၂၀. ခေမာဘိက္ခုနီဝတ္ထု

ဂမ္ဘီရပညန္တိ ဣမံ ဓမ္မဒေသနံ သတ္ထာ ဂိဇ္ဈကူဋေ ဝိဟရန္တော ခေမံ နာမ ဘိက္ခုနိံ အာရဗ္ဘ ကထေသိ.

ဧကဒိဝသဉှိ ပဌမယာမသမနန္တရေ သက္ကော ဒေဝရာဇာ ပရိသာယ သဒ္ဓိံ အာဂန္တွာ သတ္ထု သန္တိကေ သာရဏီယဓမ္မကထံ သုဏန္တော နိသီဒိ. တသ္မိံ ခဏေ ခေမာ ဘိက္ခုနီ ‘‘သတ္ထာရံ ပဿိဿာမီ’’တိ အာဂန္တွာ သက္ကံ ဒိသွာ အာကာသေ ဌိတာဝ သတ္ထာရံ ဝန္ဒိတွာ နိဝတ္တိ. သက္ကော တံ ဒိသွာ ‘‘ကော ဧသာ၊ ဘန္တေ၊ အာဂစ္ဆမာနာ အာကာသေ ဌိတာဝ သတ္ထာရံ ဝန္ဒိတွာ နိဝတ္တီ’’တိ ပုစ္ဆိ. သတ္ထာ ‘‘ဧသာ၊ မဟာရာဇ၊ မမ ဓီတာ ခေမာ နာမ မဟာပညာ မဂ္ဂါမဂ္ဂကောဝိဒါ’’တိ ဝတွာ ဣမံ ဂါထမာဟ –

၄၀၃. ‘‘ဂမ္ဘီရပညံ မေဓာဝိံ၊ မဂ္ဂါမဂ္ဂဿ ကောဝိဒံ၊

ဥတ္တမတ္ထမနုပ္ပတ္တံ၊ တမဟံ ဗြူမိ ဗြာဟ္မဏ’’န္တိ.

တတ္ထ ဂဗ္ဘီရပညန္တိ ဂမ္ဘီရေသု ခန္ဓာဒီသု ပဝတ္တာယ ပညာယ သမန္နာဂတံ ဓမ္မောဇပညာယ သမန္နာဂတံ မေဓာဝိံ ‘‘အယံ ဒုဂ္ဂတိယာ မဂ္ဂေါ၊ အယံ သုဂတိယာ မဂ္ဂေါ၊ အယံ နိဗ္ဗာနဿ မဂ္ဂေါ၊ အယံ အမဂ္ဂေါ’’တိ ဧဝံ မဂ္ဂေ စ အမဂ္ဂေ စ ဆေကတာယ မဂ္ဂါမဂ္ဂဿ ကောဝိဒံ အရဟတ္တသင်္ခါတံ ဥတ္တမတ္ထံ အနုပ္ပတ္တံ တမဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ခေမာဘိက္ခုနိဝတ္ထု ဝီသတိမံ.