၃၄. ဇောတိကတ္ထေရဝတ္ထု

ယောဓ တဏှန္တိ ပုန ဣမံ ဓမ္မဒေသနံ သတ္ထာ ဝေဠုဝနေ ဝိဟရန္တော ဇောတိကတ္ထေရံ အာရဗ္ဘ ကထေသိ.

အဇာတသတ္တုကုမာရော ဟိ ဒေဝဒတ္တေန သဒ္ဓိံ ဧကတော ဟုတွာ ပိတရံ ဃာတေတွာ ရဇ္ဇေ ပတိဋ္ဌိတော ‘‘ဇောတိကသေဋ္ဌိဿ မဟာပါသာဒံ ဂဏှိဿာမီ’’တိ ယုဒ္ဓသဇ္ဇော နိက္ခမိတွာ မဏိပါကာရေ သပရိဝါရဿ အတ္တနော ဆာယံ ဒိသွာ ‘‘ဂဟပတိကော ယုဒ္ဓသဇ္ဇော ဟုတွာ ဗလံ အာဒါယ နိက္ခန္တော’’တိ သလ္လက္ခေတွာ ဥပဂန္တုံ န ဝိသဟိ. သေဋ္ဌိပိ တံ ဒိဝသံ ဥပေါသထိကော ဟုတွာ ပါတောဝ ဘုတ္တပါတရာသော ဝိဟာရံ ဂန္တွာ သတ္ထု သန္တိကေ ဓမ္မံ သုဏန္တော နိသိန္နော ဟောတိ. ပဌမေ ဒွါရကောဋ္ဌကေ အာရက္ခံ ဂဟေတွာ ဌိတော ပန ယမကောဠိ နာမ ယက္ခော တံ ဒိသွာ ‘‘ကဟံ ဂစ္ဆသီ’’တိ သပရိဝါရံ ဝိဒ္ဓံသေတွာ ဒိသာဝိဒိသာသု အနုဗန္ဓိ. ရာဇာ ဝိဟာရမေဝ အဂမာသိ.

အထ နံ သေဋ္ဌိ ဒိသွာဝ ‘‘ကိံ၊ ဒေဝါ’’တိ ဝတွာ ဥဋ္ဌာယာသနာ အဋ္ဌာသိ. ဂဟပတိ၊ ကိံ တွံ တဝ ပုရိသေ ‘‘မယာ သဒ္ဓိံ ယုဇ္ဈထာ’’တိ အာဏာပေတွာ ဣဓာဂမ္မ ဓမ္မံ သုဏန္တော ဝိယ နိသိန္နောတိ. ကိံ ပန ဒေဝေါ မမ ဂေဟံ ဂဏှိတုံ ဂတောတိ? အာမ၊ ဂတောမှီတိ. မမ အနိစ္ဆာယ မမ ဂေဟံ ဂဏှိတုံ ရာဇသဟဿမ္ပိ န သက္ကောတိ၊ ဒေဝါတိ. သော ‘‘ကိံ ပန တွံ ရာဇာ ဘဝိဿသီ’’တိ ကုဇ္ဈိ. နာဟံ ရာဇာ၊ မမ သန္တကံ ပန ဒသိကသုတ္တမ္ပိ မမ အနိစ္ဆာယ ရာဇူဟိ ဝါ စောရေဟိ ဝါ ဂဟေတုံ န သက္ကာတိ. ကိံ ပနာဟံ တဝ ရုစိယာ ဂဏှိဿာမီတိ? တေန ဟိ၊ ဒေဝ၊ ဣမာ မေ ဒသသု အင်္ဂုလီသု ဝီသတိ မုဒ္ဒိကာ၊ ဣမာဟံ တုမှာကံ န ဒေမိ. သစေ သက္ကောထ၊ ဂဏှထာတိ. သော ပန ရာဇာ ဘူမိယံ ဥက္ကုဋိကံ နိသီဒိတွာ ဥလ္လင်္ဃန္တော အဋ္ဌာရသဟတ္ထံ ဌာနံ အဘိရုဟတိ၊ ဌတွာ ဥလ္လင်္ဃန္တော အသီတိဟတ္ထံ ဌာနံ အဘိရုဟတိ. ဧဝံမဟာဗလော သမာနောပိ ဣတော စိတော စ ပရိဝတ္တေန္တော ဧကံ မုဒ္ဒိကမ္ပိ ကဍ္ဎိတုံ နာသက္ခိ. အထ နံ သေဋ္ဌိ ‘‘သာဋကံ ပတ္ထရ၊ ဒေဝါ’’တိ ဝတွာ အင်္ဂုလိယော ဥဇုကာ အကာသိ၊ ဝီသတိပိ မုဒ္ဒိကာ နိက္ခမိံသု. အထ နံ သေဋ္ဌိ ‘‘ဧဝံ၊ ဒေဝ၊ မမ သန္တကံ မမ အနိစ္ဆာယ န သက္ကာ ဂဏှိတု’’န္တိ ဝတွာ ရညော ကိရိယာယ ဥပ္ပန္နသံဝေဂေါ ‘‘ပဗ္ဗဇိတုံ မေ အနုဇာန၊ ဒေဝါ’’တိ အာဟ. သော ‘‘ဣမသ္မိံ ပဗ္ဗဇိတေ သုခံ ပါသာဒံ ဂဏှိဿာမီ’’တိ စိန္တေတွာ ဧကဝစနေနေဝ ‘‘တွံ ပဗ္ဗဇာဟီ’’တိ အာဟ. သော သတ္ထု သန္တိကေ ပဗ္ဗဇိတွာ န စိရဿေဝ အရဟတ္တံ ပတွာ ဇောတိကတ္ထေရော နာမ အဟောသိ. တဿ အရဟတ္တံ ပတ္တက္ခဏေယေဝ သဗ္ဗာပိ သာ သမ္ပတ္တိ အန္တရဓာယိ၊ တမ္ပိဿ သတုလကာယိံ နာမ ဘရိယံ ဒေဝတာ ဥတ္တရကုရုမေဝ နယိံသု.

အထေကဒိဝသံ ဘိက္ခူ တံ အာမန္တေတွာ၊ ‘‘အာဝုသော ဇောတိက၊ တသ္မိံ ပန တေ ပါသာဒေ ဝါ ဣတ္ထိယာ ဝါ တဏှာ အတ္ထီ’’တိ ပုစ္ဆိတွာ ‘‘နတ္ထာဝုသော’’တိ ဝုတ္တေ သတ္ထု အာရောစေသုံ – ‘‘အယံ၊ ဘန္တေ၊ အဘူတံ ဝတွာ အညံ ဗျာကရောတီ’’တိ. သတ္ထာ ‘‘နတ္ထေဝ၊ ဘိက္ခဝေ၊ မမ ပုတ္တဿ တသ္မိံ တဏှာ’’တိ ဝတွာ ဣမံ ဂါထမာဟ –

၄၁၆. ‘‘ယောဓ တဏှံ ပဟန္တွာန၊ အနာဂါရော ပရိဗ္ဗဇေ၊

တဏှာဘဝပရိက္ခီဏံ၊ တမဟံ ဗြူမိ ဗြာဟ္မဏ’’န္တိ.

ဣမိဿာ ဂါထာယတ္ထော ဟေဋ္ဌာ ဇဋိလတ္ထေရဝတ္ထုမှိ ဝုတ္တနယေနေဝ ဝေဒိတဗ္ဗော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဇောတိကတ္ထေရဝတ္ထု စတုတိံသတိမံ.