၁၄. အဓိဋ္ဌာနဟာရသမ္ပာတဝဏ္ဏနာ

၇၆. အဓိဋ္ဌာနဟာရသမ္ပာတေ သမ္မာဒိဋ္ဌိ နာမ ယံ ဒုက္ခေ ဉာဏန္တိအာဒိနာ စတုသစ္စဟေတုဟေတုသမုပ္ပန္နပစ္စယပစ္စယုပ္ပန္နသင်္ခါတဿ ဝိသယဿ ဝသေန ဝေမတ္တတံ ဒဿေတွာ ပုန ယံ တတ္ထ တတ္ထ ယထာဘူတံ ဉာဏဒဿနန္တိ ပါဠိပါဠိအတ္ထာနံ အဝသိဋ္ဌဝိသယဝသေနေဝ ဝေမတ္တတံ ဒီပေတိ. တတ္ထ ယံ သစ္စာဂမနန္တိ ယံ သစ္စတော အဝိပရီတတော ဝိသယဿ အာဂမနံ၊ အဓိဂမောတိ အတ္ထော. ‘‘ယံ ပစ္စာဂမန’’န္တိပိ ပါဌော၊ တဿ ယံ ပဋိပါဋိဝိသယဿ အာဂမနံ၊ တံတံဝိသယာဓိဂမောတိ အတ္ထော. သေသမေတ္ထ ပရိက္ခာရသမာရောပနဟာရသမ္ပာတေသု ယံ ဝတ္တဗ္ဗံ၊ တံ ပုဗ္ဗေ ဝုတ္တနယတ္တာ ဥတ္တာနမေဝ.

အဓိဋ္ဌာနဟာရသမ္ပာတဝဏ္ဏနာ နိဋ္ဌိတာ.

မိဿကဟာရသမ္ပာတဝဏ္ဏနာ

အပိ စေတ္ထ ဟာရသမ္ပာတနိဒ္ဒေသော ဣမိနာပိ နယေန ဝေဒိတဗ္ဗော –

‘‘မနောပုဗ္ဗင်္ဂမာ ဓမ္မာ၊ မနောသေဋ္ဌာ မနောမယာ၊

မနသာ စေ ပသန္နေန၊ ဘာသတိ ဝါ ကရောတိ ဝါ၊

တတော နံ သုခမနွေတိ၊ ဆာယာဝ အနပါယိနီ’’တိ. (ဓ. ပ. ၂)၊

တတ္ထ ကတမော ဒေသနာဟာရသမ္ပာတော? မနောပုဗ္ဗင်္ဂမာ ဓမ္မာတိ မနောတိ ခန္ဓဝဝတ္ထာနေန ဝိညာဏက္ခန္ဓံ ဒေသေတိ. အာယတနဝဝတ္ထာနေန မနာယတနံ၊ ဓာတုဝဝတ္ထာနေန ဝိညာဏဓာတုံ၊ ဣန္ဒြိယဝဝတ္ထာနေန မနိန္ဒြိယံ. ကတမေ ဓမ္မာ ပုဗ္ဗင်္ဂမာ? ဆ ဓမ္မာ ပုဗ္ဗင်္ဂမာ၊ ကုသလာနံ ကုသလမူလာနိ၊ အကုသလာနံ အကုသလမူလာနိ၊ သာဓိပတိကာနံ အဓိပတိ၊ သဗ္ဗစိတ္တုပ္ပါဒါနံ ဣန္ဒြိယာနိ. အပိ စ ဣမသ္မိံ သုတ္တေ မနော အဓိပ္ပေတော. ယထာ ဗလဂ္ဂဿ ရာဇာ ပုဗ္ဗင်္ဂမော၊ ဧဝမေဝံ ဓမ္မာနံ မနော ပုဗ္ဗင်္ဂမော. တတ္ထ တိဝိဓေန မနော ပုဗ္ဗင်္ဂမော နေက္ခမ္မဆန္ဒေန အဗျာပါဒဆန္ဒေန အဝိဟိံသာဆန္ဒေန. တတ္ထ အလောဘဿ နေက္ခမ္မဆန္ဒေန မနောပုဗ္ဗင်္ဂမံ၊ အဒေါသဿ အဗျာပါဒဆန္ဒေန မနောပုဗ္ဗင်္ဂမံ၊ အမောဟဿ အဝိဟိံသာဆန္ဒေန မနောပုဗ္ဗင်္ဂမံ.

မနောသေဋ္ဌာတိ မနော တေသံ ဓမ္မာနံ သေဋ္ဌံ ဝိသိဋ္ဌံ ဥတ္တမံ ပဝရံ မူလံ ပမုခံ ပါမောက္ခံ၊ တေန ဝုစ္စတိ ‘‘မနောသေဋ္ဌာ’’တိ. မနောမယာတိ မနေန ကတာ၊ မနေန နိမ္မိတာ၊ မနေန နိဗ္ဗတ္တာ၊ မနော တေသံ ပစ္စယော၊ တေန ဝုစ္စတိ ‘‘မနောမယာ’’တိ. တေ ပန ဓမ္မာ ဆန္ဒသမုဒါနိတာ အနာဝိလသင်္ကပ္ပသမုဋ္ဌာနာ ဖဿသမောဓာနာ ဝေဒနာက္ခန္ဓော သညာက္ခန္ဓော သင်္ခါရက္ခန္ဓော. မနသာ စေ ပသန္နေနာတိ ယာ သဒ္ဓါ သဒ္ဒဟနာ ဩကပ္ပနာ အဘိပ္ပသာဒေါ. ဣတိ ဣမိနာ ပသာဒေန ဥပေတော သမုပေတော ဥပဂတော သမုပဂတော သမ္ပန္နော သမန္နာဂတော၊ တေန ဝုစ္စတိ ‘‘ပသန္နေနာ’’တိ ဣဒံ မနောကမ္မံ. ဘာသတိ ဝါတိ ဝစီကမ္မံ. ကရောတိ ဝါတိ ကာယကမ္မံ. ဣတိ ဒသကုသလကမ္မပထာ ဒဿိတာ.

တတောတိ ဒသဝိဓဿ ကုသလကမ္မဿ ကတတ္တာ ဥပစိတတ္တာ. နန္တိ ယော သော ကတပုညော ကတကုသလော ကတဘီရုတ္တာဏော၊ တံ ပုဂ္ဂလံ. သုခန္တိ ဒုဝိဓံ သုခံ ကာယိကံ စေတသိကဉ္စ. အနွေတီတိ အနုဂစ္ဆတိ.

