၁၇. ပါရာယနတ္ထုတိဂါထာနိဒ္ဒေသဝဏ္ဏနာ

၉၃. ဣတော ပရံ သင်္ဂီတိကာရာ ဒေသနံ ထောမေန္တာ ‘‘ဣဒမဝေါစ ဘဂဝါ’’တိအာဒိမာဟံသု. တတ္ထ ဣဒမဝေါစာတိ ဣဒံ ပါရာယနံ အဝေါစ. ပရိစာရကသောဠသာနန္တိ ဗာဝရိဿ ပရိစာရကေန ပိင်္ဂိယေန သဟ သောဠသာနံ၊ ဗုဒ္ဓဿ ဝါ ဘဂဝတော ပရိစာရကာနံ သောဠသာနန္တိ ပရိစာရကသောဠသာနံ. တေ ဧဝ စ ဗြာဟ္မဏာ တတ္ထ သောဠသသု ဒိသာသု ပုရတော စ ပစ္ဆတော စ ဝါမပဿတော စ ဒက္ခိဏပဿတော စ ဆ ဆ ယောဇနာ နိသိန္နာ ဥဇုကေန ဒွါဒသယောဇနိကာ အဟောသိ. အဇ္ဈိဋ္ဌောတိ ယာစိတော.

၉၄-၉၇. အတ္ထမညာယာတိ ပါဠိအတ္ထမညာယ. ဓမ္မမညာယာတိ ပါဠိမညာယ. ပါရာယနန္တိ ဧဝံ ဣမဿ ဓမ္မပရိယာယဿ အဓိဝစနံ အာရောပေတွာ တေသံ ဗြာဟ္မဏာနံ နာမာနိ ကိတ္တယန္တော ‘‘အဇိတော။ပေ။ ဗုဒ္ဓသေဋ္ဌမုပါဂမု’’န္တိ အာဟံသု. တတ္ထ သမ္ပန္နစရဏန္တိ နိဗ္ဗာနပဒဋ္ဌာနဘူတေန ပါတိမောက္ခသီလာဒိနာ သမ္ပန္နံ. ဣသိန္တိ မဟေသိံ.

နိဒ္ဒေသေ ဥပါဂမိံသူတိ သမီပံ ဂမိံသု. ဥပသင်္ကမိံသူတိ အဝိဒူရဋ္ဌာနံ ဂမိံသု. ပယိရုပါသိံသူတိ သမီပေ နိသီဒိံသု. ပရိပုစ္ဆိံသူတိ ပရိပုစ္ဆံ အာဟရိံသု. ပရိဂဏှိံသူတိ တုလယိံသု. ‘‘စောဒယိံသူ’’တိ ကေစိ.

သီလာစာရနိဗ္ဗတ္တီတိ ဥတ္တမသီလာစာရနိဗ္ဗတ္တိ၊ မဂ္ဂေန နိပ္ဖန္နသီလန္တိ အတ္ထော.

ဂမ္ဘီရေတိ ဥတ္တာနဘာဝပဋိက္ခေပဝစနံ. ဒုဒ္ဒသေတိ ဂမ္ဘီရတ္တာ ဒုဒ္ဒသေ၊ ဒုက္ခေန ဒဋ္ဌဗ္ဗေ၊ န သက္ကာ သုခေန ဒဋ္ဌုံ. ဒုဒ္ဒသတ္တာဝ ဒုရနုဗောဓေ၊ ဒုက္ခေန အဝဗုဇ္ဈိတဗ္ဗေ၊ န သက္ကာ သုခေန အဝဗုဇ္ဈိတုံ. သန္တေတိ နိဗ္ဗုတေ. ပဏီတေတိ အတပ္ပကေ. ဣဒံ ဒွယံ လောကုတ္တရမေဝ သန္ဓာယ ဝုတ္တံ. အတက္ကာဝစရေတိ တက္ကေန န အဝစရိတဗ္ဗေ န ဩဂါဟိတဗ္ဗေ ဉာဏေနေဝ အဝစရိတဗ္ဗေ. နိပုဏေတိ သဏှေ. ပဏ္ဍိတဝေဒနီယေတိ သမ္မာ ပဋိပန္နေဟိ ပဏ္ဍိတေဟိ ဝေဒိတဗ္ဗေ.

၉၈. တောသေသီတိ တုဋ္ဌိံ အာပါဒေသိ. ဝိတောသေသီတိ ဝိဝိဓာ တေသံ သောမနဿံ ဥပ္ပါဒေသိ. ပသာဒေသီတိ တေသံ စိတ္တပ္ပသာဒံ အကာသိ. အာရာဓေသီတိ အာရာဓယိ သိဒ္ဓိံ ပါပေသိ. အတ္တမနေ အကာသီတိ သောမနဿဝသေန သကမနေ အကာသိ.

၉၉. တတော ပရံ ဗြဟ္မစရိယမစရိံသူတိ မဂ္ဂဗြဟ္မစရိယံ အစရိံသု.

၁၀၁. တသ္မာ ပါရာယနန္တိ တဿ ပါရဘူတဿ နိဗ္ဗာနဿ အာယတနန္တိ ဝုတ္တံ ဟောတိ.

သဒ္ဓမ္မပ္ပဇ္ဇောတိကာယ စူဠနိဒ္ဒေသ-အဋ္ဌကထာယ

ပါရာယနတ္ထုတိဂါထာနိဒ္ဒေသဝဏ္ဏနာ နိဋ္ဌိတာ.