၃. ဗန္ဓုရတ္ထေရဂါထာဝဏ္ဏနာ

နာဟံ ဧတေန အတ္ထိကောတိ အာယသ္မတော ဗန္ဓုရတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော သိဒ္ဓတ္ထဿ ဘဂဝတော ကာလေ အညတရဿ ရညော အန္တေပုရေ ဂေါပကော ဟုတွာ ဧကဒိဝသံ ဘဂဝန္တံ သပရိသံ ရာဇင်္ဂဏေန ဂစ္ဆန္တံ ဒိသွာ ပသန္နစိတ္တော ကဏဝေရပုပ္ဖါနိ ဂဟေတွာ သသံဃံ လောကနာယကံ ပူဇေသိ. သော တေန ပုညကမ္မေန ဒေဝလောကေ နိဗ္ဗတ္တိတွာ အပရာပရံ သုဂတီသုယေဝ သံသရန္တော ဣမသ္မိံ ဗုဒ္ဓုပ္ပါဒေ သီလဝတီနဂရေ သေဋ္ဌိပုတ္တော ဟုတွာ နိဗ္ဗတ္တိ၊ ဗန္ဓုရောတိဿ နာမံ အဟောသိ. သော ဝိညုတံ ပတ္တော ကေနစိဒေဝ ကရဏီယေန သာဝတ္ထိယံ ဂတော ဥပါသကေဟိ သဒ္ဓိံ ဝိဟာရံ ဂတော သတ္ထု ဓမ္မဒေသနံ သုတွာ ပဋိလဒ္ဓသဒ္ဓေါ ပဗ္ဗဇိတွာ ဉာဏဿ ပရိပါကတ္တာ ဝိပဿနံ ပဋ္ဌပေတွာ နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၁၇.၇-၁၂) –

‘‘သိဒ္ဓတ္ထော နာမ ဘဂဝါ၊ လောကဇေဋ္ဌော နရာသဘော၊

ပုရက္ခတော သာဝကေဟိ၊ နဂရံ ပဋိပဇ္ဇထ.

‘‘ရညော အန္တေပုရေ အာသိံ၊ ဂေါပကော အဘိသမ္မတော၊

ပါသာဒေ ဥပဝိဋ္ဌောဟံ၊ အဒ္ဒသံ လောကနာယကံ.

‘‘ကဏဝေရံ ဂဟေတွာန၊ ဘိက္ခုသံဃေ သမောကိရိံ၊

ဗုဒ္ဓဿ ဝိသုံ ကတွာန၊ တတော ဘိယျော သမောကိရိံ.

‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘သတ္တာသီတိမှိတော ကပ္ပေ၊ စတုရာသုံ မဟိဒ္ဓိကာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ ကတညုဘာဝေ ဌတွာ အတ္တနော ဥပကာရဿ ရညော ပစ္စုပကာရံ ကာတုံ သီလဝတီနဂရံ ဂန္တွာ ရညော ဓမ္မံ ဒေသေန္တော သစ္စာနိ ပကာသေသိ. ရာဇာ သစ္စပရိယောသာနေ သောတာပန္နော ဟုတွာ အတ္တနော နဂရေ သုဒဿနံ နာမ မဟန္တံ ဝိဟာရံ ကာရေတွာ ထေရဿ နိယျာတေသိ. မဟာလာဘသက္ကာရော အဟောသိ. ထေရော ဝိဟာရံ သဗ္ဗဉ္စ လာဘသက္ကာရံ သံဃဿ နိယျာတေတွာ သယံ ပုရိမနိယာမေနေဝ ပိဏ္ဍာယ စရိတွာ ယာပေန္တော ကတိပါဟံ တတ္ထ ဝသိတွာ သာဝတ္ထိံ ဂန္တုကာမော အဟောသိ. ဘိက္ခူ၊ ‘‘ဘန္တေ၊ တုမှေ ဣဓေဝ ဝသထ၊ သစေ ပစ္စယေဟိ ဝေကလ္လံ၊ မယံ တံ ပရိပူရေဿာမာ’’တိ အာဟံသု. ထေရော၊ ‘‘န မယှံ၊ အာဝုသော၊ ဥဠာရေဟိ ပစ္စယေဟိ အတ္ထော အတ္ထိ၊ ဣတရီတရေဟိ ပစ္စယေဟိ ယာပေမိ၊ ဓမ္မရသေနေဝမှိ တိတ္တော’’တိ ဒဿေန္တော –

၁၀၃. ‘‘နာဟံ ဧတေန အတ္ထိကော၊ သုခိတော ဓမ္မရသေန တပ္ပိတော၊

ပိတွာ ရသဂ္ဂမုတ္တမံ၊ န စ ကာဟာမိ ဝိသေန သန္ထဝ’’န္တိ. –

ဂါထံ အဘာသိ.

တတ္ထ နာဟံ ဧတေန အတ္ထိကောတိ ယေန မံ တုမှေ တပ္ပေတုကာမာ ‘‘ပရိပူရေဿာမာ’’တိ ဝဒထ၊ ဧတေန အာမိသလာဘေန ပစ္စယာမိသရသေန နာဟံ အတ္ထိကော၊ မယှံ ဧတေန အတ္ထော နတ္ထိ၊ သန္တုဋ္ဌိ ပရမံ သုခန္တိ ဣတရီတရေဟေဝ ပစ္စယေဟိ ယာပေမီတိ အတ္ထော. ဣဒါနိ တေန အနတ္ထိကဘာဝေ ပဓာနကာရဏံ ဒဿေန္တော အာဟ ‘‘သုခိတော ဓမ္မရသေန တပ္ပိတော’’တိ. သတ္တတိံသဗောဓိပက္ခိယဓမ္မရသေန စေဝ နဝဝိဓလောကုတ္တရဓမ္မရသေန စ တပ္ပိတော ပီဏိတော သုခိတော ဥတ္တမေန သုခေန သုဟိတောတိ အတ္ထော. ပိတွာ ရသဂ္ဂမုတ္တမန္တိ သဗ္ဗရသေသု အဂ္ဂံ သေဋ္ဌံ တတောယေဝ ဥတ္တမံ ယထာဝုတ္တံ ဓမ္မရသံ ပိဝိတွာ ဌိတော၊ တေနာဟ – ‘‘သဗ္ဗရသံ ဓမ္မရသော ဇိနာတီ’’တိ (ဓ. ပ. ၃၅၄). န စ ကာဟာမိ ဝိသေန သန္ထဝန္တိ ဧဝရူပံ ရသုတ္တမံ ဓမ္မရသံ ပိဝိတွာ ဌိတော ဝိသေန ဝိသသဒိသေန ဝိသရသေန သန္ထဝံ သံသဂ္ဂံ န ကရိဿာမိ၊ တထာကရဏဿ ကာရဏံ နတ္ထီတိ အတ္ထော.

ဗန္ဓုရတ္ထေရဂါထာဝဏ္ဏနာ နိဋ္ဌိတာ.