ဣဓဿု ပုရိသော အပ္ပဟီနာနုသယော သံယောဇနိယေသု ဓမ္မေသု အဿာဒံ အနုပဿတိ၊ သော သံယောဇနိယေသု ဓမ္မေသု အဿာဒံ အနုပဿန္တော ယထာဒိဋ္ဌံ ယထာသုတံ သမ္ပတ္တိဘဝံ ပတ္ထေတိ. ဣစ္စဿ အဝိဇ္ဇာ စ ဘဝတဏှာ စ အနုဗဒ္ဓါ ဟောန္တိ၊ သော ယထာဒိဋ္ဌံ ယထာသုတံ သမ္ပတ္တိဘဝံ ပတ္ထေန္တော ပသာဒနီယဝတ္ထုသ္မိံ စိတ္တံ ပသာဒေတိ သဒ္ဒဟတိ ဩကပ္ပေတိ. သော ပသန္နစိတ္တော တိဝိဓံ ပုညကိရိယဝတ္ထုံ အနုတိဋ္ဌတိ ဒါနမယံ သီလမယံ ဘာဝနာမယံ ကာယေန ဝါစာယ မနသာ. သော တဿ ဝိပါကံ ပစ္စနုဘောတိ ဒိဋ္ဌေဝ ဓမ္မေ ဥပပဇ္ဇေ ဝါ အပရာပရေ ဝါ ပရိယာယေ. ဣတိ ခေါ ပနဿ အဝိဇ္ဇာပစ္စယာ သင်္ခါရာ၊ သင်္ခါရပစ္စယာ ဝိညာဏံ၊ ဝိညာဏပစ္စယာ နာမရူပံ၊ နာမရူပပစ္စယာ သဠာယတနံ၊ သဠာယတနပစ္စယာ သုခဝေဒနီယော ဖဿော၊ ဖဿပစ္စယာ ဝေဒနာတိ ဧဝံ သန္တံ တံ သုခမနွေတိ. တဿေဝံ ဝေဒနာယ အပရာပရံ ပရိဝတ္တမာနာယ ဥပ္ပဇ္ဇတိ တဏှာ. တဏှာပစ္စယာ ဥပါဒါနံ။ပေ။ သမုဒယော ဟောတီတိ.

တတ္ထ ယံ မနော၊ ယေ စ မနောပုဗ္ဗင်္ဂမာ ဓမ္မာ၊ ယဉ္စ သုခံ၊ ဣမေ ဝုစ္စန္တိ ပဉ္စက္ခန္ဓာ၊ တေ ဒုက္ခသစ္စံ. တေသံ ပုရိမကာရဏဘူတာ အဝိဇ္ဇာ ဘဝတဏှာ စ သမုဒယသစ္စံ. တေသံ ပရိညာယ ပဟာနာယ ဘဂဝါ ဓမ္မံ ဒေသေတိ၊ ဒုက္ခဿ ပရိညာယ သမုဒယဿ ပဟာနာယ. ယေန ပရိဇာနာတိ၊ ယေန ပဇဟတိ၊ အယံ မဂ္ဂေါ. ယတ္ထ စ မဂ္ဂေါ ပဝတ္တတိ၊ အယံ နိရောဓော. ဣမာနိ စတ္တာရိ သစ္စာနိ ဧဝံ အာယတနဓာတုဣန္ဒြိယမုခေနာပိ နိဒ္ဓါရေတဗ္ဗာနိ. တတ္ထ သမုဒယေန အဿာဒေါ၊ ဒုက္ခေန အာဒီနဝေါ၊ မဂ္ဂနိရောဓေဟိ နိဿရဏံ၊ သုခဿ အနွယော ဖလံ၊ မနသာ ပသန္နေန ကာယဝစီသမီဟာ ဥပါယော၊ မနောပုဗ္ဗင်္ဂမတ္တာ ဓမ္မာနံ အတ္တနော သုခကာမေန ပသန္နေန မနသာ ဝစီကမ္မံ ကာယကမ္မဉ္စ ပဝတ္တေတဗ္ဗန္တိ အယံ ဘဂဝတော အာဏတ္တိ. အယံ ဒေသနာဟာရသမ္ပာတော.

တတ္ထ ကတမော ဝိစယဟာရသမ္ပာတော? မနနတော အာရမ္မဏဝိဇာနနတော မနော. မနနလက္ခဏေ သမ္ပယုတ္တေသု အာဓိပစ္စကရဏတော ပုဗ္ဗင်္ဂမော ဤဟာဘာဝတော နိဿတ္တနိဇ္ဇီဝဋ္ဌေန ဓမ္မာ. ဂါမေသု ဂါမဏိ ဝိယ ပဓာနဋ္ဌေန မနော သေဋ္ဌော ဧတေသန္တိ မနောသေဋ္ဌာ. သဟဇာတာဒိပစ္စယဘူတေန မနသာ နိဗ္ဗတ္တာတိ မနောမယာ. အကာလုဿိယတော၊ အာရမ္မဏဿ ဩကပ္ပနတော စ ပသန္နေန ဝစီဝိညတ္တိဝိပ္ဖါရတော တထာ သာဒိယနတော စ ဘာသတိ. စောပနကာယဝိပ္ဖါရတော တထာ သာဒိယနတော စ ကရောတိ. တထာ ပသုတတ္တာ အနညတ္တာ စ ‘‘တတော’’တိ ဝုတ္တံ. သုခနတော သာတဘာဝတော ဣဋ္ဌဘာဝတော စ ‘‘သုခ’’န္တိ ဝုတ္တံ. ကတူပစိတတ္တာ အဝိပက္ကဝိပါကတ္တာ စ ‘‘အနွေတီ’’တိ ဝုတ္တံ. ကာရဏာယတ္တဝုတ္တိတော အသင်္ကန္တိတော စ ‘‘ဆာယာဝ အနပါယိနီ’’တိ ဝုတ္တံ. အယံ အနုပဒဝိစယတော ဝိစယဟာရသမ္ပာတော.

တတ္ထ ကတမော ယုတ္တိဟာရသမ္ပာတော? မနဿ ဓမ္မာနံ အာဓိပစ္စယောဂတော ပုဗ္ဗင်္ဂမတာ ယုဇ္ဇတိ. တတော ဧဝ တေသံ မနဿ အနုဝတ္တနတော ဓမ္မာနံ မနောသေဋ္ဌတာ ယုဇ္ဇတိ. သဟဇာတာဒိပစ္စယဝသေန မနသာ နိဗ္ဗတ္တတ္တာ ဓမ္မာနံ မနောမယတာ ယုဇ္ဇတိ. မနသာ ပသန္နေန သမုဋ္ဌာနာနံ ကာယဝစီကမ္မာနံ ကုသလဘာဝေါ ယုဇ္ဇတိ. ယေန ကုသလကမ္မံ ဥပစိတံ၊ တံ ဆာယာ ဝိယ သုခံ အနွေတီတိ ယုဇ္ဇတိ. အယံ ယုတ္တိဟာရသမ္ပာတော.

တတ္ထ ကတမော ပဒဋ္ဌာနော ဟာရသမ္ပာတော? မနော မနောပဝိစာရာနံ ပဒဋ္ဌာနံ. မနောပုဗ္ဗင်္ဂမာ ဓမ္မာ သဗ္ဗဿ ကုသလပက္ခဿ ပဒဋ္ဌာနံ. ‘‘ဘာသတီ’’တိ သမ္မာဝါစာ၊ ‘‘ကရောတီ’’တိ သမ္မာကမ္မန္တော၊ တေ သမ္မာအာဇီဝဿ ပဒဋ္ဌာနံ. သမ္မာအာဇီဝေါ သမ္မာဝါယာမဿ ပဒဋ္ဌာနံ. သမ္မာဝါယာမော သမ္မာသတိယာ ပဒဋ္ဌာနံ. သမ္မာသတိ သမ္မာသမာဓိဿ ပဒဋ္ဌာနံ. ‘‘မနသာ ပသန္နေနာ’’တိ ဧတ္ထ ပသာဒေါ သဒ္ဓိန္ဒြိယံ၊ တံ သီလဿ ပဒဋ္ဌာနံ. သီလံ သမာဓိဿ ပဒဋ္ဌာနံ. သမာဓိ ပညာယာတိ ယာဝ ဝိမုတ္တိဉာဏဒဿနာ ယောဇေတဗ္ဗံ. အယံ ပဒဋ္ဌာနဟာရသမ္ပာတော.

