၂၅. ပိလိန္ဒဝစ္ဆတ္ထေရဝတ္ထု

အကက္ကသန္တိ ဣမံ ဓမ္မဒေသနံ သတ္ထာ ဝေဠုဝနေ ဝိဟရန္တော ပိလိန္ဒဝစ္ဆတ္ထေရံ အာရဗ္ဘ ကထေသိ.

သော ကိရာယသ္မာ ‘‘ဧဟိ၊ ဝသလိ၊ ယာဟိ၊ ဝသလီ’’တိအာဒီနိ ဝဒန္တော ဂိဟီပိ ပဗ္ဗဇိတေပိ ဝသလိဝါဒေနေဝ သမုဒါစရတိ. အထေကဒိဝသံ သမ္ဗဟုလာ ဘိက္ခူ သတ္ထု အာရောစေသုံ – ‘‘အာယသ္မာ၊ ဘန္တေ၊ ပိလိန္ဒဝစ္ဆော ဘိက္ခူ ဝသလိဝါဒေန သမုဒါစရတီ’’တိ. သတ္ထာ တံ ပက္ကောသာပေတွာ ‘‘သစ္စံ ကိရ တွံ ပိလိန္ဒဝစ္ဆ ဘိက္ခူ ဝသလိဝါဒေန သမုဒါစရသီ’’တိ ပုစ္ဆိတွာ ‘‘ဧဝံ၊ ဘန္တေ’’တိ ဝုတ္တေ တဿာယသ္မတော ပုဗ္ဗေနိဝါသံ မနသိကရိတွာ ‘‘မာ ခေါ တုမှေ၊ ဘိက္ခဝေ၊ ဝစ္ဆဿ ဘိက္ခုနော ဥဇ္ဈာယိတ္ထ၊ န၊ ဘိက္ခဝေ၊ ဝစ္ဆော ဒေါသန္တရော ဘိက္ခူ ဝသလိဝါဒေန သမုဒါစရတိ၊ ဝစ္ဆဿ၊ ဘိက္ခဝေ၊ ဘိက္ခုနော ပဉ္စ ဇာတိသတာနိ အဗ္ဗောကိဏ္ဏာနိ သဗ္ဗာနိ တာနိ ဗြာဟ္မဏကုလေ ပစ္စာဇာတာနိ၊ သော တဿ ဒီဃရတ္တံ ဝသလိဝါဒေါ သမုဒါစိဏ္ဏော၊ ခီဏာသဝဿ နာမ ကက္ကသံ ဖရုသံ ပရေသံ မမ္မဃဋ္ဋနဝစနမေဝ နတ္ထိ. အာစိဏ္ဏဝသေန ဟိ မမ ပုတ္တော ဧဝံ ကထေတီ’’တိ ဝတွာ ဣမံ ဂါထမာဟ –

၄၀၈. ‘‘အကက္ကသံ ဝိညာပနိံ၊ ဂိရံ သစ္စမုဒီရယေ၊

ယာယ နာဘိသဇေ ကဉ္စိ၊ တမဟံ ဗြူမိ ဗြာဟ္မဏ’’န္တိ.

တတ္ထ အကက္ကသန္တိ အဖရုသံ. ဝိညာပနိန္တိ အတ္ထဝိညာပနိံ. သစ္စန္တိ ဘူတတ္ထံ. နာဘိသဇေတိ ယာယ ဂိရာယ အညံ ကုဇ္ဈာပနဝသေန န လဂ္ဂါပေယျ၊ ခီဏာသဝေါ နာမ ဧဝရူပမေဝ ဂိရံ ဘာသေယျ၊ တသ္မာ တမဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ပိလိန္ဒဝစ္ဆတ္ထေရဝတ္ထု ပဉ္စဝီသတိမံ.