၉. ကူဋဝိနိစ္ဆယိကပေတဝတ္ထုဝဏ္ဏနာ

မာလီ ကိရိဋီ ကာယူရီတိ ဣဒံ သတ္ထရိ ဝေဠုဝနေ ဝိဟရန္တေ ကူဋဝိနိစ္ဆယိကပေတံ အာရဗ္ဘ ဝုတ္တံ. တဒါ ဗိမ္ဗိသာရော ရာဇာ မာသဿ ဆသု ဒိဝသေသု ဥပေါသထံ ဥပဝသတိ၊ တံ အနုဝတ္တန္တာ ဗဟူ မနုဿာ ဥပေါသထံ ဥပဝသန္တိ. ရာဇာ အတ္တနော သန္တိကံ အာဂတာဂတေ မနုဿေ ပုစ္ဆတိ – ‘‘ကိံ တုမှေဟိ ဥပေါသထော ဥပဝုတ္ထော၊ ဥဒါဟု န ဥပဝုတ္ထော’’တိ? တတြေကော အဓိကရဏေ နိယုတ္တကပုရိသော ပိသုဏဝါစော နေကတိကော လဉ္ဇဂါဟကော ‘‘န ဥပဝုတ္ထောမှီ’’တိ ဝတ္တုံ အသဟန္တော ‘‘ဥပဝုတ္ထောမှိ၊ ဒေဝါ’’တိ အာဟ. အထ နံ ရာဇသမီပတော နိက္ခန္တံ သဟာယော အာဟ – ‘‘ကိံ၊ သမ္မ၊ အဇ္ဇ တယာ ဥပဝုတ္ထော’’တိ? ‘‘ဘယေနာဟံ၊ သမ္မ၊ ရညော သမ္မုခါ ဧဝံ အဝေါစံ၊ နာဟံ ဥပေါသထိကော’’တိ.

အထ နံ သဟာယော အာဟ – ‘‘ယဒိ ဧဝံ ဥပဍ္ဎုပေါသထောပိ တာဝ တေ အဇ္ဇ ဟောတု၊ ဥပေါသထင်္ဂါနိ သမာဒိယာဟီ’’တိ. သော တဿ ဝစနံ ‘‘သာဓူ’’တိ သမ္ပဋိစ္ဆိတွာ ဂေဟံ ဂန္တွာ အဘုတွာဝ မုခံ ဝိက္ခာလေတွာ ဥပေါသထံ အဓိဋ္ဌာယ ရတ္တိယံ ဝါသူပဂတော ရိတ္တာသယသမ္ဘူတေန ဗလဝဝါတဟေတုကေန သူလေန ဥပစ္ဆိန္နာယုသင်္ခါရော စုတိအနန္တရံ ပဗ္ဗတကုစ္ဆိယံ ဝေမာနိကပေတော ဟုတွာ နိဗ္ဗတ္တိ. သော ဟိ ဧကရတ္တိံ ဥပေါသထရက္ခဏမတ္တေန ဝိမာနံ ပဋိလဘိ ဒသကညာသဟဿပရိဝါရံ မဟတိဉ္စ ဒိဗ္ဗသမ္ပတ္တိံ. ကူဋဝိနိစ္ဆယိကတာယ ပန ပေသုဏိကတာယ စ အတ္တနော ပိဋ္ဌိမံသာနိ သယမေဝ ဩက္ကန္တိတွာ ခါဒတိ. တံ အာယသ္မာ နာရဒေါ ဂိဇ္ဇကူဋတော ဩတရန္တော ဒိသွာ –

၄၉၉. ‘‘မာလီ ကိရိဋီ ကာယူရီ၊ ဂတ္တာ တေ စန္ဒနုဿဒါ၊

ပသန္နမုခဝဏ္ဏောသိ၊ သူရိယဝဏ္ဏောဝ သောဘသိ.

၅၀၀. ‘‘အမာနုသာ ပါရိသဇ္ဇာ၊ ယေ တေမေ ပရိစာရကာ၊

ဒသ ကညာသဟဿာနိ၊ ယာ တေမာ ပရိစာရိကာ၊

တာ ကမ္ဗုကာယူရဓရာ၊ ကဉ္စနာဝေဠဘူသိတာ.

၅၀၁. ‘‘မဟာနုဘာဝေါသိ တုဝံ၊ လောမဟံသနရူပဝါ၊

ပိဋ္ဌိမံသာနိ အတ္တနော၊ သာမံ ဥက္ကစ္စ ခါဒသိ.

