၂၇. သာရိပုတ္တတ္ထေရဝတ္ထု

အာသာ ယဿာတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော သာရိပုတ္တတ္ထေရံ အာရဗ္ဘ ကထေသိ.

ထေရော ကိရ ပဉ္စဘိက္ခုသတပရိဝါရော ဇနပဒေ ဧကံ ဝိဟာရံ ဂန္တွာ ဝဿံ ဥပဂဉ္ဆိ. မနုဿာ ထေရံ ဒိသွာ ဗဟုံ ဝဿာဝါသိကံ ပဋိဿုဏိံသု. ထေရော ပဝါရေတွာ သဗ္ဗသ္မိံ ဝဿာဝါသိကေ အသမ္ပတ္တေယေဝ သတ္ထု သန္တိကံ ဂစ္ဆန္တော ဘိက္ခူ အာဟ – ‘‘ဒဟရာနဉ္စေဝ သာမဏေရာနဉ္စ မနုဿေဟိ ဝဿာဝါသိကေ အာဟဋေ ဂဟေတွာ ပေသေယျာထ၊ ဌပေတွာ ဝါ သာသနံ ပဟိဏေယျာထာ’’တိ. ဧဝံ ဝတွာ စ ပန သတ္ထု သန္တိကံ အဂမာသိ. ဘိက္ခူ ကထံ သမုဋ္ဌာပေသုံ ‘‘အဇ္ဇာပိ မညေ သာရိပုတ္တတ္ထေရဿ တဏှာ အတ္ထိယေဝ. တထာ ဟိ မနုဿေဟိ ဝဿာဝါသိကေ ဒိန္နေ အတ္တနော သဒ္ဓိဝိဟာရိကာနံ ‘ဝဿာဝါသိကံ ပေသေယျာထ၊ ဌပေတွာ ဝါ သာသနံ ပဟိဏေယျာထာ’တိ ဘိက္ခူနံ ဝတွာ အာဂတော’’တိ. သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ မမ ပုတ္တဿ တဏှာ အတ္ထိ၊ မနုဿာနံ ပန ပုညတော ဒဟရသာမဏေရာနဉ္စ ဓမ္မိကလာဘတော ပရိဟာနိ မာ အဟောသီတိ တေနေဝံ ကထိတ’’န္တိ ဝတွာ ဣမံ ဂါထမာဟ –

၄၁၀. ‘‘အာသာ ယဿ န ဝိဇ္ဇန္တိ၊ အသ္မိံ လောကေ ပရမှိ စ၊

နိရာသာသံ ဝိသံယုတ္တံ၊ တမဟံ ဗြူမိ ဗြာဟ္မဏ’’န္တိ.

တတ္ထ အာသာတိ တဏှာ. နိရာသာသန္တိ နိတ္တဏှံ. ဝိသံယုတ္တန္တိ သဗ္ဗကိလေသေဟိ ဝိသံယုတ္တံ တမဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

သာရိပုတ္တတ္ထေရဝတ္ထု သတ္တဝီသတိမံ.