တတ္ထ ကတမော လက္ခဏော ဟာရသမ္ပာတော? ‘‘မနောပုဗ္ဗင်္ဂမာ ဓမ္မာ’’တိ မနောပုဗ္ဗင်္ဂမတာဝစနေန ဓမ္မာနံ ဆန္ဒပုဗ္ဗင်္ဂမတာပိ ဝီရိယပုဗ္ဗင်္ဂမတာပိ ဝီမံသာပုဗ္ဗင်္ဂမတာပိ ဝုတ္တာ ဟောတိ အာဓိပတေယျလက္ခဏေန ဆန္ဒာဒီနံ မနသာ ဧကလက္ခဏတ္တာ. တထာ နေသံ သဒ္ဓါဒိပုဗ္ဗင်္ဂမတာပိ ဝုတ္တာ ဟောတိ ဣန္ဒြိယလက္ခဏေန သဒ္ဓါဒီနံ မနသာ ဧကလက္ခဏတ္တာ. ‘‘မနသာ စေ ပသန္နေနာ’’တိ ယထာ မနဿ ပသာဒသမန္နာဂမော တံသမုဋ္ဌာနာနံ ကာယဝစီကမ္မာနံ အနဝဇ္ဇဘာဝလက္ခဏံ. ဧဝံ စိတ္တဿ သတိအာဒိသမန္နာဂမောပိ နေသံ အနဝဇ္ဇဘာဝလက္ခဏံ ယောနိသောမနသိကာရသမုဋ္ဌာနဘာဝေန ဧကလက္ခဏတ္တာ. ‘‘သုခမနွေတီ’’တိ သုခါနုဂမနဝစနေန သုခဿ ပစ္စယဘူတာနံ မနာပိယရူပါဒီနံ အနုဂမော ဝုတ္တော ဟောတိ တေသမ္ပိ ကမ္မပစ္စယတာယ ဧကလက္ခဏတ္တာတိ. အယံ လက္ခဏဟာရသမ္ပာတော.

တတ္ထ ကတမော စတုဗျူဟော ဟာရသမ္ပာတော? ‘‘မနောပုဗ္ဗင်္ဂမာ’’တိအာဒီသု ‘‘မနော’’တိအာဒီနံ ပဒါနံ နိဗ္ဗစနံ နိရုတ္တံ၊ တံ ပဒတ္ထနိဒ္ဒေသဝသေန ဝေဒိတဗ္ဗံ. ပဒတ္ထော စ ဝုတ္တနယေန သုဝိညေယျောဝ. ယေ သုခေန အတ္ထိကာ၊ တေဟိ ပသန္နေန မနသာ ကာယဝစီမနောကမ္မာနိ ပဝတ္တေတဗ္ဗာနီတိ အယမေတ္ထ ဘဂဝတော အဓိပ္ပါယော. ပုညကိရိယာယ အညေသမ္ပိ ပုဗ္ဗင်္ဂမာ ဟုတွာ တတ္ထ တေသံ သမ္မာ ဥပနေတာရော ဣမိဿာ ဒေသနာယ နိဒါနံ. ‘‘ဆဒွါရာဓိပတီ ရာဇာ (ဓ. ပ. အဋ္ဌ. ၂.၁၈၁ ဧရကပတ္တနာဂရာဇဝတ္ထု)၊ စိတ္တာနုပရိဝတ္တိနော ဓမ္မာ (ဓ. သ. ဒုကမာတိကာ ၆၂၊ ၁၂၀၅-၁၂၀၆)၊ စိတ္တဿ ဧကဓမ္မဿ၊ သဗ္ဗေဝ ဝသမနွဂူ’’တိ (သံ. နိ. ၁.၆၂) ဧဝမာဒိသမာနယနေန ဣမိဿာ ဒေသနာယ သံသန္ဒနာ ဒေသနာနုသန္ဓိ. ပဒါနုသန္ဓိယော ပန သုဝိညေယျာဝါတိ. အယံ စတုဗျူဟော ဟာရသမ္ပာတော.

တတ္ထ ကတမော အာဝဋ္ဋော ဟာရသမ္ပာတော? ‘‘မနောပုဗ္ဗင်္ဂမာ ဓမ္မာ’’တိ တတ္ထ ယာနိ တီဏိ ကုသလမူလာနိ၊ တာနိ အဋ္ဌန္နံ သမ္မတ္တာနံ ဟေတု. ယေ သမ္မတ္တာ၊ အယံ အဋ္ဌင်္ဂိကော မဂ္ဂေါ. ယံ မနောသဟဇနာမရူပံ၊ ဣဒံ ဒုက္ခံ. အသမုစ္ဆိန္နာ ပုရိမနိပ္ဖန္နာ အဝိဇ္ဇာ ဘဝတဏှာ၊ အယံ သမုဒယော. ယတ္ထ တေသံ ပဟာနံ၊ အယံ နိရောဓောတိ ဣမာနိ စတ္တာရိ သစ္စာနိ. အယံ အာဝဋ္ဋော ဟာရသမ္ပာတော.

တတ္ထ ကတမော ဝိဘတ္တိဟာရသမ္ပာတော? ‘‘မနောပုဗ္ဗင်္ဂမာ ဓမ္မာ၊ မနသာ စေ ပသန္နေန၊ တတော နံ သုခမနွေတီ’’တိ နယိဒံ ယထာရုတဝသေန ဂဟေတဗ္ဗံ. ယော ဟိ သမဏော ဝါ ဗြာဟ္မဏော ဝါ ပါဏာတိပါတိမှိ မိစ္ဆာဒိဋ္ဌိကေ မိစ္ဆာပဋိပန္နေ သကံ စိတ္တံ ပသာဒေတိ၊ ပသန္နေန စ စိတ္တေန အဘူတဂုဏာဘိတ္ထဝနဝသေန ဘာသတိ ဝါ နိပစ္စကာရံ ဝါဿ ယံ ကရောတိ၊ န တတော နံ သုခမနွေတိ. ဒုက္ခမေဝ ပန တံ တတော စက္ကံဝ ဝဟတော ပဒမနွေတိ. ဣတိ ဟိ ဣဒံ ဝိဘဇ္ဇဗျာကရဏီယံ. ယံ မနသာ စေ ပသန္နေန ဘာသတိ ဝါ ကရောတိ ဝါ၊ တဉ္စေ ဝစီကမ္မံ ကာယကမ္မဉ္စ သုခဝေဒနီယန္တိ. တံ ကိဿ ဟေတု? သမ္မတ္တဂတေဟိ သုခဝေဒနီယံ မိစ္ဆာဂတေဟိ ဒုက္ခဝေဒနီယန္တိ. ကထံ ပနာယံ ပသာဒေါ ဒဋ္ဌဗ္ဗော? နာယံ ပသာဒေါ၊ ပသာဒပတိရူပကော ပန မိစ္ဆာဓိမောက္ခောတိ ဝဒါမိ. အယံ ဝိဘတ္တိဟာရသမ္ပာတော.

တတ္ထ ကတမော ပရိဝတ္တနော ဟာရသမ္ပာတော? မနောပုဗ္ဗင်္ဂမာတိအာဒိ. ယံ မနသာ ပဒုဋ္ဌေန ဘာသတိ ဝါ ကရောတိ ဝါ ဒုက္ခဿာနုဂါမီ. ဣဒဉှိ သုတ္တံ ဧတဿ ဥဇုပဋိပက္ခော. အယံ ပရိဝတ္တနော ဟာရသမ္ပာတော.

