၅. မလိတဝမ္ဘတ္ထေရဂါထာဝဏ္ဏနာ

ဥက္ကဏ္ဌိတောတိ အာယသ္မတော မလိတဝမ္ဘတ္ထေရဿ ဂါထာ. ကာ ဥပ္ပတ္တိ? အယံ ကိရ ပဒုမုတ္တရဿ ဘဂဝတော ကာလေ ဟိမဝန္တတော အဝိဒူရေ အညတရသ္မိံ ဇာတဿရေ သကုဏော ဟုတွာ နိဗ္ဗတ္တိ၊ ပဒုမုတ္တရော ဘဂဝါ တံ အနုဂ္ဂဏှန္တော တတ္ထ ဂန္တွာ ဇာတဿရတီရေ စင်္ကမတိ. သကုဏော ဘဂဝန္တံ ဒိသွာ ပသန္နမာနသော သရေ ကုမုဒါနိ ဂဟေတွာ ဘဂဝန္တံ ပူဇေသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ကုရုကစ္ဆနဂရေ အညတရဿ ဗြာဟ္မဏဿ ပုတ္တော ဟုတွာ နိဗ္ဗတ္တိ၊ မလိတဝမ္ဘောတိဿ နာမံ အဟောသိ. သော ဝိညုတံ ပတ္တော ပစ္ဆာဘူမဟာထေရံ ဥပသင်္ကမိတွာ တဿ သန္တိကေ ဓမ္မံ သုတွာ ပဋိလဒ္ဓသဒ္ဓေါ ပဗ္ဗဇိတွာ ဝိပဿနာယ ကမ္မံ ကရောန္တော ဝိဟရတိ. တဿ စ အယံ သဘာဝေါ၊ ယတ္ထ ဘောဇနသပ္ပါယော ဒုလ္လဘော၊ ဣတရေ သုလဘာ၊ တတော န ပက္ကမတိ. ယတ္ထ ပန ဘောဇနသပ္ပါယော သုလဘော၊ ဣတရေ ဒုလ္လဘာ၊ တတ္ထ န ဝသတိ ပက္ကမတေဝ. ဧဝံ ဝိဟရန္တော စ ဟေတုသမ္ပန္နတာယ မဟာပုရိသဇာတိကတာယ စ နစိရဿေဝ ဝိပဿနံ ဝဍ္ဎေတွာ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၁၆.၅၁-၅၇) –

‘‘ဟိမဝန္တဿာဝိဒူရေ၊ မဟာဇာတဿရော အဟု၊

ပဒုမုပ္ပလသဉ္ဆန္နော၊ ပုဏ္ဍရီကသမောတ္ထဋော.

‘‘ကုကုတ္ထော နာမ နာမေန၊ တတ္ထာသိံ သကုဏော တဒါ၊

သီလဝါ ဗုဒ္ဓိသမ္ပန္နော၊ ပုညာပုညေသု ကောဝိဒေါ.

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော၊

ဇာတဿရဿာဝိဒူရေ၊ သဉ္စရိတ္ထ မဟာမုနိ.

‘‘ဇလဇံ ကုမုဒံ ဆေတွာ၊ ဥပနေသိံ မဟေသိနော၊

မမ သင်္ကပ္ပမညာယ၊ ပဋိဂ္ဂဟိ မဟာမုနိ.

‘‘တဉ္စ ဒါနံ ဒဒိတွာန၊ သုက္ကမူလေန စောဒိတော၊

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ.

‘‘သောဠသေတော ကပ္ပသတေ၊ အာသုံ ဝရုဏနာမကာ၊

အဋ္ဌ ဧတေ ဇနာဓိပါ၊ စက္ကဝတ္တီ မဟဗ္ဗလာ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အတ္တနော ပဋိပတ္တိံ ပစ္စဝေက္ခိတွာ ဥဒါနေန္တော –

၁၀၅. ‘‘ဥက္ကဏ္ဌိတောပိ န ဝသေ၊ ရမမာနောပိ ပက္ကမေ၊

န တွေဝါနတ္ထသံဟိတံ၊ ဝသေ ဝါသံ ဝိစက္ခဏော’’တိ. – ဂါထံ အဘာသိ၊

တတ္ထ ဥက္ကဏ္ဌိတောပိ န ဝသေတိ ယသ္မိံ အာဝါသေ ဝသန္တဿ မေ ဘောဇနသပ္ပါယာလာဘေန အဓိကုသလေသု ဓမ္မေသု ဥက္ကဏ္ဌာ အနဘိရတိ ဥပ္ပဇ္ဇတိ၊ တတ္ထ ဥက္ကဏ္ဌိတောပိ ဝသာမိယေဝ ဣတရသပ္ပါယလာဘေန န ပက္ကမေ န ပက္ကမာမိ. န ဝသေတိ ဧတ္ထ န-ကာရေနပိ ပက္ကမေတိပဒံ သမ္ဗန္ဓိတဗ္ဗံ. ရမမာနောပိ ပက္ကမေတိ ယသ္မိံ ပန အာဝါသေ ဝသန္တဿ မေ ပစ္စယဝေကလ္လာဘာဝေန နတ္ထိ ဥက္ကဏ္ဌာ၊ အညဒတ္ထု အဘိရမာမိ၊ ဧဝံ အဘိရမမာနောပိ အဝသေသသပ္ပါယာလာဘေန တတော ပက္ကမေ၊ န ဝသေယျံ. ဧဝံ ပဋိပဇ္ဇန္တောဝါဟံ နစိရဿေဝ သကတ္ထံ ပစ္စုပါဒိန္တိ. အယဉ္စေတ္ထ အတ္တပဋိပတ္တိပစ္စဝေက္ခဏာယံ ယောဇနာ. ပရဿ ဩဝါဒဒါနေ ပန ဝသေယျ န ပက္ကမေယျာတိ ဝိဓာနဝသေန ယောဇေတဗ္ဗံ. န တွေဝါနတ္ထသံဟိတံ၊ ဝသေ ဝါသံ ဝိစက္ခဏောတိ ယသ္မိံ အာဝါသေ ပစ္စယာ သုလဘာ၊ သမဏဓမ္မော န ပါရိပူရိံ ဂစ္ဆတိ၊ ယသ္မိဉ္စ အာဝါသေ ပစ္စယာ ဒုလ္လဘာ၊ သမဏဓမ္မောပိ ပါရိပူရိံ န ဂစ္ဆတိ၊ ဧဝရူပေါ အာဝါသော ဣဓ အနတ္ထသံဟိတော နာမ အဝဍ္ဎိသဟိတောတိ ကတွာ. ဧဝရူပံ ဝါသံ ဝိစက္ခဏော ဝိညုဇာတိကော သကတ္ထံ ပရိပူရေတုကာမော နတွေဝ ဝသေယျ. ယတ္ထ ပန ပဉ္စင်္ဂသမန္နာဂတော အာဝါသော လဗ္ဘတိ၊ သတ္တပိ သပ္ပါယာ လဗ္ဘန္တိ၊ တတ္ထေဝ ဝသေယျာတိ အတ္ထော.

မလိတဝမ္ဘတ္ထေရဂါထာဝဏ္ဏနာ နိဋ္ဌိတာ.