၆. ပါရာပရိယတ္ထေရဂါထာဝဏ္ဏနာ

ဆဖဿာယတနေ ဟိတွာတိ အာယသ္မတော ပါရာပရိယတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ဥပစိနန္တော ပိယဒဿိဿ ဘဂဝတော ကာလေ နေသာဒယောနိယံ နိဗ္ဗတ္တိတွာ တဿ ဝိညုတံ ပတ္တဿ ဝိစရဏဋ္ဌာနေ အညတရသ္မိံ ဝနသဏ္ဍေ ပိယဒဿီ ဘဂဝါ တံ အနုဂ္ဂဏှိတုံ နိရောဓသမာပတ္တိံ သမာပဇ္ဇိတွာ နိသီဒိ. သော စ မိဂေ ပရိယေသန္တော တံ ဌာနံ ဂတော သတ္ထာရံ ဒိသွာ ပသန္နမာနသော ဘဂဝန္တံ အန္တော ကတွာ ကတံ သာခါမဏ္ဍပံ ပဒုမပုပ္ဖေဟိ ကူဋာဂါရာကာရေန သဉ္ဆာဒေတွာ ဥဠာရံ ပီတိသောမနဿံ ပဋိသံဝေဒေန္တော သတ္တာဟံ နမဿမာနော အဋ္ဌာသိ. ဒိဝသေ ဒိဝသေ စ မိလာတမိလာတာနိ အပနေတွာ အဘိနဝေဟိ ဆာဒေသိ. သတ္ထာ သတ္တာဟဿ အစ္စယေန နိရောဓတော ဝုဋ္ဌဟိတွာ ဘိက္ခုသံဃံ အနုဿရိ. တာဝဒေဝ အသီတိသဟဿမတ္တာ ဘိက္ခူ သတ္ထာရံ ပရိဝါရေသုံ. ‘‘မဓုရဓမ္မကထံ သုဏိဿာမာ’’တိ ဒေဝတာ သန္နိပတိံသု၊ မဟာ သမာဂမော အဟောသိ. သတ္ထာ အနုမောဒနံ ကရောန္တော တဿ ဒေဝမနုဿေသု ဘာဝိနိံ သမ္ပတ္တိံ ဣမသ္မိံ ဗုဒ္ဓုပ္ပါဒေ သာဝကဗောဓိဉ္စ ဗျာကရိတွာ ပက္ကာမိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ရာဇဂဟေ ဗြာဟ္မဏကုလေ နိဗ္ဗတ္တိတွာ ဝိညုတံ ပတ္တော တိဏ္ဏံ ဝေဒါနံ ပါရဂူ ဟုတွာ ပရာပရဂေါတ္တတာယ ပါရာပရိယောတိ လဒ္ဓသမညော ဗဟူ ဗြာဟ္မဏေ မန္တေ ဝါစေန္တော သတ္ထု ရာဇဂဟဂမနေ ဗုဒ္ဓါနုဘာဝံ ဒိသွာ ပဋိလဒ္ဓသဒ္ဓေါ ပဗ္ဗဇိတွာ ဝိပဿနာယ ကမ္မံ ကရောန္တော နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၄၀.၃၅၃-၃၈၅) –

‘‘ပိယဒဿီ နာမ ဘဂဝါ၊ သယမ္ဘူ လောကနာယကော၊

ဝိဝေကကာမော သမ္ဗုဒ္ဓေါ၊ သမာဓိကုသလော မုနိ.

‘‘ဝနသဏ္ဍံ သမောဂ္ဂယှ၊ ပိယဒဿီ မဟာမုနိ၊

ပံသုကူလံ ပတ္ထရိတွာ၊ နိသီဒိ ပုရိသုတ္တမော.

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ၊

ပသဒံ မိဂမေသန္တော၊ အာဟိဏ္ဍာမိ အဟံ တဒါ.

‘‘တတ္ထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ၊

ပုပ္ဖိတံ သာလရာဇံဝ၊ သတရံသိံဝ ဥဂ္ဂတံ.

‘‘ဒိသွာနဟံ ဒေဝဒေဝံ၊ ပိယဒဿိံ မဟာယသံ၊

ဇာတဿရံ သမောဂ္ဂယှ၊ ပဒုမံ အာဟရိံ တဒါ.

‘‘အာဟရိတွာန ပဒုမံ၊ သတပတ္တံ မနောရမံ၊

ကူဋာဂါရံ ကရိတွာန၊ ဆာဒယိံ ပဒုမေနဟံ.

‘‘အနုကမ္ပကော ကာရုဏိကော၊ ပိယဒဿီ မဟာမုနိ၊

သတ္တရတ္တိန္ဒိဝံ ဗုဒ္ဓေါ၊ ကူဋာဂါရေ ဝသီ ဇိနော.

