၃၅. နဋပုတ္တကတ္ထေရဝတ္ထု

ဟိတွာတိ ဣမံ ဓမ္မဒေသနံ သတ္ထာ ဝေဠုဝနေ ဝိဟရန္တော ဧကံ နဋပုတ္တကံ အာရဗ္ဘ ကထေသိ.

သော ကိရ ဧကံ နဋကီဠံ ကီဠယမာနော ဝိစရန္တော သတ္ထု ဓမ္မကထံ သုတွာ ပဗ္ဗဇိတွာ အရဟတ္တံ ပါပုဏိ. တသ္မိံ ဗုဒ္ဓပ္ပမုခေန ဘိက္ခုသံဃေန သဒ္ဓိံ ပိဏ္ဍာယ ပဝိသန္တေ ဘိက္ခူ ဧကံ နဋပုတ္တံ ကီဠန္တံ ဒိသွာ၊ ‘‘အာဝုသော၊ ဧသ တယာ ကီဠိတကီဠိတံ ကီဠတိ၊ အတ္ထိ နု ခေါ တေ ဧတ္ထ သိနေဟော’’တိ ပုစ္ဆိတွာ ‘‘နတ္ထီ’’တိ ဝုတ္တေ ‘‘အယံ၊ ဘန္တေ၊ အဘူတံ ဝတွာ အညံ ဗျာကရောတီ’’တိ အာဟံသု. သတ္ထာ တေသံ ကထံ သုတွာ၊ ‘‘ဘိက္ခဝေ၊ မမ ပုတ္တော သဗ္ဗယောဂေ အတိက္ကန္တော’’တိ ဝတွာ ဣမံ ဂါထမာဟ –

၄၁၇. ‘‘ဟိတွာ မာနုသကံ ယောဂံ၊ ဒိဗ္ဗံ ယောဂံ ဥပစ္စဂါ၊

သဗ္ဗယောဂဝိသံယုတ္တံ၊ တမဟံ ဗြူမိ ဗြာဟ္မဏ’’န္တိ.

တတ္ထ မာနုသကံ ယောဂန္တိ မာနုသကံ အာယုဉ္စေဝ ပဉ္စ ကာမဂုဏေ စ. ဒိဗ္ဗယောဂေပိ ဧသေဝ နယော. ဥပစ္စဂါတိ ယော မာနုသကံ ယောဂံ ဟိတွာ ဒိဗ္ဗံ ယောဂံ အတိက္ကန္တော၊ တံ သဗ္ဗေဟိ စတူဟိပိ ယောဂေဟိ ဝိသံယုတ္တံ အဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

နဋပုတ္တကတ္ထေရဝတ္ထု ပဉ္စတိံသတိမံ.