၅၀၂. ‘‘ကိံ နု ကာယေန ဝါစာယ၊ မနသာ ဒုက္ကဋံ ကတံ၊

ကိဿကမ္မဝိပါကေန၊ ပိဋ္ဌိမံသာနိ အတ္တနော၊

သာမံ ဥက္ကစ္စ ခါဒသီတိ.

၅၀၃. ‘‘အတ္တနောဟံ အနတ္ထာယ၊ ဇီဝလောကေ အစာရိသံ၊

ပေသုညမုသာဝါဒေန၊ နိကတိဝဉ္စနာယ စ.

၅၀၄. ‘‘တတ္ထာဟံ ပရိသံ ဂန္တွာ၊ သစ္စကာလေ ဥပဋ္ဌိတေ၊

အတ္ထံ ဓမ္မံ နိရာကတွာ၊ အဓမ္မမနုဝတ္တိသံ.

၅၀၅. ‘‘ဧဝံ သော ခါဒတတ္တာနံ၊ ယော ဟောတိ ပိဋ္ဌိမံသိကော၊

ယထာဟံ အဇ္ဇ ခါဒါမိ၊ ပိဋ္ဌိမံသာနိ အတ္တနော.

၅၀၆. ‘‘တယိဒံ တယာ နာရဒ သာမံ ဒိဋ္ဌံ၊ အနုကမ္ပကာ ယေ ကုသလာ ဝဒေယျုံ၊

မာ ပေသုဏံ မာ စ မုသာ အဘာဏိ၊ မာ ခေါသိ ပိဋ္ဌိမံသိကော တုဝ’’န္တိ. –

ထေရော စတူဟိ ဂါထာဟိ ပုစ္ဆိ၊ သောပိ တဿ စတူဟိ ဂါထာဟိ ဧတမတ္ထံ ဝိဿဇ္ဇေသိ.

၄၉၉. တတ္ထ မာလီတိ မာလဓာရီ၊ ဒိဗ္ဗပုပ္ဖေဟိ ပဋိမဏ္ဍိတောတိ အဓိပ္ပါယော. ကိရိဋီတိ ဝေဌိတသီသော. ကာယူရီတိ ကေယူရဝါ၊ ဗာဟာလင်္ကာရပဋိမဏ္ဍိတောတိ အတ္ထော. ဂတ္တာတိ သရီရာဝယဝါ. စန္ဒနုဿဒါတိ စန္ဒနသာရာနုလိတ္တာ. သူရိယဝဏ္ဏောဝ သောဘသီတိ ဗာလသူရိယသဒိသဝဏ္ဏော ဧဝ ဟုတွာ ဝိရောစသိ. ‘‘အရဏဝဏ္ဏီ ပဘာသသီ’’တိပိ ပါဠိ၊ အရဏန္တိ အရဏိယေဟိ ဒေဝေဟိ သဒိသဝဏ္ဏော အရိယာဝကာသောတိ အတ္ထော.

၅၀၀. ပါရိသဇ္ဇာတိ ပရိသပရိယာပန္နာ၊ ဥပဋ္ဌာကာတိ အတ္ထော. တုဝန္တိ တွံ. လောမဟံသနရူပဝါတိ ပဿန္တာနံ လောမဟံသဇနနရူပယုတ္တော. မဟာနုဘာဝတာသမင်္ဂိတာယ ဟေတံ ဝုတ္တံ. ဥက္ကစ္စာတိ ဥက္ကန္တိတွာ၊ ဆိန္ဒိတွာတိ အတ္ထော.

၅၀၃. အစာရိသန္တိ အစရိံ ပဋိပဇ္ဇိံ. ပေသုညမုသာဝါဒေနာတိ ပေသုညေန စေဝ မုသာဝါဒေန စ. နိကတိဝဉ္စနာယ စာတိ နိကတိယာ ဝဉ္စနာယ စ ပတိရူပဒဿနေန ပရေသံ ဝိကာရေန ဝဉ္စနာယ စ.

၅၀၄. သစ္စကာလေတိ သစ္စံ ဝတ္တုံ ယုတ္တကာလေ. အတ္ထန္တိ ဒိဋ္ဌဓမ္မိကာဒိဘေဒံ ဟိတံ. ဓမ္မန္တိ ကာရဏံ ဉာယံ. နိရာကတွာတိ ဆဍ္ဍေတွာ ပဟာယ. သောတိ ယော ပေသုညာဒိံ အာစရတိ၊ သော သတ္တော. သေသံ သဗ္ဗံ ဟေဋ္ဌာ ဝုတ္တနယမေဝ.

ကူဋဝိနိစ္ဆယိကပေတဝတ္ထုဝဏ္ဏနာ နိဋ္ဌိတာ.