တတ္ထ ကတမော ဝေဝစနော ဟာရသမ္ပာတော? ‘‘မနောပုဗ္ဗင်္ဂမာ’’တိ မနော စိတ္တံ မနာယတနံ မနိန္ဒြိယံ မနောဝိညာဏံ မနောဝိညာဏဓာတူတိ ပရိယာယဝစနံ. ပုဗ္ဗင်္ဂမာ ပုရေစာရိနော ပုရေဂါမိနောတိ ပရိယာယဝစနံ. ဓမ္မာ အတ္တာ သဘာဝါတိ ပရိယာယဝစနံ. သေဋ္ဌံ ပဓာနံ ပဝရန္တိ ပရိယာယဝစနံ. မနောမယာ မနောနိဗ္ဗတ္တာ မနောသမ္ဘူတာတိ ပရိယာယဝစနံ. ပသန္နေန သဒ္ဒဟန္တေန ဩကပ္ပေန္တေနာတိ ပရိယာယဝစနံ. သုခံ သာတံ ဝေဒယိတန္တိ ပရိယာယဝစနံ. အနွေတိ အနုဂစ္ဆတိ အနုဗန္ဓတီတိ ပရိယာယဝစနံ. အယံ ဝေဝစနော ဟာရသမ္ပာတော.

တတ္ထ ကတမော ပညတ္တိဟာရသမ္ပာတော? မနောပုဗ္ဗင်္ဂမာတိ အယံ မနသော ကိစ္စပညတ္တိ. ဓမ္မာတိ သဘာဝပညတ္တိ၊ ကုသလကမ္မပထပညတ္တိ. မနောသေဋ္ဌာတိ ပဓာနပညတ္တိ. မနောမယာတိ သဟဇာတပညတ္တိ. ပသန္နေနာတိ သဒ္ဓိန္ဒြိယေန သမန္နာဂတပညတ္တိ၊ အဿဒ္ဓိယဿ ပဋိက္ခေပပညတ္တိ. ဘာသတိ ဝါ ကရောတိ ဝါတိ သမ္မာဝါစာသမ္မာကမ္မန္တာနံ နိက္ခေပပညတ္တိ. တတော နံ သုခမနွေတီတိ ကမ္မဿ ဖလာနုဗန္ဓပညတ္တိ၊ ကမ္မဿ အဝိနာသပညတ္တီတိ. အယံ ပညတ္တိဟာရသမ္ပာတော.

တတ္ထ ကတမော ဩတရဏော ဟာရသမ္ပာတော? မနောတိ ဝိညာဏက္ခန္ဓော. ဓမ္မာတိ ဝေဒနာသညာသင်္ခါရက္ခန္ဓာ. ဘာသတိ ဝါ ကရောတိ ဝါတိ ကာယဝစီဝိညတ္တိယော. တာသံ နိဿယာ စတ္တာရော မဟာဘူတာတိ ရူပက္ခန္ဓောတိ အယံ ခန္ဓေဟိ ဩတရဏော. မနောတိ အဘိသင်္ခါရဝိညာဏန္တိ မနောဂ္ဂဟဏေန အဝိဇ္ဇာပစ္စယာ သင်္ခါရာ ဂဟိတာတိ. သင်္ခါရပစ္စယာ ဝိညာဏံ။ပေ။ သမုဒယော ဟောတီတိ အယံ ပဋိစ္စသမုပ္ပါဒေန ဩတရဏောတိ. အယံ ဩတရဏော ဟာရသမ္ပာတော.

တတ္ထ ကတမော သောဓနော ဟာရသမ္ပာတော? မနောတိ အာရမ္ဘော နေဝ ပဒသုဒ္ဓိ၊ န အာရမ္ဘသုဒ္ဓိ. မနောပုဗ္ဗင်္ဂမာတိ ပဒသုဒ္ဓိ၊ န အာရမ္ဘသုဒ္ဓိ. တထာ ဓမ္မာတိ ယာဝ သုခန္တိ ပဒသုဒ္ဓိ၊ န အာရမ္ဘသုဒ္ဓိ. သုခမနွေတီတိ ပန ပဒသုဒ္ဓိ စေဝ အာရမ္ဘသုဒ္ဓိ စာတိ. အယံ သောဓနော ဟာရသမ္ပာတော.

တတ္ထ ကတမော အဓိဋ္ဌာနော ဟာရသမ္ပာတော? မနောပုဗ္ဗင်္ဂမာ ဓမ္မာ၊ မနောသေဋ္ဌာ မနောမယာတိ ဧကတ္တတာ. မနသာ စေ ပသန္နေနာတိ ဝေမတ္တတာ၊ တထာ မနသာ စေ ပသန္နေနာတိ ဧကတ္တတာ. ဘာသတိ ဝါ ကရောတိ ဝါတိ ဝေမတ္တတာ၊ တထာ မနသာ စေ ပသန္နေနာတိ ဧကတ္တတာ. သော ပသာဒေါ ဒုဝိဓော အဇ္ဈတ္တဉ္စ ဗျာပါဒဝိက္ခမ္ဘနတော၊ ဗဟိဒ္ဓါ စ ဩကပ္ပနတော. တထာ သမ္ပတ္တိဘဝဟေတုဘူတောပိ ဝဍ္ဎိဟေတုဘူတောဝါတိ အယံ ဝေမတ္တတာ. တယိဒံ သုတ္တံ ဒွီဟိ အာကာရေဟိ အဓိဋ္ဌာတဗ္ဗံ ဟေတုနာ စ ယော ပသန္နမာနသော၊ ဝိပါကေန စ ယော သုခဝေဒနီယောတိ. အယံ အဓိဋ္ဌာနော ဟာရသမ္ပာတော.

တတ္ထ ကတမော ပရိက္ခာရော ဟာရသမ္ပာတော? မနောပုဗ္ဗင်္ဂမာတိ ဧတ္ထ မနောတိ ကုသလဝိညာဏံ. တဿ စ ဉာဏသမ္ပယုတ္တဿ အလောဘော အဒေါသော အမောဟောတိ တယော သမ္ပယုတ္တာ ဟေတူ၊ ဉာဏဝိပ္ပယုတ္တဿ အလောဘော အဒေါသောတိ ဒွေ သမ္ပယုတ္တာ ဟေတူ. သဗ္ဗေသံ အဝိသေသေန ယောနိသောမနသိကာရော ဟေတု၊ စတ္တာရိ သမ္ပတ္တိစက္ကာနိ ပစ္စယော. တထာ သဒ္ဓမ္မဿဝနံ၊ တဿ စ ဒါနာဒိဝသေန ပဝတ္တမာနဿ ဒေယျဓမ္မာဒယော ပစ္စယော. ဓမ္မာတိ စေတ္ထ ဝေဒနာဒီနံ ဣဋ္ဌာရမ္မဏာဒယော. တထာ တယော ဝိညာဏဿ၊ ဝေဒနာဒယော ပသာဒဿ၊ သဒ္ဓေယျဝတ္ထုကုသလာဘိသင်္ခါရော ဝိပါကသုခဿ ပစ္စယောတိ. အယံ ပရိက္ခာရော ဟာရသမ္ပာတော.

