၂၆. အညတရတ္ထေရဝတ္ထု

ယောဓ ဒီဃန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော အညတရတ္ထေရံ အာရဗ္ဘ ကထေသိ.

သာဝတ္ထိယံ ကိရေကော မိစ္ဆာဒိဋ္ဌိကော ဗြာဟ္မဏော သရီရဂန္ဓဂဟဏဘယေန ဥတ္တရသာဋကံ အပနေတွာ ဧကမန္တေ ဌပေတွာ ဂေဟဒွါရာဘိမုခေါ နိသီဒိ. အထေကော ခီဏာသဝေါ ဘတ္တကိစ္စံ ကတွာ ဝိဟာရံ ဂစ္ဆန္တော တံ သာဋကံ ဒိသွာ ဣတော စိတော စ ဩလောကေတွာ ကဉ္စိ အပဿန္တော ‘‘နိဿာမိကော အယ’’န္တိ ပံသုကူလံ အဓိဋ္ဌဟိတွာ ဂဏှိ. အထ နံ ဗြာဟ္မဏော ဒိသွာ အက္ကောသန္တော ဥပသင်္ကမိတွာ ‘‘မုဏ္ဍက၊ သမဏ၊ မမ သာဋကံ ဂဏှသီ’’တိ အာဟ. တဝေသော၊ ဗြာဟ္မဏာတိ. အာမ၊ သမဏာတိ. ‘‘မယာ ကဉ္စိ အပဿန္တေန ပံသုကူလသညာယ ဂဟိတော၊ ဂဏှ န’’န္တိ တဿ ဒတွာ ဝိဟာရံ ဂန္တွာ ဘိက္ခူနံ တမတ္ထံ အာရောစေသိ. အထဿ ဝစနံ သုတွာ ဘိက္ခူ တေန သဒ္ဓိံ ကေဠိံ ကရောန္တာ ‘‘ကိံ နု ခေါ၊ အာဝုသော၊ သာဋကော ဒီဃော ရဿော ထူလော သဏှော’’တိ. အာဝုသော၊ ဒီဃော ဝါ ဟောတု ရဿော ဝါ ထူလော ဝါ သဏှော ဝါ၊ နတ္ထိ မယှံ တသ္မိံ အာလယော၊ ပံသုကူလသညာယ နံ ဂဏှိန္တိ. တံ သုတွာ ဘိက္ခူ တထာဂတဿ အာရောစေသုံ – ‘‘ဧသ၊ ဘန္တေ၊ ဘိက္ခု အဘူတံ ဝတွာ အညံ ဗျာကရောတီ’’တိ. သတ္ထာ ‘‘ဘူတံ၊ ဘိက္ခဝေ၊ ဧသ ကထေတိ၊ ခီဏာသဝါ နာမ ပရေသံ သန္တကံ န ဂဏှန္တီ’’တိ ဝတွာ ဣမံ ဂါထမာဟ –

၄၀၉. ‘‘ယောဓ ဒီဃံ ဝ ရဿံ ဝါ၊ အဏုံ ထူလံ သုဘာသုဘံ၊

လောကေ အဒိန္နံ နာဒိယတိ၊ တမဟံ ဗြူမိ ဗြာဟ္မဏ’’န္တိ.

တဿတ္ထော – သာဋကာဘရဏာဒီသု ဒီဃံ ဝါ ရဿံ ဝါ မဏိမုတ္တာဒီသု အဏုံ ဝါ ထူလံ ဝါ မဟဂ္ဃအပ္ပဂ္ဃဝသေန သုဘံ ဝါ အသုဘံ ဝါ ယော ပုဂ္ဂလော ဣမသ္မိံ လောကေ ပရပရိဂ္ဂဟိတံ နာဒိယတိ၊ တမဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

အညတရတ္ထေရဝတ္ထု ဆဗ္ဗီသတိမံ.