ဇတိ ယံ ယောနိံ၊ ဒေဝတ္တံ အထ မာနုသံ၊

သဗ္ဗဒါ သဗ္ဗသောဝဏ္ဏံ၊ ဆဒနံ ဓာရယိဿတိ.

‘‘တိံသကပ္ပသဟဿမှိ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ.

‘‘ဘိက္ခုသံဃေ နိသီဒိတွာ၊ သီဟနာဒံ နဒိဿတိ၊

စိတကေ ဆတ္တံ ဓာရေန္တိ၊ ဟေဋ္ဌာ ဆတ္တမှိ ဍယှထ.

‘‘သာမညံ မေ အနုပ္ပတ္တံ၊ ကိလေသာ ဈာပိတာ မယာ၊

မဏ္ဍပေ ရုက္ခမူလေ ဝါ၊ သန္တာပေါ မေ န ဝိဇ္ဇတိ.

‘‘တိံသကပ္ပသဟဿမှိ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ သဗ္ဗဒါနဿိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အထ ဘဂဝါ အာယသ္မန္တံ ယသံ ဒက္ခိဏံ ဗာဟုံ ပသာရေတွာ ‘‘ဧဟိ ဘိက္ခူ’’တိ အာဟ. ဝစနသမနန္တရမေဝ ဒွင်္ဂုလမတ္တကေသမဿု အဋ္ဌပရိက္ခာရဓရော ဝဿသဋ္ဌိကတ္ထေရော ဝိယ အဟောသိ. သော အတ္တနော ပဋိပတ္တိံ ပစ္စဝေက္ခိတွာ ဥဒါနေန္တော ဧဟိဘိက္ခုဘာဝပ္ပတ္တိတော ပုရိမာဝတ္ထဝသေန –

၁၁၇. ‘‘သုဝိလိတ္တော သုဝသနော၊ သဗ္ဗာဘရဏဘူသိတော၊

တိဿော ဝိဇ္ဇာ အဇ္ဈဂမိံ၊ ကတံ ဗုဒ္ဓဿ သာသန’’န္တိ. – ဂါထံ အဘာသိ၊

တတ္ထ သုဝိလိတ္တောတိ သုန္ဒရေန ကုင်္ကုမစန္ဒနာနုလေပနေန ဝိလိတ္တဂတ္တော. သုဝသနောတိ သုဋ္ဌု မဟဂ္ဃကာသိကဝတ္ထဝသနော. သဗ္ဗာဘရဏဘူသိတောတိ သီသူပဂါဒီဟိ သဗ္ဗေဟိ အာဘရဏေဟိ အလင်္ကတော. အဇ္ဈဂမိန္တိ အဓိဂစ္ဆိံ. သေသံ ဝုတ္တနယမေဝ.

ယသတ္ထေရဂါထာဝဏ္ဏနာ နိဋ္ဌိတာ.