၂၂. အညတရဘိက္ခုဝတ္ထု

နိဓာယ ဒဏ္ဍန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော အညတရံ ဘိက္ခုံ အာရဗ္ဘ ကထေသိ.

သော ကိရ သတ္ထု သန္တိကေ ကမ္မဋ္ဌာနံ ဂဟေတွာ အရညေ ဝါယမန္တော အရဟတ္တံ ပတွာ ‘‘ပဋိလဒ္ဓဂုဏံ သတ္ထု အာရောစေဿာမီ’’တိ တတော နိက္ခမိ. အထ နံ ဧကသ္မိံ ဂါမေ ဧကာ ဣတ္ထီ သာမိကေန သဒ္ဓိံ ကလဟံ ကတွာ တသ္မိံ ဗဟိ နိက္ခန္တေ ‘‘ကုလဃရံ ဂမိဿာမီ’’တိ မဂ္ဂံ ပဋိပန္နာ အန္တရာမဂ္ဂေ ဒိသွာ ‘‘ဣမံ ထေရံ နိဿာယ ဂမိဿာမီ’’တိ ပိဋ္ဌိတော ပိဋ္ဌိတော အနုဗန္ဓိ. ထေရော ပန တံ န ပဿတိ. အထဿာ သာမိကော ဂေဟံ အာဂတော တံ အဒိသွာ ‘‘ကုလဂါမံ ဂတာ ဘဝိဿတီ’’တိ အနုဗန္ဓန္တော တံ ဒိသွာ ‘‘န သက္ကာ ဣမာယ ဧကိကာယ ဣမံ အဋဝိံ ပဋိပဇ္ဇိတုံ၊ ကံ နု ခေါ နိဿာယ ဂစ္ဆတီ’’တိ ဩလောကေန္တော ထေရံ ဒိသွာ ‘‘အယံ ဣမံ ဂဏှိတွာ နိက္ခန္တော ဘဝိဿတီ’’တိ စိန္တေတွာ ထေရံ သန္တဇ္ဇေသိ. အထ နံ သာ ဣတ္ထီ ‘‘နေဝ မံ ဧသ ဘဒန္တော ပဿတိ၊ န အာလပတိ၊ မာ နံ ကိဉ္စိ အဝစာ’’တိ အာဟ. သော ‘‘ကိံ ပန တွံ အတ္တာနံ ဂဟေတွာ ဂစ္ဆန္တံ မမ အာစိက္ခိဿသိ၊ တုယှမေဝ အနုစ္ဆဝိကံ ဣမဿ ကရိဿာမီ’’တိ ဥပ္ပန္နကောဓော ဣတ္ထိယာ အာဃာတေန ထေရံ ပေါထေတွာ တံ အာဒါယ နိဝတ္တိ. ထေရဿ သကလသရီရံ သဉ္ဇာတဂဏ္ဍံ အဟောသိ. အထဿ ဝိဟာရံ ဂတကာလေ ဘိက္ခူ သရီရံ သမ္ဗာဟန္တာ ဂဏ္ဍေ ဒိသွာ ‘‘ကိံ ဣဒ’’န္တိ ပုစ္ဆိံသု. သော တေသံ တမတ္ထံ အာရောစေသိ. အထ နံ ဘိက္ခူ၊ ‘‘အာဝုသော၊ တသ္မိံ ပုရိသေ ဧဝံ ပဟရန္တေ တွံ ကိံ အဝစ၊ ကိံ ဝါ တေ ကောဓော ဥပ္ပန္နော’’တိ. ‘‘န မေ၊ အာဝုသော၊ ကောဓော ဥပ္ပဇ္ဇီ’’တိ ဝုတ္တေ သတ္ထု သန္တိကံ ဂန္တွာ တမတ္ထံ အာရောစေတွာ၊ ‘‘ဘန္တေ၊ ဧသ ဘိက္ခု ‘ကောဓော တေ ဥပ္ပဇ္ဇတီ’တိ ဝုစ္စမာနော ‘န မေ၊ အာဝုသော၊ ကောဓော ဥပ္ပဇ္ဇတီ’တိ အဘူတံ ဝတွာ အညံ ဗျာကရောတီ’’တိ အာရောစေသုံ. သတ္ထာ တေသံ ကထံ သုတွာ၊ ‘‘ဘိက္ခဝေ၊ ခီဏာသဝါ နာမ နိဟိတဒဏ္ဍာ၊ တေ ပဟရန္တေသုပိ ကောဓံ န ကရောန္တိယေဝါ’’တိ ဝတွာ ဣမံ ဂါထမာဟ –

၄၀၅. ‘‘နိဓာယ ဒဏ္ဍံ ဘူတေသု၊ တသေသု ထာဝရေသု စ၊

ယော န ဟန္တိ န ဃာတေတိ၊ တမဟံ ဗြူမိ ဗြာဟ္မဏ’’န္တိ.

တတ္ထ နိဓာယာတိ နိက္ခိပိတွာ ဩရောပေတွာ. တသေသု ထာဝရေသု စာတိ တဏှာတာသေန တသေသု၊ တဏှာအဘာဝေန ထိရတာယ ထာဝရေသု စ. ယော န ဟန္တီတိ ယော ဧဝံ သဗ္ဗသတ္တေသု ဝိဂတပဋိဃတာယ နိက္ခိတ္တဒဏ္ဍော နေဝ ကဉ္စိ သယံ ဟနတိ၊ န အညေ ဃာတေတိ၊ တမဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

အညတရဘိက္ခုဝတ္ထု ဗာဝီသတိမံ.