တတ္ထ ကတမော သမာရောပနော ဟာရသမ္ပာတော? မနောပုဗ္ဗင်္ဂမာ ဓမ္မာတိ မနောတိ ပုညစိတ္တံ၊ တံ တိဝိဓံ – ဒါနမယံ၊ သီလမယံ၊ ဘာဝနာမယန္တိ. တတ္ထ ဒါနမယဿ အလောဘော ပဒဋ္ဌာနံ၊ သီလမယဿ အဒေါသော ပဒဋ္ဌာနံ၊ ဘာဝနာမယဿ အမောဟော ပဒဋ္ဌာနံ. သဗ္ဗေသံ အဘိပ္ပသာဒေါ ပဒဋ္ဌာနံ၊ ‘‘သဒ္ဓါဇာတော ဥပသင်္ကမတိ၊ ဥပသင်္ကမန္တော ပယိရုပါသတီ’’တိ (မ. နိ. ၂.၁၈၃) သုတ္တံ ဝိတ္ထာရေတဗ္ဗံ. ကုသလစိတ္တံ သုခဿ ဣဋ္ဌဝိပါကဿ ပဒဋ္ဌာနံ. ယောနိသောမနသိကာရော ကုသလစိတ္တဿ ပဒဋ္ဌာနံ. ယောနိသော ဟိ မနသိ ကရောန္တော ကုသလစိတ္တံ အဓိဋ္ဌာတိ ကုသလစိတ္တံ ဘာဝေတိ၊ သော အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပါဒါယ ဆန္ဒံ ဇနေတိ၊ ဥပ္ပန္နာနံ ကုသလာနံ ဓမ္မာနံ။ပေ။ ပဒဟတိ. တဿေဝံ စတူသု သမ္မပ္ပဓာနေသု ဘာဝိယမာနေသု စတ္တာရော သတိပဋ္ဌာနာ ယာဝ အရိယော အဋ္ဌင်္ဂိကော မဂ္ဂေါ ဘာဝနာပါရိပူရိံ ဂစ္ဆတီတိ အယံ ဘာဝနာယ သမာရောပနာ. သတိ စ ဘာဝနာယ ပဟာနဉ္စ သိဒ္ဓမေဝါတိ. အယံ သမာရောပနော ဟာရသမ္ပာတော.

တထာ –

‘‘ဒဒတော ပုညံ ပဝဍ္ဎတိ၊ သံယမတော ဝေရံ န စီယတိ၊

ကုသလော စ ဇဟာတိ ပါပကံ၊ ရာဂဒေါသမောဟက္ခယာ သ နိဗ္ဗုတော’’တိ. (ဒီ. နိ. ၂.၁၉၇၊ ဥဒါ. ၇၅၊ ပေဋကော. ၁၆)၊

တတ္ထ ဒဒတော ပုညံ ပဝဍ္ဎတီတိ ဒါနမယံ ပုညကိရိယဝတ္ထု ဝုတ္တံ. သံယမတော ဝေရံ န စီယတီတိ သီလမယံ ပုညကိရိယဝတ္ထု ဝုတ္တံ. ကုသလော စ ဇဟာတိ ပါပကန္တိ လောဘဿ စ ဒေါသဿ စ မောဟဿ စ ပဟာနမာဟ. တေန ဘာဝနာမယံ ပုညကိရိယဝတ္ထု ဝုတ္တံ. ရာဂဒေါသမောဟက္ခယာ သ နိဗ္ဗုတောတိ အနုပါဒါပရိနိဗ္ဗာနမာဟ.

ဒဒတော ပုညံ ပဝဍ္ဎတီတိ အလောဘော ကုသလမူလံ. သံယမတော ဝေရံ န စီယတီတိ အဒေါသော ကုသလမူလံ. ကုသလော စ ဇဟာတိ ပါပကန္တိ အမောဟော ကုသလမူလံ. ရာဂဒေါသမောဟက္ခယာ သ နိဗ္ဗုတောတိ တေသံ နိဿရဏံ ဝုတ္တံ.

ဒဒတော ပုညံ ပဝဍ္ဎတီတိ သီလက္ခန္ဓဿ ပဒဋ္ဌာနံ. သံယမတော ဝေရံ န စီယတီတိ သမာဓိက္ခန္ဓဿ ပဒဋ္ဌာနံ. ကုသလော စ ဇဟာတိ ပါပကန္တိ ပညာက္ခန္ဓဿ ဝိမုတ္တိက္ခန္ဓဿ ပဒဋ္ဌာနံ. ဒါနေန ဩဠာရိကာနံ ကိလေသာနံ ပဟာနံ၊ သီလေန မဇ္ဈိမာနံ၊ ပညာယ သုခုမာနံ. ရာဂဒေါသမောဟက္ခယာ သ နိဗ္ဗုတောတိ ကတာဝီဘူမိံ ဒဿေတိ.

ဒဒတော ပုညံ။ပေ။ ဇဟာတိ ပါပကန္တိ သေက္ခဘူမိ ဒဿိတာ. ရာဂဒေါသမောဟက္ခယာ သ နိဗ္ဗုတောတိ အဂ္ဂဖလံ ဝုတ္တံ.

တထာ ဒဒတော ပုညံ။ပေ။ န စီယတီတိ လောကိယကုသလမူလံ ဝုတ္တံ. ကုသလော စ ဇဟာတိ ပါပကန္တိ လောကုတ္တရကုသလမူလံ ဝုတ္တံ. ရာဂဒေါသမောဟက္ခယာ သ နိဗ္ဗုတောတိ လောကုတ္တရဿ ကုသလမူလဿ ဖလံ ဝုတ္တံ.

ဒဒတော။ပေ။ န စီယတီတိ ပုထုဇ္ဇနဘူမိ ဒဿိတာ. ကုသလော စ ဇဟာတိ ပါပကန္တိ သေက္ခဘူမိ ဒဿိတာ. ရာဂဒေါသမောဟက္ခယာ သ နိဗ္ဗုတောတိ အသေက္ခဘူမိ ဒဿိတာ.

ဒဒတော ။ပေ။ န စီယတီတိ သဂ္ဂဂါမိနီ ပဋိပဒါ ဝုတ္တာ. ကုသလော စ ဇဟာတိ ပါပကန္တိ သေက္ခဝိမုတ္တိ. ရာဂဒေါသမောဟက္ခယာ သ နိဗ္ဗုတောတိ အသေက္ခဝိမုတ္တိ ဝုတ္တာ.

ဒဒတော။ပေ။ န စီယတီတိ ဒါနကထံ သီလကထံ သဂ္ဂကထံ လောကိယာနံ ဓမ္မာနံ ဒေသနမာဟ. ကုသလော စ ဇဟာတိ ပါပကန္တိ လောကေ အာဒီနဝါနုပဿနာယ သဒ္ဓိံ သာမုက္ကံသိကံ ဓမ္မဒေသနမာဟ. ရာဂဒေါသမောဟက္ခယာ သ နိဗ္ဗုတောတိ တဿာ ဒေသနာယ ဖလမာဟ.