‘‘ပုရာဏံ ဆဍ္ဍယိတွာန၊ နဝေန ဆာဒယိံ အဟံ၊

အဉ္ဇလိံ ပဂ္ဂဟေတွာန၊ အဋ္ဌာသိံ တာဝဒေ အဟံ.

‘‘ဝုဋ္ဌဟိတွာ သမာဓိမှာ၊ ပိယဒဿီ မဟာမုနိ၊

ဒိသံ အနုဝိလောကေန္တော၊ နိသီဒိ လောကနာယကော.

‘‘တဒါ သုဒဿနော နာမ၊ ဥပဋ္ဌာကော မဟိဒ္ဓိကော၊

စိတ္တမညာယ ဗုဒ္ဓဿ၊ ပိယဒဿိဿ သတ္ထုနော.

‘‘အသီတိယာ သဟဿေဟိ၊ ဘိက္ခူဟိ ပရိဝါရိတော၊

ဝနန္တေ သုခမာသီနံ၊ ဥပေသိ လောကနာယကံ.

‘‘ယာဝတာ ဝနသဏ္ဍမှိ၊ အဓိဝတ္ထာ စ ဒေဝတာ၊

ဗုဒ္ဓဿ စိတ္တမညာယ၊ သဗ္ဗေ သန္နိပတုံ တဒါ.

‘‘သမာဂတေသု ယက္ခေသု၊ ကုမ္ဘဏ္ဍေ သဟရက္ခသေ၊

ဘိက္ခုသံဃေ စ သမ္ပတ္တေ၊ ဂါထာ ပဗျာဟရီ ဇိနော.

‘‘ထောမံ သတ္တာဟံ ပူဇေသိ၊ အာဝါသဉ္စ အကာသိ မေ၊

တမဟံ ကိတ္တယိဿာမိ၊ သုဏာထ မမ ဘာသတော.

‘‘သုဒုဒ္ဒသံ သုနိပုဏံ၊ ဂမ္ဘီရံ သုပ္ပကာသိတံ၊

ဉာဏေန ကိတ္တယိဿာမိ၊ သုဏာထ မမ ဘာသတော.

‘‘စတုဒ္ဒသာနိ ကပ္ပါနိ၊ ဒေဝရဇ္ဇံ ကရိဿတိ၊

ကူဋာဂါရံ မဟန္တဿ၊ ပဒ္မပုပ္ဖေဟိ ဆာဒိတံ.

‘‘အာကာသေ ဓာရယိဿတိ၊ ပုပ္ဖကမ္မဿိဒံ ဖလံ၊

စတုဗ္ဗီသေ ကပ္ပသတေ၊ ဝေါကိဏ္ဏံ သံသရိဿတိ.

‘‘တတ္ထ ပုပ္ဖမယံ ဗျမှံ၊ အာကာသေ ဓာရယိဿတိ၊

ယထာ ပဒုမပတ္တမှိ၊ တောယံ န ဥပလိမ္ပတိ.

‘‘တထေဝီမဿ ဉာဏမှိ၊ ကိလေသာ နောပလိမ္ပရေ၊

မနသာ ဝိနိဝဋ္ဋေတွာ၊ ပဉ္စ နီဝရဏေ အယံ.

‘‘စိတ္တံ ဇနေတွာ နေက္ခမ္မေ၊ အဂါရာ ပဗ္ဗဇိဿတိ၊

တတော ပုပ္ဖမယေ ဗျမှေ၊ ဓာရေန္တေ နိက္ခမိဿတိ.

‘‘ရုက္ခမူလေ ဝသန္တဿ၊ နိပကဿ သတီမတော၊

တတ္ထ ပုပ္ဖမယံ ဗျမှံ၊ မတ္ထကေ ဓာရယိဿတိ.

‘‘စီဝရံ ပိဏ္ဍပါတဉ္စ၊ ပစ္စယံ သယနာသနံ၊

ဒတွာန ဘိက္ခုသံဃဿ၊ နိဗ္ဗာယိဿတိနာသဝေါ.

‘‘ကူဋာဂါရေန စရတာ၊ ပဗ္ဗဇ္ဇံ အဘိနိက္ခမိံ၊

ရုက္ခမူလေ ဝသန္တမ္ပိ၊ ကူဋာဂါရံ ဓရီယတိ.

‘‘စီဝရေ ပိဏ္ဍပါတေ စ၊ စေတနာ မေ န ဝိဇ္ဇတိ၊

ပုညကမ္မေန သံယုတ္တော၊ လဘာမိ ပရိနိဋ္ဌိတံ.

