၃. မာရဝတ္ထု

ယဿ ပါရန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော မာရံ အာရဗ္ဘ ကထေသိ.

သော ကိရေကသ္မိံ ဒိဝသေ အညတရော ပုရိသော ဝိယ ဟုတွာ သတ္ထာရံ ဥပသင်္ကမိတွာ ပုစ္ဆိ – ‘‘ဘန္တေ၊ ပါရံ ပါရန္တိ ဝုစ္စတိ၊ ကိန္နု ခေါ ဧတံ ပါရံ နာမာ’’တိ. သတ္ထာ ‘‘မာရော အယ’’န္တိ ဝိဒိတွာ၊ ‘‘ပါပိမ၊ ကိံ တဝ ပါရေန၊ တဉှိ ဝီတရာဂေဟိ ပတ္တဗ္ဗ’’န္တိ ဝတွာ ဣမံ ဂါထမာဟ –

၃၈၅. ‘‘ယဿ ပါရံ အပါရံ ဝါ၊ ပါရာပါရံ န ဝိဇ္ဇတိ၊

ဝီတဒ္ဒရံ ဝိသံယုတ္တံ၊ တမဟံ ဗြူမိ ဗြာဟ္မဏ’’န္တိ.

တတ္ထ ပါရန္တိ အဇ္ဈတ္တိကာနိ ဆ အာယတနာနိ. အပါရန္တိ ဗာဟိရာနိ ဆ အာယတနာနိ. ပါရာပါရန္တိ တဒုဘယံ. န ဝိဇ္ဇတီတိ ယဿ သဗ္ဗမ္ပေတံ ‘‘အဟ’’န္တိ ဝါ ‘‘မမ’’န္တိ ဝါ ဂဟဏာဘာဝေန နတ္ထိ၊ တံ ကိလေသဒရထာနံ ဝိဂမေန ဝီတဒ္ဒရံ သဗ္ဗကိလေသေဟိ ဝိသံယုတ္တံ အဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

မာရဝတ္ထု တတိယံ.