၁၀. ဥသဘတ္ထေရဂါထာဝဏ္ဏနာ

နဂါ နဂဂ္ဂေသု သုသံဝိရူဠှာတိ အာယသ္မတော ဥသဘတ္ထေရဿ ဂါထာ. ကာ ဥပ္ပတိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယာနိ ပုညာနိ ကရောန္တော ဣတော ဧကတိံသေ ကပ္ပေ သိခိဿ ဘဂဝတော ကာလေ ဒေဝပုတ္တော ဟုတွာ နိဗ္ဗတ္တော ဧကဒိဝသံ သတ္ထာရံ ဒိသွာ ပသန္နမာနသော ဒိဗ္ဗပုပ္ဖေဟိ ပူဇံ အကာသိ. သာ ပုပ္ဖပူဇာ သတ္တာဟံ ပုပ္ဖမဏ္ဍပါကာရေန အဋ္ဌာသိ. ဒေဝမနုဿာနံ မဟာသမာဂမော အဟောသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ကောသလရဋ္ဌေ ဣဗ္ဘကုလေ နိဗ္ဗတ္တိ၊ တဿ ဥသဘောတိ နာမံ အဟောသိ. သော ဝိညုတံ ပတ္တော ဇေတဝနပဋိဂ္ဂဟဏေ သတ္ထရိ လဒ္ဓပ္ပသာဒေါ ပဗ္ဗဇိတွာ ကတပုဗ္ဗကိစ္စော အရညေ ပဗ္ဗတပါဒေ ဝိဟရတိ. တေန စ သမယေန ပါဝုသကာလမေဃေ အဘိပ္ပဝုဋ္ဌေ ပဗ္ဗတသိခရေသု ရုက္ခဂစ္ဆလတာယ ဃနပဏ္ဏသဏ္ဍိနော ဟောန္တိ. အထေကဒိဝသံ ထေရော လေဏတော နိက္ခမိတွာ တံ ဝနရာမဏေယျကံ ပဗ္ဗတရာမဏေယျကဉ္စ ဒိသွာ ယောနိသောမနသိကာရဝသေန ‘‘ဣမေပိ နာမ ရုက္ခာဒယော အစေတနာ ဥတုသမ္ပတ္တိယာ ဝဍ္ဎိံ ပါပုဏန္တိ၊ အထ ကသ္မာ နာဟံ ဥတုသပ္ပါယံ လဘိတွာ ဂုဏေဟိ ဝဍ္ဎိံ ပါပုဏိဿာမီ’’တိ စိန္တေန္တော –

၁၁၀. ‘‘နဂါ နဂဂ္ဂေသု သုသံဝိရူဠှာ၊ ဥဒဂ္ဂမေဃေန နဝေန သိတ္တာ၊

ဝိဝေကကာမဿ အရညသညိနော၊ ဇနေတိ ဘိယျော ဥသဘဿ ကလျတ’’န္တိ. –

ဂါထံ အဘာသိ.

တတ္ထ နဂါတိ ရုက္ခာ၊ ‘‘နာဂါ’’တိ ကေစိ ဝဒန္တိ၊ နာဂရုက္ခာတိ အတ္ထော. နဂဂ္ဂေသူတိ ပဗ္ဗတသိခရေသု. သုသံဝိရူဠှာတိ သုဋ္ဌု သမန္တတော ဝိရူဠှမူလာ ဟုတွာ ပရိတော ဥပရိ စ သမ္မဒေဝ သဉ္ဇာတသာခဂ္ဂပလ္လဝပ္ပသာခါတိ အတ္ထော. ဥဒဂ္ဂမေဃေန နဝေန သိတ္တာတိ ပဌမုပ္ပန္နေန ဥဠာရေန မဟတာ ပါဝုသမေဃေန အဘိပ္ပဝုဋ္ဌာ. ဝိဝေကကာမဿာတိ ကိလေသဝိဝိတ္တံ စိတ္တဝိဝေကံ ဣစ္ဆန္တဿ၊ အရညဝါသေန တာဝ ကာယဝိဝေကော လဒ္ဓေါ၊ ဣဒါနိ ဥပဓိဝိဝေကာဓိဂမဿ နိဿယဘူတော စိတ္တဝိဝေကော လဒ္ဓဗ္ဗောတိ တံ ပတ္ထယမာနဿ၊ ဇာဂရိယံ အနုယုဉ္ဇန္တဿာတိ အတ္ထော၊ တေနာဟ ‘‘အရညသညိနော’’တိ. အရညဝါသော နာမ သတ္ထာရာ ဝဏ္ဏိတော ထောမိတော. သော စ ခေါ ယာဝဒေဝ သမထဝိပဿနာဘာဝနာပါရိပူရိယာ၊ တသ္မာ သာ မယာ ဟတ္ထဂတာ ကာတဗ္ဗာတိ ဧဝံ အရညဂတသညိနော နေက္ခမ္မသင်္ကပ္ပဗဟုလဿာတိ အတ္ထော. ဇနေတီတိ ဥပ္ပါဒေန္တိ၊ ပုထုတ္တေ ဟိ ဣဒံ ဧကဝစနံ. ကေစိ ပန ‘‘ဇနေန္တီ’’တိ ပဌန္တိ. ဘိယျောတိ ဥပရူပရိ. ဥသဘဿာတိ အတ္တာနမေဝ ပရံ ဝိယ ဝဒတိ. ကလျတန္တိ ကလျဘာဝံ စိတ္တဿ ကမ္မညတံ ဘာဝနာယောဂျတံ. သွာယမတ္ထော ဟေဋ္ဌာ ဝုတ္တောယေဝ. ဧဝံ ထေရော ဣမံ ဂါထံ ဝဒန္တောယေဝ ဝိပဿနံ ဥဿုက္ကာပေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၁၆.၂၅-၂၉) –

‘‘ဒေဝပုတ္တော အဟံ သန္တော၊ ပူဇယိံ သိခိနာယကံ၊

မန္ဒာရဝေန ပုပ္ဖေန၊ ဗုဒ္ဓဿ အဘိရောပယိံ.

‘‘သတ္တာဟံ ဆဒနံ အာသိ၊ ဒိဗ္ဗံ မာလံ တထာဂတေ၊

သဗ္ဗေ ဇနာ သမာဂန္တွာ၊ နမဿိံသု တထာဂတံ.

‘‘ဧကတိံသေ ဣတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ဣတော စ ဒသမေ ကပ္ပေ၊ ရာဇာဟောသိံ ဇုတိန္ဓရော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အယမေဝ စ ထေရဿ အညာဗျာကရဏဂါထာ အဟောသီတိ.

ဥသဘတ္ထေရဂါထာဝဏ္ဏနာ နိဋ္ဌိတာ.

ဧကာဒသမဝဂ္ဂဝဏ္ဏနာ နိဋ္ဌိတာ.