၅. ဝိပက္ခသေဝကဘိက္ခုဝတ္ထု

သလာဘန္တိ ဣမံ ဓမ္မဒေသနံ သတ္ထာ ဝေဠုဝနေ ဝိဟရန္တော အညတရံ ဝိပက္ခသေဝကံ ဘိက္ခုံ အာရဗ္ဘ ကထေသိ.

တဿ ကိရေကော ဒေဝဒတ္တပက္ခိကော ဘိက္ခု သဟာယော အဟောသိ. သော တံ ဘိက္ခူဟိ သဒ္ဓိံ ပိဏ္ဍာယ စရိတွာ ကတဘတ္တကိစ္စံ အာဂစ္ဆန္တံ ဒိသွာ ‘‘ကုဟိံ ဂတောသီ’’တိ ပုစ္ဆိ. ‘‘အသုကဋ္ဌာနံ နာမ ပိဏ္ဍာယ စရိတု’’န္တိ. ‘‘လဒ္ဓေါ တေ ပိဏ္ဍပါတော’’တိ? ‘‘အာမ၊ လဒ္ဓေါ’’တိ. ‘‘ဣဓ အမှာကံ မဟာလာဘသက္ကာရော၊ ကတိပါဟံ ဣဓေဝ ဟောဟီ’’တိ. သော တဿ ဝစနေန ကတိပါဟံ တတ္ထ ဝသိတွာ သကဋ္ဌာနမေဝ အဂမာသိ. အထ နံ ဘိက္ခူ ‘‘အယံ၊ ဘန္တေ၊ ဒေဝဒတ္တဿ ဥပ္ပန္နလာဘသက္ကာရံ ပရိဘုဉ္ဇတိ၊ ဒေဝဒတ္တဿ ပက္ခိကော ဧသော’’တိ တထာဂတဿ အာရောစေသုံ. သတ္ထာ တံ ပက္ကောသာပေတွာ ‘‘သစ္စံ ကိရ တွံ ဧဝမကာသီ’’တိ ပုစ္ဆိ. ‘‘အာမ၊ ဘန္တေ၊ အဟံ တတ္ထ ဧကံ ဒဟရံ နိဿာယ ကတိပါဟံ ဝသိံ၊ န စ ပန ဒေဝဒတ္တဿ လဒ္ဓိံ ရောစေမီ’’တိ. အထ နံ ဘဂဝါ ‘‘ကိဉ္စာပိ တွံ လဒ္ဓိံ န ရောစေသိ၊ ဒိဋ္ဌဒိဋ္ဌကာနံယေဝ ပန လဒ္ဓိံ ရောစေန္တော ဝိယ ဝိစရသိ. န တွံ ဣဒါနေဝ ဧဝံ ကရောသိ၊ ပုဗ္ဗေပိ ဧဝရူပေါယေဝါ’’တိ ဝတွာ ‘‘ဣဒါနိ တာဝ၊ ဘန္တေ၊ အမှေဟိ သာမံ ဒိဋ္ဌော၊ ပုဗ္ဗေ ပနေသ ကေသံ လဒ္ဓိံ ရောစေန္တော ဝိယ ဝိစရိ၊ အာစိက္ခထ နော’’တိ ဘိက္ခူဟိ ယာစိတော အတီတံ အာဟရိတွာ –

‘‘ပုရာဏစောရာန ဝစော နိသမ္မ၊

မဟိဠာမုခေါ ပေါထယမနွစာရီ၊

သုသညတာနဉှိ ဝစော နိသမ္မ၊

ဂဇုတ္တမော သဗ္ဗဂုဏေသု အဋ္ဌာ’’တိ. (ဇာ. ၁.၁.၂၆) –

ဣမံ မဟိဠာမုခဇာတကံ ဝိတ္ထာရေတွာ၊ ‘‘ဘိက္ခဝေ၊ ဘိက္ခုနာ နာမ သကလာဘေနေဝ သန္တုဋ္ဌေန ဘဝိတဗ္ဗံ၊ ပရလာဘံ ပတ္ထေတုံ န ဝဋ္ဋတိ. ပရလာဘံ ပတ္ထေန္တဿ ဟိ ဈာနဝိပဿနာမဂ္ဂဖလေသု ဧကဓမ္မောပိ နုပ္ပဇ္ဇတိ၊ သကလာဘသန္တုဋ္ဌဿေဝ ပန ဈာနာဒီနိ ဥပ္ပဇ္ဇန္တီ’’တိ ဝတွာ ဓမ္မံ ဒေသေန္တော ဣမာ ဂါထာ အဘာသိ –

၃၆၅. ‘‘သလာဘံ နာတိမညေယျ၊ နာညေသံ ပိဟယံ စရေ၊

အညေသံ ပိဟယံ ဘိက္ခု၊ သမာဓိံ နာဓိဂစ္ဆတိ.

၃၆၆. ‘‘အပ္ပလာဘောပိ စေ ဘိက္ခု၊ သလာဘံ နာတိမညတိ၊

တံ ဝေ ဒေဝါ ပသံသန္တိ၊ သုဒ္ဓါဇီဝိံ အတန္ဒိတ’’န္တိ.

တတ္ထ သလာဘန္တိ အတ္တနော ဥပ္ပဇ္ဇနကလာဘံ. သပဒါနစာရဉှိ ပရိဝဇ္ဇေတွာ အနေသနာယ ဇီဝိကံ ကပ္ပေန္တော သလာဘံ အတိမညတိ ဟီဠေတိ ဇိဂုစ္ဆတိ နာမ. တသ္မာ ဧဝံ အကရဏေန သလာဘံ နာတိမညေယျ. အညေသံ ပိဟယန္တိ အညေသံ လာဘံ ပတ္ထေန္တော န စရေယျာတိ အတ္ထော. သမာဓိံ နာဓိဂစ္ဆတီတိ အညေသဉှိ လာဘံ ပိဟယန္တော တေသံ စီဝရာဒိကရဏေ ဥဿုက္ကံ အာပန္နော ဘိက္ခု အပ္ပနာသမာဓိံ ဝါ ဥပစာရသမာဓိံ ဝါ နာဓိဂစ္ဆတိ. သလာဘံ နာတိမညတီတိ အပ္ပလာဘောပိ သမာနော ဥစ္စနီစကုလေ ပဋိပါဋိယာ သပဒါနံ စရန္တော ဘိက္ခု သလာဘံ နာတိမညတိ နာမ. တံ ဝေတိ တံ ဧဝရူပံ ဘိက္ခုံ သာရဇီဝိတတာယ သုဒ္ဓါဇီဝိံ ဇင်္ဃဗလံ နိဿာယ ဇီဝိတကပ္ပနေန အကုသီတတာယ အတန္ဒိတံ ဒေဝါ ပသံသန္တိ ထောမေန္တီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဝိပက္ခသေဝကဘိက္ခုဝတ္ထု ပဉ္စမံ.