၃၇. ဝင်္ဂီသတ္ထေရဝတ္ထု

စုတိံ ယော ဝေဒီတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဝင်္ဂီသတ္ထေရံ အာရဗ္ဘ ကထေသိ.

ရာဇဂဟေ ကိရေကော ဗြာဟ္မဏော ဝင်္ဂီသော နာမ မတမနုဿာနံ သီသံ အာကောဋေတွာ ‘‘ဣဒံ နိရယေ နိဗ္ဗတ္တဿ သီသံ၊ ဣဒံ တိရစ္ဆာနယောနိယံ၊ ဣဒံ ပေတ္တိဝိသယေ၊ ဣဒံ မနုဿလောကေ၊ ဣဒံ ဒေဝလောကေ နိဗ္ဗတ္တဿ သီသ’’န္တိ ဇာနာတိ. ဗြာဟ္မဏာ ‘‘သက္ကာ ဣမံ နိဿာယ လောကံ ခါဒိတု’’န္တိ စိန္တေတွာ တံ ဒွေ ရတ္တဝတ္ထာနိ ပရိဒဟာပေတွာ အာဒါယ ဇနပဒံ စရန္တာ မနုဿေ ဝဒန္တိ ‘‘ဧသော ဝင်္ဂီသော နာမ ဗြာဟ္မဏော မတမနုဿာနံ သီသံ အာကောဋေတွာ နိဗ္ဗတ္တဋ္ဌာနံ ဇာနာတိ၊ အတ္တနော ဉာတကာနံ နိဗ္ဗတ္တဋ္ဌာနံ ပုစ္ဆထာ’’တိ. မနုဿာ ယထာဗလံ ဒသပိ ကဟာပဏေ ဝီသတိပိ သတမ္ပိ ဒတွာ ဉာတကာနံ နိဗ္ဗတ္တဋ္ဌာနံ ပုစ္ဆန္တိ. တေ အနုပုဗ္ဗေန သာဝတ္ထိံ ပတွာ ဇေတဝနဿ အဝိဒူရေ နိဝါသံ ဂဏှိံသု. တေ ဘုတ္တပါတရာသာ မဟာဇနံ ဂန္ဓမာလာဒိဟတ္ထံ ဓမ္မဿဝနာယ ဂစ္ဆန္တံ ဒိသွာ ‘‘ကဟံ ဂစ္ဆထာ’’တိ ပုစ္ဆိတွာ ‘‘ဝိဟာရံ ဓမ္မဿဝနာယာ’’တိ ဝုတ္တေ ‘‘တတ္ထ ဂန္တွာ ကိံ ကရိဿထ၊ အမှာကံ ဝင်္ဂီသဗြာဟ္မဏေန သဒိသော နာမ နတ္ထိ၊ မတမနုဿာနံ သီသံ အာကောဋေတွာ နိဗ္ဗတ္တဋ္ဌာနံ ဇာနာတိ၊ ဉာတကာနံ နိဗ္ဗတ္တဋ္ဌာနံ ပုစ္ဆထာ’’တိ အာဟံသု. တေ ‘‘ဝင်္ဂီသော ကိံ ဇာနာတိ၊ အမှာကံ သတ္ထာရာ သဒိသော နာမ နတ္ထီ’’တိ ဝတွာ ဣတရေဟိပိ ‘‘ဝင်္ဂီသသဒိသော နတ္ထီ’’တိ ဝုတ္တေ ကထံ ဝဍ္ဎေတွာ ‘‘ဧထ၊ ဒါနိ ဝေါ ဝင်္ဂီသဿ ဝါ အမှာကံ ဝါ သတ္ထု ဇာနနဘာဝံ ဇာနိဿာမာ’’တိ တေ အာဒါယ ဝိဟာရံ အဂမံသု. သတ္ထာ တေသံ အာဂမနဘာဝံ ဉတွာ နိရယေ တိရစ္ဆာနယောနိယံ မနုဿလောကေ ဒေဝလောကေတိ စတူသု ဌာနေသု နိဗ္ဗတ္တာနံ စတ္တာရိ သီသာနိ၊ ခီဏာသဝသီသဉ္စာတိ ပဉ္စ သီသာနိ အာဟရာပေတွာ ပဋိပါဋိယာ ဌပေတွာ အာဂတကာလေ ဝင်္ဂီသံ ပုစ္ဆိ – ‘‘တွံ ကိရ သီသံ အာကောဋေတွာ မတကာနံ နိဗ္ဗတ္တဋ္ဌာနံ ဇာနာသီ’’တိ? ‘‘အာမ၊ ဇာနာမီ’’တိ. ‘‘ဣဒံ ကဿ သီသ’’န္တိ? သော တံ အာကောဋေတွာ ‘‘နိရယေ နိဗ္ဗတ္တဿာ’’တိ အာဟ. အထဿ သတ္ထာ ‘‘သာဓု သာဓူ’’တိ သာဓုကာရံ ဒတွာ ဣတရာနိပိ တီဏိ သီသာနိ ပုစ္ဆိတွာ တေန အဝိရဇ္ဈိတွာ ဝုတ္တဝုတ္တက္ခဏေ တထေဝ တဿ သာဓုကာရံ ဒတွာ ပဉ္စမံ သီသံ ဒဿေတွာ ‘‘ဣဒံ ကဿ သီသ’’န္တိ ပုစ္ဆိ၊ သော တမ္ပိ အာကောဋေတွာ နိဗ္ဗတ္တဋ္ဌာနံ န ဇာနာတိ.

