၄. အညတရဗြာဟ္မဏဝတ္ထု
ဈာယိန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော အညတရံ ဗြာဟ္မဏံ အာရဗ္ဘ ကထေသိ.
သော ကိရ စိန္တေသိ – ‘‘သတ္ထာ အတ္တနော သာဝကေ၊ ‘ဗြာဟ္မဏာ’တိ ဝဒတိ၊ အဟဉ္စမှိ ဇာတိဂေါတ္တေန ဗြာဟ္မဏော၊ မမ္ပိ နု ခေါ ဧဝံ ဝတ္တုံ ဝဋ္ဋတီ’’တိ. သော သတ္ထာရံ ဥပသင်္ကမိတွာ တမတ္ထံ ပုစ္ဆိ. သတ္ထာ ‘‘နာဟံ ဇာတိဂေါတ္တမတ္တေန ဗြာဟ္မဏံ ဝဒါမိ၊ ဥတ္တမတ္ထံ အရဟတ္တံ အနုပ္ပတ္တမေဝ ပနေဝံ ဝဒါမီ’’တိ ဝတွာ ဣမံ ဂါထမာဟ –
၃၈၆. ‘‘ဈာယိံ ဝိရဇမာသီနံ၊ ကတကိစ္စမနာသဝံ၊
ဥတ္တမတ္ထမနုပ္ပတ္တံ၊ တမဟံ ဗြူမိ ဗြာဟ္မဏ’’န္တိ.
တတ္ထ ဈာယိန္တိ ဒုဝိဓေန ဈာနေန ဈာယန္တံ ကာမရဇေန ဝိရဇံ ဝနေ ဧကကမာသီနံ စတူဟိ မဂ္ဂေဟိ သောဠသန္နံ ကိစ္စာနံ ကတတ္တာ ကတကိစ္စံ အာသဝါနံ အဘာဝေန အနာသဝံ ဥတ္တမတ္ထံ အရဟတ္တံ အနုပ္ပတ္တံ အဟံ ဗြာဟ္မဏံ ဝဒါမီတိ အတ္ထော.
ဒေသနာဝသာနေ သော ဗြာဟ္မဏော သောတာပတ္တိဖလေ ပတိဋ္ဌဟိ၊ သမ္ပတ္တာနမ္ပိ သာတ္ထိကာ ဓမ္မဒေသနာ အဟောသီတိ.
အညတရဗြာဟ္မဏဝတ္ထု စတုတ္ထံ.