၃၆. သမသီသဋ္ဌဉာဏနိဒ္ဒေသဝဏ္ဏနာ

၈၇. သမသီသဋ္ဌဉာဏနိဒ္ဒေသေ ပဉ္စက္ခန္ဓာတိအာဒီဟိ ဒသဟိ ရာသီဟိ သဗ္ဗဓမ္မသင်္ဂဟော ဝေဒိတဗ္ဗော. န ဟိ ဧကေကဿ ဝသေန အာယတနဓာတုရာသိဝဇ္ဇေဟိ သေသေဟိ အဋ္ဌဟိ ရာသီဟိ ဝိသုံ ဝိသုံ သဗ္ဗဓမ္မော သင်္ဂယှတီတိ. ယသ္မာ ပန လောကုတ္တရဓမ္မာ ဟေတုသမုစ္ဆေဒေန သမုစ္ဆိန္ဒိတဗ္ဗာ န ဟောန္တိ၊ တသ္မာ သဗ္ဗဓမ္မသဒ္ဒေန သင်္ဂဟိတာပိ လောကုတ္တရဓမ္မာ သမုစ္ဆေဒဝသေန သမ္ဘဝတော ဣဓ န ဂဟေတဗ္ဗာ၊ ဟေတုသမုစ္ဆေဒေန သမုစ္ဆိန္ဒိတဗ္ဗာ ဧဝ တေဘူမကဓမ္မာ ဂဟေတဗ္ဗာ. သမ္မာ သမုစ္ဆိန္ဒတီတိ ယထာယောဂံ ဝိက္ခမ္ဘနတဒင်္ဂသမုစ္ဆေဒပဟာနဝသေန ပရိယုဋ္ဌာနံ အနုသယဉ္စ နိရောဓေန္တော သမ္မာ သမုစ္ဆိန္ဒတိ. ဧဝံ ပုဂ္ဂလာဓိဋ္ဌာနာယ ဒေသနာယ သမ္မာ သမုစ္ဆေဒေါ နိဒ္ဒိဋ္ဌော. နိရောဓေတီတိ အနုပ္ပါဒနိရောဓေန နိရောဓေတိ. ဣမိနာ သမုစ္ဆေဒတ္ထော ဝုတ္တော. န ဥပဋ္ဌာတီတိ ဧဝံ နိရောဓေ ကတေ သော သော ဓမ္မော ပုန န ဥပတိဋ္ဌတိ၊ န ဥပ္ပဇ္ဇတီတိ အတ္ထော. ဣမိနာ နိရောဓတ္ထော ဝုတ္တော. ဧဝံ အနုပဋ္ဌဟနဓမ္မဝသေန အနုပဋ္ဌာနဘာဝေါ နိဒ္ဒိဋ္ဌော. သမန္တိ ကာမစ္ဆန္ဒာဒီနံ သမိတတ္တာ သမံ. တာနိ ပန နေက္ခမ္မာဒီနိ သတ္တ၊ ရူပါရူပဇ္ဈာနာနိ အဋ္ဌ၊ မဟာဝိပဿနာ အဋ္ဌာရသ၊ အရိယမဂ္ဂါ စတ္တာရောတိ သတ္တတိံသ ဟောန္တိ.

တေရသ သီသာနိ သီသဘူတာနံ သဗ္ဗေသံ သင်္ဂဟဝသေန ဝုတ္တာနိ. ဣဓ ပန သဒ္ဓါဒီနိ အဋ္ဌေဝ သီသာနိ ယုဇ္ဇန္တိ. န ဟိ အရဟတော တဏှာဒီနိ ပဉ္စ သီသာနိ သန္တိ. ပလိဗောဓသီသန္တိ ပလိဗုန္ဓနံ ပလိဗောဓော၊ နိဗ္ဗာနမဂ္ဂါဝရဏန္တိ အတ္ထော. သီသန္တိ ပဓာနံ၊ အဓိကန္တိ အတ္ထော. ပလိဗောဓောယေဝ သီသံ၊ တံသမ္ပယုတ္တာဒိသဗ္ဗပလိဗောဓေသု ဝါ သီသန္တိ ပလိဗောဓသီသံ. ဧသ နယော သေသေသု. ဝိသေသတော ပန ဝိနိဗန္ဓနန္တိ ဥန္နတိဝသေန သံသာရေ ဗန္ဓနံ. ပရာမာသောတိ အဘိနိဝေသော. ဝိက္ခေပေါတိ ဝိပ္ပကိဏ္ဏတာ. ကိလေသောတိ ကိလိဿနံ. အဓိမောက္ခောတိ အဓိမုစ္စနံ. ပဂ္ဂဟောတိ ဥဿာဟနံ. ဥပဋ္ဌာနန္တိ အပိလာပနံ. အဝိက္ခေပေါတိ အဝိပ္ပကိဏ္ဏတာ. ဒဿနန္တိ ယထာသဘာဝပဋိဝေဓော. ပဝတ္တန္တိ ဥပါဒိန္နက္ခန္ဓပဝတ္တံ. ဂေါစရောတိ အာရမ္မဏံ. ဣမေသု ဒွါဒသသုပိ ဝါရေသု ပဓာနဋ္ဌော သီသဋ္ဌော. ဝိမောက္ခောတိ ဝိက္ခမ္ဘနတဒင်္ဂသမုစ္ဆေဒပဋိပ္ပဿဒ္ဓိနိဿရဏဝိမုတ္တီသု ပဉ္စသု နိဿရဏဝိမုတ္တိ နိဗ္ဗာနံ. သင်္ခါရသီသန္တိ သဗ္ဗသင်္ခတသင်္ခါရာနံ သီသံ၊ ကောဋိ အဝသာနန္တိ အတ္ထော. ဧတေန အနုပါဒိသေသပရိနိဗ္ဗာနံ ဝုတ္တံ. သင်္ခါရာဘာဝမတ္တဝသေန ဝါ ခန္ဓပရိနိဗ္ဗာနမေဝ ဝုတ္တံ ဟောတိ. နေက္ခမ္မာဒိကံ သမဉ္စ သဒ္ဓါဒိကံ သီသဉ္စ၊ သမသီသံ ဝါ အဿ အတ္ထီတိ သမသီသီတိ. အထ ဝါ တေရသန္နံ သီသာနံ တဏှာဒီနိ ပဉ္စ သီသာနိ သမုဒယသစ္စံ၊ သဒ္ဓါဒီနိ ပဉ္စ မဂ္ဂသစ္စံ၊ ပဝတ္တသီသံ ဇီဝိတိန္ဒြိယံ ဒုက္ခသစ္စံ၊ ဂေါစရသီသဉ္စ သင်္ခါရသီသဉ္စ နိရောဓသစ္စန္တိ ဣမေသံ စတုန္နံ အရိယသစ္စာနံ ဧကသ္မိံ ရောဂေ ဝါ ဧကသ္မိံ ဣရိယာပထေ ဝါ ဧကသ္မိံ သဘာဂဇီဝိတိန္ဒြိယေ ဝါ အဘိသမယော စ အနုပါဒိသေသပရိနိဗ္ဗာနဉ္စ ယဿ ဟောတိ၊ သော ပုဗ္ဗေ ဝုတ္တသမာနဉ္စ ဣမေသဉ္စ သီသာနံ အတ္ထိတာယ သမသီသီတိ ဝုစ္စတိ.

သမသီသဋ္ဌဉာဏနိဒ္ဒေသဝဏ္ဏနာ နိဋ္ဌိတာ.