၈. ကိမိလတ္ထေရဂါထာဝဏ္ဏနာ

အဘိသတ္တောဝ နိပတတီတိ အာယသ္မတော ကိမိလတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ကရောန္တော ကကုသန္ဓဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတ္တော ပရိနိဗ္ဗုတေ သတ္ထရိ တဿ ဓာတုယော ဥဒ္ဒိဿ သဠလမာလာဟိ မဏ္ဍပါကာရေန ပူဇံ အကာသိ. သော တေန ပုညကမ္မေန တာဝတိံသေ နိဗ္ဗတ္တိတွာ အပရာပရံ ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ကပိလဝတ္ထုနဂရေ သာကိယရာဇကုလေ နိဗ္ဗတ္တိ၊ ကိမိလောတိဿ နာမံ အဟောသိ. သော ဝယပ္ပတ္တော ဘောဂသမ္ပတ္တိယာ သမ္ပန္နော ဝိဟရတိ. တဿ ဉာဏပရိပါကံ ဒိသွာ သံဝေဂဇနနတ္ထံ အနုပိယာယံ ဝိဟရန္တော သတ္ထာ ပဌမယောဗ္ဗနေ ဌိတံ ဒဿနီယံ ဣတ္ထိရူပံ အဘိနိမ္မိနိတွာ ပုရတော ဒဿေတွာ ပုန အနုက္ကမေန ယထာ ဇရာရောဂဝိပတ္တီဟိ အဘိဘူတာ ဒိဿတိ၊ တထာ အကာသိ. တံ ဒိသွာ ကိမိလကုမာရော အတိဝိယ သံဝေဂံ ပကာသေန္တော –

၁၁၈. ‘‘အဘိသတ္တောဝ နိပတတိ ဝယော၊ ရူပံ အညမိဝ တထေဝ သန္တံ၊

တဿေဝ သတော အဝိပ္ပဝသတော၊ အညဿေဝ သရာမိ အတ္တာန’’န္တိ. –

ဂါထံ အဘာသိ.

တတ္ထ အဘိသတ္တောဝါတိ ‘‘တွံ သီဃံ ဂစ္ဆ မာ တိဋ္ဌာ’’တိ ဒေဝေဟိ အနုသိဋ္ဌော အာဏတ္တော ဝိယ. ‘‘အဘိသဋ္ဌော ဝါ’’တိပိ ပါဌော၊ ‘‘တွံ လဟုံ ဂစ္ဆာ’’တိ ကေနစိ အဘိလာသာပိတော ဝိယာတိ အတ္ထော. နိပတတီတိ အတိပတတိ အဘိဓာဝတိ န တိဋ္ဌတိ၊ ခဏေ ခဏေ ခယဝယံ ပါပုဏာတီတိ အတ္ထော. ဝယောတိ ဗာလျယောဗ္ဗနာဒိကော သရီရဿ အဝတ္ထာဝိသေသော. ဣဓ ပနဿ ယောဗ္ဗညံ အဓိပ္ပေတံ၊ တံ ဟိဿ အဘိပတန္တံ ခီယန္တံ ဟုတွာ ဥပဋ္ဌိတံ. ရူပန္တိ ရူပသမ္ပဒါတိ ဝဒတိ. ရူပန္တိ ပန သရီရံ ‘‘အဋ္ဌိဉ္စ ပဋိစ္စ နှာရုဉ္စ ပဋိစ္စ မံသဉ္စ ပဋိစ္စ အာကာသော ပရိဝါရိတော ရူပံတွေဝ သင်္ခံ ဂစ္ဆတီ’’တိအာဒီသု (မ. နိ. ၁.၃၀၆) ဝိယ. အညမိဝ တထေဝ သန္တန္တိ ဣဒံ ရူပံ ယာဒိသံ၊ သယံ တထေဝ တေနေဝါကာရေန သန္တံ ဝိဇ္ဇမာနံ အညံ ဝိယ မယှံ ဥပဋ္ဌာတီတိ အဓိပ္ပါယော. ‘‘တဒေဝ သန္တ’’န္တိ စ ကေစိ ပဌန္တိ. တဿေဝ သတောတိ တဿေဝ မေ အနညဿ သတော သမာနဿ. အဝိပ္ပဝသတောတိ န ဝိပ္ပဝသန္တဿ၊ စိရဝိပ္ပဝါသေန ဟိ သတော အနညမ္ပိ အညံ ဝိယ ဥပဋ္ဌာတိ ဣဒမ္ပိ ဣဓ နတ္ထီတိ အဓိပ္ပါယော. အညဿေဝ သရာမိ အတ္တာနန္တိ ဣမံ မမ အတ္တဘာဝံ အညဿ သတ္တဿ ဝိယ သရာမိ ဥပဓာရေမိ သဉ္ဇာနာမီတိ အတ္ထော. တဿေဝံ အနိစ္စတံ မနသိ ကရောန္တဿ ဒဠှတရော သံဝေဂေါ ဥဒပါဒိ၊ သော သံဝေဂဇာတော သတ္ထာရံ ဥပသင်္ကမိတွာ ဓမ္မံ သုတွာ ပဋိလဒ္ဓသဒ္ဓေါ ပဗ္ဗဇိတွာ ဝိပဿနံ ပဋ္ဌပေတွာ နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၂.၅၆.၄၂-၄၈) –

‘‘နိဗ္ဗုတေ ကကုသန္ဓမှိ၊ ဗြာဟ္မဏမှိ ဝုသီမတိ၊

ဂဟေတွာ သဠလံ မာလံ၊ မဏ္ဍပံ ကာရယိံ အဟံ.

‘‘တာဝတိံသံ ဂတော သန္တော၊ လဘိမှ ဗျမှမုတ္တမံ၊

အညေ ဒေဝေတိရောစာမိ၊ ပုညကမ္မဿိဒံ ဖလံ.

‘‘ဒိဝါ ဝါ ယဒိ ဝါ ရတ္တိံ၊ စင်္ကမန္တော ဌိတော စဟံ၊

ဆန္နော သဠလပုပ္ဖေဟိ၊ ပုညကမ္မဿိဒံ ဖလံ.

‘‘ဣမသ္မိံယေဝ ကပ္ပမှိ၊ ယံ ဗုဒ္ဓမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာပိ ထေရော အတ္တနော ပုရိမုပ္ပန္နံ အနိစ္စတာမနသိကာရံ ဝိဘာဝေန္တော တမေဝ ဂါထံ ပစ္စုဒါဟာသိ. တေနေတံ ဣမဿ ထေရဿ အညာဗျာကရဏမ္ပိ အဟောသိ.

ကိမိလတ္ထေရဂါထာဝဏ္ဏနာ နိဋ္ဌိတာ.