၉. သင်္ဃရက္ခိတတ္ထေရဂါထာဝဏ္ဏနာ

န နူနာယံ ပရမဟိတာနုကမ္ပိနောတိ အာယသ္မတော သင်္ဃရက္ခိတတ္ထေရဿ ဂါထာ. ကာ ဥပ္ပတ္တိ? သောပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ပုညာနိ ဥပစိနန္တော ဣတော စတုနဝုတေ ကပ္ပေ ကုလဂေဟေ နိဗ္ဗတ္တိတွာ ဝိညုတံ ပတ္တော ဧကဒိဝသံ ပဗ္ဗတပါဒေ ဝသန္တေ သတ္တ ပစ္စေကသမ္ဗုဒ္ဓေ ဒိသွာ ပသန္နမာနသော ကဒမ္ဗပုပ္ဖါနိ ဂဟေတွာ ပူဇေသိ. သော တေန ပုညကမ္မေန ဒေဝလောကေ နိဗ္ဗတ္တိတွာ အပရာပရံ ပုညာနိ ကတွာ သုဂတီသုယေဝ သံသရန္တော ဣမသ္မိံ ဗုဒ္ဓုပ္ပါဒေ သာဝတ္ထိယံ ဣဗ္ဘကုလေ နိဗ္ဗတ္တိ၊ တဿ သင်္ဃရက္ခိတောတိ နာမံ အဟောသိ. သော ဝိညုတံ ပတ္တော ပဋိလဒ္ဓသဒ္ဓေါ ပဗ္ဗဇိတွာ ကမ္မဋ္ဌာနံ ဂဟေတွာ အညတရံ ဘိက္ခုံ သဟာယံ ကတွာ အရညေ ဝိဟရတိ. ထေရဿ ဝသနဋ္ဌာနတော အဝိဒူရေ ဝနဂုမ္ဗေ ဧကာ မိဂီ ဝိဇာယိတွာ တရုဏံ ဆာပံ ရက္ခန္တီ ဆာတဇ္ဈတ္တာပိ ပုတ္တသိနေဟေန ဒူရေ ဂေါစရာယ န ဂစ္ဆတိ၊ အာသန္နေ စ တိဏောဒကဿ အလာဘေန ကိလမတိ. တံ ဒိသွာ ထေရော၊ ‘‘အဟော ဝတာယံ လောကော တဏှာဗန္ဓနဗဒ္ဓေါ မဟာဒုက္ခံ အနုဘဝတိ၊ န တံ ဆိန္ဒိတုံ သက္ကောတီ’’တိ သံဝေဂဇာတော တမေဝ အင်္ကုသံ ကတွာ ဝိပဿနံ ဝဍ္ဎေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၁၆.၃၀-၃၄) –

‘‘ဟိမဝန္တဿာဝိဒူရေ၊ ကုက္ကုဋော နာမ ပဗ္ဗတော၊

တမှိ ပဗ္ဗတပါဒမှိ၊ သတ္တ ဗုဒ္ဓါ ဝသန္တိ တေ.

‘‘ကဒမ္ဗံ ပုပ္ဖိတံ ဒိသွာ၊ ဒီပရာဇံဝ ဥဂ္ဂတံ၊

ဥဘော ဟတ္ထေဟိ ပဂ္ဂယှ၊ သတ္တ ဗုဒ္ဓေ သမောကိရိံ.

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ဒွေနဝုတေ ဣတော ကပ္ပေ၊ သတ္တာသုံ ပုပ္ဖနာမကာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အတ္တနော ဒုတိယကံ ဘိက္ခုံ မိစ္ဆာဝိတက္ကဗဟုလံ ဝိဟရန္တံ ဉတွာ တမေဝ မိဂိံ ဥပမံ ကရိတွာ တံ ဩဝဒန္တော –

၁၀၉. ‘‘န နူနာယံ ပရမဟိတာနုကမ္ပိနော၊ ရဟောဂတော အနုဝိဂဏေတိ သာသနံ၊

တထာဟယံ ဝိဟရတိ ပါကတိန္ဒြိယော၊ မိဂီ ယထာ တရုဏဇာတိကာ ဝနေ’’တိ. –

ဂါထံ အဘာသိ.

တတ္ထ န နူနာယန္တိ န-ဣတိ ပဋိသေဓေ နိပါတော. နူနာတိ ပရိဝိတက္ကေ. နူန အယန္တိ ပဒစ္ဆေဒေါ. ပရမဟိတာနုကမ္ပိနောတိ ပရမံ အတိဝိယ၊ ပရမေန ဝါ အနုတ္တရေန ဟိတေန သတ္တေ အနုကမ္ပနသီလဿ ဘဂဝတော. ရဟောဂတောတိ ရဟသိ ဂတော၊ သုညာဂါရဂတော ကာယဝိဝေကယုတ္တောတိ အတ္ထော. အနုဝိဂဏေတီတိ ဧတ္ထ ‘‘န နူနာ’’တိ ပဒဒွယံ အာနေတွာ သမ္ဗန္ဓိတဗ္ဗံ ‘‘နာနုဝိဂဏေတိ နူနာ’’တိ၊ န စိန္တေသိ မညေ၊ ‘‘နာနုယုဉ္ဇတီ’’တိ တက္ကေမီတိ အတ္ထော. သာသနန္တိ ပဋိပတ္တိသာသနံ၊ စတုသစ္စကမ္မဋ္ဌာနဘာဝနန္တိ အဓိပ္ပါယော. တထာ ဟီတိ တေနေဝ ကာရဏေန၊ သတ္ထု သာသနဿ အနနုယုဉ္ဇနတော ဧဝ. အယန္တိ အယံ ဘိက္ခု. ပါကတိန္ဒြိယောတိ မနစ္ဆဋ္ဌာနံ ဣန္ဒြိယာနံ ယထာသကံ ဝိသယေသု ဝိဿဇ္ဇနတော သဘာဝဘူတဣန္ဒြိယော၊ အသံဝုတစက္ခုဒွါရာဒိကောတိ အတ္ထော. ယဿ တဏှာသင်္ဂဿ အစ္ဆိန္နတာယ သော ဘိက္ခု ပါကတိန္ဒြိယော ဝိဟရတိ၊ တဿ ဥပမံ ဒဿေန္တော ‘‘မိဂီ ယထာ တရုဏဇာတိကာ ဝနေ’’တိ အာဟ. ယထာ အယံ တရုဏသဘာဝါ မိဂီ ပုတ္တသ္နေဟဿ အစ္ဆိန္နတာယ ဝနေ ဒုက္ခံ အနုဘဝတိ၊ န တံ အတိဝတ္တတိ၊ ဧဝမယမ္ပိ ဘိက္ခု သင်္ဂဿ အစ္ဆိန္နတာယ ပါကတိန္ဒြိယော ဝိဟရန္တော ဝဋ္ဋဒုက္ခံ နာတိဝတ္တတီတိ အဓိပ္ပါယော. ‘‘တရုဏဝိဇာတိကာ’’တိ ဝါ ပါဌော. အဘိနဝပ္ပသုတာ ဗာလဝစ္ဆာတိ အတ္ထော. တံ သုတွာ သော ဘိက္ခု သဉ္ဇာတသံဝေဂေါ ဝိပဿနံ ဝဍ္ဎေတွာ နစိရဿေဝ အရဟတ္တံ ပါပုဏိ.

သင်္ဃရက္ခိတတ္ထေရဂါထာဝဏ္ဏနာ နိဋ္ဌိတာ.