၁၀. (ဒုတိယ) ဒေဝသဘတ္ထေရဂါထာဝဏ္ဏနာ

သမ္မပ္ပဓာနသမ္ပန္နောတိ အာယသ္မတော ဒေဝသဘတ္ထေရဿ ဂါထာ. ကာ ဥပ္ပတ္တိ? အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယံ ကုသလံ ဥပစိနန္တော သိခိဿ ဘဂဝတော ကာလေ ကုလဂေဟေ နိဗ္ဗတ္တိတွာ ဝိညုတံ ပတ္တော ဧကဒိဝသံ သိခိံ ဘဂဝန္တံ ဒိသွာ ပသန္နမာနသော ဗန္ဓုဇီဝကပုပ္ဖေဟိ ပူဇံ အကာသိ. သော တေန ပုညကမ္မေန ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပါဒေ ကပိလဝတ္ထုသ္မိံ သကျရာဇကုလေ နိဗ္ဗတ္တိ၊ တဿ ဒေဝသဘောတိ နာမံ အဟောသိ. သော ဝယပ္ပတ္တော စုမ္ဗဋကလဟဝူပသမနတ္ထံ သတ္ထရိ အာဂတေ ဗုဒ္ဓါနုဘာဝံ ဒိသွာ ပသန္နမာနသော သရဏေသု ပတိဋ္ဌိတော ပုန နိဂြောဓာရာမေ သတ္ထရိ ဝိဟရန္တေ သတ္ထာရံ ဥပသင်္ကမိတွာ ပဋိလဒ္ဓသဒ္ဓေါ ပဗ္ဗဇိတွာ ကတပုဗ္ဗကိစ္စော ဝိပဿနာယ ကမ္မံ ကရောန္တော နစိရဿေဝ အရဟတ္တံ ပါပုဏိ. တေန ဝုတ္တံ အပဒါနေ (အပ. ထေရ ၁.၁၆.၁-၆) –

‘‘စန္ဒံဝ ဝိမလံ သုဒ္ဓံ၊ ဝိပ္ပသန္နမနာဝိလံ၊

နန္ဒီဘဝပရိက္ခီဏံ၊ တိဏ္ဏံ လောကေ ဝိသတ္တိကံ.

‘‘နိဗ္ဗာပယန္တံ ဇနတံ၊ တိဏ္ဏံ တာရယတံ ဝရံ၊

မုနိံ ဝနမှိ ဈာယန္တံ၊ ဧကဂ္ဂံ သုသမာဟိတံ.

‘‘ဗန္ဓုဇီဝကပုပ္ဖါနိ၊ လဂေတွာ သုတ္တကေနဟံ၊

ဗုဒ္ဓဿ အဘိရောပယိံ၊ သိခိနော လောကဗန္ဓုနော.

‘‘ဧကတိံသေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

‘‘ဣတော သတ္တမကေ ကပ္ပေ၊ မနုဇိန္ဒော မဟာယသော၊

သမန္တစက္ခုနာမာသိ၊ စက္ကဝတ္တီ မဟဗ္ဗလော.

‘‘ကိလေသာ ဈာပိတာ မယှံ။ပေ။ ကတံ ဗုဒ္ဓဿ သာသန’’န္တိ.

အရဟတ္တံ ပန ပတွာ အတ္တနာ အဓိဂတံ ဝိမုတ္တိသုခံ နိဿာယ ဥပ္ပန္နပီတိသောမနဿော ဥဒါနဝသေန –

၁၀၀. ‘‘သမ္မပ္ပဓာနသမ္ပန္နော၊ သတိပဋ္ဌာနဂေါစရော၊

ဝိမုတ္တိကုသုမသဉ္ဆန္နော၊ ပရိနိဗ္ဗိဿတျနာသဝေါ’’တိ. – ဂါထံ အဘာသိ၊

တတ္ထ သမ္မပ္ပဓာနသမ္ပန္နောတိ သမ္ပန္နစတုဗ္ဗိဓသမ္မပ္ပဓာနော၊ တေဟိ ကတ္တဗ္ဗကိစ္စံ သမ္ပာဒေတွာ ဌိတောတိ အတ္ထော. သတိပဋ္ဌာနဂေါစရောတိ ကာယာနုပဿနာဒယော သတိပဋ္ဌာနာ ဂေါစရော ပဝတ္တိဋ္ဌာနံ ဧတဿာတိ သတိပဋ္ဌာနဂေါစရော၊ စတူသု သတိပဋ္ဌာနေသု ပတိဋ္ဌိတစိတ္တောတိ အတ္ထော. ဂုဏသောဘေန ပရမသုဂန္ဓာ ဝိမုတ္တိယေဝ ကုသုမာနိ၊ တေဟိ သဗ္ဗသော သမ္မဒေဝ သဉ္ဆန္နော ဝိဘူသိတော အလင်္ကတောတိ ဝိမုတ္တိကုသုမသဉ္ဆန္နော. ပရိနိဗ္ဗိဿတျနာသဝေါတိ ဧဝံ သမ္မာ ပဋိပဇ္ဇန္တော ဘိက္ခု နစိရဿေဝ အနာသဝေါ ဟုတွာ ပရိနိဗ္ဗိဿတိ သဥပါဒိသေသာယ အနုပါဒိသေသာယ စ နိဗ္ဗာနဓာတုယာတိ အတ္ထော. ဣဒမေဝ စ ထေရဿ အညာဗျာကရဏံ အဟောသိ.

(ဒုတိယ) ဒေဝသဘတ္ထေရဂါထာဝဏ္ဏနာ နိဋ္ဌိတာ.

ဒသမဝဂ္ဂဝဏ္ဏနာ နိဋ္ဌိတာ.