၁၀. ကပ္ပမာဏဝသုတ္တနိဒ္ဒေသဝဏ္ဏနာ

၆၁. ဒသမေ ကပ္ပသုတ္တနိဒ္ဒေသေ – မဇ္ဈေ သရသ္မိန္တိ ပုရိမပစ္ဆိမကောဋိပညာဏာဘာဝတော မဇ္ဈဘူတေ သံသာရေတိ ဝုတ္တံ ဟောတိ. တိဋ္ဌတန္တိ တိဋ္ဌမာနာနံ. ယထာယိဒံ နာပရံ သိယာတိ ယထာ ဣဒံ ဒုက္ခံ ပုန န ဘဝေယျ.

အာဂမနန္တိ ပုဗ္ဗန္တတော ဣဓာဂမနံ. ဂမနန္တိ ဣတော ပရလောကဂမနံ. ဂမနာဂမနန္တိ တဒုဘယဝသေန ဝုတ္တံ. ကာလန္တိ မရဏကာလံ. ဂတီတိ နိဗ္ဗတ္တိ. ဘဝါဘဝေါတိ ဘဝတော ဘဝေါ. စုတိ စာတိ ဘဝတော စဝနဉ္စ. ဥပပတ္တိ စာတိ စုတဿ ဥပပတ္တိ စ. နိဗ္ဗတ္တိ စာတိ ပါတုဘာဝေါ စ. ဘေဒေါ စာတိ ခန္ဓဘေဒေါ စ. ဇာတိ စာတိ ဇနနဉ္စ. ဇရာ စာတိ ဟာနိ စ. မရဏဉ္စာတိ ဇီဝိတိန္ဒြိယဿ စာဂေါ စ. ပုရိမာပိ ကောဋိ န ပညာယတီတိ ပုဗ္ဗာပိ ကောဋိ နတ္ထိ န သံဝိဇ္ဇတိ. တထာ ပစ္ဆိမာပိ ကောဋိ.

ဧတ္တကာ ဇာတိယောတိ ဧတပရမာ ဇာတိယော. ဝဋ္ဋံ ဝတ္တီတိ သံသာရပဝတ္တိ. တတော ပရံ န ဝတ္တတီတိ တတော ဥဒ္ဓံ နပ္ပဝတ္တတိ. ဟေဝံ နတ္ထီတိ ဧဝံ နတ္ထိ န သံဝိဇ္ဇတိ. ဟိ-ဣတိ နိပါတော. အနမတဂ္ဂေါယန္တိ အယံ သံသာရော အဝိဒိတဂ္ဂေါ.

အဝိဇ္ဇာနီဝရဏာနန္တိ အဝိဇ္ဇာယ အာဝရိတာနံ. တဏှာသံယောဇနာနန္တိ ကာမရာဂသင်္ခါတတဏှာဗန္ဓနဗဒ္ဓါနံ. သန္ဓာဝတန္တိ ကာမဓာတုယာ ပုနပ္ပုနံ ဓာဝန္တာနံ. သံသရတန္တိ ရူပါရူပဓာတုယာ သံသရန္တာနံ. ဒုက္ခံ ပစ္စနုဘူတန္တိ ကာယိကစေတသိကဒုက္ခံ အနုဘူတံ ဝိန္ဒိတံ. တိဗ္ဗန္တိ ဗဟလံ. ဗျသနန္တိ အဝဍ္ဎိ ဝိနာသော. ကဋသီ ဝဍ္ဎိတာတိ သုသာနဝဍ္ဎိတံ. အလမေဝါတိ ယုတ္တမေဝ. သဗ္ဗသင်္ခါရေသူတိ တေဘူမကသင်္ခါရေသု. နိဗ္ဗိန္ဒိတုန္တိ ဥက္ကဏ္ဌိတုံ. ဝိရဇ္ဇိတုန္တိ ဝိရာဂံ ဥပ္ပါဒေတုံ. ဝိမုစ္စိတုန္တိ မောစေတုံ. ဝဋ္ဋံ ဝတ္တိဿတီတိ သံသာရပဝတ္တံ တေဘူမကဝဋ္ဋံ အနာဂတေ ပဝတ္တိဿတိ. တတော ပရံ န ဝတ္တိဿတီတိ တတော ဥဒ္ဓံ အနာဂတေ သံသာရပဝတ္တံ နပ္ပဝတ္တိဿတိ. ဇာတိဘယေတိ ဇာတိံ ပဋိစ္စ ဥပ္ပဇ္ဇနကဘယေ. ဇရာဘယာဒီသုပိ ဧသေဝ နယော.

၆၂-၃. အထဿ ဘဂဝါ တမတ္ထံ ဗျာကရောန္တော ဥပရူပရိဂါထာယော အဘာသိ. ဒုတိယဂါထာ ဝုတ္တတ္ထာယေဝ. တတိယဂါထာယ အကိဉ္စနန္တိ ကိဉ္စနပဋိပက္ခံ. အနာဒါနန္တိ အာဒါနပဋိပက္ခံ၊ ကိဉ္စနာဒါနဝူပသမန္တိ ဝုတ္တံ ဟောတိ. အနာပရန္တိ အပရပဋိဘာဂဒီပဝိရဟိတံ၊ သေဋ္ဌန္တိ ဝုတ္တံ ဟောတိ.

၆၄. စတုတ္ထဂါထာယ န တေ မာရဿ ပဒ္ဓဂူတိ တေ မာရဿ ပဒ္ဓစရာ ပရိစာရိကာ သိဿာ န ဟောန္တိ.

မဟာဇနံ ပါသေ နိယောဇေတွာ မာရေတီတိ မာရော. အကုသလကမ္မေ နိယုတ္တတ္တာ ကဏှော. ဆသု ဒေဝလောကေသု အဓိပတိတ္တာ အဓိပတိ. အကုသလာနံ ဓမ္မာနံ အန္တံ ဂတတ္တာ အန္တဂူ. ပါပဇနံ န မုဉ္စတီတိ နမုစိ. သတိဝိပ္ပဝါသပ္ပမတ္တပုဂ္ဂလာနံ ဉာတကောတိ ပမတ္တဗန္ဓု. သေသံ သဗ္ဗတ္ထ ပါကဋမေဝ.

ဧဝံ ဘဂဝါ ဣဒမ္ပိ သုတ္တံ အရဟတ္တနိကူဋေနေဝ ဒေသေသိ၊ ဒေသနာပရိယောသာနေ စ ပုဗ္ဗသဒိသောဝ ဓမ္မာဘိသမယော အဟောသီတိ.

သဒ္ဓမ္မပ္ပဇ္ဇောတိကာယ စူဠနိဒ္ဒေသ-အဋ္ဌကထာယ

ကပ္ပမာဏဝသုတ္တနိဒ္ဒေသဝဏ္ဏနာ နိဋ္ဌိတာ.