‘‘ဂဏနာတော အသင်္ခေယျာ၊ ကပ္ပကောဋီ ဗဟူ မမ၊

ရိတ္တကာ တေ အတိက္ကန္တာ၊ ပမုတ္တာ လောကနာယကာ.

‘‘အဋ္ဌာရသေ ကပ္ပသတေ၊ ပိယဒဿီ ဝိနာယကော၊

တမဟံ ပယိရုပါသိတွာ၊ ဣမံ ယောနိံ ဥပါဂတော.

‘‘ဣဓ ပဿာမိ သမ္ဗုဒ္ဓံ၊ အနောမံ နာမ စက္ခုမံ၊

တမဟံ ဥပဂန္တွာန၊ ပဗ္ဗဇိံ အနဂါရိယံ.

‘‘ဒုက္ခဿန္တကရော ဗုဒ္ဓေါ၊ မဂ္ဂံ မေ ဒေသယီ ဇိနော၊

တဿ ဓမ္မံ သုဏိတွာန၊ ပတ္တောမှိ အစလံ ပဒံ.

‘‘တောသယိတွာန သမ္ဗုဒ္ဓံ၊ ဂေါတမံ သကျပုင်္ဂဝံ၊

သဗ္ဗာသဝေ ပရိညာယ၊ ဝိဟရာမိ အနာသဝေါ.

‘‘အဋ္ဌာရသေ ကပ္ပသတေ၊ ယံ ဗုဒ္ဓမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အတ္တနော ပဋိပတ္တိံ ပစ္စဝေက္ခိတွာ သဉ္ဇာတသောမနဿော ဥဒါနဝသေန –

၁၁၆. ‘‘ဆဖဿာယတနေ ဟိတွာ၊ ဂုတ္တဒွါရော သုသံဝုတော၊

အဃမူလံ ဝမိတွာန၊ ပတ္တော မေ အာသဝက္ခယော’’တိ. – ဂါထံ အဘာသိ၊

တတ္ထ ဆဖဿာယတနေ ဟိတွာတိ စက္ခုသမ္ဖဿာဒီနံ ဆန္နံ သမ္ဖဿာနံ ဥပ္ပတ္တိဋ္ဌာနတာယ ‘‘ဖဿာယတနာနီ’’တိ လဒ္ဓနာမာနိ စက္ခာဒီနိ ဆ အဇ္ဈတ္တိကာယတနာနိ တပ္ပဋိဗဒ္ဓသံကိလေသပ္ပဟာနဝသေန ပဟာယ. ဂုတ္တဒွါရော သုသံဝုတောတိ တတော ဧဝ စက္ခုဒွါရာဒီနံ ဂုတ္တတ္တာ၊ တတ္ထ ပဝတ္တနကာနံ အဘိဇ္ဈာဒီနံ ပါပဓမ္မာနံ ပဝေသနနိဝါရဏေန သတိကဝါဋေန သုဋ္ဋု ပိဟိတတ္တာ ဂုတ္တဒွါရော သုသံဝုတော. အထ ဝါ မနစ္ဆဋ္ဌာနံ ဆန္နံ ဒွါရာနံ ဝုတ္တနယေန ရက္ခိတတ္တာ ဂုတ္တဒွါရော၊ ကာယာဒီဟိ သုဋ္ဌု သညတတ္တာ သုသံဝုတောတိ ဧဝမေတ္ထ အတ္ထော ဝေဒိတဗ္ဗော. အဃမူလံ ဝမိတွာနာတိ အဃဿ ဝဋ္ဋဒုက္ခဿ မူလဘူတံ အဝိဇ္ဇာဘဝတဏှာသင်္ခါတံ ဒေါသံ၊ သဗ္ဗံ ဝါ ကိလေသဒေါသံ အရိယမဂ္ဂသင်္ခါတဝမနယောဂပါနေန ဥဂ္ဂိရိတွာ သန္တာနတော ဗဟိ ကတွာ၊ ဗဟိကရဏဟေတု ဝါ. ပတ္တော မေ အာသဝက္ခယောတိ ကာမာသဝါဒယော အာသဝါ ဧတ္ထ ခီယန္တိ၊ တေသံ ဝါ ခယေန ပတ္တဗ္ဗောတိ အာသဝက္ခယော၊ နိဗ္ဗာနံ အရဟတ္တဉ္စ. သော အာသဝက္ခယော ပတ္တော အဓိဂတောတိ ဥဒါနဝသေန အညံ ဗျာကာသိ.

ပါရာပရိယတ္ထေရဂါထာဝဏ္ဏနာ နိဋ္ဌိတာ.