အထ နံ သတ္ထာ ‘‘ကိံ၊ ဝင်္ဂီသ၊ န ဇာနာသီ’’တိ ဝတွာ၊ ‘‘အာမ၊ န ဇာနာမီ’’တိ ဝုတ္တေ ‘‘အဟံ ဇာနာမီ’’တိ အာဟ. အထ နံ ဝင်္ဂီသော ယာစိ ‘‘ဒေထ မေ ဣမံ မန္တ’’န္တိ. န သက္ကာ အပဗ္ဗဇိတဿ ဒါတုန္တိ. သော ‘‘ဣမသ္မိံ မန္တေ ဂဟိတေ သကလဇမ္ဗုဒီပေ အဟံ ဇေဋ္ဌကော ဘဝိဿာမီ’’တိ စိန္တေတွာ တေ ဗြာဟ္မဏေ ‘‘တုမှေ တတ္ထေဝ ကတိပါဟံ ဝသထ၊ အဟံ ပဗ္ဗဇိဿာမီ’’တိ ဥယျောဇေတွာ သတ္ထု သန္တိကေ ပဗ္ဗဇိတွာ လဒ္ဓူပသမ္ပဒေါ ဝင်္ဂီသတ္ထေရော နာမ အဟောသိ. အထဿ သတ္ထာ ဒွတ္တိံသာကာရကမ္မဋ္ဌာနံ ဒတွာ ‘‘မန္တဿ ပရိကမ္မံ သဇ္ဈာယာဟီ’’တိ အာဟ. သော တံ သဇ္ဈာယန္တော အန္တရန္တရာ ဗြာဟ္မဏေဟိ ‘‘ဂဟိတော တေ မန္တော’’တိ ပုစ္ဆိယမာနော ‘‘အာဂမေထ တာဝ၊ ဂဏှာမီ’’တိ ဝတွာ ကတိပါဟေနေဝ အရဟတ္တံ ပတွာ ပုန ဗြာဟ္မဏေဟိ ပုဋ္ဌော ‘‘အဘဗ္ဗော ဒါနာဟံ၊ အာဝုသော၊ ဂန္တု’’န္တိ အာဟ. တံ သုတွာ ဘိက္ခူ ‘‘အယံ၊ ဘန္တေ၊ အဘူတေန အညံ ဗျာကရောတီ’’တိ သတ္ထု အာရောစေသုံ. သတ္ထာ ‘‘မာ၊ ဘိက္ခဝေ၊ ဧဝံ အဝစုတ္ထ၊ ဣဒါနိ၊ ဘိက္ခဝေ၊ မမ ပုတ္တော စုတိပဋိသန္ဓိကုသလော ဇာတော’’တိ ဝတွာ ဣမာ ဂါထာ အဘာသိ –

၄၁၉. ‘‘စုတိံ ယော ဝေဒိ သတ္တာနံ၊ ဥပပတ္တိဉ္စ သဗ္ဗသော၊

အသတ္တံ သုဂတံ ဗုဒ္ဓံ၊ တမဟံ ဗြူမိ ဗြာဟ္မဏံ.

၄၂၀. ‘‘ယဿ ဂတိံ န ဇာနန္တိ၊ ဒေဝါ ဂန္ဓဗ္ဗမာနုသာ၊

ခီဏာသဝံ အရဟန္တံ၊ တမဟံ ဗြူမိ ဗြာဟ္မဏ’’န္တိ.

တတ္ထ ယော ဝေဒီတိ ယော သတ္တာနံ သဗ္ဗာကာရေန စုတိဉ္စ ပဋိသန္ဓိဉ္စ ပါကဋံ ကတွာ ဇာနာတိ၊ တမဟံ အလဂ္ဂတာယ အသတ္တံ၊ ပဋိပတ္တိယာ သုဋ္ဌု ဂတတ္တာ သုဂတံ၊ စတုန္နံ သစ္စာနံ ဗုဒ္ဓတာယ ဗုဒ္ဓံ ဗြာဟ္မဏံ ဝဒါမီတိ အတ္ထော. ယဿာတိ ယဿေတေ ဒေဝါဒယော ဂတိံ န ဇာနန္တိ၊ တမဟံ အာသဝါနံ ခီဏတာယ ခီဏာသဝံ၊ ကိလေသေဟိ အာရကတ္တာ အရဟန္တံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဝင်္ဂီသတ္ထေရဝတ္ထု သတ္တတိံသတိမံ.