ဒဒတော ပုညံ ပဝဍ္ဎတီတိ ဓမ္မဒါနံ အာမိသဒါနဉ္စ ဝဒတိ. သံယမတော ဝေရံ န စီယတီတိ ပါဏာတိပါတာ ဝေရမဏိယာ သတ္တာနံ အဘယဒါနံ ဝဒတိ. ဧဝံ သဗ္ဗာနိပိ သိက္ခာပဒါနိ ဝိတ္ထာရေတဗ္ဗာနိ. တေန စ သီလသံယမေန သီလေ ပတိဋ္ဌိတော စိတ္တံ သံယမေတိ၊ တဿ သမထော ပါရိပူရိံ ဂစ္ဆတိ. ဧဝံ သော သမထေ ဌိတော ဝိပဿနာကောသလ္လယောဂတော ကုသလော စ ဇဟာတိ ပါပကံ ရာဂံ ဇဟာတိ၊ ဒေါသံ ဇဟာတိ၊ မောဟံ ဇဟာတိ၊ အရိယမဂ္ဂေန သဗ္ဗေပိ ပါပကေ အကုသလေ ဓမ္မေ ဇဟာတိ. ဧဝံ ပဋိပန္နော စ ရာဂဒေါသမောဟက္ခယာ သ နိဗ္ဗုတောတိ ရာဂါဒီနံ ပရိက္ခယာ ဒွေပိ ဝိမုတ္တိယော အဓိဂစ္ဆတီတိ အယံ သုတ္တနိဒ္ဒေသော.

တတ္ထ ကတမော ဒေသနာဟာရသမ္ပာတော? ဣမသ္မိံ သုတ္တေ ကိံ ဒေသိတံ? ဒွေ သုဂတိယော ဒေဝါ စ မနုဿာ စ၊ ဒိဗ္ဗာ စ ပဉ္စ ကာမဂုဏာ၊ မာနုသကာ စ ပဉ္စ ကာမဂုဏာ၊ ဒိဗ္ဗာ စ ပဉ္စုပါဒါနက္ခန္ဓာ၊ မာနုသကာ စ ပဉ္စုပါဒါနက္ခန္ဓာ. ဣဒံ ဝုစ္စတိ ဒုက္ခံ အရိယသစ္စံ. တဿ ကာရဏဘာဝေန ပုရိမပုရိမနိပ္ဖန္နာ တဏှာ သမုဒယော အရိယသစ္စံ. တယိဒံ ဝုစ္စတိ အဿာဒေါ စ အာဒီနဝေါ စ. သဗ္ဗဿ ပုရိမေဟိ ဒွီဟိ ပဒေဟိ နိဒ္ဒေသော ‘‘ဒဒတော။ပေ။ န စီယတီ’’တိ. ကုသလော စ ဇဟာတိ ပါပကန္တိ မဂ္ဂေါ ဝုတ္တော. ရာဂဒေါသမောဟက္ခယာ သ နိဗ္ဗုတောတိ ဒွေ နိဗ္ဗာနဓာတုယော သဥပါဒိသေသာ စ အနုပါဒိသေသာ စ. ဣဒံ နိဿရဏံ. ဖလာဒီနိ ပန ယထာရဟံ ဝေဒိတဗ္ဗာနီတိ. အယံ ဒေသနာဟာရသမ္ပာတော.

ဝိစယောတိ ‘‘ဒဒတော ပုညံ ပဝဍ္ဎတီ’’တိ ဣမိနာ ပဌမေန ပဒေန တိဝိဓမ္ပိ ဒါနမယံ သီလမယံ ဘာဝနာမယံ ပုညကိရိယဝတ္ထု ဝုတ္တံ. ဒသဝိဓဿပိ ဒေယျဓမ္မဿ ပရိစ္စာဂေါ ဝုတ္တော. တထာ ဆဗ္ဗိဓဿပိ ရူပါဒိအာရမ္မဏဿ. ‘‘သံယမတော ဝေရံ န စီယတီ’’တိ ဒုတိယေန ပဒေန အဝေရာ အသပတ္တာ အဗျာပါဒါ စ ပဋိပဒါ ဝုတ္တာ. ‘‘ကုသလော စ ဇဟာတိ ပါပက’’န္တိ တတိယေန ပဒေန ဉာဏုပ္ပါဒေါ အညာဏနိရောဓော သဗ္ဗောပိ အရိယော အဋ္ဌင်္ဂိကော မဂ္ဂေါ သဗ္ဗေပိ ဗောဓိပက္ခိယာ ဓမ္မာ ဝုတ္တာ. ‘‘ရာဂဒေါသမောဟက္ခယာ သ နိဗ္ဗုတော’’တိ ရာဂက္ခယေန ရာဂဝိရာဂါ စေတောဝိမုတ္တိ၊ မောဟက္ခယေန အဝိဇ္ဇာဝိရာဂါ ပညာဝိမုတ္တိ ဝုတ္တာတိ. အယံ ဝိစယော ဟာရသမ္ပာတော.

ယုတ္တီတိ ဒါနေ ဌိတော ဥဘယံ ပရိပူရေတိ မစ္ဆရိယပ္ပဟာနဉ္စ ပုညာဘိသန္ဒဉ္စာတိ အတ္ထေသာ ယုတ္တိ. သီလသံယမေ ဌိတော ဥဘယံ ပရိပူရေတိ ဥပစာရသမာဓိံ အပ္ပနာသမာဓိဉ္စာတိ အတ္ထေသာ ယုတ္တိ. ပါပကေ ဓမ္မေ ပဇဟန္တော ဒုက္ခံ ပရိဇာနာတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ အတ္ထေသာ ယုတ္တိ. ရာဂဒေါသမောဟေသု သဗ္ဗသော ပရိက္ခီဏေသု အနုပါဒိသေသာယ နိဗ္ဗာနဓာတုယာ ပရိနိဗ္ဗာယတီတိ အတ္ထေသာ ယုတ္တီတိ. အယံ ယုတ္တိဟာရသမ္ပာတော.

ပဒဋ္ဌာနန္တိ ဒဒတော ပုညံ ပဝဍ္ဎတီတိ စာဂါဓိဋ္ဌာနဿ ပဒဋ္ဌာနံ. သံယမတော ဝေရံ န စီယတီတိ သစ္စာဓိဋ္ဌာနဿ ပဒဋ္ဌာနံ. ကုသလော စ ဇဟာတိ ပါပကန္တိ ပညာဓိဋ္ဌာနဿ ပဒဋ္ဌာနံ. ရာဂဒေါသမောဟက္ခယာ သ နိဗ္ဗုတောတိ ဥပသမာဓိဋ္ဌာနဿ ပဒဋ္ဌာနန္တိ. အယံ ပဒဋ္ဌာနော ဟာရသမ္ပာတော.

လက္ခဏောတိ ‘‘ဒဒတော’’တိ ဧတေန ပေယျဝဇ္ဇံ အတ္ထစရိယံ သမာနတ္တတာ စ ဒဿိတာတိ ဝေဒိတဗ္ဗာ သင်္ဂဟဝတ္ထုဘာဝေန ဧကလက္ခဏတ္တာ. ‘‘သံယမတော’’တိ ဧတေန ခန္တိမေတ္တာအဝိဟိံသာအနုဒ္ဒယာဒယော ဒဿိတာတိ ဝေဒိတဗ္ဗာ ဝေရာနုပ္ပါဒနလက္ခဏေန ဧကလက္ခဏတ္တာ. ‘‘ဝေရံ န စီယတီ’’တိ ဧတေန ဟိရီဩတ္တပ္ပအပ္ပိစ္ဆတာသန္တုဋ္ဌိတာဒယော ဒဿိတာ ဝေရာဝဍ္ဎနေန ဧကလက္ခဏတ္တာ. တထာ အဟိရီကာနောတ္တပ္ပါဒယော အစေတဗ္ဗဘာဝေန ဧကလက္ခဏတ္တာ. ‘‘ကုသလော’’တိ ဧတေန ကောသလ္လဒီပနေန သမ္မာသင်္ကပ္ပါဒယော ဒဿိတာ မဂ္ဂင်္ဂါဒိဘာဝေန ဧကလက္ခဏတ္တာ. ‘‘ဇဟာတိ ပါပက’’န္တိ ဧတေန ပရိညာဘိသမယာဒယောပိ ဒဿိတာ အဘိသမယလက္ခဏေန ဧကလက္ခဏတ္တာ. ‘‘ရာဂဒေါသမောဟက္ခယာ’’တိ ဧတေန အဝသိဋ္ဌကိလေသာဒီနမ္ပိ ခယာ ဒဿိတာ ခေပေတဗ္ဗဘာဝေန ဧကလက္ခဏတ္တာတိ အယံ လက္ခဏော.

