၉. သန္တကာယတ္ထေရဝတ္ထု

သန္တကာယောတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော သန္တကာယတ္ထေရံ နာမ အာရဗ္ဘ ကထေသိ.

တဿ ကိရ ဟတ္ထပါဒကုက္ကုစ္စံ နာမ နာဟောသိ၊ ကာယဝိဇမ္ဘနရဟိတော သန္တအတ္တဘာဝေါဝ အဟောသိ. သော ကိရ သီဟယောနိတော အာဂတော ထေရော. သီဟာ ကိရ ဧကဒိဝသံ ဂေါစရံ ဂဟေတွာ ရဇတသုဝဏ္ဏမဏိပဝါဠဂုဟာနံ အညတရံ ပဝိသိတွာ မနောသိလာတလေ ဟရိတာလစုဏ္ဏေသု သတ္တာဟံ နိပဇ္ဇိတွာ သတ္တမေ ဒိဝသေ ဥဋ္ဌာယ နိပန္နဋ္ဌာနံ ဩလောကေတွာ သစေ နင်္ဂုဋ္ဌဿ ဝါ ကဏ္ဏာနံ ဝါ ဟတ္ထပါဒါနံ ဝါ စလိတတ္တာ မနောသိလာဟရိတာလစုဏ္ဏာနံ ဝိပ္ပကိဏ္ဏတံ ပဿန္တိ၊ ‘‘န တေ ဣဒံ ဇာတိယာ ဝါ ဂေါတ္တဿ ဝါ ပတိရူပ’’န္တိ ပုန သတ္တာဟံ နိရာဟာရာ နိပဇ္ဇန္တိ၊ စုဏ္ဏာနံ ပန ဝိပ္ပကိဏ္ဏဘာဝေ အသတိ ‘‘ဣဒံ တေ ဇာတိဂေါတ္တာနံ အနုစ္ဆဝိက’’န္တိ အာသယာ နိက္ခမိတွာ ဝိဇမ္ဘိတွာ ဒိသာ အနုဝိလောကေတွာ တိက္ခတ္တုံ သီဟနာဒံ နဒိတွာ ဂေါစရာယ ပက္ကမန္တိ. ဧဝရူပါယ သီဟယောနိယာ အာဂတော အယံ ဘိက္ခု. တဿ ကာယသမာစာရံ ဒိသွာ ဘိက္ခူ သတ္ထု အာရောစေသုံ – ‘‘န နော၊ ဘန္တေ၊ သန္တကာယတ္ထေရသဒိသော ဘိက္ခု ဒိဋ္ဌပုဗ္ဗော. ဣမဿ ဟိ နိသိန္နဋ္ဌာနေ ဟတ္ထစလနံ ဝါ ပါဒစလနံ ဝါ ကာယဝိဇမ္ဘိတာ ဝါ နတ္ထီ’’တိ. တံ သုတွာ သတ္ထာ၊ ‘‘ဘိက္ခဝေ၊ ဘိက္ခုနာ နာမ သန္တကာယတ္ထေရေန ဝိယ ကာယာဒီဟိ ဥပသန္တေနေဝ ဘဝိတဗ္ဗ’’န္တိ ဝတွာ ဣမံ ဂါထမာဟ –

၃၇၈. ‘‘သန္တကာယော သန္တဝါစော၊ သန္တဝါ သုသမာဟိတော၊

ဝန္တလောကာမိသော ဘိက္ခု၊ ဥပသန္တောတိ ဝုစ္စတီ’’တိ.

တတ္ထ သန္တကာယောတိ ပါဏာတိပါတာဒီနံ အဘာဝေန သန္တကာယော၊ မုသာဝါဒါဒီနံ အဘာဝေန သန္တဝါစော၊ အဘိဇ္ဈာဒီနံ အဘာဝေန သန္တဝါ၊ ကာယာဒီနံ တိဏ္ဏမ္ပိ သုဋ္ဌု သမာဟိတတ္တာ သုသမာဟိတော၊ စတူဟိ မဂ္ဂေဟိ လောကာမိသဿ ဝန္တတာယ ဝန္တလောကာမိသော ဘိက္ခု အဗ္ဘန္တရေ ရာဂါဒီနံ ဥပသန္တတာယ ဥပသန္တောတိ ဝုစ္စတီတိ အတ္ထော.

ဒေသနာဝသာနေ သော ထေရော အရဟတ္တေ ပတိဋ္ဌဟိ၊ သမ္ပတ္တာနမ္ပိ သာတ္ထိကာ ဓမ္မဒေသနာ အဟောသီတိ.

သန္တကာယတ္ထေရဝတ္ထု နဝမံ.