၃၈. ဓမ္မဒိန္နတ္ထေရီဝတ္ထု

ယဿာတိ ဣမံ ဓမ္မဒေသနံ သတ္ထာ ဝေဠုဝနေ ဝိဟရန္တော ဓမ္မဒိန္နံ နာမ ဘိက္ခုနိံ အာရဗ္ဘ ကထေသိ.

ဧကဒိဝသဉှိ တဿာ ဂိဟိကာလေ သာမိကော ဝိသာခေါ ဥပါသကော သတ္ထု သန္တိကေ ဓမ္မံ သုတွာ အနာဂါမိဖလံ ပတွာ စိန္တေသိ – ‘‘မယာ သဗ္ဗံ သာပတေယျံ ဓမ္မဒိန္နံ ပဋိစ္ဆာပေတုံ ဝဋ္ဋတီ’’တိ. သော တတော ပုဗ္ဗေ အာဂစ္ဆန္တော ဓမ္မဒိန္နံ ဝါတပါနေန ဩလောကေန္တိံ ဒိသွာ သိတံ ကရောတိ. တံ ဒိဝသံ ပန ဝါတပါနေန ဌိတံ အနောလောကေန္တောဝ အဂမာသိ. သာ ‘‘ကိံ နု ခေါ ဣဒ’’န္တိ စိန္တေတွာ ‘‘ဟောတု၊ ဘောဇနကာလေ ဇာနိဿာမီ’’တိ ဘောဇနဝေလာယ ဘတ္တံ ဥပနာမေသိ. သော အညေသု ဒိဝသေသု ‘‘ဧဟိ၊ ဧကတော ဘုဉ္ဇာမာ’’တိ ဝဒတိ၊ တံ ဒိဝသံ ပန တုဏှီဘူတောဝ ဘုဉ္ဇိ. သာ ‘‘ကေနစိဒေဝ ကာရဏေန ကုပိတော ဘဝိဿတီ’’တိ စိန္တေသိ. အထ နံ ဝိသာခေါ သုခနိသိန္နဝေလာယ တံ ပက္ကောသိတွာ ‘‘ဓမ္မဒိန္နေ ဣမသ္မိံ ဂေဟေ သဗ္ဗံ သာပတေယျံ ပဋိစ္ဆာဟီ’’တိ အာဟ. သာ ‘‘ကုဒ္ဓါ နာမ သာပတေယျံ န ပဋိစ္ဆာပေန္တိ၊ ကိံ နု ခေါ ဧတ’’န္တိ စိန္တေတွာ ‘‘တုမှေ ပန၊ သာမီ’’တိ အာဟ. အဟံ ဣတော ပဋ္ဌာယ န ကိဉ္စိ ဝိစာရေမီတိ. တုမှေဟိ ဆဍ္ဍိတံ ခေဠံ ကော ပဋိစ္ဆိဿတိ၊ ဧဝံ သန္တေ မမ ပဗ္ဗဇ္ဇံ အနုဇာနာထာတိ. သော ‘‘သာဓု၊ ဘဒ္ဒေ’’တိ သမ္ပဋိစ္ဆိတွာ မဟန္တေန သက္ကာရေန တံ ဘိက္ခုနီဥပဿယံ နေတွာ ပဗ္ဗာဇေသိ. သာ လဒ္ဓူပသမ္ပဒါ ဓမ္မဒိန္နတ္ထေရီ နာမ အဟောသိ.

သာ ပဝိဝေကကာမတာယ ဘိက္ခုနီဟိ သဒ္ဓိံ ဇနပဒံ ဂန္တွာ တတ္ထ ဝိဟရန္တီ န စိရဿေဝ သဟ ပဋိသမ္ဘိဒါဟိ အရဟတ္တံ ပတွာ ‘‘ဣဒါနိ မံ နိဿာယ ဉာတိဇနာ ပုညာနိ ကရိဿန္တီ’’တိ ပုနဒေဝ ရာဇဂဟံ ပစ္စာဂဉ္ဆိ. ဥပါသကော တဿာ အာဂတဘာဝံ သုတွာ ‘‘ကေန နု ခေါ ကာရဏေန အာဂတာ’’တိ ဘိက္ခုနီဥပဿယံ ဂန္တွာ ထေရိံ ဝန္ဒိတွာ ဧကမန္တံ နိသိန္နော ‘‘ဥက္ကဏ္ဌိတာ နု ခေါသိ၊ အယျေတိ ဝတ္တုံ အပ္ပတိရူပံ၊ ပဉှမေကံ နံ ပုစ္ဆိဿာမီ’’တိ စိန္တေတွာ သောတာပတ္တိမဂ္ဂေ ပဉှံ ပုစ္ဆိ၊ သာ တံ ဝိဿဇ္ဇေသိ. ဥပါသကော တေနေဝ ဥပါယေန သေသမဂ္ဂေသုပိ ပဉှံ ပုစ္ဆိတွာ အတိက္ကမ္မ ပဉှဿ ပုဋ္ဌကာလေ တာယ ‘‘အစ္စယာသိ၊ အာဝုသော၊ ဝိသာခါ’’တိ ဝတွာ ‘‘အာကင်္ခမာနော သတ္ထာရံ ဥပသင်္ကမိတွာ ဣမံ ပဉှံ ပုစ္ဆေယျာသီ’’တိ ဝုတ္တေ ထေရိံ ဝန္ဒိတွာ ဥဋ္ဌာယာသနာ သတ္ထု သန္တိကံ ဂန္တွာ တံ ကထာသလ္လာပံ သဗ္ဗံ ဘဂဝတော အာရောစေသိ. သတ္ထာ ‘‘သုကထိတံ မမ ဓီတာယ ဓမ္မဒိန္နာယ၊ အဟမ္ပေတံ ပဉှံ ဝိဿဇ္ဇေန္တော ဧဝမေဝ ဝိဿဇ္ဇေယျ’’န္တိ ဝတွာ ဓမ္မံ ဒေသေန္တော ဣမံ ဂါထမာဟ –

၄၂၁. ‘‘ယဿ ပုရေ စ ပစ္ဆာ စ၊ မဇ္ဈေ စ နတ္ထိ ကိဉ္စနံ၊

အကိဉ္စနံ အနာဒါနံ၊ တမဟံ ဗြူမိ ဗြာဟ္မဏ’’န္တိ.

တတ္ထ ပုရေတိ အတီတေသု ခန္ဓေသု. ပစ္ဆာတိ အနာဂတေသု ခန္ဓေသု. မဇ္ဈေတိ ပစ္စုပ္ပန္နေသု ခန္ဓေသု. နတ္ထိ ကိဉ္စနန္တိ ယဿေတေသု ဌာနေသု တဏှာဂါဟသင်္ခါတံ ကိဉ္စနံ နတ္ထိ၊ တမဟံ ရာဂကိဉ္စနာဒီဟိ အကိဉ္စနံ ကဿစိ ဂဟဏဿ အဘာဝေန အနာဒါနံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဓမ္မဒိန္နတ္ထေရီဝတ္ထု အဋ္ဌတိံသတိမံ.