စတုဗျူဟောတိ ဒဒတောတိ ဂါထာယံ ဘဂဝတော ကော အဓိပ္ပါယော? ယေ မဟာဘောဂတံ ပတ္ထယိဿန္တိ၊ တေ ဒါနံ ဒဿန္တိ ဒါလိဒ္ဒိယပ္ပဟာနာယ. ယေ အဝေရတံ ဣစ္ဆန္တိ၊ တေ ပဉ္စ ဝေရာနိ ပဇဟိဿန္တိ. ယေ ကုသလဓမ္မေဟိ ဆန္ဒကာမာ၊ တေ အဋ္ဌင်္ဂိကံ မဂ္ဂံ ဘာဝေဿန္တိ. ယေ နိဗ္ဗာယိတုကာမာ၊ တေ ရာဂဒေါသမောဟံ ပဇဟိဿန္တီတိ အယမေတ္ထ ဘဂဝတော အဓိပ္ပါယော. ဧဝံ နိဗ္ဗစနနိဒါနသန္ဓယော ဝတ္တဗ္ဗာတိ. အယံ စတုဗျူဟော.

အာဝဋ္ဋောတိ ယဉ္စ အဒဒတော မစ္ဆရိယံ၊ ယဉ္စ အသံယမတော ဝေရံ၊ ယဉ္စ အကုသလဿ ပါပဿ အပ္ပဟာနံ၊ အယံ ပဋိပက္ခနိဒ္ဒေသေန သမုဒယော. တဿ အလောဘေန စ အဒေါသေန စ အမောဟေန စ ဒါနာဒီဟိ ပဟာနံ၊ ဣမာနိ တီဏိ ကုသလမူလာနိ. တေသံ ပစ္စယော အဋ္ဌ သမ္မတ္တာနိ၊ အယံ မဂ္ဂေါ. ယော ရာဂဒေါသမောဟာနံ ခယော၊ အယံ နိရောဓောတိ. အယံ အာဝဋ္ဋော.

ဝိဘတ္တီတိ ဒဒတော ပုညံ ပဝဍ္ဎတီတိ ဧကံသေန ယော ဘယဟေတု ဒေတိ၊ ရာဂဟေတု ဒေတိ၊ အာမိသကိဉ္စိက္ခဟေတု ဒေတိ၊ န တဿ ပုညံ ဝဍ္ဎတိ. ယဉ္စ ဒဏ္ဍဒါနံ သတ္ထဒါနံ ပရဝိဟေဌနတ္ထံ အပုညံ အဿ ပဝဍ္ဎတိ. ယံ ပန ကုသလေန စိတ္တေန အနုကမ္ပန္တော ဝါ အပစာယမာနော ဝါ အန္နံ ဒေတိ၊ ပါနံ ဝတ္ထံ ယာနံ မာလာဂန္ဓဝိလေပနံ သေယျာဝသထံ ပဒီပေယျံ ဒေတိ၊ သဗ္ဗသတ္တာနံ ဝါ အဘယဒါနံ ဒေတိ၊ မေတ္တစိတ္တော ဟိတဇ္ဈာသယော နိဿရဏသညီ ဓမ္မံ ဒေသေတိ. သံယမတော ဝေရံ န စီယတီတိ ဧကံသေန အဘယူပရတဿ စီယတိ၊ ကိံကာရဏံ? ယံ အသမတ္ထော၊ ဘယူပရတော ဒိဋ္ဌဓမ္မိကဿ ဘာယတိ ‘‘မာ မံ ရာဇာနော ဂဟေတွာ ဟတ္ထံ ဝါ ဆိန္ဒေယျုံ။ပေ။ ဇီဝန္တမ္ပိ သူလေ ဥတ္တာသေယျု’’န္တိ၊ တေန သံယမေန အဝေရံ စီယတိ. ယော ပန ဧဝံ သမာနော ဝေရံ န စီယတိ. ယော ပန ဧဝံ သမာဒိယတိ၊ ပါဏာတိပါတဿ ပါပကော ဝိပါကော ဒိဋ္ဌေ စေဝ ဓမ္မေ အဘိသမ္ပရာယေ စ၊ ဧဝံ သဗ္ဗဿ အကုသလဿ၊ သော တတော အာရမတိ၊ ဣမိနာ သံယမေန ဝေရံ န စီယတိ. သံယမော နာမ သီလံ. တံ စတုဗ္ဗိဓံ စေတနာ သီလံ၊ စေတသိကံ သီလံ၊ သံဝရော သီလံ၊ အဝီတိက္ကမော သီလန္တိ. ကုသလော စ ဇဟာတိ ပါပကန္တိ ပါပပဟာယကာ သတ္တတ္တိံသ ဗောဓိပက္ခိယာ ဓမ္မာ ဝတ္တဗ္ဗာတိ. အယံ ဝိဘတ္တိ.

ပရိဝတ္တနောတိ ဒဒတော ပုညံ ပဝဍ္ဎတိ၊ အဒဒတောပိ ပုညံ ပဝဍ္ဎတိ၊ န ဒါနမယိကံ. သံယမတော ဝေရံ န စီယတိ အသံယမတောပိ ဝေရံ န စီယတိ၊ ယံ ဒါနေန ပဋိသင်္ခါနဗလေန ဘာဝနာဗလေန. ကုသလော စ ဇဟာတိ ပါပကံ၊ အကုသလော ပန န ဇဟာတိ. ရာဂဒေါသမောဟက္ခယာ သ နိဗ္ဗုတော၊ တေသံ အပရိက္ခယာ နတ္ထိ နိဗ္ဗုတီတိ. အယံ ပရိဝတ္တနော.

ဝေဝစနောတိ ဒဒတော ပုညံ ပဝဍ္ဎတိ. ပရိစ္စာဂတော ကုသလံ ဥပစီယတိ. အနုမောဒတောပိ ပုညံ ပဝဍ္ဎတိ စိတ္တပ္ပသာဒတောပိ ဝေယျာဝစ္စကိရိယာယပိ. သံယမတောတိ သီလသံဝရတော သောရစ္စတော. ဝေရံ န စီယတီတိ ပါပံ န ဝဍ္ဎတိ၊ အကုသလံ န ဝဍ္ဎတိ. ကုသလောတိ ပဏ္ဍိတော နိပုဏော မေဓာဝီ ပရိက္ခကော. ဇဟာတီတိ သမုစ္ဆိန္ဒတိ သမုဂ္ဃါဋေတိ. အယံ ဝေဝစနော.

ပညတ္တီတိ ဒဒတော ပုညံ ပဝဍ္ဎတီတိ လောဘဿ ပဋိနိဿဂ္ဂပညတ္တိ၊ အလောဘဿ နိက္ခေပပညတ္တိ. သံယမတော ဝေရံ န စီယတီတိ ဒေါသဿ ဝိက္ခမ္ဘနပညတ္တိ၊ အဒေါသဿ နိက္ခေပပညတ္တိ. ကုသလော စ ဇဟာတိ ပါပကန္တိ မောဟဿ သမုဂ္ဃါတပညတ္တိ၊ အမောဟဿ ဘာဝနာပညတ္တိ. ရာဂဒေါသမောဟဿ ပဟာနပညတ္တိ၊ အလောဘာဒေါသာမောဟဿ ဘာဝနာပညတ္တိ. ရာဂဒေါသမောဟက္ခယာ သ နိဗ္ဗုတောတိ ကိလေသာနံ ပဋိပ္ပဿဒ္ဓိပညတ္တိ၊ နိဗ္ဗာနဿ သစ္ဆိကိရိယပညတ္တီတိ. အယံ ပညတ္တိ.

ဩတရဏောတိ ဒဒတော ပုညံ ပဝဍ္ဎတီတိ ဒါနံ နာမ သဒ္ဓါဒီဟိ ဣန္ဒြိယေဟိ ဟောတီတိ အယံ ဣန္ဒြိယေဟိ ဩတရဏော. သံယမတော ဝေရံ န စီယတီတိ သံယမော နာမ သီလက္ခန္ဓောတိ အယံ ခန္ဓေဟိ ဩတရဏော. ကုသလော စ ဇဟာတိ ပါပကန္တိ ပါပပ္ပဟာနံ နာမ တီဟိ ဝိမောက္ခေဟိ ဟောတိ. တေသံ ဥပါယဘူတာနိ တီဏိ ဝိမောက္ခမုခါနီတိ အယံ ဝိမောက္ခမုခေဟိ ဩတရဏော. ရာဂဒေါသမောဟက္ခယာ သ နိဗ္ဗုတောတိ ဝိမုတ္တိက္ခန္ဓော. သော စ ဓမ္မဓာတု ဓမ္မာယတနဉ္စာတိ အယံ ဓာတူဟိ စ အာယတနေဟိ စ ဩတရဏောတိ. အယံ ဩတရဏော.

သောဓနောတိ ဒဒတောတိအာဒိကာ ပဒသုဒ္ဓိ၊ နော အာရမ္ဘသုဒ္ဓိ. ရာဂဒေါသမောဟက္ခယာ သ နိဗ္ဗုတောတိ အယံ ပဒသုဒ္ဓိ စ အာရမ္ဘသုဒ္ဓိ စာတိ. အယံ သောဓနော.

အဓိဋ္ဌာနောတိ ဒဒတောတိ အယံ ဧကတ္တတာ၊ စာဂေါ ပရိစ္စာဂေါ ဓမ္မဒါနံ အာမိသဒါနံ အဘယဒါနံ၊ အဋ္ဌ ဒါနာနိ ဝိတ္ထာရေတဗ္ဗာနိ. အယံ ဝေမတ္တတာ. သံယမောတိ အယံ ဧကတ္တတာ. ပါတိမောက္ခသံဝရော သတိသံဝရောတိ အယံ ဝေမတ္တတာ. ကုသလော စ ဇဟာတိ ပါပကန္တိ အယံ ဧကတ္တတာ. သက္ကာယဒိဋ္ဌိံ ပဇဟတိ ဝိစိကိစ္ဆံ ပဇဟတီတိအာဒိကာ အယံ ဝေမတ္တတာ. ရာဂဒေါသမောဟက္ခယာ သ နိဗ္ဗုတောတိ အယံ ဧကတ္တတာ. သဥပါဒိသေသာ နိဗ္ဗာနဓာတု အနုပါဒိသေသာ နိဗ္ဗာနဓာတူတိ အယံ ဝေမတ္တတာတိ. အယံ အဓိဋ္ဌာနော.

ပရိက္ခာရောတိ ဒါနဿ ပါမောဇ္ဇံ ပစ္စယော. အလောဘော ဟေတု၊ သံယမဿ ဟိရောတ္တပ္ပါဒယော ပစ္စယော. ယောနိသောမနသိကာရော အဒေါသော စ ဟေတု၊ ပါပပ္ပဟာနဿ သမာဓိ ယထာဘူတဉာဏဒဿနဉ္စ ပစ္စယော. တိဿော အနုပဿနာ ဟေတု၊ နိဗ္ဗုတိယာ မဂ္ဂသမ္မာဒိဋ္ဌိ ဟေတု၊ သမ္မာသင်္ကပ္ပါဒယော ပစ္စယောတိ. အယံ ပရိက္ခာရော.

သမာရောပနော ဟာရသမ္ပာတောတိ ဒဒတော ပုညံ ပဝဍ္ဎတီတိ ဒါနမယံ ပုညကိရိယဝတ္ထု၊ တံ သီလဿ ပဒဋ္ဌာနံ. သံယမတော ဝေရံ န စီယတီတိ သီလမယံ ပုညကိရိယဝတ္ထု၊ တံ သမာဓိဿ ပဒဋ္ဌာနံ. သီလေန ဟိ ဈာနေနပိ ရာဂါဒိကိလေသာ န စီယန္တိ. ယေပိဿ တပ္ပစ္စယာ ဥပ္ပဇ္ဇေယျုံ အာသဝါ ဝိဃာတပရိဠာဟာ၊ တေပိဿ န ဟောန္တိ. ကုသလော စ ဇဟာတိ ပါပကန္တိ ပဟာနပရိညာ၊ တံ ဘာဝနာမယံ ပုညကိရိယဝတ္ထု. ရာဂဒေါသမောဟက္ခယာ သ နိဗ္ဗုတောတိ ရာဂဿပိ ခယာ ဒေါသဿပိ ခယာ မောဟဿပိ ခယာ. တတ္ထ ရာဂေါတိ ယော ရာဂေါ သာရာဂေါ စေတသော သာရဇ္ဇနာ လောဘော လုဗ္ဘနာ လုဗ္ဘိတတ္တံ အဘိဇ္ဈာ လောဘော အကုသလမူလံ. ဒေါသောတိ ယော ဒေါသော ဒုဿနာ ဒုဿိတတ္တံ ဗျာပါဒေါ စေတသော ဗျာပဇ္ဇနာ ဒေါသော အကုသလမူလံ. မောဟောတိ ယံ အညာဏံ အဒဿနံ အနဘိသမယော အသမ္ဗောဓော အပ္ပဋိဝေဓော ဒုမ္မေဇ္ဈံ ဗာလျံ အသမ္ပဇညံ မောဟော အကုသလမူလံ. ဣတိ ဣမေသံ ရာဂါဒီနံ ခယော နိရောဓော ပဋိနိဿဂ္ဂေါ နိဗ္ဗုတိ နိဗ္ဗာယနာ ပရိနိဗ္ဗာနံ သဥပါဒိသေသာ နိဗ္ဗာနဓာတု အနုပါဒိသေသာ နိဗ္ဗာနဓာတူတိ. အယံ သမာရောပနော ဟာရသမ္ပာတော.

မိဿကဟာရသမ္ပာတဝဏ္ဏနာ နိဋ္ဌိတာ.